1-3. (a) Ke maemo afe ao a bontšhago ntlha ya diswantšho tša Jesu tše pedi? (b) Ke dipotšišo dife tšeo re swanetšego go di araba?

NAGANA o kgopelwa ke mohlankedi yo a tumilego gore o mo iše sebokeng se bohlokwa ka koloi. Lega go le bjalo, metsotso e sego kae pele ga ge o ka tloga go yo mo tšea o mo iše sebokeng seo, o lemoga gore ga o na makhura a lekanego ka koloing ya gago gore o fihle mo a yago gona. O gapeletšega gore o kitime o ye go a reka. Ge o sa ile, mohlankedi yoo o a fihla. O go nyaka gohle gomme ga a go hwetše. A ka se kgone go go leta, ka gona o kgopela motho yo mongwe gore a mo iše ka koloi ya gagwe. Go se go ye kae, wena o a boa gomme o hwetša gore mohlankedi yoo o ile. O be o tla ikwa bjang?

² Bjale nagana e le wena mohlankedi gomme o kgethile batho ba bararo ba swanelegago gore ba swaragane le ditaba tše itšego tše bohlokwa. O ba hlalosetša seo ba swanetšego go se dira, ke moka ka boraro bja bona ba a dumela. Eupša ge o boa ka moragonyana, o hwetša gore ke ba babedi feela bao ba dirilego seo o ba laetšego sona. Go oketša moo, yo a paletšwego ke go dira seo o mo laetšego sona o go fa mabaka a sa kwagalego. Ge e le gabotse, le go leka ga se a leka. O be o tla ikwa bjang?

³ Seswantšhong sa gagwe sa dikgarebe le sa ditalente, Jesu o ile a diriša maemo a swanago le ao go bontšha lebaka leo ba bangwe ba Bakriste ba tloditšwego ba bego ba tla botega le go ba le temogo mehleng ya bofelo, mola ba bangwe ba be ba ka se be bjalo. * (Mat. 25:1-30) O ile a gatelela ntlha ya gagwe ka go bolela gore: “Ka gona, dulang le phakgame, gobane ga le tsebe letšatši le ge e le iri”—ke gore, nako yeo Jesu a bego a tla phethagatša kahlolo ya Modimo godimo ga lefase la Sathane. (Mat. 25:13) Re ka diriša keletšo yeo lehono. Re holega bjang ka go dula re phakgame, go etša ge Jesu a re kgothaleditše go dira bjalo? Ke bomang bao ba hlatsetšego gore ba itokišeditše go phologa?  Le gona re swanetše go dira eng gona bjale gore re dule re phakgame?

4. Ke ka baka la’ng ‘go dula re phakgame’ go sa bolele gore re tshwenyege ka nako?

⁴ Go dira dilo tše dingwe, tše bjalo ka go šoma feketoring, go bona ngaka goba go namela senamelwa sa batho bohle, go nyaka gore re hlomphe nako. Eupša go tshwenyega ka nako go ka go šitiša, goba gwa ba kotsi kudu, ge o tšea karolo medirong e mengwe e bjalo ka go tima mollo goba lesolo la tlhakodišo la ka morago ga ge go bile le kotsi. Maemong a bjalo, go bohlokwa kudu go šetša seo o se dirago ka nako yeo go feta go tshwenyega ka nako. Ge bofelo bja tshepedišo ye bo dutše bo batamela, modiro wa go bontšha batho ditokišetšo tša Jehofa tša phološo o bohlokwa kudu go feta le ge e le neng pele. Go dula ga Bakriste ba phakgame ga go bolele gore ba tshwenyege ka nako. Ge e le gabotse, go na le bonyenyane ditsela tše hlano tšeo re holegago ka tšona ge re sa tsebe letšatši le iri tša go lebanya tša go tla ga bofelo.

5. Go se tsebe ga rena letšatši goba iri go ka thuša bjang go utolla seo se lego ka dipelong tša rena?

⁵ Lebaka la pele ke gore go se tsebe ga rena nako ya go tla ga bofelo go re dumelela gore re utolle seo ge e le gabotse se lego ka dipelong tša rena. Ge e le gabotse, go se tsebe ga rena go re nea seriti, go re dumelela gore re diriše tokologo ya rena ya go ikgethela go bontšha gore re botegela Jehofa. Le ge re fagahletše go bona re phologa bofelo bja tshepedišo ye, re hlankela Jehofa gobane re mo rata, e sego feela gore re hwetše bophelo. (Bala Psalme 37:4.) Re thabela go dira thato ya gagwe, e bile re lemoga gore Modimo o re ruta gore re holege. (Jes. 48:17) Ditaelo tša gagwe ga di re imele le ganyenyane.—1 Joh. 5:3.

6. Modimo o ikwa bjang ge e ba re mo hlankela ka gobane re mo rata, gona ka baka la’ng?

⁶ Lebaka la bobedi leo re holegago ka lona ka go se tsebe letšatši goba iri ke gore re ba le sebaka sa go thabiša pelo ya Jehofa. Ge e ba re mo hlankela gobane re mo rata—e sego feela ka gobane re naganne ka letšatši le itšego goba moputso o itšego—re kgatha tema karabong ya Jehofa ya ge a kwerwa ke lenaba la gagwe Sathane. (Jobo 2:4, 5; bala Diema 27:11.) Ka baka la bohloko ka moka le manyami tšeo Diabolo a di bakilego, re thabela go emela bogoši bja Jehofa le go gana pušo e kgopo ya Sathane.

7. Ke ka baka la’ng o nagana gore go phegelela bophelo bja boikgafo go a kgahliša?

⁷ Lebaka la boraro ke gore go mo hlankela ga rena re sa nagana ka letšatši le itšego go re tutueletša go phela maphelo a boikgafo. Ba bangwe lehono bao ba sa tsebego Modimo le bona ba dumela gore lefase le re lego go lona le ka se be gona ka nako e telele. Ka ge ba tšhaba kotsi e itšego yeo ba rego e ka se phemege yeo e tlago go wela lefase le, ba na le kgopolo ya gore: “A re jeng gomme re nweng, gobane gosasa re tla hwa.” (1 Bakor. 15:32) Ge e le rena ga re boife selo. Ga re nyake go ipea lekatana ka morero wa gore re kgotsofatše dikganyogo tša rena tša boithati. (Die. 18:1) Go e na le moo, re a itatola gomme ka bolokologi ra diriša nako ya rena, matla a rena le dithoto tša rena go botša batho ba bangwe ditaba tše dibotse tša Mmušo wa Modimo. (Bala Mateo 16:24.) Re thabela go hlankela Modimo, kudukudu ka go thuša ba bangwe gore ba mo tsebe.

8. Ke mohlala ofe wa Beibele woo o bontšhago lebaka leo re swanetšego go ithekga kudu ka Jehofa le Lentšu la gagwe?

⁸ Lebaka la bone leo re holegago ka lona ka go se tsebe letšatši goba iri ke gore go re thuša go ithekga kudu ka Jehofa e bile re fišegela go diriša Lentšu la gagwe maphelong a rena. Se sengwe sa dika tše dikgolo tša go ba ga rena le sebe ke gore re tlwaetše go ithekga ka bohlale bja rena. Paulo o lemošitše Bakriste ka moka gore: “Anke yo a naganago gore o eme a hlokomele gore a se we.” Ba dikete tše masomepedi-tharo ba ile ba se sa hlwa ba amogelwa ke Jehofa nakwana pele ga ge Joshua a ka tsenya setšhaba sa Modimo Nageng ya Kholofetšo. Paulo o re: “Dilo tše . . . di ngwaletšwe go ba temošo go rena bao re fihletšwego ke bofelo bja mehla ye.”—1 Bakor. 10:8, 11, 12.

9. Mathata a ka re otlolla bjang gomme a re batametša kgauswi kudu le Modimo?

 ⁹ Lebaka la bohlano leo re holegago ka lona ka go se tsebe nako yeo bofelo bo tlago ka yona ke gore seo se dumelela mathata ao re lebeletšanego le ona gona bjale gore a re otlolle. (Bala Psalme 119:71.) Ruri mehla ya bofelo bja tshepedišo ye ke “dinako tše di hlobaetšago tšeo go lego thata go lebeletšana le tšona.” (2 Tim. 3:1-5) Batho ba bantši lefaseng le la Sathane ba re hloile, ka gona re ka tlaišetšwa tumelo ya rena. (Joh. 15:19; 16:2) Ge e ba re ikokobetša gomme re tsoma tlhahlo ya Modimo nakong ya diteko tše bjalo, tumelo ya rena e tla sekišwa bjalo ka ge eka ke ka mollo. Ga re fele matla. Go e na le moo, re batamela kgauswi kudu le Jehofa go feta kamoo re bego re nagana ka gona pele.—Jak. 1:2-4; 4:8.

10. Ke eng seo se dirago gore nako e bonagale e feta ka lebelo?

¹⁰ Nako e ka bonagala e feta ka pela goba e nanya. Ge e ba re swaregile ka modiro o itšego go e na le go tshwenyega ka nako, go bonagala eka nako e feta ka lebelo. Ka mo go swanago, ge e ba re ineela modirong o kgahlišago woo Jehofa a re neilego wona, letšatši leo le iri di ka fihla le pele re lemoga seo. Batlotšwa ba bantši ba beile mohlala o mobotse kudu tabeng ye. Anke re ahlaahleng ka boripana seo se ilego sa direga ka morago ga gore Jesu a bewe Kgoši ka 1914 gomme re bone kamoo ba bangwe ba ilego ba itlhatsela ba itokišitše mola ba bangwe ba ile ba palelwa.

11. Ka morago ga 1914, ke ka baka la’ng batlotšwa ba bangwe ba ile ba phetha ka gore Morena o be a diega?

¹¹ Gopola seswantšho sa Jesu sa dikgarebe le sa ditalente. Ge nkabe dikgarebe goba bahlanka ba diswantšhong tšeo ba be ba tseba nako ya go tla ga monyadi goba mong wa bona, gona go be go ka se nyakege gore ba dule ba phakgame. Eupša ba be ba sa tsebe, ka gona go be go nyakega gore ba dule ba itokišitše. Le ge batlotšwa ba ile ba bolela gore 1914 ke ngwaga o swailwego, ba be ba sa kwešiše gabotse seo se bego se tla direga. Ge dilo di be di sa direge ka tsela yeo ba bego ba letetše ka yona, go ka ba go ile gwa bonagala eka Monyadi o be a diega. Ngwanabo rena yo mongwe ka morago o ile a gopola gore: “Ba sego kae ba rena re be re tloga re nagana gore re tla ya legodimong bekeng ya mathomo ya October yeo [ya 1914].”

12. Batlotšwa ba ile ba bontšha bjang gore ba a botega e bile ba na le temogo?

¹² Anke o nagane kamoo go bego go ka nyamiša ka gona go letela bofelo eupša bja se tle! Go oketša moo, bana babo rena ba ile ba lebeletšana le kganetšo ya mabapi le Ntwa ya I ya Lefase. Go ile gwa latela nako yeo go bego go se modiro o dirwago, ya go swana le boroko. Eupša ka 1919, go ile gwa tšwa mogoo wa gore go tsogwe borokong! Jesu o be a tlile tempeleng ya Modimo ya moya, gomme e be e le nako ya gore a ba hlahlobe. Lega go le bjalo, ba bangwe ba bona ba ile ba palelwa tlhahlobong yeo gomme ba lahlegelwa ke tokelo ya gore ba dire ‘kgwebo’ ya Kgoši. (Mat. 25:16) Go be go le bjalo ka ge eka ga se ba šoma ka thata go tlaleletša makhura a bona a moya, go swana le dikgarebe tša ditlaela. Le gona ka go swana le mohlanka wa sebodu, ba be ba sa ikemišetša go ikgafa maphelong a bona e le gore ba tšwetše pele dikgahlego tša Mmušo. Eupša batlotšwa ba bantši ba ile ba botega ka go se šišinyege gomme ba ba le kganyogo e matla ya go hlankela Mong wa bona gaešita le nywageng yeo e thata ya ntwa.

13. Boemo bja kgopolo bja sehlopha sa mohlanka ka morago ga 1914 e be e le bofe, gomme bo bjang lehono?

¹³ Ka morago ga 1914, Morokami o ile wa bolela mantšu a a latelago a bohlokwa: “Bana babo rena, bao gare ga rena ba nago le boemo bjo nepagetšego bja kgopolo ka Modimo ga se ba nyamišwa ke thulaganyo le ge e le efe ya Gagwe. Re be re sa nyake gore go dirwe thato ya rena; ka gona ge re be re lemoga gore re be re letetše selo se se fošagetšego ka October, 1914, re ile ra thabišwa ke gore Morena ga se a fetoša Thulaganyo ya Gagwe gore e  dumelelane le dikganyogo tša rena. Re be re sa nyake gore A dire bjalo. Re kganyoga feela gore re kgone go kgomarela thulaganyo ya Gagwe le merero ya gagwe.” Boemo bjo bjalo bja kgopolo bja boikokobetšo le bja boikgafo bo sa dutše bo bonagala go batlotšwa ba Morena. Ga ba bolele gore ba buduletšwe, eupša ba ikemišeditše go phetha modiro wa Morena mo lefaseng. Ga bjale “lešaba le legolo” la “dinku tše dingwe,” e lego Bakriste bao ba nago le kholofelo ya go phela mo lefaseng, ba ekiša go phakgama ga bona le phišego ya bona.—Kut. 7:9; Joh. 10:16.

14. Go kgomarela ga rena mokero wa Modimo wa go aba dijo tša moya go re šireletša bjang?

¹⁴ Go fo swana le kamoo Bakriste ba tloditšwego ba dirago ka gona, ditho tše phafogilego tša lešaba le legolo di kgomarela mokero woo o hlomilwego ke Modimo wa go aba dijo tša moya. Ka baka leo, go bjalo ka ge eka di tlaleletša makhura a tšona a moya go tšwa Lentšung la Modimo le go moya wa gagwe. (Bala Psalme 119:130; Johane 16:13.) Ka ge di matlafatšwa ke seo, le tšona di itlhatsela di itokišeditše maboo a Kriste, di dula di le mafolofolo le ge di lekwa o šoro. Ka mohlala, kampeng e nngwe ya kgolego ya Nazi, mathomong bana babo rena ba be ba na le kopi e tee feela ya Beibele. Ka gona ba ile ba rapelela gore ba hwetše dijo tše oketšegilego tša moya. Nakwana ka morago ga moo, ba ile ba kwa gore ngwanabo rena yo mongwe yo a bego a sa tšwa go golegwa o kgonne go šwahlišetša ditokollo tše sego kae tše difsa tša Morokami ka kampeng yeo di le ka gare ga leoto la gagwe la kota. Gare ga bao e bego e le baphologi go be go na le ngwanabo rena wa motlotšwa yo a bitšwago Ernst Wauer, yoo ka morago a ilego a gopola gore: “Jehofa o ile a re thuša ka tsela e makatšago gore re kgone go gopola dikarolo tše di matlafatšago tša dihlogo tše di tšwago dimakasineng tšeo.” Ke moka o ile a re: “Matšatši a go bonolo kudu go hwetša dijo tša moya, eupša potšišo ke gore na re di tšeela godimo ka mehla? Ke kgodišegile gore Jehofa o na le ditšhegofatšo tše dintši tšeo a tlago go di nea bao ba dulago ba mmotegela gomme ba iphepa tafoleng ya gagwe.”

15, 16. Phišego ya banyalani ba bangwe bodireding bja Bokriste e ile ya putswa bjang, gomme ke’ng seo o ka ithutago sona diphihlelong tše bjalo?

¹⁵ Le gona dinku tše dingwe di dula di swaregile ka modiro wa Mong wa tšona, di thekga ka mo go feletšego bana babo Kriste. (Mat. 25:40) Go fapana le mohlanka yo kgopo le wa sebodu wa seswantšhong sa Jesu, di ikemišeditše go ikgafa le go dira boiteko bjohle gore di etiše pele dikgahlego tša Mmušo.  Ka mohlala, ge Jon le Masako ba be ba laletšwa gore ba tlo thuša tšhemong yeo go bolelwago se-China kua Kenya, mathomong ba be ba sa ikwe ba lokologile. Eupša ka morago ga gore ba rapele gomme ba hlahlobe maemo a bona, ba ile ba phetha ka gore ba hudugele moo.

¹⁶ Ba ile ba šegofatšwa kudu ka baka la maiteko ao ba a dirilego. Ba itše: “Bodiredi bja mo bo a makatša.” Ba ile ba thoma dithuto tša Beibele tše šupago. Go ile gwa latela diphihlelo tše dingwe tše dintši tše kgahlišago. Ba ile ba phetha ka gore: “Re leboga Jehofa letšatši le letšatši ge a re dumeletše gore re be mo.” Therešo ke gore go na le bana babo rena le dikgaetšedi ba bantši bao ba bontšhitšego ka diphetho tšeo ba di dirilego gore ba ikemišeditše go swarega ka mo go feletšego ka tirelo ya Modimo go sa šetšwe gore bofelo bo tla neng. Nagana ka ba dikete bao ba alogilego Sekolong sa Gilead gomme ba tsenela tirelo ya boromiwa. Go re’ng o sa latswe seo se diregago tirelong yeo e kgethegilego ka go bala sehlogo se se rego: “Re Dira Sohle Seo re ka se Kgonago!” seo se tšweletšego ka go Morokami wa October 15, 2001? Ge o dutše o bala pego yeo e thabišago ya kamoo letšatši modirong wa boromiwa le sepelago ka gona, nagana ka ditsela tšeo o ka oketšago tirelo ya gago gomme Modimo a tumišwa, ke moka le wena wa feleletša o thabile.

17. Go se tsebe ga rena letšatši goba iri go re hotše bjang?

¹⁷ Go molaleng gore re hotšwe ke go se tsebe ga rena letšatši goba iri ya go lebanya yeo ka yona tshepedišo ye e tlago go fedišwa. Go e na le gore re gakanege goba re nyame, re ikhwetša re batametše kgauswi kudu le Jehofa go feta le ge e le neng pele, yena Tatago rena yo lerato, ge re dutše re ineela ka mo go feletšego go dira thato ya gagwe. Go bea ga rena seatla mogomeng le go phema ditšhitišo, go dirile gore re thabele go dira tirelo ya Mong wa rena.—Luka 9:62.

18. Ke ka baka la’ng re sa swanela go lahla tumelo ya rena?

¹⁸ Re batamela ka lebelo le legolo letšatši la Modimo la kahlolo. Ga go le o tee wa rena yo a nyakago go nyamiša Jehofa goba Jesu. Ba re neile ditokelo tše di kgahlišago tša tirelo mehleng ye ya bofelo. Re tloga re tšeela godimo maikwelo ao ba nago le ona ka rena a go bontšha gore ba re holofetše!—Bala 1 Timotheo 1:12.

19. Re ka itlhatsela bjang re le ba itokišitšego?

¹⁹ Go sa šetšwe gore kholofelo ya rena ke ya go thabela bophelo legodimong goba Paradeiseng mo lefaseng, anke re ikemišetšeng go dula re kgomaretše kabelo ya rena yeo re e filwego ke Modimo ya boboledi le go dira barutiwa. Re sa dutše re sa tsebe letšatši goba iri ya go lebanya yeo letšatši la Jehofa le tlago go fihla ka lona, le gona na ruri go tloga go nyakega gore re le tsebe? Re ka kgona go itlhatsela re itokišitše e bile ke sona seo re tlago go tšwela pele re se dira. (Mat. 24:36, 44) Re kgodišegile gore ge feela re bota Jehofa ka mo go feletšego e bile re etiša Mmušo wa gagwe pele, re ka se ke ra nyamišwa.—Baroma 10:11.