Babadi ba Rena ba a Botšiša

Na Ruri Banna ba Bararo ba Bohlale ba Ile ba Etela Jesu wa Lesea?

Dikanegelo tša keresemose go tšwa lefaseng ka bophara di bolela ka dikgoši tše tharo, goba banna ba bohlale, ba rwaletše Jesu wa lesea dimpho. Na kanegelo ye ke therešo? Na e dumelelana le ditherešo? Anke re bone.

Diebangedi tše pedi, ya Mateo le ya Luka, di hlalosa tiragalo ya matswalo a Jesu. Dipego tše di bontšha gore ke badiši ba nyatšegago feela ba tšwago mašemong a kgaufsi bao ba ilego ba etela Jesu ge a be a belegwa. Bao go thwego ke dikgoši, goba banna ba bohlale, ge e le gabotse e be e le balepi ba dinaledi, e sego dikgoši gomme ga se gwa bolelwa palo ya bona. Balepi ba ba dinaledi ga se ba ka ba etela lesea leo le lego ka legopong eupša ba ile ba fihla ge Jesu e be e le ngwana gomme a dula ka ngwakong. Leeto la bona le ile la ba la bea bophelo bja Jesu kotsing!

Ela hloko pego ya mabapi le matswalo a Jesu yeo e begwago ke mongwadi wa Beibele Luka gomme o tla hwetša e bolela gore: “Go be go . . . e-na le badiši bao ba bego ba dula merakeng ba dišitše mehlape ya bona bošego. Gatee-tee morongwa wa Jehofa a ema kgaufsi le bona, . . . a re go bona: ‘ . . . Le tla hwetša lesea le phuthetšwe ka mašela le letše legopong.‘ . . . Ba ya ka go akgofa gomme ba hwetša Maria le Josefa le lesea le letše legopong.”—Luka 2:8-16.

Ke feela Josefa, Maria le badiši bao ba bego ba e-na le Jesu wa lesea. Ga go yo mongwe gape yoo go bolelwago ka yena pegong ya Luka.

Bjale hlahloba pego yeo e lego go Mateo 2:1-11 go tšwa Beibeleng ya Sepedi: “Eitše xe Jesu a belexwe motseng wa Betlehêma naxeng ya Juda mehleng ya kxoši Herode, xwa tšwêlêla ba bohlale ba Bohlabêla, ba fihla Jerusalêma. . . . Ba tsêna ngwakong, ba hwetša ngwana le Maria mm’axwe.”

Ela hloko gore pego ye e bolela feela ka “ba bohlale,” e sego “ba bohlale ba bararo,” le gore ba ile ba thoma ka go tloga bohlabela gomme ba ya Jerusalema, e sego motseng woo Jesu a belegwego go wona, e lego Betlelehema. Nakong ya ge ba be ba fihla Betlelehema, Jesu e be e le “ngwana”—e sa hlwe e le lesea—gomme a se sa hlwa a le ka setaleng eupša a le ka ngwakong.

Le gona, gaešita le ge Beibele ya Sepedi e diriša mantšu a rego “ba bohlale” ge e hlalosa baeng ba, diphetolelo tše dingwe di diriša mantšu a rego “balepi ba dinaledi.” Go ya ka A Handbook on the Gospel of Matthew, polelwana e rego “ba bohlale” ke phetolelo ya “leina la Segerika leo mathomong le bego le šupa baperisita ba Baperesia bao e bego e le balepi ba dinaledi ba nago le bokgoni.” Le gona The Expanded Vine’s Expository Dictionary of New Testament Words e hlalosa lentšu leo e le “moloi, senoge, yo a itirago eka o na le matla a maleatlana, moprofesara wa boloi.”

Gaešita le ge bolepi bja dinaledi le boloi di sa le gona le lehono, Beibele e nea temošo malebana le go di diriša. (Jesaya 47:13-15) Ke ditsela tša go dirišana le meoya e bile ke mekgwa yeo Jehofa Modimo a e hloilego. (Doiteronomio 18:10-12) Ke ka baka leo go sego morongwa wa Modimo yoo a tsebišago balepi ba dinaledi ka go belegwa ga Jesu. Lega go le bjalo, Modimo o ile a tsena ditaba gare ka toro gomme a ba lemoša gore ba se ke ba bušetša pego go Kgoši Heroda yo kgopo, ka ge a be a nyaka go bolaya Jesu. Ka baka leo ba ile “ba tloga ba boela nageng ya gabo bona ka tsela e nngwe.”—Mateo 2:11-16.

Na Bakriste ba therešo ba ka nyaka go boloka Kanegelo ya nonwane yeo e fapošago therešo yeo e lego mabapi le matswalo a Jesu? Ba ka se dire bjalo le gatee.