1. Ahabw’enki tushemereire kusiima Yehova?

TWINE kusiima Yehova ahabw’okugira ngu niwe arikutuha “engabirano yoona enungi n’ekiconco kyona ekihikire.” (Yak. 1:17) N’omuriisa waitu oine rukundo kandi naatureeberera omu by’omwoyo n’omu by’omubiri. (Zab. 23:1-3) Ayorekire ngu “niwe buhungiro bwaitu, kandi amaani gaitu” okukira munonga omu bwire bw’oburemeezi. (Zab. 46:1) Buzima hariho bingi ebirikutureetera kwikirizana n’omuhandiiki wa Zaaburi owahandiikire ati: “Musiime MUKAMA, ahabw’okuba ni murungi; kandi embabazi ze n’ez’ebiro n’ebiro.”—Zab. 106:1.

2, 3. (a) Ni kabi ki akari omu kuba entasiima? (b) Omu kicweka eki nituza kushwijuma bibuuzo ki?

² Ahabw’enki ni kikuru kushwijuma enshonga egi ey’okusiima? Abantu omu biro ebi eby’emperu beeyongyeire kuba entasiima. (2 Tim. 3:2) Baingi tibarikusiima ebintu birungi ebi Yehova abakoreire. Ahabw’okutuura omu nsi erikwebembeza okugira ebintu bingi, abantu nyamwingi nibateeraho kutunga ebintu bingi omu mwanya gw’okumarwa n’ebi baine. Naitwe twaba tutegyendesereize nitubaasa  kuba entasiima. Nk’Abaisraeli, nitubaasa kutasiima ebirungi ebi Yehova arikutuha n’omukago gwaitu nawe.—Zab. 106:7, 11-13.

³ Teekateeka n’aha kirikubaasa kubaho twatunga oburemeezi bw’amaani. Omu bwire obwo, nitubaasa kuhwa amaani kandi tubure kwijuka emigisha mingi ei twine. (Zab. 116:3) Mbwenu nitubaasa kworeka tuta ngu nitusiima emigisha ei twine? Niki ekiraatuhwere kuguma twine emiteekateekyere mirungi n’obu twakuba twine oburemeezi bw’amaani?

4. Niki ekirikubaasa kutuhwera kuguma twine omutima gw’okusiima?

⁴ Twaba nitwenda kuguma twine omutima gw’okusiima, twine kumanya emigisha mingi ei Yehova arikutuha kandi tukateekateeka munonga aha bikorwa bye ebya rukundo. Omuhandiiki wa zaaburi ku yaakozire atyo, akatangaazibwa ebintu birungi bingi ebi Yehova yaakozire.—Shoma Zaaburi 40:5; 107:43.

5. Nitubaasa kwega ki ahari Paulo aha bikwatiraine n’okusiima?

⁵ Nitubaasa kwega bingi aha ntumwa Paulo aha bikwatiraine n’okusiima. Akaba ateekateeka munonga aha migisha ei yaabaire aine, kandi akaba ayoreka ngu naagisiima. Paulo akaba naamanya ngu akaba yaabaireho ‘omurogotsi, omujumi, kandi omuntu enshaarizi.’ Akooreka okusiima ahabw’okugira ngu n’obu araabe yaabaire akozire enshobe, Ruhanga na Kristo bakamugirira embabazi kandi baamuha omurimo gw’okubuurira. (Shoma 1 Timoseo 1:12-14.) Kandi Paulo akasiima Abakristaayo bagyenzi be. Butoosha akaba abasiimira Yehova ahabw’okugira emitwarize mirungi n’okuba abeesigwa. (Fil. 1:3-5, 7; 1 Tes. 1:2, 3) Paulo ku yaabaire ahikwaho oburemeezi bw’amaani, akaba arahuka kwebaza Yehova ahabw’obuhwezi obu yaabaire atunga kuruga aha b’eishe-emwe bagyenzi be. (Byak. 28:15; 2 Kor. 7:5-7) N’ahabw’ekyo tikirikutangaaza kureeba ngu Paulo akahiga Abakristaayo ati: “Mube abarikusiima . . . , muhanane omu bwengye burungi bwona nimweshongorera Ruhanga zaaburi n’ebyeshongoro n’ebyevugo by’Omwoyo, nimumuhimbisa omu mitima yaanyu.”—Kol. 3:15-17.

6. Niki ekirikukureetera kusiima Yehova?

⁶ Nitubaasa kutooreza Paulo tuta tukaguma twine omutima gw’okusiima? Nka Paulo, buri omwe oine kuteekateeka munonga aha bi Yehova amukoreire. (Zab. 116:12) Ku baakukubuuza ngu ‘ni birungi ki ebi Yehova akuhaire ebirikukureetera kumusiima,’ okaagarukamu ki? Okaagira ngu n’omukago gwawe na Yehova? Nari n’okusaasirwa ahabw’okwikiririza omu kitambo kya Kristo? Mbwenu shi okaagamba amaziina g’ab’eishe-emwe abaakuhwereire obu waabaire oine oburemeezi? Buzima torikubaasa kwebwa kugamba omukazi waawe nari omushaija waawe n’abaana baawe. Okugira obwire tukateekateeka aha migisha ya Yehova, Tataitwe oine rukundo, nikiija kutureetera kushemererwa omu mutima n’okumusiima butoosha.—Shoma Zaaburi 92:1, 2.

7. (a) Ahabw’enki twine kusiima omu kushaba? (b) Nitugasirwa tuta twasiima omu kushaba?

⁷ Twateekateeka munonga aha migisha ei twine, nikiija kutureetera kushaba n’okusiima Yehova. (Zab. 95:2; 100:4, 5) Abantu baingi nibashaba baaba baine eki barikwenda ahari Yehova. Kwonka itwe, nitumanya ngu Yehova naashemererwa twamusiima  ahabw’ebi twine. Baibuli erimu okushaba kwingi okw’abo abayoorekire okusiima, otwariiremu okwa Hanna na Hezekia. (1 Sam. 2:1-10; Isa. 38:9-20) N’ahabw’ekyo nitubaasa kutooreza abaheereza ba Yehova abeesigwa abaabaire baine omutima gw’okusiima. Buzima, oine kusiima Yehova omu kushaba ahabw’emigisha ei akuhaire. (1 Tes. 5:17, 18) Waakora otyo noija kutunga emigisha mingi. Nikiija kukuhwera kutunguuka omu by’omwoyo, kweyongyera kukunda Yehova, kandi oyeyongyere kumwirira haihi.—Yak. 4:8.

8. Niki ekirikubaasa kuturemesa kusiima Yehova ahabw’ebintu byona ebi atukoreire?

⁸ Ahabw’enki twine kuguma nitwijuka akabi akarikuruga omu kutasiima ebirungi ebi Yehova atuhaire? Ahabw’okuba tukahungura omuze gw’okutasiima. Teekateeka aha bazaire baitu ab’okubanza, Adamu na Haawa, abu Ruhanga yaataire omu musiri Edeni. Yehova akaba abahaire buri kimwe kyona eki baabaire nibeetenga, kandi bakaba nibaija kugumaho ebiro byona baine obusingye. (Kut. 1:28) Kwonka tibarasiimire ebirungi ebi baabaire baine. Bakeetenga ebirikukira aha bi baabaire baine. Ekyarugiremu, bakafeerwa byona ebi baabaire baine. (Kut. 3:6, 7, 17-19) Obu turi omu nsi erimu abantu abatarikusiima, naitwe nitubaasa kuteetegyereza ebirungi ebi Yehova atukoreire. Nitubaasa kutwara omukago gwaitu nawe nk’ogutaine mugasho. Nitubaasa kuremwa kusiima omugisha gwaitu gw’okuba bamwe aha Bakristaayo ab’amazima. Obumwe nitubaasa kumara obwire byaitu omu bintu by’ensi egi eri haihi kuhwaho. (1 Yoh. 2:15-17) Kubaasa kwetantara ekyo, twine kuteekateeka munonga aha birungi ebi Yehova arikutuha kandi tukasiima omugisha gw’okuba abaheereza be.—Shoma Zaaburi 27:4.

9. Twaba twine oburemeezi ahabw’enki twine kuteekateeka aha birungi ebi Yehova atukoreire?

⁹ Twaba twine omutima ogurikusiima, nikiija kutuhwera kugumisiriza oburemeezi. Obumwe nitubaasa kuhwamu amaani twahikwaho oburemeezi, nk’ou turi nawe omu bushwere yaashambana, yaatunga endwara y’amaani, yaafa, nari twahikwaho ebihikiirizi. Omu bwire nk’obwo, nitubaasa kugumibwa twateekateeka aha birungi ebi Yehova atukoreire. Ka tureebe ebyahikire ahari bamwe.

10. Irina akagasirwa ata ahabw’okuteekateeka aha birungi ebi aine?

 ¹⁰ Irina *, payoniya ow’obutwire omuri North America, akaba ashwairwe omureeberezi owaaremirwe kuguma ari omwesigwa kandi akamutsigaho n’abaana be. Niki ekyahwereire Irina kugumizamu naaheereza Yehova n’obwesigwa? Naagira ati: “Ninsiima Yehova ahabw’okunfaho. Ku ndikuteekateeka aha birungi ebi ndikutunga buri izooba, nindeeba guri omugisha gw’amaani okumanywa n’okukundwa Tataitwe ow’omu iguru. Nimmanya ngu tarintsigaho.” N’obu Irina araabe yaatungire oburemeezi bwingi, aine okushemererwa kwingi kandi hati naagaruramu abandi amaani.

11. Niki ekyahwereire Kyung-sook kugumisiriza endwara y’amaani?

¹¹ Kyung-sook, orikutuura omuri Asia, we n’omushaija we bakaheereza nka baapayoniya kumara emyaka erikurenga 20. Bwanyima, Kyung-sook akakwatwa endwara y’ekokoro kandi yaagambirwa ngu akaba asigaize ameezi ashatu nari mukaaga akafa. N’obu we n’omushaija we baatungire oburemeezi bwingi, bakaguma baine obumanzi. Akagira ati: “Endwara ekammaramu amaani. Nkateekateeka ngu naafeerwa buri kimwe, ekyo kyandeetera kutiina.” Niki ekyahwereire Kyung-sook kugumisiriza? Naagira ti: “Buri kiro ntakagiire kubyama, omu kushaba nkaba mbanza naagamba ebintu bitaano ndikworeka okusiima ahabw’eizooba eryo. Ekyo kikaba kimpa amatsiko, kandi kindeetera kworeka rukundo yangye ahari Yehova.” Kyung-sook okushaba buri kiro kukamuhwera kuta? Naagira ati: “Nyetegyereize ngu Yehova naatugumya twaba turi omu buremeezi kandi ngu twine emigisha mingi kukira oburemeezi obu twine.”

12. Jason akahumurizibwa ata obu yaafeerwa omukazi we?

¹² Jason, orikuheereza aha ofiisi y’eitaagi ery’Abajurizi ba Yehova omuri Africa, atwire omu buheereza by’obutwire kumara emyaka erikurenga omuri 30. Naashoboorora ati: “Nkafeerwa omukazi wangye emyaka mushanju ehingwire, kandi nyine obusaasi bw’amaani. Okuguma ninteekateeka aha byamuhikireho obu yaabaire aine endwara y’ekokoro nikindeetera enaku y’amaani.” Niki ekyahwereire Jason kugumisiriza? Naagira ati: “Obumwe nkaba nteekateeka aha bwire burungi obu naabaire nyine n’omukazi wangye, kandi nsiima Yehova omu kushaba ahabw’obwire obwo. Eki kikaba kingaruramu amaani kandi nsiima Yehova ahabw’ebiteekateeko birungi ebyo. Eki kindetaire empinduka y’amaani ahabw’okugira omutima gw’okusiima. Na hati ninkwatwaho ahabw’okufeerwa omukundwa, kwonka okusiima Yehova ahabw’okumpa obushwere burungi n’okumuheereza n’omuntu owaabaire arikumukunda nikingaruramu amaani.”

13. Niki ekyahwereire Sheryl kugumisiriza obu yaafeerwa bamwe omu ka yaabo?

¹³ Obu ihunga Super Typhoon Haiyan ry’ateera omuri Philippines omu 2013, Sheryl, owaabaire aine emyaka 13, akafeerwa haihi buri kimwe eki yaabaire aine. Akagira ati: “Enju yaitu ekacwekyerera, kandi na baingi omu ka yaitu bakafa.” Ishe, nyina, na beene-nyina bashatu bakafeera omu ihunga eryo. Niki ekyahwereire Sheryl kugumisiriza oburemeezi obu kandi akaguma aikaikaine? Akaguma aine omutima gw’okusiima kandi tarikwebwa emigisha ei aine. “Nkareeba ebi ab’eishe-emwe n’abanyaanyazi-itwe baakozire kuhwera abo abaabaire nibenda obuhwezi. Nkaba nimmanya ngu ab’eishe-emwe omu  nsi yoona nibanshabira.” Naayongyera agira ati: “Ninshemererwa munonga ahabw’okugira ngu Yehova ni Ruhanga wangye. Butoosha naatuha ebi turikwetenga.” Buzima, okuguma nitwijuka emigisha ei twine, n’omubazi gw’amaani ogurituhwera kugumisiriza oburemeezi. Okusiima nikituhwera kutahwamu maani n’obu twakuba twine oburemeezi bw’amaani.—Efe. 5:20; shoma Abafilipi 4:6, 7.

14. Twine matsiko ki agarikushemeza? (Reeba ekishushani aha kutandika.)

¹⁴ Kuruga ira abaheereza ba Yehova batwire baine okushemererwa ahabw’emigisha ei baine. Nk’eky’okureeberaho, obu Abaisraeli baacungurwa kutaitwa Faraho n’eihe rye aha Nyanja Erikutukura, bakooreka okushemererwa kwabo barikweshongora ebyeshongoro by’okuhimbisa n’okusiima. (Kur. 15:1-21) Obunaku obu, gumwe aha migisha ei twine n’amatsiko g’okucungurwa ahabw’ebintu byona ebirikutureetera kubonabona n’okugira obusaasi. (Zab. 37:9-11; Isa. 25:8; 33:24) Teekateeka ha ku turikwija kuhurira, Yehova ku araacwekyereze abazigu be, kandi tukaza omu nsi ensya erimu obusingye n’okuhikiirira. Ka nitwija kushemererwa munonga!—Kush. 20:1-3; 21:3, 4.

15. Tushemereire kumariirira kukora ki omu 2015?

¹⁵ Omu 2015 twine ekihika ky’okutunga emigisha mingi kuruga ahari Yehova. Kwonka nabwo, nitubaasa kuhikwaho oburemeezi. Kyona ekiraabeho, nitumanya ngu Yehova tarikubaasa kututsigaho. (Bir. 31:8; Zab. 9:9, 10) Naagumizamu kutuha byona ebirikwetengyesa kubaasa kumuheereza omu bwesigwa. N’ahabw’ekyo, ka tumariirire kuguma twine emiteekateekyere nk’eya nabi Habakuuki, owaagizire ati: “N’obu emitiini eraabe etarikurabya, emizaabibu etaine bijuma, emizeituuni ebuzire amajuta, emisiri etarikwera by’okurya, obusyo bw’entaama buhweire omu kibuga, n’obw’ente buhweire omuka, kwonka ndyashemerererwa MUKAMA, nyesiimire omuri Ruhanga ow’okujunwa kwangye.” (Hab. 3:17, 18) Buzima, omu mwaka ogu gwona, ka tuteereho kuteekateeka aha migisha ei twine, kandi tukuratire okwehanangiriza kw’ekyahandiikirwe ky’omwaka 2015 eki: ‘Musiime Yehova, ahabw’okuba ni murungi.’—Zab. 106:1.