Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Aloga ga Klase ya bo-136 ya Sekolo sa Beibele sa Watchtower sa Gilead

Go Aloga ga Klase ya bo-136 ya Sekolo sa Beibele sa Watchtower sa Gilead

Klase ya bo-136 ya Sekolo sa Beibele sa Watchtower sa Gilead e alogile ka Mokibelo March 8, 2014, ka morago ga go fetša tlwaetšo e thata ya thuto ya Beibele yeo e tšerego dikgwedi tše hlano. Sekolong se, badiredi ba nago le phihlelo ba Dihlatse tša Jehofa ba ithuta kamoo ba ka atlegago ka gona bodireding bja bona le go matlafatša tumelo ya Dihlatsegotee le bona. Batho ba 11 548 ba bile gona lenaneong ka go lebanya lefelong la tša thuto la Dihlatse tša Jehofa kua Patterson, New York goba ba le bogetše Inthaneteng kua Canada, Jamaica, Puerto Rico le United States.

“Dulang le na le Boemo bjo bja Monagano.” David Splane, e lego setho sa Sehlopha se Bušago sa Dihlatse tša Jehofa e bile e le modulasetulo wa lenaneo le, o ile a thea polelo ya gagwe go Bafilipi 2: 5-7 e rego: “Dulang le na le boemo bjo bja monagano bjo bo bego bo le go Kriste Jesu.” Ge Jesu a be a le mo lefaseng, o be a sa tshwenyege ka go ba le maemo, eupša ka boikokobetšo o ile a ikgafa modirong wa Modimo.

Ka mohlala, Jesu o ile a gana teko e nngwe le e nngwe ya Diabolo ka mantšu a rego “go ngwadilwe gwa thwe,” a tsopola mantšu ao Moshe a a boletšego ge a be a a botša setšhaba sa Isiraele. (Mateo 4:4, 7, 10; Doiteronomio 6:13, 16; 8:3) Jesu a ka be a ile a bolela mantšu ao ka boyena ka ge e be e le Morwa yo a tloditšwego wa Modimo, eupša ka boikokobetšo o ile a tšeela godimo seo Moshe a se boletšego. Ka mo go swanago, le rena re swanetše go lemoga bokgoni bja batho ba bangwe gomme re ba rete go tšwa pelong.

Ngwanabo rena Splane o boletše gape le kamoo Jesu a bontšhitšego boemo bjo bobotse bja kgopolo bofelong bja tlwaetšo ya gagwe ya mo lefaseng. Ge Jesu a rapela, o itše: “Ke go tagafaditše lefaseng ka go phetha modiro wo o nneilego wona gore ke o dire. Bjale wena Tate, ntagafatše ke le kgauswi le wena ka letago leo ke bego ke na le lona ke le kgauswi le wena pele lefase le eba gona.” (Johane 17:4, 5) Jesu ga se a tsoma ditokelo tše oketšegilego. O be a na le kgopelo e tee feela ya go bušetšwa boemong bja gagwe bja peleng goba go phetha modiro woo a bego a o dira ge a boela legodimong. Ka mo go swanago, dialoga tša Gilead di swanetše go ekiša Jesu ka go tshwenyega ka mošomo go e na le go tshwenyega ka maemo, ka go dula di kgotsofetše le ge di sa hwetše ditokelo tše oketšegilego ge di boela dikabelong tša tšona.

“Go Ikgafa Ntle le go Itshola.” William Malenfant, e lego mothuši Komiting ya go Ruta ya Sehlopha se Bušago, o kgothaleditše barutwana go latela mohlala wa boikgafo wa moapostola Paulo. Go e na le gore a gadime morago ka seo a ilego a se gafa tirelong ya gagwe go Modimo, Paulo o itše: “Ke obelela dilo tša pele, ke phegelela pakaneng ya go hwetša moputso.”—Bafilipi 3:13, 14.

Ka go ikgafa ga bona ntle le go itshola, barutwana ba ekiša bahlanka ba Modimo ba botegago ba mehleng ya bogologolo le ba mehleng yeno. Ngwanabo rena Malenfant o tsopotše mohlala wa Clara Gerber Moyer, yoo a ilego a thoma go hlankela Jehofa bjaneng bja gagwe. O ngwadile gore: “Ke tokelo e kgolo gakaakang go gadima morago nywageng e 80 ya tirelo e neetšwego go Modimo—ke sa itshole! Ge ke be nka kgona go bušeletša bophelo bja-ka, ke be ke tla bo phela ka tsela e swanago.”

“Go Dira Boboledi bja Mmušo le Barongwa e Bile le le Barongwa.” Gerrit Lösch, yo e lego setho sa Sehlopha se Bušago, o thušitše barutwana go tšeela godimo ditokelo tše pedi tše di kgethegilego tšeo di hwetšwago ke bao ba dirago boboledi. Sa pele, ba hlankela e le barongwa ba Modimo ge ba bolela molaetša wa gagwe wa ditaba tše dibotse tša Mmušo, ka gobane lentšu la Seheberu le la Segerika leo le dirišitšwego ka Beibeleng le bolela “morongwa” gape le ka fetolelwa e le “moromiwa.” Sa bobedi, barutwana ba dira boboledi bja ditaba tše dibotse ba hlahlwa ke dibopiwa tša moya e lego barongwa, go etša le ge Filipi a be a hlahlwa ke bona.—Ditiro 8:26-35.

Ka gona Ngwanabo rena Lösch o ile a laodiša diphihlelo tše mmalwa tšeo Dihlatse tša Jehofa di bilego le tšona modirong wa tšona wa go bolela ka Mmušo. Ka mohlala, kua Mexico Hlatse e bitšwago Gabino, yeo gantši e kokotago mojakong gatee goba gabedi, lekgeng le lengwe e ile ya kokota ka makga a mane. Monna yo a ilego a araba o boditše Gabino gore o be a le kgauswi le go ipolaya. Monna yoo o itše: “Ge o be o kokota ka lekga la bone, thapo e be e šetše e le molaleng wa ka. Eupša ke ile ka e bofolla e le gore ke yo bula mojako. Ke leboga ge o ile wa phegelela. Ge nkabe o se wa phegelela, nkabe ke ipolaile.”

Le ge ditiragalo tša mohuta wo di direga, tše dintši tša tšona ga di no itiragalela feela. Go e na le moo, di nea bohlatse bja gore barongwa ba Modimo ba hlahla modiro wa lefase ka bophara wa boboledi.—Kutollo 14:6.

“Yo a Hlomphegago o tla Šegofatšwa.” Michael Burnett, yo e lego mohlahli wa Gilead, o ile a godiša sehlogo se ka go diriša mohlala wa Jabese, e lego wa leloko la Juda, yo a bego “a hlomphega go feta bana babo.” Jabese o rapetše Modimo ka gore: “Ge e ba o tla ntšhegofatša, wa katološa selete sa ka gomme seatla sa gago sa ba le nna wa ba wa ntšhireletša bošuleng.”—1 Dikoronika 4:9, 10.

Barutwana ba ka ekiša mohlala o hlomphegago wa Jabese ka gore e be bao ba lebanyago dithapelong tša bona, kudukudu ge ba dutše ba kgopela Modimo go ba thuša go phetha morero wa tlwaetšo ya bona ya Gilead. Le gona ba ka lopa Modimo gore a ba šireletše bošuleng, e sego ka gore a ba šireletše ka mo go feleletšego bošuleng bjoo, eupša a ba thuše go phema go fenywa ke mafelelo a bobe. Modimo o arabile thapelo ya Jabese, e bile O tla dira se swanago le ka barutwana ba Gilead.

“Dulang le Kgohletša Mollo.” Mark Noumair, yo e lego mohlahli wa Gilead e bile e le mothuši Komiting ya go Ruta, o ile a thea polelo ya gagwe go 1 Bathesalonika 5:16-19. Go etša ge mollo wa kgonthe o nyaka makhura, oksitšene le phišo gore o tšwele pele o tuka, barutwana ba ka diriša dilo tše tše tharo go dira gore phišego ya bona bodireding e dule e tuka.

Sa pele, “thabang ka mehla.” (1 Bathesalonika 5:16) Barutwana ba ka hwetša lethabo—leo le tla kgohletšago phišego ya bona—ka gore ba naganišiše ka tšhegofatšo ya go amogelwa ke Jehofa. Sa bobedi, “le rapeleng ka mehla.” (1 Bathesalonika 5:17) Thapelo e bjalo ka oksitšene yeo e phedišago mollo. Re swanetše go oketša nako yeo re e fetšago dithapelong tša rena, re ntšhetše Modimo seo se lego ka pelong ya rena. Sa boraro, “le lebogeng se sengwe le se sengwe.” (1 Bathesalonika 5:18) Pelo e nago le tebogo e dira gore re tšeele godimo tswalano ya rena le Jehofa gotee le bana babo rena. Ngwanabo rena Noumair o itše: “Dulang le na le moya o mobotse wa go bontšha tebogo, e sego wa go dula le swayaswaya diphošo.”

“Go Tumiša Jehofa Gotee le Leratadima.” Sam Roberson, yo e lego mohlahli wa dikolo tša pušo ya Modimo, o theile matseno a gagwe mantšung a tšwago Beibeleng ao a bontšhago gore letšatši, kgwedi le dinaledi di tumiša Jehofa. (Psalme 19:1; 89:37; 148:3) O boletše gore barutwana le bona ba na le tokelo ya go tumiša Jehofa, ke moka o ile a ba hlahla ka go diragatša diphihlelo tšeo ba di thabetšego tirelong ya tšhemo. Ka mohlala, morutwana o ile a leboga monna yo a bego a le setulong sa digole ka gore a bontšhe tebogo ka morago ga ge morutwana yoo a ile a emiša koloi yeo a bego a e otlela gore a dumelele monna yoo go feta setarateng. Poledišano e ile ya latela ke moka monna yo o ile a amogela thuto ya mahala ya Beibele. Ka ge morutwana yo wa Gilead a ile a swara thuto dibekeng tšeo di latetšego, o ile a kgona go boledišana ka Beibele le batho ba mmalwa bao ba bego ba etetše monna yoo. Mafelelong, go ile gwa thongwa dithuto tša Beibele tše šupago ka baka la poledišano yeo ya mathomo.

“Tiang Matla ka Thuto ya Modimo.” Donald Gordon, yo e lego mothuši Komiting ya Kgatišo, o boledišane le banyalani ba babedi bao ba bego ba le klaseng ye. Yo mongwe wa bana babo rena yoo go boledišanwego le yena o gopola go gatelelwa ga Baefeso 3:16-20 sekolong se. Se se thušitše barutwana gore “ba matlafatšwe” ka gore ba ikokobetše le ka go ba bao ba batamelegago gomme ba lemoge gore Jehofa o sa dutše a na le mošomo o mogolo Hlatseng e nngwe le e nngwe. Yo mongwe wa dikgaetšedi o boletše gore o tšeela godimo tsela yeo mohlahli yo mongwe a ilego a kgothaletša barutwana gore ba se swane le hlapi e kgolo ka sebjaneng se senyenyane sa meetse yeo e ka se kgonego go gola, eupša ba swane le hlapi e nyenyane ka lewatleng le legolo. Kgaetšedi yo o itše: “Thuto yeo ke ithutilego yona ke gore ge e ba ke itshwara bjalo ka yo monyenyane mokgatlong wa Jehofa, gona Jehofa o tla nthuša gore ke gole moyeng.”

“Eka Jehofa a ka go Gopola ka tše Botse.” Mark Sanderson, yo e lego setho sa Sehlopha se Bušago, o neile polelo ya thwadi lenaneong la go aloga, gomme o tšere sehlogo sa gagwe go tšwa thapelong ya Nehemia, e rego: “Hle Modimo wa ka, o nkgopole ka tše botse.” (Nehemia 5:19; 13:31) Nehemia o be a sa boife gore ka tsela e itšego Jehofa o be a tla mo lebala le go lebala modiro wa gagwe tirelong ya Modimo. Go e na le moo, o be a lopa Modimo go mo gopola ka lerato le go mo šegofatša.

Ka tsela e swanago, barutwana ba ka holofela gore Jehofa o tla ba gopola ka tše botse ge e ba ba diriša dithuto tšeo ba ithutilego tšona Gilead. Ka mohlala, go rata Jehofa ka pelo ya bona ka moka e swanetše go ba lebaka le legolo la go mo hlankela. (Mareka 12:30) Aborahama o be a rata Jehofa ka pelo ya gagwe ka moka e bile Modimo o ile a mo gopola ka lerato. Gaešita le ka morago ga gore Aborahama a hwe ka mengwaga e dikete, Modimo o ile a mmitša ‘mogwera wa gagwe.’—Jesaya 41:8.

Se se latelago, Ngwanabo rena Sanderson o ile a gopotša barutwana go rata baagišani ba bona, kudukudu bana babo bona le dikgaetšedi tša Bakriste. (Mareka 12:31) Go swana le Mosamaria wa kgaugelo, yo a ‘itirilego moagišani go monna yo a wetšego bahlakoding,’ ba swanetše go gata mogato wa pele gomme ba thuše bao ba nyakago go thušwa. (Luka 10:36) E le gore a gatelele ntlha yeo, o dirišitše mohlala wa Nicholas Kovalak, yo e lego sealoga sa Gilead seo se hlanketšego e le molebeledi wa selete. Ngwanabo rena Kovalak o be a tsebja ka go ba borutho le go bontšha lerato. O kile a kgothaletša molebeledi yo mongwe wa mosepedi le mosadi wa gagwe gore ba šome ka thata bodireding bja bona, gomme o be a diriša dipolelwana tše bjalo ka “Rulaganyang bodiredi bja lena mathomong a letšatši, mathomong a beke, mathomong a kgwedi le mathomong a ngwaga.” Lega go le bjalo, ka morago ga go bona kgaetšedi yoo matšatši a sego kae, molebeledi yoo o mmoditše gore: “Lebala seo ke go boditšego sona. O šetše o šoma kudu. Fokotša lebelo la gago e le gore o ka kgona go tšwela pele o hlankela Jehofa.” Keletšo ya gagwe e botho le yeo e bontšhago kwelobohloko e thušitše kgaetšedi yoo go tšwela pele ka tirelo ya nako e tletšego ka mengwaga e masomesome.

Mafelelong, Ngwanabo rena Sanderson o ile a kgothaletša barutwana go phethagatša morero wa sekolo se ka go ruta le go tlwaetša ba bangwe. (2 Timotheo 2:2) Ge ba dutše ba hlankela dikabelong tša bona, ba ka matlafatša le go tiiša tumelo ya bana babo bona le dikgaetšedi gomme se sa ba kgodiša gore Jehofa o tla ba gopola gabotse.—Psalme 20:1-5.

Phetho. Ka morago ga gore barutwana ba hwetše di-diploma tša bona, sealoga se sengwe se ile sa bala lengwalo la tebogo leo le tšwago klaseng yeo. Ke moka ditho tše 15 tša klase ye di phethile lenaneo ka go opela kopelo 123 go tšwa kopelong ya Opelela Jehofa, e nago le sehlogo se rego “Badiši—Dimpho Tšeo e Lego Banna.”

 

Ithute ka mo go oketšegilego

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?

Go Fihla Mafelelong a Lefase

Sekolo sa Beibele sa Watchtower sa Gilead se swaregile kudu ka modiro o bohlokwa wa boboledi. Ipshine ka diphihlelo go tšwa go bao ba tsenego sekolo se se se kgethegilego.