Phihlelo

Go Hlankela ka Lethabo go sa Šetšwe Mafokodi

KA GE GO ANEGA VARNAVAS SPETSIOTIS

Ka 1990 ge ke e-na le nywaga e 68 ke ile ka golofala ka mo go feletšego. Lega go le bjalo, gona bjale ke na le nywaga e ka bago 15 ke hlankela bjalo ka modiredi wa nako e tletšego sehlakahlakeng sa Tsipero. Ke’ng se se nneilego matla a go dula ke hlankela Jehofa ka mafolofolo go sa šetšwe mafokodi a-ka?

K E BELEGETŠWE lapeng la bana ba senyane—bašemane ba bane le banenyana ba bahlano—ka October 11, 1922. Re be re dula motsaneng wa Xylophagou kua Tsipero. Le ge batswadi ba-ka ba be ba humile kudu, go fepa lapa le legolo ka tsela ye go be go akaretša go šoma ka thata ka mašemong.

Tate e lego Antonis, e be e le motho yo a ratago go bala ka tlhago e bile a rata go tseba dilo. Kapejana ka morago ga ge ke belegwe, ge tate a be a etetše morutiši wa sekolo wa motsaneng wa gabo rena, o ile a bona pampišana e nago le sehlogo se se rego Peoples Pulpit, yeo e gatišitšwego ke Barutwana ba Beibele (ka ge Dihlatse tša Jehofa di be di tsebja bjalo ka nako yeo). O ile a thoma go e bala, gomme kapejana a kgahlwa ke dikagare tša yona. Ka baka la seo, tate le yo mongwe wa bagwera ba gagwe e lego Andreas Christou, ba ile ba ba gare ga batho ba pele sehlakahlakeng se bao ba ilego ba kopanela le Dihlatse tša Jehofa.

Kgolo go sa Šetšwe Kganetšo

Ge nako e dutše e e-ya, bobedi bja bona ba ile ba hwetša dikgatišo tše di oketšegilego tše di theilwego Beibeleng go Dihlatse tša Jehofa. Kapejana, Tate le Andreas ba ile ba tutueletšega gore ba botše batho ba motsaneng wa gabo bona ditherešo  tša Beibele tšeo ba bego ba ithuta tšona. Modiro wa bona wa boboledi o ile wa tsoša kganetšo e kgolo e tšwago go baruti ba kereke ya Gerika ya Orthodox le go ba bangwe bao ba bego ba nagana gore Dihlatse tša Jehofa di na le tutuetšo e mpe.

Batho ba bantši ba tikologong ye ba be ba hlompha barutiši ba ba babedi ba Beibele. Tate o be a tsebja kudu ka botho bja gagwe le go fana ka seatla se se bulegilego. Gantši o be a thuša malapa a diilago. Ka dinako tše dingwe o be a e-tšwa ka gae bošego re sa mmone gomme a tlogela korong goba borotho mejakong ya malapa ao a diilago. Boitshwaro bjo bjalo bja Bokriste bjo bo se nago boithati bo ile bja dira gore molaetša wa badiredi ba ba babedi e be o rategago le go feta.—Mateo 5:16.

Mafelelo a seo e bile gore batho ba ka bago 12 ba ile ba amogela molaetša wa Beibele. Ge kwešišo ya bona ka therešo e dutše e gola, ba ile ba bona go nyakega gore ba kopane ka malapeng a fapa-fapanego e le gore ba ithute Beibele e le sehlopha. Mo e ka bago ka 1934, Nikos Matheakis, e lego modiredi wa nako e tletšego yo a tšwago Gerika, o ile a fihla Tsipero gomme a etela sehlopha sa kua Xylophagou. Ka go se fele pelo le ka boikemišetšo, Ngwanabo Rena Matheakis o ile a thuša go rulaganya sehlopha le go se thuša go ba le kwešišo e kaone ya Mangwalo. Sehlopha se se ile sa bopa motheo wa phuthego ya pele ya Dihlatse tša Jehofa kua Tsipero.

Ge modiro wa Bokriste o dutše o tšwela pele gomme batho ba bantši ba amogela therešo ya Beibele, bana babo rena ba ile ba bona go nyakega gore ba hwetše lefelo la sa ruri leo ba bego ba ka swarela diboka tša bona go lona. Mogolo’a-ka, e lego George le mosadi wa gagwe Eleni ba ile ba neela ka phapoši yeo ba bego ba e diriša e le bobolokelo. Moago wo, woo o bego o lebane le legae la bona, o ile wa lokišwa gomme wa fetošwa gore e be lefelo le le swanetšego la diboka. Ka go rialo, bana babo rena ba ile ba ba le Holo ya bona ya Mmušo ya pele sehlakahlakeng se. Ba be ba tloga ba leboga se! Le gona, se ruri se ile sa dira gore go be le kgolo e oketšegilego!

Go Dira Gore Therešo e be Ya-ka

Ka 1938, ge ke e-na le nywaga e 16, ke ile ka dira phetho ya go ba mmetli. Ka baka leo, tate o ile a nthomela motseng-mošate wa Tsipero, e lego Nicosia. Ka go naganela pele, o ile a  rulaganyetša gore ke dule le Nikos Matheakis. Ngwanabo rena yo yo a botegago o sa dutše a gopolwa ke ba bantši sehlakahlakeng se ka baka la phišego ya gagwe le go amogela baeng. Phišego ya gagwe yeo e bonwago ke bohle le go dula a le sebete e be e le dika tše di nyakegago go Mokriste le ge e le ofe yo a bego a dula Tsipero mehleng yeo ya kgale.

Ngwanabo rena Matheakis o ile a nthuša kudu go hwetša thuto e tiilego ya motheo ya Beibele le go dira tšwelopele ya moya. Ge ke be ke dula le yena, ke be ke e ba gona dibokeng ka moka tšeo di bego di swarelwa legaeng la gagwe. Ka lekga la pele, ke ile ka kwa lerato la-ka go Jehofa le gola. Ke ile ka ikemišetša go aga tswalano e nago le morero le Modimo. Ka morago ga dikgwedi tše sego kae feela, ke ile ka kgopela Ngwanabo Rena Matheakis gore ke ye le yena tirelong ya tšhemo. E be e le ka 1939.

Ka morago ga nakwana ke ile ka boela gae gore ke yo etela ba lapa lešo. Go ba le tate ka nakwana go ile gwa matlafatša kgodišego ya-ka ya gore ke hweditše therešo le morero wa bophelo. Ka September 1939, Ntwa ya II ya Lefase e ile ya thoma. Masogana a mantši ao e lego dithaka tša-ka a ile a ithapela go ya ntweng, eupša ka go latela tlhahlo ya Beibele, ke ile ka phetha ka go kgomarela boema-gare. (Jesaya 2:4; Johane 15:19) Ngwageng wona woo, ke ile ka ineela go Jehofa gomme ka kolobetšwa ka 1940. E be e le ka lekga la pele ke ikwa gore ga ke sa boifa batho!

Ka 1948, ke ile ka nyala Efprepia. Re ile ra šegofatšwa ka bana ba bane. Go se go ye kae, re ile ra lemoga gore re be re swanetše go šoma ka thata e le gore re ba godiše “ka tayo le tlhahlo ya monagano ya Jehofa.” (Baefeso 6:4) Dithapelo tša rena le maiteko a rena di be di lebišitšwe tabeng ya go ruta bana ba rena go rata Jehofa ka mo go tseneletšego le go hlompha melao ya gagwe le melao ya motheo.

Mathata a tša Maphelo a Tliša Ditlhohlo

Ka 1964, ge ke e-na le nywaga e 42, ke ile ka thoma go hwa bogatšu ka letsogong la-ka le letona le ka leotong le letona. Ganyenyane-ganyenyane, bothata bjo bo ile bja fetela le ka lehlakoreng la-ka le letshadi. Ge ke hlahlobja go ile gwa hwetšwa gore ke swerwe ke bolwetši bja go fokola ga mešifa (muscle atrophy), e lego bolwetši bjo bo sa alafegego bjoo mafelelong bo dirago gore motho a feleletše a golofetše ka mo go feletšego. Ke ile ka nyama kudu ge ke e-kwa se. Dilo di ile tša direga ka lebelo kudu e bile go sa letelwa! Ke ile ka tlala kgalefo, ka ipotšiša gore ‘Ke ka baka la’ng se se ntiragalela? Ke ka baka la’ng ke  otlwa?’ Lega go le bjalo, ge nako e dutše e e-ya, ke ile ka kgona go fenya manyami ao ke bilego le ona ka morago ga go botšwa ka bolwetši bjo. Ke moka ke ile ka thoma go tshwenyega le go se kgonthišege ka seo se tlago go direga. Ke be ke dula ke ipotšiša dipotšišo tše dintši. Na ke tla golofala ka mo go feletšego gomme ka ithekga ka mo go feletšego ka thušo ya batho ba bangwe? Ke tla lebeletšana bjang ka katlego le bolwetši bjo? Na ke tla kgona go hlokomela lapa la-ka—mosadi wa-ka le bana ba rena ba bane? Go nagana ka dilo tše go be go nkweša bohloko.

Ge ke le boemong bjo, ke ile ka lemoga go nyakega ga go retologela go Jehofa ka thapelo go feta le ge e le neng pele le go bolela le yena go tšwa pelong ka dilo ka moka tšeo di ntshwenyago le tšeo di nnyamišago. Ke be ke rapela bošego le mosegare ke tletše megokgo ka mahlong. Go se go ye kae ke ile ka ikwa ke homotšegile. Mantšu a homotšago a Bafilipi 4:6, 7 a ile a ipontšha e le a therešo kudu boemong bja-ka, ge a re: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; gomme khutšo ya Modimo ye e fetago kgopolo yohle e tla diša dipelo tša lena le matla a lena a monagano ka Kriste Jesu.”

Go Lebeletšana ka Katlego le go Golofala

Boemo bja-ka bo ile bja tšwela pele bo mpefala. Ke ile ka lemoga gore ke swanetše go itlwaelanya le maemo a-ka a mafsa ka go akgofa. Ka ge ke be nka se sa kgona go šoma ke le mmetli, ke ile ka phetha ka go hwetša mošomo o sego thata wo o bego o swanela boemo bja-ka bja mmele le wo o bego o tla dira gore ke kgone go tšwela pele ke hlokomela lapa la-ka. Mathomong, ke be ke rekiša ice cream yeo ke bego ke e rwala ka koloi e nyenyane. Ke dirile se ka nywaga e ka bago e tshela go fihlela bolwetši bja-ka bo dira gore ke sepele ka setulo sa digole. Ke moka ke ile ka nyaka mešomo e mengwe e bonolo yeo ke bego nka kgona go e dira.

Ga e sa le go tloga ka 1990, boemo bja-ka bja tša maphelo bo mpefetše go fihla bokgoleng bja gore ke se sa hlwa ke kgona go dira mošomo wa boiphedišo le gatee. Ga bjale, ke ithekgile ka mo go feletšego ka thušo ya ba bangwe, gaešita le medirong e sa rego selo yeo e ka dirwago ke motho yo a phetšego gabotse. Ke swanetše go thušwa go ya malaong, go hlapa le go apara. E le gore ke ye dibokeng tša Bokriste, ke swanetše go sepedišwa ka setulo sa digole go ya koloing ke moka ke tsenywe ka gare ga yona. Ge ke fihla Holong ya Mmušo, ke swanetše go ntšhwa ka koloing, ke dudišwe setulong sa digole gomme ke sepedišwe ka sona go tsena ka Holong. Nakong ya diboka, ke dula kgaufsi le seruthufatši sa mohlagase e le gore ke ruthetše maoto a-ka.

Lega go le bjalo, go sa šetšwe go golofala, ke ba gona dibokeng ka moka mo e nyakilego go ba ka mehla. Ke lemoga gore dibokeng ke moo Jehofa a re rutago, gomme go ba le bana bešo le dikgaetšedi ba moya ke setšhabelo sa kgonthe le mothopo wa thekgo le kgothatšo. (Baheberu 10:24, 25) Go dula ke etelwa ke badumedi-gotee le nna ba godilego moyeng ka mehla go a nthuša. Ruri ke ikwa go swana le Dafida ge a re: “Senwêlô sa-ka se tletše wa xo falala.”—Psalme 23:5.

Mosadi wa-ka yo a rategago e bile mothuši yo mobotse nywageng ye ka moka. Bana ba-ka le bona ba nthuša kudu. Ka nywaga e mmalwa bjale, ba nthušitše ka dinyakwa tša-ka tša letšatši le letšatši. Seo ba se dirago ga se bonolo, gomme ge nywaga e dutše e e-ya, go ba thata kudu le go feta go ntlhokomela. E tloga e le mehlala ya go hlagolela go se fele pelo le go ikgafa, gomme ke rapela Jehofa gore a tšwele pele a ba šegofatša.

Tokišetšo e nngwe e kgahlišago yeo Jehofa a e dirilego ya go matlafatša bahlanka ba gagwe ke thapelo. (Psalme 65:2) E le go araba dithapelo tša-ka tše tšwago pelong, Jehofa o nneile matla a go tšwela pele ke botega nywaga ye ka moka. Thapelo e a nkimolla e bile e nthuša gore ke tšwele pele ke thabile, kudu-kudu ge ke ikwa ke nyamile. Go bolela le Jehofa ka mehla go a ntapološa e bile go tsošološa boikemišetšo bja-ka bja gore ke tšwele pele. Ke tloga ke kgodišegile gore Jehofa o kwa dithapelo tša bahlanka ba gagwe le gore o ba nea khutšo ya monagano ge ba e nyaka.—Psalme 51:17; 1 Petro 5:7.

Ka godimo ga tšohle, ke matlafala lefsa nako le nako ge ke gopola gore Modimo mafelelong o tla fodiša bohle bao ba šegofaditšwego ka  bophelo Paradeiseng ka tlase ga pušo ya Mmušo wa Morwa wa gagwe, Jesu Kriste. Megokgo ya lethabo e kile ya ela sefahlegong sa-ka ka makga a mmalwa ge ke nagana ka kholofelo yeo ya go kgahliša.—Psalme 37:11, 29; Luka 23:43; Kutollo 21:3, 4.

Go Hlankela ke le Modiredi wa Nako e Tletšego

Mo e ka bago ka 1991, ka morago ga go hlahloba boemo bja-ka ke ile ka lemoga gore tsela e kaone ya go phema go ikwela bohloko ke go dula ke swaregile ka go boledišana le ba bangwe ka ditaba tše dibotse tšeo di lego bohlokwa tša Mmušo. Ngwageng woo, ke ile ka thoma go hlankela ke le modiredi wa nako e tletšego.

Ka ge ke le segole, bontši bja bohlatse bjoo ke bo neago ke bo nea ka go ngwala mangwalo. Lega go le bjalo, go nna go ngwala ga se modiro o bonolo; go nyaka boiteko bjo bogolo. Ke hwetša go le thata go swara pene ka go tia ka seatla sa-ka, seo se fokodišitšwego ke bolwetši bja go fokola ga mešifa. Lega go le bjalo, ka kgotlelelo le ka thapelo ke kgonne go dira boboledi ka go ngwala mangwalo ka nywaga ya ka godimo ga e 15 gona bjale. Le gona, ke diriša mogala go boledišana le batho. Ga nke ke fošwa ke sebaka sa go bolela ka kholofelo ya-ka ya lefase le lefsa le ya lefase la Paradeise go ba leloko, bagwera le baagišani bao ba etelago lapeng la-ka.

Ka baka leo, ke bile le diphihlelo tše dintši tše di kgothatšago. Ke ile ka thaba kudu ge motlogolo yo mongwe wa-ka, yoo ke ithutilego Beibele le yena nywageng e 12 e fetilego, a tšwela pele moyeng gomme a tšeela godimo therešo ya Beibele. A tutueditšwe ke letswalo la gagwe leo le tlwaeditšwego ka Beibele, o tšwela pele a botega e bile a tiile tabeng ya boema-gare bja Bokriste.

Ke tloga ke thabišwa ke ge batho bao ke ba ngwalelago mangwalo ba nkaraba gomme ba nyaka go tseba mo go oketšegilego ka Beibele. Ka dinako tše dingwe, ba bangwe ba kgopela dikgatišo tša Beibele tše di oketšegilego. Ka mohlala, mosadi yo mongwe o ile a nteletša mogala gomme a nteboga bakeng sa lengwalo le le kgothatšago leo ke le ngwaletšego monna wa gagwe. O ile a kgahlwa kudu ke ditaba tšeo di lego ka lengwalong leo. Se se ile sa dira gore ke be le dipoledišano tše dintši tša Beibele le yena le monna wa gagwe legaeng la-ka.

Kholofelo e Kgahlišago

Go theoša le nywaga, ke bone bagoeledi ba Mmušo ba oketšega karolong ye ya lefase. Holo e nyenyane ya Mmušo yeo e lego kgaufsi le ngwako wa mogolo’a-ka e lego George e katološitšwe le go mpshafatšwa ka makga a mantši. Ke lefelo le lebotse la borapedi leo le dirišwago ke diphuthego tše pedi tša Dihlatse tša Jehofa.

Tate o hlokofetše ka 1943, a e-na le nywaga e 52. Eupša ruri o re tlogeletše bohwa bja bohlokwa kudu bja moya! Bana ba gagwe ba seswai ba ile ba amogela therešo gomme ba sa dutše ba hlankela Jehofa. Motsaneng wa Xylophagou woo tate a belegetšwego go ona, le metsaneng ya kgaufsi, ga bjale go na le diphuthego tše tharo, tšeo di nago le palo-moka ya bagoeledi ba Mmušo ba 230!

Mafelelo a bjalo a kgahlišago e bile mothopo wa lethabo le legolo go nna. Ga bjale, ke e-na le nywaga e 83, ka kgodišego ke dumelelana le mantšu a mopsalme a rego: “’Tau tša masoxana di ka hlôka tša kwa tlala. Ba ba nyakaxo Morêna ba ka se kê ba bá ba hlôka tše di botse.” (Psalme 34:10) Ke letetše ka phagahlo nako yeo boporofeta bjo bo begilwego go Jesaya 35:6 bo tlago go phethagala, ge bo re: “Ke mo dixôlê di tl’o xo taboxa bo-ka thsêpê.” Go fihlela ka nako yeo, ke ikemišeditše go tšwela pele ke hlankela Jehofa ka lethabo go sa šetšwe mafokodi a-ka.

[Mmapa go letlakala 17]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

TURKEY

SIRIA

LIBANONI

TSIPERO

Nicosia

Xylophagou

Lewatle la Mediterranean

[Seswantšho go letlakala 17]

Holo ya pele ya Mmušo kua Xylophagou, e sa dutše e dirišwa le lehono

[Diswantšho go letlakala 18]

Ke e-na le Efprepia ka 1946 le lehono

[Seswantšho go letlakala 20]

Ke thabišwa ke go dira boboledi ka mogala le ka go ngwala mangwalo