Okwetegyereza eki “Babulooni Orurembo Orukuru” Kiri

EKITABO kya Okushuuruurwa kirimu ebigambo ebitashemereire kwetegyerezibwa nk’oku bihandiikirwe. (Okushuuruurwa 1:1) Nk’eky’okureeberaho, nikigamba aha mukazi oine eiziina “Babulooni orurembo Orukuru” erihandiikirwe aha buso bwe. Omukazi ogu naagambwa kuba ashutami aha mitwe ‘y’abantu nyamwingi hamwe n’amahanga.’ (Okushuuruurwa 17:1, 5, 15) Obu hatariho mukazi orikubaasa kukora eki, Babulooni orurembo Orukuru rwine kuba ruri akamanyiso. Mbwenu shi obwo, maraaya ogu ow’akamanyiso naajwekyera ki?

Omu kitabo kya Okushuuruurwa 17:18, omukazi ogwo ow’akamanyiso naashobororwaho ‘nk’orurembo orukuru orurikutegyeka  abagabe b’ensi.’ Ekigambo “orurembo” nikyoreka ngu n’ekigombe ky’abantu abeteeraine. Obu “orurembo orukuru” oru rurikutegyeka “abagabe b’ensi,” omukazi orikwetwa Babulooni orurembo Orukuru aine kuba ari ekibiina ekirikutegyeka abantu baingi omu nsi. Babulooni orurembo Orukuru ruhikire kwetwa ekibiina ekirikutegyeka ensi yoona. Ni kibiina kya muringo ki? N’ekibiina ky’ediini. Yetegyereze oku ebicweka bimwe omu kitabo kya Okushuuruurwa birikutuhitsya aha kumanya ngu orurembo oru n’ekibiina ky’ediini.

Ekibiina nikibaasa kuba eky’obutegyeki, eky’obushuubuzi, nari eky’ediini. Omukazi orikwetwa Babulooni orurembo Orukuru ti kibiina ky’eby’obutegyeki ahabw’okuba Ekigambo kya Ruhanga nikigira ngu “abagabe b’ensi,” nari shi ab’eby’obutegyeki bw’ensi egi, ‘bakashambana’ nawe. Obushambani bwe nibumanyisa enkoragana ei aine n’abagabe b’ensi egi kandi nikishoborora ahabw’enki naayetwa “maraaya omukuru.”—Okushuuruura 17:1, 2; Yakobo 4:4.

Babulooni orurembo Orukuru tirurikubaasa kuba ruri ekibiina ky’eby’obushuubuzi ahabw’okuba “abashuubuzi b’ensi,” nibaija kurucurira baruborogyere omu bwire bw’okucwekyerezibwa kwarwo. Abagabe hamwe n’abashuubuzi nibashobororwaho bemereire “hangahari” ahabw’okutiina okubonabonesibwa kwa Babulooni orurembo Orukuru. (Okushuuruurwa 18:3, 9, 10, 15-17) N’ahabw’ekyo, kihikire okugira ngu Babulooni orurembo Orukuru ti kibiina ky’eby’obutegyeki nari ky’eby’obushuubuzi, kureka ekibiina ky’ediini.

Ekirikworeka ngu Babulooni orurembo Orukuru n’ekibiina ky’ediini kandi nikihamibwa ebigambo ebirikugira ngu naahabisa amahanga goona arikwejunisa ‘oburogo bwe.’ (Okushuuruurwa 18:23) Obu emiringo yoona ey’oburogo erikukomooka omuri baadaimoni, tikirikutangaaza okureeba Baibuli neeyeta Babulooni orurembo Orukuru “obutuuro bwa baadaimoni.” (Okushuuruurwa 18:2; Eky’Ebiragiro 18:10-12) Ekibiina eki nikishobororwaho kuba nk’ekirikuhakanisiza kimwe ediini ey’amazima, kandi ekirikuhiiganisa “abarangi” hamwe ‘n’abarikwera.’ (Okushuuruurwa 18:24) Buzima, Babulooni orurembo Orukuru rwiniire ediini ey’amazima rwango mpango kuhika n’aha kugihiiganisiza kimwe nangwa n’okwita ‘abarikuha obujurizi ahari Yesu.’ (Okushuuruurwa 17:6) N’ahabw’ekyo, omukazi ogu orikwetwa Babulooni orurembo Orukuru buzima n’akamanyiso k’ekibiina ky’ediini z’ebishuba, ekirimu ediini zoona ezirikuhakanisa Yehova Ruhanga.