Bonang! Seetša se a Makatša!

GE E ba o kile wa phopholetša tsela lefsifsing, gona o a tseba gore go ferekanya gakaakang. Ruri seetša se tliša kimologo! Le wena o ka no ba o ile wa ba boemong bjo bo ka swantšhwago le lefsifsi. Mohlomongwe se se ka ba se ile sa direga ge o be o palelwa ke go rarolla bothata. Ke moka ganyenyane-ganyenyane o ile wa bona seetša—wa kgona go rarolla bothata. Go tšwa lefsifsing le le bjalo go ya seetšeng go a thabiša.

Lekgolong la pele la nywaga batho ka kakaretšo ba be ba le lefsifsing la moya. A ngwalela bao ba ilego ba tlogela ditumelo tša bona tša pele e le gore ba amogele Bokriste, moapostola Petro o ngwadile gore: ‘Modimo o le biditše lefsifsing gomme a le biletša seetšeng sa gagwe se se makatšago.’ (1 Petro 2:9) Boemong bja bona, se se bile bjalo ka phetogo ya go tloga kgamping ya lefsifsi go ya seetšeng seo se phadimago. Le gona go ka swantšhwa le go ba noši, o se na kholofelo gomme ka morago wa ba karolo ya lapa leo le nago le bokamoso bjo bo kgonthišeditšwego.—Baefeso 2:1, 12.

“O Tlogetše Lerato le o Bego o E-na le Lona Pele”

Bakriste ba pele ba ile ba hwetša “therešo”—tumelo ya kgonthe ya Bokriste. (Johane 18:37) Ba ile ba bona seetša se se makatšago sa therešo gomme ba dira diphetogo tša go tloga lefsifsing la moya go ya seetšeng se se phadimago. Lega go le bjalo, ge nako e dutše e feta, phišego ya Bakriste ba bangwe e ile ya fola. Ka mohlala, bofelong bja lekgolo la pele la nywaga go be go e-na le mathata a magolo ka phuthegong ya Efeso. Jesu Kriste yo a tsošitšwego o ile a lemoga bothata bjoo, a bolela gore: “Ke go solela se, gore o tlogetše lerato le o bego o e-na le lona pele. Ka gona, gopola moo o welego gona o itshole, o dire ditiro tša pele.” (Kutollo 2:4, 5) Bakriste ba Efeso ba be ba swanetše go tsošološa lerato leo ba ratago Modimo le therešo ka lona.

Go thwe’ng ka rena? Le rena re ile ra thabišwa ke go bona seetša, go tseba therešo e makatšago ya Lentšu la Modimo. Re ile ra thoma go rata therešo. Eupša mathata a batho a tlwaelegilego a ka fokodiša go rata ga rena therešo. Le mathata a sa tlwaelegago a ‘mehla ya bofelo’ a ka tlaleletša go seo. Re phela lefaseng leo le hlaolwago ka “dinako tše hlobaetšago tšeo go lego thata go lebeletšana le tšona”—lefase leo le tletšego ka batho bao e lego “baithati, barati ba tšhelete, ba go ipona, ba ikgogomošago, barogaki, ba go se kwe batswadi, ba go se leboge, ba go se botege.” (2 Timotheo 3:1, 2) Tutuetšo ya bona e ka fodiša phišego ya rena le go dira gore lerato la rena bakeng sa Jehofa le fole.

Ge e ba lerato la rena la pele le fodile, re swanetše go ‘gopola moo re welego gona gomme re itshole.’ Re swanetše go boela boemong bja rena bja pele bja moya. Go feta moo, re swanetše go hlokomela gore re se ka ra dumelela go leboga ga rena therešo go hwelela. Go bohlokwa gakaakang gore ka moka ga rena re boloke pono ya rena e nepagetše e bile e thabiša le go dira gore lerato leo re ratago Modimo le therešo ka lona le dule le le gona!

‘Therešo Yeo e re Lokollago’

Seetša sa therešo ya Mangwalo se a kgahliša ka gobane Beibele e araba dipotšišo tše bohlokwa  tšeo di gakantšhitšego batho ka nywaga-kgolo e mentši. Gare ga dipotšišo tšeo go na le tše: Ke ka baka la’ng re phela? Morero wa bophelo ke ofe? Ke ka baka la’ng go e-na le bokgopo? Na go na le bophelo ka morago ga lehu? Jehofa o re hlabišeditše seetša ka ditherešo tše di kgahlišago tša Beibele. Na seo ga se re thabiše? Eka re ka tšeela dilo tšeo re ithutilego tšona godimo!

Jesu o boditše balatedi ba gagwe gore: “Le tla tseba therešo, gomme therešo e tla le lokolla.” (Johane 8:32) Sehlabelo sa Jesu sa topollo se dirile gore go lokologa sebeng le lehung go kgonege. Eupša gape ditherešo tše tše bohlokwa di re lokollotše lefaseng leo le hlokago tsebo le leo le sa tsepamago leo le aparetšwego ke lefsifsi. Go naganišiša ka tebogo ka seo re ithutilego sona go tla re thuša go matlafatša go rata ga rena Jehofa le Lentšu la gagwe.

Moapostola Paulo o ngwaletše Bakriste ba Thesalonika gore: “Eitše ge le amogela lentšu la Modimo, leo le le kwelego go tšwa go rena, la le amogela, e sego e le lentšu la batho, eupša kamoo ruri le lego ka gona, e le lentšu la Modimo, leo gape le šomago go lena badumedi.” (1 Bathesalonika 2:13) Bathesalonika ba ile ba kwa le go ‘amogela lentšu la Modimo ka lethabo.’ Ba ile ba tloga “lefsifsing.” Ke moka, ba fetoga “barwa ba seetša.” (1 Bathesalonika 1:4-7; 5:4, 5) Bakriste bao ba ile ba ithuta gore Jehofa ke Mmopi le gore ke yo matla ohle, yo bohlale, yo lerato e bile o a gaugela. Go swana le balatedi ba bangwe ba Kriste, ba ithutile le gore Jehofa o dirile tokišetšo ya go phumola dibe tša bona ka sehlabelo sa topollo sa Morwa wa gagwe, Jesu Kriste.—Ditiro 3:19-21.

Le ge Bathesalonika ba sa ka ba tseba ditherešo tša Beibele ka moka, ba be ba tseba moo ba bego ba swanetše go tsoma tsebo gona. Mangwalo a buduletšwego a ka dira gore motho wa Modimo “a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.” (2 Timotheo 3:16, 17) Bakriste ba Thesalonika ba be ba ka tšwela pele ba ithuta, ba bona leboelela gore therešo e tšwago go Modimo e kgahliša e le ka kgonthe. Ba be ba e-na le lebaka la go thaba ka dinako tšohle. (1 Bathesalonika 5:16) Le rena re swanetše go dira bjalo.

Seetša Ditseleng tša Rena

Ge mopsalme a bontšha lebaka leo le dirago gore seetša se kgahliše, o opetše ka gore: “’Ntšu la xaxo ké lebônê la dinaô tša-ka, ké seetša tseleng ya-ka.” (Psalme 119:105) Tlhahlo yeo re e hwetšago Lentšung la Modimo e ka re thuša go rulaganya bophelo bja rena le go phela bophelo bjo bo nago le morero. Ga se ra swanela go swana le sekepe seo se tšewago ke phefo. Go tseba therešo le go e diriša go re šireletša gore re se ke ra “akga-akgwa bjalo ka ge eka re akga-akgwa ke maphoto le go išwa kua le kua ke phefo e nngwe le e nngwe ya thuto ka bohwirihwiri bja batho.”—Baefeso 4:14.

Beibele e bolela gore: “Se boteng maxoši e lexo bana ba batho, bao xo sexo phološô xo bôná.” E bolela gape gore: “Wa lehlôxônôlô ké eo phološô ya xaxwe e lexo Modimo wa Jakobo, pôtô ya xaxwe a re ké Morêna Modimo wa xaxwe.” (Psalme 146:3, 5) Go feta moo, go bota Jehofa go re thuša go fenya poifo le pelaelo. Moapostola Paulo o ngwadile gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; gomme khutšo ya Modimo ye e fetago kgopolo yohle e tla diša dipelo tša lena le matla a lena a monagano ka Kriste Jesu.” (Bafilipi 4:6, 7) Go sepela seetšeng sa Lentšu la Modimo go re hola e le ruri.

 Go Phadima Bjalo ka Diediši Lefaseng

Lebaka le lengwe leo le dirago gore seetša sa Lentšu la Modimo se makatše ke gore se bulela batho mejako ya go hwetša dikabelo tše kaone-kaone bophelong. Jesu o laetše balatedi ba gagwe gore: “E-yang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona. Bonang! Ke na le lena matšatši ka moka go fihla bofelong bja tshepedišo ya dilo.” O thomile taelo ya gagwe ka go bolela gore: “Ke neilwe matla ka moka legodimong le lefaseng.”—Mateo 28:18-20.

Ela hloko gore ke mang yo a thušago Bakriste ba therešo go dira modiro wa go bolela ditaba tše dibotse le go ruta batho ba ditšhaba ka moka ditherešo tša Beibele. Jesu o holofeditše balatedi ba gagwe gore o tla ba le bona. O be a dutše a ba thuša le go ba thekga bodireding bja bona ge ba be ba dira gore ‘seetša sa bona se phadime’ ka tsela yeo le ka ‘mediro e mengwe e mebotse.’ (Mateo 5:14-16) Barongwa le bona ba tšea karolo modirong wo wa boebangedi. (Kutollo 14:6) Go thwe’ng ka Jehofa Modimo? Moapostola Paulo o ngwadile gore: “Nna ke bjetše, Apollo a nošetša, eupša Modimo o tšwetše pele a godiša.” Ruri ke tokelo go ba gare ga “badirišani ba Modimo”!—1 Bakorinthe 3:6, 9.

Le gona, nagana kamoo maiteko a rena kabelong ye yeo re e neilwego ke Modimo a šegofatšwago ka gona. Ga go na selo seo se ka bapetšwago le tokelo yeo re e neilwego ke Modimo ya go ‘bonega re le diediši lefaseng.’ Ruri re kgona go thuša ba dipelo tše di botegago ka go ediša seetša se se tšwago Lentšung la Modimo ka dipolelo tša rena le ka mediro. (Bafilipi 2:15) Le gona re ka thaba ge re dutše re bolela le go ruta ka mafolofolo, ‘gobane Modimo ga se yo a sa lokago moo a ka lebalago modiro wa rena le lerato leo re le bontšhitšego leineng la gagwe.’—Baheberu 6:10.

‘Reka Sehlare sa Mahlo Gore o Tlotše Mahlo a Gago’

Molaetšeng wa gagwe o yago phuthegong ya lekgolong la pele la nywaga ya Laoditsea, Jesu o boletše gore: “O reke [go nna] . . . sehlare sa mahlo gore o tlotše mahlo a gago gore o bone. Ke sola le go laya ka moka bao ke nago le maikwelo a borutho ka bona.” (Kutollo 3:18, 19) Sehlare sa kgonthe bakeng sa bofofu bja moya ke “sehlare sa mahlo”—dithuto le tayo tša Jesu. Ge e ba re nyaka go dula re e-na le ponagalo e botse ya moya, re swanetše go amogela tayo ya gagwe le go ikokobeletša yona gaešita le go ikokobeletša tayo yeo e hwetšwago ka Beibeleng ka moka. Le gona re swanetše go amogela mogopolo wo o swanago le wa Kriste le go ekiša mohlala wa gagwe. (Bafilipi 2:5; 1 Petro 2:21) Sehlare sa mahlo ga se hwetšwe ka ntle le tefo. Jesu o itše: ‘O se reke go nna.’ Theko e akaretša nako le go iteka ga rena.

Ge re e-tšwa lefsifsing gomme re tsena ka phapošing yeo e nago le seetša, mahlo a rena a ka tšea nako e teletšana pele a tlwaela maemo ao. Ka mo go swanago, go ithuta Lentšu la Modimo le go bona seetša sa therešo go tšea nako. Go naganišiša ka seo re ithutago sona le go naganišiša kamoo therešo e lego bohlokwa ka gona le gona go tšea nako. Lega go le bjalo, ga go bitše kudu. Ka baka la’ng? Ka gobane seetša se a makatša!

[Seswantšho go letlakala 14]

“O reke [go nna] . . . sehlare sa mahlo gore o tlotše mahlo a gago gore o bone”