Oku Oburangi bwa Danieli Burikuragura aha Kwija kwa Mesia
Oku Oburangi bwa Danieli Burikuragura aha Kwija kwa Mesia
OMURANGI Danieli akaba ariho emyaka erikurenga ahari 500 Yesu atakazairwe. Kwonka nabwe, Yehova akamanyisa Danieli ebyabaire nibiija kubaasisa abantu okumanya obwire bwenyine obu Yesu yaabaire naaza kushukwaho amajuta kuba Mesia nari shi Kristo. Danieli akagambirwa ati: “Omanye kandi oyetegyereze, ngu okwiha aha kiragiro ky’okuhunduura n’okwombeka Yerusaalemu okuhitsya aha kwija kw’omunyiginya owaashukirweho amajuta, haryabaho saabiiti mushanju. Bwanyima omu saabiiti makumi mukaaga na ibiri egarukye eyombekwe.”—Danieli 9:25.
Okubaasa kumanya obwire obu Mesia yaabaire naaza kwiziramu, nitwetenga kubanza twamanya ah’okutandikira kubara obwire oburikutuhitsya aha kureebeka kwa Mesia. Okurugiirira aha burangi, ‘n’okwiha aha kiragiro ky’okuhunduura n’okwombeka Yerusaalemu.’ “Ekiragiro” eki kikaheebwa ryari? Okurugiirira ahari Nehemia omuhandiiki wa Baibuli, ekiragiro ky’okwombeka ebisiika by’engo za Yerusaalemu kikaheebwa “omu mwaka gwa makumi abiri ogw’omu busingye bwa Arutagizakiseesi.” (Nehemia 2:1, 5-8) Ab’ebyafaayo nibahamya ngu omwaka 474 B.C.E. nigwo gwabaire guri omwaka gw’okubanza ogwijwire ogw’obutegyeki bwa Arutagizakiseesi. N’ahabw’ekyo, omwaka gwa 20 ogw’obutegyeki bwe gukaba guri 455 B.C.E. Hati twine ahu oburangi bwa Danieli burikutandikira, nigwo mwaka 455 B.C.E.
Danieli naayoreka obwire obwabaire nibuza kuhinguraho “Mesia Omutegyeki” abone kureebeka. Oburangi nibugamba ahari “saabiiti mushanju,” hamwe na “saabiiti makumi mukaaga na ibiri”—zoona hamwe ezirikuhika saabiiti 69. Obwire obu nibwingana ki? Zaabaibuli ezindi nizooreka ngu ezi ti saabiiti z’ebiro mushanju, ngu kureka ni saabiiti z’emyaka. Eki nikimanyisa ngu buri saabiiti neyingana emyaka mushanju. Embara egi eya saabiiti z’emyaka nari ey’okubarira omu myaka mushanju ekaba neemanywa munonga omu Bayudaaya aba ira. Nk’eky’okureeberaho, bakaba bakuza Omwaka gwa Sabato buri mwaka gwa mushanju. (Okuruga 23:10, 11) N’ahabw’ekyo, saabiiti 69 ez’omu burangi buri emwe neyingana emyaka mushanju, kandi zoona hamwe nizingana emyaka 483.
Hati eki tushemereire kukora n’okubara. Twabara emyaka 483 kuruga omu gwa 455 B.C.E., nituhika aha mwaka gwa 29 C.E. Ogwo nigwo mwaka gwenyine ogu Yesu yaabatiriziibwemu atyo akahinduka Mesia! * (Luka 3:1, 2, 21, 22) Okuhikiirizibwa kw’oburangi bw’omuri Baibuli oku buzima tikurikuhamya okwikiriza kwaitu?
[Obugambo obw’Ahansi]
^ kacw. 2 Okuruga omu mwaka gwa 455 B.C.E. okuhika 1 B.C.E. hariho emyaka 454. Okuruga 1 B.C.E. okuhika 1 C.E. hariho omwaka gumwe (hakaba hatariho omwaka zeero). Kandi okuruga 1 C.E. okuhika 29 C.E. hariho emyaka 28. Twagaita hamwe emyaka egi yoona nitutunga emyaka 483. Yesu ‘akaitwa’ omu mwaka gwa 33 C.E., omu saabiiti eya 70 omuri saabiiti ezi ez’emyaka. (Danieli 9:24, 26) Reeba omu kitabo ekirikwetwa Pay Attention to Daniel’s Prophecy! Eshuura ya 11, hamwe n’omuri Insight on the Scriptures, Ekitabo 2, aha rupapura 899-901. Byombi bikahandiikwa Abajurizi ba Yehova.
[Orukaanga/Ekishushani ekiri aha rupapura 198]
(Okureeba oku birikushoboororwa omu bigambo, reeba ekitabo)
“SAABIITI MAKUMI MUSHANJU”
Emyaka 490
Saabiiti 7 Saabiiti 62 Saabiiti 1
(emyaka 49) (emyaka 434) (emyaka 7)
455 406 ← B.C.E. C.E. → 29 33 36
“Ekiragiro Yerusaalemu Okwija kwa Mesia Omuheru gwa
ky’okuhunduura . . . okugaruka Mesia “okwitwa” “Saabiiti
Yerusaalemu” kwombekwa makumi mushanju”
