Karolo 7
Mafelelo a Borabele e Bile Afe?
1-3. Go feta ga nako go bontšhitše bjang gore Jehofa o be a nepile?
MABAPI le kgang ya tshwanelo ya Modimo ya go buša, mafelelo a pušo ya motho ka ntle le Modimo ka nywaga-kgolo ye ka moka e bile afe? Na batho ba bontšhitše gore ke babuši ba bakaone go e na le Modimo? Ge re ahlola go ya ka pego ya go swarana gampe ga batho, karabo ruri ke aowa.
2 Ge batswadi ba rena ba pele ba be ba gana pušo ya Modimo, go ile gwa latela mathata. Ba ile ba ipiletša mathata gotee le lapa ka moka la batho leo le ilego la ba gona ka bona. Ba ile ba hloka yo ba ka mmeago molato ge e se bona ka noši. Lentšu la Modimo le re: “Ba dirile ka tsela e kotsi; ga se bana ba gagwe, phošo ke ya bona ka noši.”—Doiteronomio 32:5, NW.
3 Histori e bontšhitše go nepagala ga temošo ya Modimo go Adama le Efa ya gore ge ba be ba ka tšwa tokišetšong ya Modimo, ba be ba tla tšofala gomme mafelelong ba hwa. (Genesi 2:17; 3:19) Ba ile ba intšha ka tlase ga pušo ya Modimo gomme ka morago ba tšofala le go hwa.
4. Ke ka baka la’ng ge rena ka moka re belegwe re sa phethega, re tlaišwa ke malwetši le lehu?
4 Seo ka morago se ilego sa diragalela bana ba bona ka moka ke se se hlaloswago ke Ba-Roma 5:12: “Ké xôna, byalo ka xe sebe sè tsene lefaseng ka motho o tee, [Adama, e lego hlogo ya lapa la batho] ’me lehu la tsêna ka sebe, lehu le aparetše batho bohle ka xe ba dirile dibe bohle.” Ka gona, ge batswadi ba rena ba pele ba be ba fetogela bolebeledi bja Modimo, ba ile ba fetoga badira-dibe bao ba nago le bosodi. Ka go dumelelana le melao ya leabela, go se phethagale mo go ilego gwa tšwelela ke gona feela ba ilego ba go fetišetša baneng ba bona. Ke ka baka leo ge rena ka moka re tswetšwe re sa phethega, re babja e bile re e-hwa.
5, 6. Histori e bontšhitše’ng ge e le mabapi le maiteko a batho a go tliša khutšo ya kgonthe le katlego?
5 Go ile gwa feta nywaga-kgolo e mentši. Mebušo e ile ya šuthelana. Go lekilwe mehuta ka moka ye e ka naganwago ya mebušo. Lega go le bjalo, dilo tše di boifišago di ile tša ipoapoeletša lekokong la batho. Ka morago ga nywaga e dikete tše tshelelago, motho a ka nagana gore batho ba tšwetše pele go fihla ntlheng ya go thea khutšo, toka, le katlego lefaseng ka bophara le gore mo nakong ye ba be ba swanetše go ba ba kgonne go ithuta mehola ya botho, kwelobohloko le tirišano.
6 Eupja therešo ke gore ga go bjalo. Ga go na mohuta wa mmušo wa batho wo o kilego wa dirwa wo o tlišeditšego batho ka moka khutšo ya kgonthe le katlego. Ngwaga-kgolong wo wa bo-20 feela, re bone Holocaust (Polao e sehlogo ya ma-Nazi) le go bolawa ga batho ba fetago dimilione tše 100 dintweng. Mehleng ya rena batho ba bantši-ntši ba ile ba hlokofatšwa, ba bolawa le go lahlelwa kgolegong ka baka la go felelana pelo le go se kwane ditabeng tša bopolitiki.
Boemo bja Dilo Lehono
7. Boemo bja lapa la motho lehono bo ka hlaloswa bjang?
7 Go oketša moo, nagana ka boemo ka moka bja lapa la motho lehono. Bokebekwa le bošoro di tlile ka mmetela. Go dirišwa gampe ga dihlare-tagi go apareditše. Malwetši ao a fetelago ka dikopano tša botona le botshadi a fetogile leuba. Bolwetši bjo bo boifšago bja AIDS bo swere batho ba dimilione. Batho ba dimilione tše masome ba hwa ka tlala goba bolwetši ngwaga le ngwaga, mola palo e nyenyane ya batho e humile le dinala. Batho ba šilafatša lefase le go le senya. Bophelo bja lapa le mekgwa e mebotse kae le kae di senyegile. Ka kgonthe, bophelo lehono bo bontšha bošoro bja pušo ya Sathane, ‘modimo wa lefase le.’ Lefase leo e lego mmuši wa lona ga le na lerato, le sehlogo, e bile ke le tlogago le gobogile e le ka kgonthe.—2 Ba-Korinthe 4:4.
8. Ke ka baka la’ng re ka se ke ra re dilo tšeo batho ba di fihleletšego ke tšwelopele ya kgonthe?
8 Modimo o file batho nako e lekanego ya gore ba fihle seremong sa tšwelopele ya bona go tša thuta-mahlale le dilong tše di bonagalago. Eupja na ke tšwelopele ya kgonthe ge bora le mosebe di tšeetšwe legato ke dithunya, ditanka tša ntwa, difofane tše di fošago dipomo le dibetša tša nuclear? Na ke tšwelopele ge batho ba kgona go fofela lefaufaung eupja ba sa kgone go phedišana ka khutšo lefaseng? Na ke tšwelopele ge batho ba tšhaba go sepela mebileng bošego, goba gaešita le mosegare mafelong a mangwe?
Seo se Bonagetšego ge Nako e Dutše e Feta
9, 10. (a) Nako e fetilego ya nywaga e makgolo e bontšhitše’ng ka mo go sa belaetšego? (b) Ke ka baka la’ng Modimo a ka se ke a fediša boikgethelo?
9 Teko ye e tšerego nywaga-kgolo e mentši e bontšhitše gore batho ba ka se kgone go sepediša dikgato tša bona ka katlego ka ntle le pušo ya Modimo. Ba ka se kgone go dira seo go etša ge ba sa kgone go phela ka ntle le go ja, go nwa le go buša moya. Bohlatse bo molaleng: Re bopilwe ka tsela ya gore re ithekge ka tlhahlo ya Mmopi wa rena go etša ge re bopilwe ka tsela yeo re ka se kego ra phela kantle le dijo, meetse, le moya.
10 Modimo ka go dumelela bokgopo o bontšhitše ka tsela e wišago pelo mafelelo ao a ka bakwago ke go šomiša boikgethelo gampe. Le gona boikgethelo ke mpho e bohlokwa kudu mo e lego gore go e-na le gore Modimo a e amoge batho, o ile a upja a ba nea sebaka sa gore ba bone moo go bo šomiša gampe go ka išago gona. Lentšu la Modimo le a rereša ge le re: “Motho tsela y’axwe xa’ e buše.” Le gona le opile kgomo lenaka ge le re: ‘Motho o buša motho gore a mo senye.’—Jeremia 10:23; Mmoledi 8:9.
11. Na go na le mohuta lege e ka ba ofe wa pušo ya batho wo o fedišitšego mathata?
11 Go dumelela ga Modimo pušo ya motho ka nywaga e dikete tše tshelelago go bontšha ka mo go sa belaetšego gore motho ga a kgone go fediša mathata. Ga se a ka a kgona go dira seo. Ka mohlala, Kgoši Salomo wa Isiraele mehleng ya gagwe, lege a be a e-na le bohlale, mahumo, le matla, o ile a palelwa ke go lokiša madimabe ao a tlišwago ke pušo ya motho. (Mmoledi 4:1-3) Ka mo go swanago, mehleng ya rena baetapele ba lefase gaešita le ka tšwelopele ya morago-rago go tša thekinolotši, ba palelwa ke go fediša tlaišego. Se se nyamišago le go feta ke gore histori e bontšhitše gore batho bao ba sa bušwego ke Modimo ba okeditše tlaišego go e na le gore ba e fokotše.
Pono ya Modimo ya Nako e Telele
12-14. Ke mehola efe ya nako e telele ye e tlišwago ke go dumelela ga Modimo mathata?
12 Go dumelela ga Modimo tlaišego go re kwešitše bohloko. Eupja o bile le pono ya nako e telele, ka ge a tsebile mafelelo a mabotse ao a bego a tla ba gona mafelelong. Pono ya Modimo e tla hola dibopiwa, e sego ka nywaga e sego kae feela goba e dikete tše sego kae feela, eupja ka nywaga e dimilione, ee, ka mo go sa felego.
13 Ge go ka tla gwa direga ka nako e tlago gore motho o mongwe a diriše boikgethelo gampe ka go belaela tsela ya Modimo ya go dira dilo, go ka se nyakege gore a newe sebaka sa go hlatsela gore dikgopolo tša gagwe di nepagetše. Modimo ka ge a šetše a dumeletše marabele ka nywaga e dikete, o dirile motheo wa molao woo o ka dirišwago ka mo go sa felego kae le kae legohleng.
14 Ka ge Jehofa a dumeletše bokgopo le tlaišego nakong ye, go tla ba go bontšhitšwe ka ntle le pelaelo gore ga go selo lege e ka ba sefe seo se sa dumelelanego le thato ya gagwe seo se ka atlegago. Go tla ba go bontšhitšwe ka tsela e kgotsofatšago gore ga go na leano leo le ikemetšego la batho goba la diphedi tša moya leo le ka tlišago mehola e sa felego. Ke ka fao Modimo a tlago go hloka molato ge a ka gatikela mang le mang yo a rabelago. “Ba babe bôná ó tlo ba fediša.”—Psalme 145:20; Ba-Roma 3:4.
[Dipotšišo tša Thuto]
[Pictures on page 15]
Ka morago ga gore batswadi ba rena ba pele ba kgethe go se bušwe ke Modimo, mafelelong ba ile ba tšofala le go hwa
[Pictures on page 16]
Go buša ga batho ka ntle le Modimo go tlile le masetla-pelo
[Credit Line]
U.S. Coast Guard photo
