JEHOFA ke “Mohlahli wa [rena] yo Mogolo.” (Jes. 30:20) Lerato le mo šušumetša gore a rute batho le go ba tlwaetša. Ka mohlala, ka ge Jehofa a šušumetšwa ke lerato la gagwe le legolo, o bontšha Jesu “dilo ka moka tšeo yena ka noši a di dirago.” (Joh. 5:20) Ka ge Jehofa a rata rena Dihlatse tša gagwe, o šušumeletšega go re fa “leleme la ba ba rutilwego,” ge re dutše re dira sohle seo re ka se kgonago gore re mo godiše le go thuša ba bangwe.—Jes. 50:4.

Komiti ya go Ruta ya Sehlopha se Bušago e ekiša tsela ya Jehofa ya go bontšha lerato ka go diriša dikolo tše lesome tša pušo ya Modimo go tlwaetša bao ba kganyogago go ingwadiša go tšona le bao maemo a bona a ba dumelelago go dira bjalo. Na o lebelela dikolo tše e le bohlatse bja gore Jehofa o a re rata?

Thabela kakaretšo e latelago ya dikolo tše tša gona bjale tša pušo ya Modimo le dilo tšeo ba bangwe bao ba tšwago dikolong tše ba di bolelago. Ke moka o ipotšiše gore: ‘Nka holwa bjang ke thuto ye ya Modimo?’

Ka ge Jehofa e le “Modimo wa lerato,” o re nea tlwaetšo yeo e dirago gore maphelo a rena a be le morero, yeo e re lokišeletšago go lebeletšana le diteko, gomme ra ba le lethabo le legolo bodireding bja rena. (2 Bakor. 13:11) Go swana le barutiwa ba lekgolong la pele nywaga, re swanelega gabotse go thuša ba bangwe le go “ba ruta go boloka dilo tšohle” tšeo re di laetšwego.—Mat. 28:20.

Le ge re ka se kgone go tsena dikolo tše ka moka, re ka holwa ke setee goba tše dingwe tša tšona. Le gona re ka kgona go šomiša keletšo e theilwego Beibeleng yeo e hwetšwago moo. E bile re ka oketša katlego yeo re bago le yona bodireding ka go šoma gotee le bahlanka ba tlwaeditšwego gabotse ba Jehofa.

Ipotšiše gore: ‘Na maemo a ka a ntumelela gore ke swanelegele go ba go se sengwe sa dikolo tše?’

Barapedi ba Jehofa ba bona e le tokelo go thekga dikolo tše tšeo di holago le go rutwa go tšona. Eka tlwaetšo yeo o e hwetšago go tšona e ka go batametša kgauswi le Modimo gomme ya go hlamela go phetha boikarabelo bjoo a go filego bjona, kudukudu taelo e akgofilego ya gore re bolele ditaba tše dibotse.