Na o Ekiša Jehofa ge o Hlokomela ba Bangwe?

‘LAHLELANG dipelaelo tša lena ka moka go Modimo, gobane o a le hlokomela.’ (1 Petro 5:7) A taletšo e borutho gakaakang! Jehofa Modimo ka noši o tshwenyegile ka batho ba gagwe. Re ka ikwa re šireletšegile ka diatleng tša gagwe.

Re swanetše go hlagolela le go bonagatša boemo bjo bo swanago bja kgopolo bja go hlokomela ba bangwe. Ka ge re sa phethagala, re swanetše go ela hloko dikotsi tše dingwe ge re bontšha go kgahlegela batho ba bangwe. Pele ga ge re ka ahla-ahla tše dingwe tša tšona, anke re boneng tše dingwe tša ditsela tšeo ka tšona Jehofa a hlokomelago batho ba gagwe.

Ge mopsalme Dafida a diriša papišo ya modiši, o hlalositše tlhokomelo ya Modimo ka gore: “Morêna ké modiši wa-ka; nka se hlôke selô. Ó nkhutamiša mafulong a matalá; ó nkiša meetseng a makhutšô. Ó lapološa môya wa-ka; . . . Le xe nka sepela molapong wa moriti wa lehu, nka se boife bobe, xobane ó na le nna.”—Psalme 23:1-4.

Ka ge Dafida ka boyena e be e le modiši, o be a tseba seo se bego se akaretšwa tabeng ya go hlokomela mohlape. Modiši o šireletša dinku tša gagwe dibateng, tše bjalo ka ditau, diphiri le dibere. O boloka mohlape o sa gašana, o tsoma dinku tše di timetšego, o bea dikwana tše di lapilego sehubeng sa gagwe gomme a thuša tše di babjago le tše di gobetšego. O nea mohlape meetse letšatši le letšatši. Se ga se bolele gore modiši o laola kgato e nngwe le e nngwe ya dinku. Dinku di lokologile go ya mo di nyakago go ya gona, lega go le bjalo, di šireletšegile.

Ke ka tsela yeo Jehofa a hlokomelago batho ba gagwe. Moapostola Petro o hlalositše gore: ‘Le šireletšwa ke matla a Modimo.’ Mo, ‘le šireletšwa’ ka go lebanya e bolela “go dula o beilwe leihlo.” (1 Peter 1:5, mongwalo wa tlase wa NW) Ka baka la go tshwenyega mo go tšwago pelong, Jehofa ka mehla o a re hlokomela, o dula a ikemišeditše go re thuša ge re tsoma thušo. Lega go le bjalo, Jehofa o re bopile re le dibopiwa tše di nago le tokologo ya boikgethelo, ka baka leo, ga a tsena-tsenane le ditiro gotee le diphetho tša rena ka moka. Re ka ekiša Jehofa bjang tabeng ye?

Ekiša Modimo ge o Hlokomela Bana ba Gago

“Bana ba motho ké neô ya Morêna.” Ka baka leo, batswadi ba swanetše go šireletša le go hlokomela bana ba bona. (Psalme 127:3) Seo se ka akaretša go kgothaletša bana go bolela seo ba se naganago le kamoo ba ikwago ka gona gomme seo se tšeelwe godimo ge go dirišanwa le bona. Ge e ba batswadi ba leka go laola kgato e nngwe le e nngwe ya bana ba bona, gomme ba hlokomologa dikganyogo tša bona ka mo go feletšego, go tla ba bjalo ka ge modiši a leka go laola dinku tša gagwe ka teu. Ga go na modiši yo a ka dišago mohlape  wa gagwe ka tsela yeo; le Jehofa ga a re diše ka tsela yeo.

Mariko * o dumela ka gore: “Ka nywaga e mentši ke be ke dutše ke botša bana ba-ka gore, ‘O swanetše go dira se’ le gore ‘Ga se wa swanela go dira seo.’ Ke be ke nagana gore se ke selo seo ke swanetšego go se dira bjalo ka motswadi. Ke be ke sa ba rete e bile ke sa be le poledišano ya kgonthe le bona.” Gaešita le ge morwedi wa Mariko a be a bolela ka nako e telele le bagwera ba gagwe mogaleng, o be a sa tšee nako e telele a boledišana le mmagwe. Mariko o tšwela pele ka gore: “Ke moka ke ile ka lemoga phapano. Ge morwedi’a-ka a bolela le bagwera ba gagwe, o diriša dipolelo tše di bontšhago kwelobohloko, tše bjalo ka gore ‘Ee, ke a dumela’ goba ‘Le nna ke ikwa bjalo.’ Ke ile ka thoma go diriša dipolelo tše swanago gore ke bone tsela yeo morwedi’a-ka a ikwago ka yona, gomme go se go ye kae ke ge dipoledišano tša rena di tšea nako e telele e bile e le tšeo di kgahlišago kudu.” Se se gatelela bohlokwa bja poledišano e botse, yeo gantši e lego ya bogwera, e sa sekamelago ka lehlakoreng le tee.

Batswadi ba swanetše go tseba bana ba bona e bile bana ba swanetše go kwešiša lebaka leo ka lona tlhokomelo ya batswadi e lego tšhireletšo. Beibele e eletša bana go kwa batswadi ba bona; gomme e nea lebaka: “Gore di go sepelele gabotse le gore o phele galelele lefaseng.” (Baefeso 6:1, 3) Bana bao ba kgodišegilego kudu gore go ikokobetša go a hola, ba nolofalelwa ke go ba bao ba kwago.

Ge o Hlokomela Mohlape wa Jehofa

Go tshwenyega ga Jehofa ka tsela e lerato go bonagatšwa ka phuthegong ya Bokriste. Ka ge e le Hlogo ya phuthego, Jesu Kriste o hlahla bagolo gore ba hlokomele mohlape wa gagwe. (Johane 21:15-17) Lentšu la Segerika bakeng sa molebeledi le tswalana le lediri leo le bolelago go “hlapetša ka kelohloko.” Ge moapostola Petro a gatelela kamoo se se swanetšego go dirwa ka gona, o laela bagolo gore: “Dišang mohlape wa Modimo wo o lego tlhokomelong ya lena, e sego ka go gapeletšwa, eupša e be ka go rata; le gona e se be ka go rata leruo la go se botege, eupša e be ka go fišega; gape e se be ka go buša bao e lego bohwa bja Modimo, eupša e be ka go ba mehlala go mohlape.”—1 Petro 5:2, 3.

Ee, modiro wa bagolo o swana le wa badiši. Bagolo ba Bakriste ba swanetše go hlokomela bao ba babjago moyeng le go ba phošolla e le gore maphelo a bona a ka bonagatša ditekanyetšo tše di lokilego. Bagolo ba ikarabela ka go rulaganya  mediro ya ka phuthegong, go rulaganya diboka le go boloka dilo di sepela ka thulaganyo ka phuthegong.—1 Bakorinthe 14:33.

Lega go le bjalo, mantšu a a ka mo godimo a Petro a re lemoša ka kotsi—ya gore bagolo ba ‘buše’ phuthego. Mogato o mongwe wo o ka lebišago moo ke gore mogolo a ka bea melao yeo e sa nyakegego. Ka baka la tutuetšo e matla ya go ikwa a gapeletšega go šireletša mohlape, mogolo a ka feteletša dilo. Phuthegong e nngwe ya ka Bohlabela, bagolo ba ile ba bea melao ya kamoo go swanetšego go dumedišanwa ka gona ka Holong ya Mmušo—e bjalo ka gore ke mang yo a swanetšego go bolela pele—ba dumela gore go latela melao ye go tla tlaleletša khutšong ya phuthego. Gaešita le ge go se pelaelo gore maikemišetšo a bona e be e le a mabotse, na bagolo bao ba be ba ekiša tsela yeo Jehofa a hlokomelago batho ba gagwe ka yona? Ka tsela e lemogegago, boemo bja kgopolo bja moapostola Paulo bo ile bja bonagatšwa mantšung a gagwe a rego: “E sego gore re babuši ba tumelo ya lena, eupša re badirišani gore le thabe, gobane le eme ka tumelo ya lena.” (2 Bakorinthe 1:24) Jehofa o bota batho ba gagwe.

Go oketša tabeng ya go phema go bea melao yeo e sa thewago Mangwalong, bagolo bao ba hlokomelago ba bontšha go tshwenyega ga bona e le ka kgonthe ka go se utolle tsebišo yeo e lego khupamarama. Ba lemoga temošo e tšwago go Modimo e rego: “Xe e le dithopa tša e mongwê, O se di utollê.”—Diema 25:9.

Moapostola Paulo o bapišitše phuthego ya Bakriste ba tloditšwego le mmele wa motho, a re: “Modimo o kopantše mmele . . . gore go se be le karogano mmeleng, eupša gore ditho tša wona di hlokomelane ka mo go swanago.” (1 Bakorinthe 12:12, 24-26) Polelwana ya Segerika bakeng sa “hlokomelane ka mo go swanago” ka go lebanya e bolela ‘go tshwenyega ka yo mongwe le yo mongwe wa bona.’ Ditho tša phuthego ya Bokriste di swanetše go kgahlegelana ka mo go tseneletšego.—Bafilipi 2:4.

Bakriste ba therešo ba ka bontšha bjang gore ba ‘tshwenyega ka yo mongwe le yo mongwe wa bona’? Ba ka bontšha gore ba tshwenyega ka ditho tše dingwe tša phuthego ka dithapelo tša bona le ka go nea thušo e šomago go bao ba e hlokago. Se se thuša go tšweletša botse go ba bangwe. Ela hloko kamoo Tadataka a ilego a thušwa ka gona ka tlhokomelo e bjalo e lerato. Ge a be a kolobetšwa ge a e-na le nywaga e 17, e be e le yena feela ka lapeng labo yo a bego a hlankela Jehofa. O a laodiša: “Lapa le lengwe ka phuthegong le be le ntaletša gantši go tla go ja dijo le lona le go thabela bogwera. Ke be ke e-ya lapeng leo mo e ka bago mesong e mengwe le e mengwe ge ke be ke le tseleng ya go ya sekolong bakeng sa go ahla-ahla le lona temana ya letšatši ya Beibele. Ke ile ka hwetša temošo mabapi le kamoo nka lebeletšanago le mathata ka katlego kua sekolong, gomme re be re rapela ka mathata ao re le gotee. Ke ithutile moya wa go nea lapeng le.” Ga bjale Tadataka o diriša seo a ithutilego sona ka go hlankela go e nngwe ya diofisi tša makala tša Dihlatse tša Jehofa.

Moapostola Paulo o ile a lemoša ka kotsi e lemogegago mabapi le go bontšha kgahlego go ba bangwe. O ile a bolela ka basadi ba bangwe bao e bilego “basebi le bao ba tsena-tsenago ditabeng tša batho ba bangwe, ba bolela ka dilo tšeo ba sa swanelago go bolela ka tšona.” (1 Timotheo 5:13) Gaešita le ge e le mo go swanetšego go kgahlegela batho ba bangwe, re swanetše go ba šedi gore ga re feteletše dilo ka go dira gore re tsena-tsene ditabeng tša bona tša motho ka noši. Go kgahlegela ba bangwe ka tsela e feteletšego go ka bonagala ge re ‘bolela ka dilo tšeo re sa swanelago go bolela ka tšona,’ tše bjalo ka dipolelo tša go swaya diphošo.

Re swanetše go gopola gore Bakriste ba ka fapana tseleng yeo ba rulaganyago dilo tša bona tša motho ka noši, seo ba kgethago go se ja gotee le mohuta wa boitapološo bjo bo agago bjo ba bo kgethago. Ka go dumelelana le ditekanyetšo tše di bontšhitšwego ka melaong ya motheo ya Beibele, yo mongwe le yo mongwe o lokologile go dira phetho ya seo a tlago go se dira. Paulo o eleditše Bakriste ba Baroma gore: “A re se ke ra hlwa re ahlolana. . . . A re phegeleleng dilo tše di išago khutšong le dilo tše e lego tša go agana.” (Baroma 14:13, 19) Go tshwenyega ga rena ka yo mongwe le yo mongwe wa rena ka phuthegong go swanetše go bonagala ka go ikemišetša go thušana, e sego ka go tsena-tsena ditabeng tša ba bangwe. Ge re hlokomelana ka tsela ye, lerato le botee di ba gona ka lapeng le ka phuthegong.

[Mongwalo wa ka tlase]

[Seswantšho go letlakala 19]

Lemoga kamoo bana ba gago ba naganago le go ikwa ka gona ka go ba reta le ka go ba kwela bohloko