Dipoloko tša Bakriste​—Di na le Seriti, ke tše sa Bitšego Kudu Gomme di Kgahla Modimo

GO KWAGALA dillo tša manyami mo gohle. Bao ba hwetšwego ba apere diaparo tše diso, ba lla ba sa kgaotše ba itahlela fase. Dibini di binela mmino o nago le morethetho. Lega go le bjalo, ba bangwe ba a ja e bile ba keteka ba thabile ba segela godimo. Ba bangwe ba robetše fase, ba tagilwe ke beine ya mopalema le bjala, dino tšeo di hwetšagalago ka boati. Ke tirelo efe? Dikarolong tše dingwe tša lefase, tše ke ditiragalo tše dingwe tšeo di diregago dipolokong moo batho ba makgolo ba bokanago bakeng sa go laela bahu.

Bontši bja Dihlatse tša Jehofa bo dula metseng yeo ba leloko le baagišani ba dumelago ditumela-khwele e bile ba boifago bahu. Batho ba dimilione ba dumela gore ge motho a e-hwa, o fetoga yo mongwe wa badimo, o ba le bokgoni bja go thuša goba go gobatša bao ba phelago. Ditirelo tše dintši tša poloko di tswalanywa le tumelo ye. Go ba gona, ke ga tlhago go llela motho yo a hwilego. Lebakeng le lengwe, Jesu le barutiwa ba gagwe ba ile ba llela bahu bao ba bego ba ba rata. (Joh. 11:33-35, 38; Dit. 8:2; 9:39) Lega go le bjalo, ga go na moo ba ilego ba bontšha mokgwa o feteletšego wa go lla woo o bego go tlwaelegile mehleng ya bona. (Luka 23:27, 28; 1 Bathes. 4:13) Ka baka la’ng? Lebaka le lengwe e be e le gore ba be ba tseba therešo mabapi le lehu.

Beibele e bolela ka mo go kwagalago gore: “Ba ba phelaxo ba tseba xore ba tlo hwa; ’me xo bahu xa xo se se tsebyaxo, . . . Leratô la bôná, lehlôyô la bôná, lehufa la bôná, di fedile kxalê . . . Tšohle tše ’atla sa xaxo se di kxônaxo, di dirê ka matla a xaxo, xobane kwa bo-dula-bahu mo O yaxo xôna, xa xo na modirô, xa xo na kxopolô, xa xo tsebô le bohlale.” (Mmo. 9:5, 6, 10) Ditemana tše tša Beibele tšeo di buduletšwego di bontšha gabotse gore ge motho a e-hwa, ga a sa tseba selo. A ka se kgone go nagana, go bolela goba go kwešiša e bile ga a sa na maikwelo. Go kwešiša therešo ye e bohlokwa ya Beibele go swanetše go tutuetša bjang tsela yeo Bakriste ba swarago ditirelo tša poloko?

‘Lesang go Kgwatha Selo se se sa Hlwekago’

Go sa šetšwe ditlogo goba ditšo tša tšona, Dihlatse tša Jehofa di tloga di efoga metlwae le ge e le efe yeo e tswalanago le tumelo ya gore bahu ba a bona le gore ba ka tutuetša maphelo a bao ba phelago. Metlwae e bjalo ka meletelo, meletlo yeo e dirwago ka morago ga poloko, meletlo ya go gopola matšatši a poloko le meetlo ya bohlologadi ke e sa hlwekago le yeo e sa kgahlišego Modimo ka gobane e tswalana le thuto e sego ya Mangwalo, ya botemona ya gore moya ga o hwe. (Hesek. 18:4, PK) Bakriste ba therešo ba “ka se jele ‘tafoleng ya Jehofa’ le tafoleng ya batemona,” ka gona ga ba tšee karolo ditirelong tše bjalo. (1 Bakor. 10:21) Ba kwa keletšo e rego: “Tšwang gare ga bona, le itlhaole, . . . le lese go kgwatha selo se se sa hlwekago.” (2 Bakor. 6:17) Lega go le bjalo, go gata mogato o bjalo ga go bonolo.

Afrika le mafelong a mangwe, ba bantši ba dumela gore badimo ba tla kgopišega ge go sa latelwe metlwae e itšego. Go hlokomologa metlwae e bjalo go ka tliša kotlo goba madimabe motseng. Ka baka la go gana go tšea karolo meetlong ya dipoloko yeo e sego ya Mangwalo, batho ba bantši ba Jehofa, ba ile ba bolelwa gampe, ba rogwa le go se amogelwe ke ba moo ba dulago gona goba ba leloko. Ba bangwe ba ile  ba bewa molato wa go ba majela-thoko le ba sa hlomphego bahu. Ka dinako tše dingwe, bao ba sa dumelego ba ile ba amoga Bakriste tirelo ya poloko ka kgang. Ka baka leo, re ka phema bjang go thulana le bao ba gapeletšago go kgomarela metlwae ya poloko yeo e sa kgahlego Modimo? Se bohlokwa le go feta, re ka dira’ng gore re dule re arogile meetlong e sa hlwekago le mekgweng yeo e ka senyago tswalano ya rena le Jehofa?

Dira Gore Boemo bja Gago bo Tsebje

Dikarolong tše dingwe tša lefase, ke setlwaedi gore ba leloko ba akaretšwe go direng diphetho mabapi le poloko ya mohu. Ka baka leo Mokriste o swanetše go bolela thwii gore tirelo ya poloko e tla rulaganywa le go swarwa ke Dihlatse tša Jehofa go ya ka melao ya motheo ya Beibele. (2 Bakor. 6:14-16) Seo se diregago tirelong ya poloko ya Mokriste ga se sa swanela go tshwenya matswalo a badumedi-gotee goba go kgopiša bao ba tsebago seo re se dumelago goba re se rutago ka bahu.

Ge e ba moemedi wa phuthego ya Bokriste a kgopetšwe gore a sware tirelo ya poloko, bagolo ba kgethilwego ba ka thuša ka go nea ditšhišinyo le thekgo ya moya e le gore dithulaganyo ka moka di ka dumelelana le tlhahlo ya Mangwalo. Ge e ba ba bangwe bao e sego Dihlatse ba nyaka go tsenya meetlo e sa hlwekago, go bohlokwa gore re dule re tiile gomme ka sebete re hlalose boemo bja rena bja Bokriste ka tsela e botho le e bontšhago tlhompho. (1 Pet. 3:15) Eupša go thwe’ng ge e ba ba leloko ba sa dumelego ba sa dutše ba gapeletša go tsenya meetlo e sa hlwekago dithulaganyong? Gona ba lapa bao ba dumelago ba ka dira phetho ya go se sa dira dithulaganyo tša poloko. (1 Bakor. 10:20) Ge se se direga, go ka newa polelo e kopana ya poloko Holong ya Mmušo goba lefelong le lengwe leo le swanelegago e le gore bao ba tlogago ba kwešitšwe bohloko ke lehu la yo ba mo ratago ba ka hwetša “khomotšo e tšwago Mangwalong.” (Baroma 15:4) Gaešita le ge setopo sa mohu se se gona, thulaganyo e bjalo e tla ba e nago le seriti le e amogelegago ka mo go feletšego. (Doit. 34:5, 6, 8) Go tsena ditaba gare mo go sego botho ga bao ba sa dumelego go ka oketša kgateletšego le manyami a seo se diregilego, eupša re ka homotšwa ke go tseba gore Modimo yo a ka re fago “matla a fetago a tlwaelegilego” o lemoga boikemišetšo bja rena bja go dira seo se nepagetšego.—2 Bakor. 4:7.

Ngwala Ditaelo tša Gago

Ge motho a ngwadile ditaelo mabapi le dithulaganyo tša poloko ya gagwe, go bonolo kudu go bontšha ditho tša lapa tšeo e sego Dihlatse mabaka, ka ge gantši di hlompha lentšu la mohu. Dintlha tše bohlokwa tšeo di swanetšego go ngwalwa ke kamoo poloko e swanetšego go swarwa ka gona, moo e swanetšego go swarelwa gona gotee le gore ke mang yoo a tlago go ba le matla go dira dithulaganyo tša tirelo ya poloko le go e swara. (Gen. 50:5) Seo se šomago kudu ke pampiri yeo e saenilwego e  bile e hlatsetšwego. Bao ba rulaganyetšago bokamoso bja bona e sa le pele ka temogo le bohlale tšeo di theilwego melaong ya motheo ya Beibele ba tseba gore ga se ba swanela go letela ge ba tšofetše goba ba babja la go hwa pele ba ka gata mogato wo.—Die. 22:3; Mmo. 9:12.

Ba bangwe ba ile ba ikwa ba thatafalelwa ke go ngwala ditaelo tše bjalo. Lega go le bjalo, go dira bjalo ke bohlatse bja kgolo ya Bokriste le go tshwenyega ka ba bangwe ka tsela e lerato. (Bafil. 2:4) Go kaone go swaragana le ditaba tše bjalo ka bowena go e na le gore o di tlogelele ditho tša lapa tšeo di nyamilego tšeo di ka gatelelwago gore di amogele mekgwa e sa hlwekago yeo mohu a bego a sa e dumele goba go e amogela.

Boloka Poloko e le e sa Bitšego Kudu

Dikarolong tše dintši tša Afrika, go phatlaletše tumelo ya gore tirelo ya poloko e swanetše go ba e kgolo le e bitšago kudu e le gore go se ke gwa galefišwa badimo. Ba bangwe ba diriša ditirelo tša poloko e le “pontšho ya bompogeng” ya maemo a bona setšhabeng le a tša boiphedišo. (1 Joh. 2:16) Go fetšwa nako e ntši e bile go dirwa maiteko a magolo le go diriša dilo tše dintši bakeng sa go dira seo go thwego ke poloko e swanetšego ya mohu. Bakeng sa go gogela batho ba bantši ka mo go kgonegago, go bewa dipampiri tše dikgolo tšeo di nago le seswantšho sa mohu mafelong a fapa-fapanego e le ge go kwala-kwatšwa tirelo ya poloko. Dikhipa tšeo di nago le seswantšho sa mohu di a dirwa le go phatlalatšwa e le gore di ka aparwa ke bao ba llago. Mapokisi a magolo le a bitšago kudu a bahu a a rekwa bakeng sa go kgahla batho. Nageng e nngwe ya Afrika, ba bangwe ba ile ba fihla bokgoleng bja go dira mapokisi a swanago le dikoloi, difofane, dikepe le dilo tše dingwe tšeo di diretšwego go bontšha bohumi, maemo gotee le matsaka. Setopo se ka ntšhwa ka lepokising gomme sa bewa godimo ga mpete o kgabišitšwego ka tsela e kgethegilego. Setopo sa mosadi se ka apešwa lešira gomme sa rwešwa mabenyabje a bitšago kudu, dipheta le go tlotšwa ka melorana. Na go tšea karolo medirong e bjalo ruri e ba mo go swanelago motho le ge e le ofe wa Modimo?

Bakriste ba gotšego ka tsebo ba bona bohlale bja go efoga go dira dilo ka mo go feteletšego moo go dirwago ke batho bao ba sa tsebego goba bao ba sa rego selo ka melao ya Modimo ya motheo. Re a lemoga gore metlwae le  ditirelo tša lenyatšo le tšeo e sego tša mangwalo ‘ga di tšwe go Modimo, eupša di tšwa lefaseng leo le fetago.’ (1 Joh. 2:15-17) Go nyakega gore re be šedi gore re se ke ra gogelwa mokgweng woo e sego wa Bokriste wa phadišano, re leka go phala ba bangwe. (Bagal. 5:26) Phihlelo e bontšha gore ge setšo le mokgwa wa bophelo wa setšhaba se itšego o theilwe poifong ya bahu, gantši ditirelo tša poloko e ba tše dikgolo le tšeo go lego thata go di laola, ka gona go ba bonolo gore di se laolege. Go boifa bahu go ka tutuetša bao ba sa dumelego go tsenela mekgwa yeo e sa hlwekago. Dipolokong tše bjalo, go ka ba le dillo tše di feteletšego, gwa gokarwa setopo, gwa bolelwa le sona moo o ka rego se a phela gomme gwa tsenywa tšhelete le dilo tše dingwe go sona. Ge e ba se se ka direga polokong ya Mokriste, e tla ba thogako e kgolo leineng la Jehofa le la batho ba gagwe.—1 Pet. 1:14-16.

Go tseba boemo bja kgonthe bja bahu go swanetše go re nea sebete sa go swara dipoloko tša rena ka tsela yeo e sa bontšhego moya wa lefase. (Baef. 4:17-19) Le ge Jesu e e be e le motho yo a phagamego le yo bohlokwa yo a kilego a phela, o ile a bolokwa ka tsela e kgahlišago le e sego ya bompogeng. (Joh. 19:40-42) Go bao ba nago le “monagano wa Kriste,” ga go na go nyatšega dipolokong tše bjalo. (1 Bakor. 2:16) Ka kgonthe, go dira gore dipoloko tša Bakriste e be tše bonolo le tšeo e sego tša bompogeng ke tsela e kaone ya go efoga seo se šilafetšego go ya ka Mangwalo, le go dira gore di bonagale di e-na le seriti, di ratega le go swanela bao ba ratago Modimo.

Na go Swanetše go Ketekwa?

E ka ba setlwaedi go ba leloko, baagišani le ba bangwe go kgobokana ka morago ga poloko bakeng sa go keteka le go binela mmino o llelago godimo. Mekete e bjalo ya dipoloko gantši e tswalanywa le botagwa le boitshwaro bjo bo gobogilego. Batho ba bangwe ba bolela gore go keteka mo go bjalo go ba thuša go tloša manyami a lehu. Ba bangwe ba nagana gore go dira bjalo ke karolo ya setšo sa bona. Lega go le bjalo, ba bantši ba dumela gore tirelo e bjalo e bohlokwa ka ge e swanetše go dirwa bakeng sa go hlompha le go tumiša mohu gotee le go lokolla moya wa mohu gore o ye go badimo.

Bakriste ba therešo ba bona bohlale bja keletšo ya Mangwalo e rego: “Nyamô e phala lesexô; mahló xe a lla, pelo e ba e botse.” (Mmo. 7:3) Go feta moo, ba tseba mohola wa go naganišiša ka bophelo bjo bokopana le ka kholofetšo ya go tsošwa ga bahu. Ee, go bao ba nago le tswalano ya kgaufsi le Jehofa, “’tšatši la xo hwa le phala la xo tswalwa.” (Mmo. 7:1) Ka gona, go tseba gore go keteka lehu go tswalana le ditumelo tša go dirišana le meoya le ditirelo tše gobogilego go dira gore Bakriste ba se rulaganye meletlo e bjalo goba go ya go yona. Go ba lefelong le tee le bao ba tsomago go ikgotsofatša lehung go tla bontšha go se hlomphe Modimo le matswalo a barapedi-gotee ba Jehofa.

Ba Bangwe a ba Iponele Phapano

Re thabile kudu gore re lokologile poifong e fošagetšego ya go boifa bahu yeo e tlwaelegilego bathong bao ba lego lefsifsing la moya! (Joh. 8:32) Bjalo ka “bana ba seetša,” re bontšha go nyama ga rena le go lla ka tsela yeo e bontšhago gore re na le tsebo dilong tša moya, tsela e leka-lekanego, e hlomphegago le yeo e tutuetšwago ke kholofelo ya kgonthe ya tsogo. (Baef. 5:8; Joh. 5:28, 29) Kholofelo e bjalo e tla re thibela go kgahlwa ke mekgwa e feteletšego ya go lla yeo e bonwago bathong bao “ba se nago kholofelo.” (1 Bathes. 4:13) E swanetše go re nea sebete sa go emela borapedi bjo bo sekilego re tiile e bile re sa boife batho.—1 Pet. 3:13, 14.

Go latela melao ya motheo ya Mangwalo go tla nea batho sebaka sa go ‘hlatha modirela-Morena le e a sa Mo direlego.’ (Mal. 3:18) Ka letšatši le lengwe, lehu le tla fedišwa. (Kut. 21:4) Ge re sa letile go phethagatšwa ga kholofetšo yeo, eka Jehofa a ka re hwetša re se na sepatso, re hloka sekodi gomme re arogile lefaseng le le kgopo le mekgweng ya lona e sa kgahlišego Modimo.—2 Pet. 3:14.

[Seswantšho go letlakala 30]

Go ngwala thulaganyo ya poloko ya gago ke tsela ya go bontšha bohlale

[Seswantšho go letlakala 31]

Dipoloko tša Bakriste e swanetše go ba tše sa bitšego kudu le tše nago le seriti