Karolo 5
Mpho e Botse Kudu ya Boikgethelo
1, 2. Ke mpho efe e botse kudu yeo e lego karolo ya kagego ya rena?
GORE re kwešiše lebaka leo ka lona Modimo a dumeletšego mathata le seo a tlago go se dira ka ona, re swanetše go kwešiša tsela yeo a re bopilego ka yona. Ga se a fo re bopa re e-na le mmele le bjoko feela. O re bopile re e-na le dika tše di kgethegilego tša monagano le tša maikwelo.
2 Karolo e bohlokwa ya kagego ya monagano wa rena le maikwelo ke boikgethelo. Ee, Modimo o tsentše ka gare ga rena seka sa tokologo ya go ikgethela. Ye ruri ke mpho e botse kudu ye a re filego yona.
Kamoo re Bopilwego ka Gona
3-5. Ke ka baka la’ng re rata boikgethelo?
3 Anke re boneng kamoo boikgethelo bo tsenago ka gona tabeng ya go dumelela ga Modimo tlaišego. Sa pele, anke o nagane ka se: Na o leboga ge o e-na le tokologo ya go ikgethela seo o tlago go se dira le seo o tlago go se bolela, seo o tlago go se ja le seo o tlago go se apara, mošomo wo o nyakago go o dira, le lefelo leo o tlago go dula go lona le gore o tla dula bjang? Goba na o ka rata ge bophelong bja gago bja ka mehla go ka ba le motho yo a go botšago se sengwe le se sengwe seo o swanetšego go se bolela le selo se sengwe le se sengwe seo o swanetšego go se dira?
4 Ga go na motho yo a nago le tlhaloganyo yo a ka ratago ge a amogwa taolo ya bophelo bja gagwe ka mo go feletšego ka tsela yeo. Ka baka la’ng? Ka baka la tsela yeo Modimo a re bopilego ka yona. Beibele e re botša gore Modimo o bopile motho ka ‘seswantšho sa gagwe le ka go swana le yena,’ le gona seka se sengwe seo Modimo a nago le sona ke tokologo ya go ikgethela. (Genesi 1:26; Doiteronomio 7:6) Ge a be a bopa batho, o ile a ba nea sona seka seo se sebotse—mpho ya boikgethelo. Le ke le lengwe la mabaka ao ka ona re ferekanago ge re gatelelwa ke babuši ba bašoro.
5 Ka gona go kganyoga tokologo ga se selo se se itiragalelago feela, ka gobane Modimo ke Modimo wa tokologo. Beibele e re: “Mo xo lexo môya wa Morêna, ké mo xo lexo khunoloxô.” (2 Ba-Korinthe 3:17) Ka baka leo, Modimo o re neile boikgethelo e le karolo ya kagego ya rena. Ka ge a tsebile tsela yeo menagano ya rena le maikwelo di bego di tla šoma ka yona, o ile a tseba gore re be re tla thaba kudu ge re e-na le boikgethelo.
6. Modimo o bopile bjang bjoko bja rena gore bo šomišane le boikgethelo?
6 Gotee le mpho ya boikgethelo, Modimo o re neile gape le bokgoni bja go nagana, go bapetša dilo, go dira diphetho le go tseba phapano magareng ga se se lokilego le se se fošagetšego. (Ba-Hebere 5:14) Ka gona, boikgethelo bo be bo tla thewa kgethong e bohlale. Ga se ra bopja bjalo ka diroboto tše di se nago tlhaloganyo tšeo di se nago boikgethelo. Le gona ga se ra bopja ka tsela ya gore re laolwe ke tsebo yeo ka tlhago e ageletšwego ka gare ga rena bjalo ka diphoofolo. Go e na le moo, bjoko bja rena bjo bo makatšago bo dirilwe ka tsela ya gore bo šome ka go dumelelana le tokologo ya rena ya boikgethelo.
Mathomo a Mabotse
7, 8. Modimo o ile a dira gore batswadi ba rena ba be le mathomo afe a mabotse?
7 Go bontšha kamoo Modimo a bego a ba šetša ka gona, batswadi ba rena ba pele, Adama le Efa ba be ba neilwe dilo ka moka tšeo motho lege e le ofe a bego a ka di tsoma. Ba ile ba bewa tšhemong e kgolo e bjalo ka paradeise. Ba be ba e-na le dilo tše dintši tše di bonagalago. Ba be ba e-na le menagano le mebele e phethegilego, ka gona ba be ba ka se tšofale, ba babja goba ba hwa—ba be ba ka phela ka mo go sa felego. Ba be ba tla ba le bana ba ba phethegilego bao le bona ba bego ba tla ba le bokamoso bjo bo thabišago bja ka mo go sa felego. Batho bao ba bego ba tla ata ba be ba tla ba le mošomo wo o kgotsofatšago wa go fetola lefase paradeise.—Genesi 1:26-30; 2:15.
8 Mabapi le seo se bego se neilwe, Beibele e anega ka gore: “Ya re xe Modimo a lebêlêla tšohle tše a di dirilexo, a bôna e le tše botse kudu.” (Genesi 1:31) Beibele gape e bolela ka Modimo ka gore: “[Ke] yo tirô-phethexi.” (Doiteronomio 32:4) Ee, Mmopi o neile lapa la batho mathomo a phethegilego. Go be go se na se se fetago seo. O ipontšhitše e le Modimo yo a hlokomelago gakaakang!
Tokologo ye e Nago le Mellwane
9, 10. Ke ka baka la’ng boikgethelo bo swanetše go šomišwa ka tshwanelo?
9 Lega go le bjalo, na Modimo o be a rerile gore boikgethelo bo se be le mellwane? Nagana ka motse wo o nago le leema-ema wo o se nago melao ya tsela, moo mang le mang ge a otlela a lebišago koloi bo-rata-pelo le ka lebelo leo a le ratago. Na o be o ka rata go otlela maemong a bjalo? Aowa, seo e be e tla ba go hloka taolo tshepedišong ya dinamelwa gomme ruri se ka baka dikotsi tše dintši.
10 Go bjalo le ka mpho ya Modimo ya boikgethelo. Tokologo e se nago mellwane e be e tla baka go dubagana lekokong la batho. Go swanetše gore go be le melao ya go hlahla mediro ye e dirwago ke batho. Lentšu la Modimo le re: “Itshwareng bjalo ka batho ba ba lokologilego, gomme le ka mohla le se ke la šomiša tokologo ya lena bakeng sa go lokafatša bokgopo.” (1 Petro 2:16, JB) Modimo o nyaka gore boikgethelo bo dirišwe ka tsela e tlago go hola batho ka moka. Ga se a rera gore re be le tokologo e feletšego, eupja o rerile gore re be le tokologo e lekanetšego, re be ka tlase ga pušo ya molao.
Melao ya Mang?
11. Re be re bopetšwe go kwa melao ya mang?
11 Re bopetšwe go kwa melao ya mang? Karolo e nngwe ya lengwalo la 1 Petro 2:16 (JB) e re: “Ga le bahlanka ba motho lege e le mang ge e se Modimo.” Se ga se bolele bohlanka bjo bo gatelelago, eupja go e na le moo, go bolela gore re bopetšwe go ba ba ba thabilego kudu ge re e-kwa melao ya Modimo. (Mateo 22:35-40) Melao ya gagwe e feta melao lege e ka ba efe yeo e dirilwego ke batho ka gore e re nea tlhahlo e kaone-kaone. “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.”—Jesaya 48:17.
12. Ke tokologo efe ya boikgethelo yeo re nago le yona ka gare ga mellwane ya melao ya Modimo?
12 Ka nako e swanago, melao ya Modimo e nea tokologo e kgolo ya boikgethelo ka gare ga mellwane ya yona. Se se dira gore go be le go se swane le go dira gore lapa la batho e be le le kgahlišago. Nagana ka mehuta e fapa-fapanego ya dijo, diaparo, mmino, bokgabo gotee le magae go phuleletša lefase ka moka. Re tloga re rata go ba le boikgethelo dilong tše bjalo go e na le gore re kgethelwe ke motho o mongwe.
13. Ke melao efe ya tlhago yeo re swanetšego go e kwa gore rena ka noši re holege?
13 Ka gona re bopilwe ka tsela ya gore re be ba ba thabilego kudu ge re e-kwa melao ya Modimo mabapi le boitshwaro bja batho. Go swana le go kwa melao ya Modimo ya tlhago. Ka mohlala, ge re ka hlokomologa molao wa matla-kgogedi gomme ra fofa go tloga lefelong le le lego godimo, re tla gobala goba ra hwa. Ge re hlokomologa melao ya ka gare ya mebele ya rena gomme re lesa go ja dijo, go nwa meetse goba go buša moya, re tla hwa.
14. Re tseba bjang gore batho ga se ba bopelwa go phela ka ntle le Modimo?
14 Bjalo ka ge ka kgonthe re ile ra bopja re e-na le tlhokagalo ya go kwa melao ya Modimo ya tlhago, re bopilwe re e-na le tlhokagalo ya go kwa melao ya Modimo ya boitshwaro gotee le melao ya setšhaba. (Mateo 4:4) Batho ga se ba bopelwa go phela ka ntle le Modiri wa bona gomme ba kgona go atlega. Moporofeta Jeremia o re: “Motho tsela y’axwe xa a e buše; le monna mo a yaxo xa’ ikiše, le xe a xata a tiiša. Morêna, nkôtle [“mphošolle,” NW].” (Jeremia 10:23, 24) Ka gona batho ba be ba bopetšwe go phela ka tlase ga pušo ya Modimo ka ditsela tšohle, e sego ya bona ka noši.
15. Na melao ya Modimo e be e tla imela Adama le Efa?
15 Go kwa melao ya Modimo go be go ka se imele batswadi ba rena ba pele. Go e na le moo, go be go tla nea bona gotee le lapa ka moka la batho bophelo bjo bo botse. Ge nkabe batho ba pele ba babedi ba dule ka gare ga mellwane ya melao ya Modimo, dilo ka moka di ka be di ba sepeletše gabotse. Ge e le gabotse, gona bjale re ka be re phela paradeiseng e botse ya lethabo re le lapa la batho le le nago le lerato le le kopanego! Bokgopo, tlaišego le lehu di ka be di sa ka tša ba gona.
[Dipotšišo tša Thuto]
[Seswantšho go letlakala 11]
Mmopi o ile a nea batho mathomo a phethegilego
[Seswantšho go letlakala 12]
Na o be o ka rata go otlela gare ga dikoloi tše dintši ge go ka be go se na melao ya tsela?
