Go Tseba Ditsela tša Jehofa

“Ntsebišê tsela ya xaxo . . . xore ke Xo tsebê.”—EKISODO 33:13.

1, 2. (a) Ke ka baka la’ng Moše a ile a gata mogato ka tsela yeo a dirilego ka yona ge a be a bona mo-Egipita a tlaiša mo-Hebere? (b) E le gore a swanelegele tirelo ya Jehofa, Moše o be a swanetše go ithuta’ng?

MOŠE o be a godišeditšwe lapeng la Farao e bile a rutilwe bohlale bjoo bo bego bo tšeelwa godimo ke bahlomphegi ba Egipita. Lega go le bjalo, Moše o ile a lemoga gore e be e se mo-Egipita. Batswadi ba gagwe e be e le ba-Hebere. Ge a le ngwageng wa gagwe wa bo-40, o ile a tšwa gore a yo hlola bana babo, e lego bana ba Isiraele. Ge Moše a be a bona mo-Egipita a tlaiša yo mongwe wa ba-Hebere, ga se a ka a hlokomologa seo. O ile a bolaya mo-Egipita. Moše o ile a kgetha go ema le batho ba Jehofa gomme o be a nagana gore Modimo o be a mo diriša bakeng sa go lokolla bana babo. (Ditiro 7:21-25; Ba-Hebere 11:24, 25) Ge tiragalo ye e be e thoma go tsebja, bao e lego maloko a ka mošate a Egipita ba ile ba lebelela Moše e le lerabele, gomme o ile a swanelwa ke go tšhaba e le gore a phološe bophelo bja gagwe. (Ekisodo 2:11-15) Ge e ba Moše a be a tla dirišwa ke Modimo, o be a swanetše go tlwaelana gakaone le ditsela tša Gagwe. Na Moše o be a tla rutega?—Psalme 25:9.

² Nywageng e 40 e latetšego, Moše o ile a phela e le mofaladi e bile e le modiši. Go e na le go itumelela gore a dule a nyamile ka gobane go be go bonagala bana babo ba ba-Hebere ba sa mo tšeele godimo, Moše o ile a ikokobeletša seo Modimo a dumeletšego gore se mo diragalele. Le ge go ile gwa feta nywaga e mentši a sa tsebje, Moše o ile a dumelela Jehofa gore a tutuetše bophelo bja gagwe. Ka morago o ile a ngwala, e sego kamoo yena ka noši a bego a bona dilo ka gona, eupša a tutuetšwa ke moya wa Modimo o mokgethwa, gore: “Yêna Mošê e be e le monna yo bolêta [“yo a ikokobeditšego,” NW] ruri xo fetiša batho ka moka ba lefase.” (Numeri 12:3) Jehofa o ile a diriša Moše ka ditsela tše di lemogegago. Ge e ba le rena re nyaka go ba ba ikokobeditšego, Jehofa o tla re šegofatša.—Tsefanya 2:3.

O a Rongwa

3, 4. (a) Ke thomo efe yeo Jehofa a ilego a e nea Moše? (b) Moše o ile a newa thušo efe?

³ Ka letšatši le lengwe morongwa yo e lego moemedi wa Jehofa o ile a bolela le Moše kgaufsi le Thaba ya Horebe Pheninsuleng ya Sinai. Moše o ile a botšwa gore: “Mahloko a sethšaba sa-ka se se lexo kwa Egipita ke a bone; ke ba kwile xe ba xôlôla ka ’baka la baxapeletši ba bôná; ruri, ditlaišêxô tša bôná ke a di tseba. Byale ke tletše tšôna, xore ke ba namolêlê diatleng tša Ba-Egipita, ke ba nthšê naxeng yé, ke ba išê naxeng e botse ye e ahlamexo, ye e êlaxo mafsi le nose.” (Ekisodo 3:2, 7, 8) Mabapi le se, Modimo o be a e-na le mošomo wo a bego a nyaka gore Moše a o dire, eupša o be o swanetše go dirwa ka tsela yeo Jehofa a laetšego gore o dirwe ka yona.

⁴ Morongwa wa Jehofa o ile a tšwela pele ka gore: “Byale tlaa ke Xo romê O yê xo Farao, ’me O nthšê sethšaba sa-ka sa Ba-Isiraele mo naxeng ya Egipita.” Moše o ile a dika-dika. O be a sa ikwe a swanelega, gomme yena ka noši o be a sa swanelege. Lega go le bjalo, Jehofa o ile a kgonthišetša Moše ka gore: “Nna ke tlo ba le wêna.” (Ekisodo 3:10-12) Jehofa o ile a nea Moše matla e le gore a dire mehlolo yeo e bego e tla šoma e le bohlatse bjo bo bontšhago gore ka kgonthe o be a romilwe ke Modimo. Morwarrago Moše e lego Arone, o be a swanetše go sepela le yena e le mmoleledi wa gagwe. Jehofa o be a tla ba ruta seo ba bego ba swanetše go se bolela le go se dira. (Ekisodo 4:1-17) Na Moše o be a tla phetha kabelo yeo ka potego?

5. Ke ka baka la’ng boemo bja ba-Isiraele bja kgopolo e ile ya ba tlhohlo go Moše?

⁵ Banna ba bagolo ba Isiraele mathomong ba ile ba dumela Moše le Arone. (Ekisodo 4:29-31)  Lega go le bjalo, kapejana “badiši ba Ba-Isiraele” ba ile ba bea Moše le morwarragwe molato wa gore ba ba “lohlantše” le Farao le bahlanka ba gagwe. (Ekisodo 5:19-21; 6:9) Ge ba-Isiraele ba be ba tloga Egipita, ba ile ba tšhošwa ke go bona dikoloi tša ntwa tša ba-Egipita di ba hlomere. Ba eme pele ga Lewatle le Lehwibidu gomme dikoloi tša ntwa di le ka morago ga bona, ba-Isiraele ba ile ba ikwa ba wetše molabeng, gomme ba ile ba bea Moše molato. O ka ba o ile wa arabela bjang? Le ge ba-Isiraele ba be ba se na diketswana, ka tlhahlo ya Jehofa, Moše o ile a kgothaletša batho gore ba itokišeletše go sepela. Ke moka Modimo o ile a arola meetse a Lewatle le Lehwibidu, gomme botlase bja lewatle bja oma e le gore ba-Isiraele ba kgone go feta.—Ekisodo 14:1-22.

Taba ya Bohlokwa Kudu go Feta go Lokollwa

6. Ke’ng seo Jehofa a ilego a se gatelela ge a be a roma Moše?

⁶ Ge Jehofa a be a roma Moše, o ile a gatelela go ba bohlokwa ga leina la gagwe le lekgethwa. Go hlompha leina leo le Mong wa lona go be go le bohlokwa. Ge a be a botšišwa mabapi le leina la gagwe, Jehofa o ile a botša Moše gore: “Ke tla ba seo ke nyakago go ba sona.” (NW) Go oketša moo, Moše o be a swanetše go botša bana ba Isiraele gore: “Jehofa Modimo wa bo-tataweno, Modimo wa Aborahama, Modimo wa Isaka, Modimo wa Jakobo o nthometše go lena.” Jehofa o okeditše ka gore: “Ke lona leina la-ka ka go sa felego, gomme ke tlo bitšwa ka lona ditlogolong tša ditlogolwana.” (Ekisodo 3:13-15, PK) Jehofa e sa dutše e le leina leo Modimo a tsebjago ka lona go bahlanka ba gagwe lefaseng ka moka.—Jesaya 12:4, 5; 43:10-12.

7. Modimo o ile a kgothaletša Moše gore a dire’ng go sa šetšwe boikgogomošo bja Farao?

⁷ Ge Moše le Arone ba be ba tšwelela pele ga Farao, ba ile ba rola molaetša wa bona leineng la Jehofa. Eupša Farao ka boikgogomošo o ile a re: “Jehofa ke mang, yo nka kwago lentšu la gagwe, ka lesetša ba-Isiraele ba sepela? Ga ke tsebe Jehofa, le gona nka se ke ka lesetša ba-Isiraele ba sepela.” (Ekisodo 5:1, 2, PK) Le ge Farao a ile a ipontšha e le yo pelo-thata e bile e le moradia, Jehofa o ile a kgothaletša Moše gore a iše molaetša go yena leboelela. (Ek 7:14-16, 20-23; 8:1, 2, 20, NW) Moše o be a kgona go bona gore Farao o tenegile. Na go boledišana le yena gape go be go tla ba le mafelelo a mabotse? Ba-Isiraele ba be ba fagahletše go lokollwa. Farao o be a gana a tiile. Nkabe o ile wa dira’ng?

8. Ke mohola ofe woo o ilego wa tlišwa ke tsela yeo Jehofa a ilego a dirišana le Farao ka yona, gomme ditiragalo tšeo di swanetše go re kgoma bjang?

⁸ Moše o ile a iša molaetša o mongwe gape gomme a re: “Jehofa Modimo wa ba-Hebere o re: Lesetša setšhaba sa-ka se ye se ntirele.” (PK) Modimo gape o ile a re: “Xe nka be ke emišitše letsôxô ka Xo ôtla ka dinkhu, wêna le sethšaba sa xaxo, Le ka be Le fedišitšwe mo lefaseng. Fêla ke sa na se ke sa Xo lesitšexo ka ’baka la sôna. Ke sa Xo lesitše xore ke Xo bonthšê matla a-ka, xore leina la-ka le bolêlwê lefaseng ka moka.” (Ekisodo 9:13-16) Ka baka la seo se bego se tla dirwa go Farao yo pelo-thata, Jehofa o be a rerile go bonagatša matla a gagwe ka tsela yeo e bego e tla šoma e le temošo go batho bohle bao ba mo nyatšago. Batho ba ba be ba tla akaretša Sathane Diabolo, yo Jesu Kriste ka morago a ilego a mmitša “mmuši wa lefase.” (Johane 14:30; Ba-Roma 9:17-24) Go etša ge go boletšwe e sa le pele, leina la Jehofa le ile la tsebatšwa lefaseng ka moka. Kgotlelelo ya gagwe e ile ya feleletša ka go phološwa ga ba-Isiraele le lešaba la mahlakanasela le le ilego la sepela le bona go yo mo rapela. (Ekisodo 9:20, 21; 12:37, 38) Go tloga ka nako yeo, go tsebatšwa ga leina la  Jehofa go hotše ba bangwe ba dimilione bao ba amogetšego borapedi bja therešo.

Go Dirišana le Batho ba Dihlogo tše Thata

9. Batho ba gabo Moše ba ile ba nyatša Jehofa bjang?

⁹ Ba-Hebere ba be ba tseba leina la Modimo. Moše o be a diriša leina leo ge a be a bolela le bona, eupša ga se ka mehla ba bego ba bontšha tlhompho e swanetšego go Mong wa lona. Kapejana ka morago ga ge Jehofa a lokolotše ba-Isiraele ka mohlolo Egipita, go diregile’ng ge ba be ba tšea nako go hwetša meetse a swanetšego a go nwa? Ba ile ba ngongoregela Moše. Se se latelago ba ile ba belaela ka dijo. Moše o ile a ba lemoša gore ba be ba sa ngongoregele yena le Arone eupša ba be ba ngongoregela Jehofa. (Ekisodo 15:22-24; 16:2-12) Thabeng ya Sinai, Jehofa o ile a nea ba-Isiraele Molao, gomme o be o sepedišana le dipontšho tša mohlolo. Lega go le bjalo, batho ka go se kwe ba ile ba itirela namane ya gauta bakeng sa gore ba e rapele gomme ba bolela gore ba be ba diretše ‘Jehofa monyanya.’—Ekisodo 32:1-9.

10. Ke ka baka la’ng kgopelo ya Moše yeo e begilwego go Ekisodo 33:13 e kgahla balebeledi ba Bakriste ka mo go kgethegilego lehono?

¹⁰ Moše o be a swanetše go dirišana bjang le batho bao Jehofa ka noši a bego a ba hlalosa e le ba melala e thata? Moše o ile a lopa Jehofa ka gore: “Byalo xe O ntebeletše ka botho, xôna ntsebišê tsela ya xaxo hlê, xore ke Xo tsebê, xe O fêla O ntebeletše ka botho.” (Ekisodo 33:13) Ge ba hlokomela Dihlatse tša Jehofa tša mehleng yeno, balebeledi ba Bakriste ba diša mohlape o ikokobeditšego le go feta. Lega go le bjalo, le bona ka mo go swanago ba rapela ka gore: “Morêna, ntsebišê ditsela tša xaxo, O nthutê mebila ya xaxo.” (Psalme 25:4) Go tseba ditsela tša Jehofa go thuša balebeledi gore ba lebeletšane le maemo ka tsela yeo e dumelelanago le Lentšu la Modimo le semelo sa gagwe.

Seo Jehofa a se Letetšego go Batho ba Gagwe

11. Ke tlhahlo efe yeo Jehofa a ilego a e nea Moše, gomme ke ka baka la’ng re e kgahlegela?

¹¹ Seo Jehofa a bego a se letetše go batho ba gagwe se ile sa bolelwa ka molomo kua Thabeng ya Sinai. Moše ka morago o ile a newa matlapa a mabedi ao a nago le Melao e Lesome yeo e ngwadilwego. Ka morago ga go theoga thabeng, o ile a bona ba-Isiraele ba rapela namane e bopilwego ka gauta e tološitšwego gomme o ile a lahlela matlapa ao fase a galefile, a a pšhatlaganya. Jehofa o ile a mo nea gape Melao e Lesome e ngwadilwego matlapeng ao Moše a a betlilego. (Ekisodo 32:19; 34:1) Melao ye e be e sa fetoga go tloga ge e be e newa la mathomo. Moše o be a swanetše go dira dilo ka go dumelelana le yona. Le gona Modimo o ile a ruta Moše gore ke Yena motho wa mohuta mang, ka go rialo a bontšha Moše kamoo a swanetšego go itshwara ka gona bjalo ka moemedi wa Gagwe. Bakriste ga ba ka tlase ga Molao wa Moše, eupša seo Jehofa a se boditšego Moše se sa dutše se rwele melao e mentši ya motheo yeo e sa kago ya fetoga le yeo e sa dutšego e šoma go bohle bao ba rapelago Jehofa. (Ba-Roma 6:14; 13:8-10) Anke re ahla-ahleng e sego kae ya yona.

12. Go nyaka ga Jehofa boineelo bjo bo feletšego go be go swanetše go kgoma ba-Isiraele bjang?

¹² Ineele go Jehofa ka mo go feletšego. Setšhaba sa Isiraele se be se le gona ge Jehofa a be a tsebatša gore o nyaka boineelo bjo bo feletšego. (Ekisodo 20:2-5) Ba-Isiraele ba bone bohlatse bjo bontši bja gore Jehofa ke Modimo wa therešo. (Doiteronomio 4:33-35) Go sa šetšwe seo ditšhaba tše dingwe di bego di se dira, Jehofa o ile a bolela ka mo go kwagalago gore a ka se kgotlelele mohuta le ge e le ofe wa borapedi bja medimo ya diswantšho goba go dirišana le meoya bathong ba gagwe. Boineelo bja bona go yena e be e sa swanela go ba mokgwa feela. Ka moka ga bona ba be ba swanetše go rata Jehofa ka pelo ka moka, ka moya ka moka le ka matla ka moka. (Doiteronomio 6:5, 6) Se se be se tla akaretša dipolelo tša bona, boitshwaro bja bona—ee, dikarolo ka moka tša maphelo a bona. (Lefitiko 20:27; 24:15, 16; 26:1) Jesu Kriste le yena o ile a bolela ka mo go kwagalago gore Jehofa o nyaka boineelo bjo bo feletšego.—Mareka 12:28-30; Luka 4:8.

13. Ke ka baka la’ng ba-Isiraele ba be ba swanetše go kwa Modimo ka go tia, gomme ke’ng se se swanetšego go re tutueletša gore re mo kwe? (Mmoledi 12:13)

¹³ E-kwa melao ya Jehofa ka go tia. Ba-Isiraele ba be ba nyaka go gopotšwa gore ge ba be ba tsena  tswalanong ya kgwerano le Jehofa, ba ile ba ikana gore ba tla mo kwa ka go tia. Ba be ba thabela tokologo e ntši ya motho ka noši, eupša ditabeng tšeo Jehofa a bego a ba neile melao go tšona, ba be ba swanetše go mo kwa ka go tia. Go dira bjalo e be e tla ba bohlatse bja lerato la bona go Modimo gomme go be go tla hola bona le bana ba bona ka gobane dilo ka moka tšeo Jehofa a bego a di nyaka e be e le bakeng sa go ba hola.—Ekisodo 19:5-8; Doiteronomio 5:27-33; 11:22, 23.

14. Modimo o ile a ruta ba-Isiraele bjang bohlokwa bja go etiša mediro ya moya pele?

¹⁴ Etiša dilo tša moya pele. Setšhaba sa Isiraele se be se sa swanela go dumelela taba ya go hlokomela dilo tša nama gore e be ya bohlokwa kudu go feta go lebiša tlhokomelo medirong ya moya. Maphelo a ba-Isiraele a be a sa swanela go neelwa ka mo go feletšego tabeng ya go phegelela mediro ya lefase. Bekeng e nngwe le e nngwe Jehofa o be a beetše nako ka thoko yeo a e kgethilego gore e be e kgethwa, nako yeo e bego e swanetše go dirišwa ka mo go feletšego bakeng sa modiro wo o tswalanago le borapedi bja Modimo wa therešo. (Ekisodo 35:1-3; Numeri 15:32-36) Ngwaga o mongwe le o mongwe, go be go swanetše gore go beelwe nako e oketšegilego ka thoko bakeng sa dikopano tše di kgethilwego tše kgethwa. (Lefitiko 23:4-44) Dikopano tše di be di tla ba nea dibaka tša gore ba boledišane ka ditiro tša Jehofa tša matla, ba gopotšwe ka ditsela tša gagwe le gore ba mo leboge bakeng sa botho bja gagwe. Ge batho ba be ba dutše ba bontšha boineelo bja bona go Jehofa, tlhompho ya bona le lerato la bona go Yena di be di tla gola gomme ba be ba tla thušwa go sepela ditseleng tša gagwe. (Doiteronomio 10:12, 13) Melao ya motheo e agago yeo e hwetšwago melaong yeo e hola bahlanka ba Jehofa lehono.—Ba-Hebere 10:24, 25.

Go Kwešiša Dika tša Jehofa

15. (a) Ke ka baka la’ng go kwešiša dika tša Jehofa go be go hola Moše? (b) Ke dipotšišo dife tšeo di ka re thušago go naganišiša ka seka se sengwe le se sengwe sa Jehofa?

¹⁵ Le gona, go kwešiša dika tša Jehofa go be go tla thuša Moše gore a kgone go dirišana le batho. Ekisodo 34:5-7 e bolela gore Modimo o ile a feta pele ga sefahlego sa Moše gomme a tsebatša gore: “Morêna, Morêna, Modimo yo mabobo le kxauxêlô, wa xo se fêlê pelo, wa botho byo boxolo le therešô. Wa xo bolokêla ba dikete-kete botho, wa xo lebalêla batho bokxôpô le dikaroxô le dibê; fêla, a se kê a lesa xo ôtla mosenyi; le xo bana le bana ba bana ó bela molato wa bô-tat’abô, xo iša xo moloko wa boraro le wa bonê.” Iphe nako ya go naganišiša ka mantšu ao. Ipotšiše gore: ‘Seka se sengwe le se sengwe se bolela’ng? Jehofa o se bonagaditše bjang? Balebeledi ba Bakriste ba ka bonagatša seka se bjang? Seka se se swanetše go kgoma bjang seo yo mongwe le yo mongwe wa rena a se dirago?’ Ela hloko mehlala e sego kae feela.

16. Re ka godiša bjang tebogo ya rena bakeng sa kgaugelo ya Modimo, gomme ke ka baka la’ng go dira se e le gabohlokwa?

¹⁶ Jehofa ke “Modimo yo mabobo le kxauxêlô.” Ge e ba o e-na le puku ya ditšhupetšo ya Insight on the Scriptures, ke ka baka la’ng o sa bale seo e se bolelago ka tlase ga sehlogo se se rego “Mercy” (Kgaugelo)? Goba dira nyakišišo mabapi le taba yeo o diriša Watch Tower Publications Index goba  lenaneo la computer la Watchtower Library (CD-ROM). * Diriša tšhupane (concordance) go hwetša mangwalo ao a bolelago ka kgaugelo. O tla bona gore go oketša tabeng ya go fokotša kahlolo ka dinako tše dingwe, kgaugelo ya Jehofa e akaretša kwelobohloko e lerato. E tutueletša Modimo gore a gate mogato bakeng sa go tliša kimollo go batho ba gagwe. E le bohlatse bja se, Modimo o ile a hlokomela dinyakwa tša ba-Isiraele tša nama le tša moya ge ba be ba le leetong la go ya Nageng ya Kholofetšo. (Doiteronomio 1:30-33; 8:4) Jehofa ka kgaugelo o ile a ba lebalela ge ba dirile diphošo. O ile a bontšha kgaugelo go batho ba gagwe ba bogologolo. Go tloga go swanetše gakaakang gore bahlanka ba gagwe ba mehleng yeno ba kwelane bohloko!—Mateo 9:13; 18:21-35.

17. Go kwešiša ga rena botho bja Jehofa go ka godiša bjang borapedi bja therešo?

¹⁷ Le gona, kgaugelo ya Jehofa e sepedišana le botho. Ge e ba o e-na le pukuntšu, bala seo e se bolelago ka tlase ga lentšu “botho.” Bapiša tlhaloso ye le mangwalo ao a bolelago ka Jehofa e le yo a nago le botho. Beibele e bontšha gore botho bja Jehofa bo akaretša go tshwenyega ka tsela e lerato ka batho ba ba diilago bao ba lego gare ga batho ba gagwe. (Ekisodo 22:25, 26) Nageng le ge e le efe, badiiledi gotee le ba bangwe ba ka ikhwetša ba diila. Ge a be a ruta batho ba gagwe gore ba se ke ba beba sefahlego le gore ba bontšhe botho go batho ba bjalo, Jehofa o ile a ba gopotša gore le bona e kile ya ba badiiledi—kua Egipita. (Doiteronomio 24:17-22) Go thwe’ng ka rena re le batho ba Modimo lehono? Botho bja rena bo re thuša gore re be boteeng le gore re gogele ba bangwe borapeding bja Jehofa.—Ditiro 10:34, 35; Kutollo 7:9, 10.

18. Re ithuta’ng ditekanyetšong tšeo Jehofa a di rutilego ba-Isiraele mabapi le ditsela tša bophelo tša batho ba ditšhaba tše dingwe?

¹⁸ Lega go le bjalo, go tshwenyega ka batho ba ditšhaba tše dingwe ka tsela e botho go be go sa swanela go ba bohlokwa go feta lerato la ba-Isiraele go Jehofa le ditekanyetšo tša gagwe tša boitshwaro. Ka gona, ba-Isiraele ba ile ba rutwa gore ba se ke ba phela go ya ka ditsela tša ditšhaba tšeo di ba dikologilego, ba se ke ba amogela mekgwa ya tšona ya bodumedi le ditsela tša tšona tše di gobogilego tša bophelo. (Ekisodo 34:11-16; Doiteronomio 7:1-4) Seo se a šoma le go rena lehono. Re swanetše go ba batho ba bakgethwa, go etša ge Jehofa Modimo wa rena e le yo mokgethwa.—1 Petro 1:15, 16.

19. Go kwešiša pono ya Jehofa mabapi le phošo go ka šireletša bjang batho ba gagwe?

¹⁹ E le gore Moše a kwešiše ditsela tša Gagwe, Jehofa o ile a bolela ka mo go kwagalago gore gaešita le ge a sa amogele sebe, o diega go galefa. O nea batho nako ya gore ba ithute dilo tšeo a di nyakago le gore ba phele ka go dumelelana le tšona. Ge batho ba itshola, Jehofa o ba lebalela dibe tša bona, eupša ga a lese go ba nea kotlo yeo e swanetšego  bakeng sa dibe tše dikgolo. O ile a lemoša Moše gore meloko e tlago e be e ka kgongwa, gampe goba gabotse, ke seo ba-Isiraele ba se dirilego. Go kwešiša ditsela tša Jehofa go ka šireletša batho ba Modimo gore ba se ke ba bea Modimo molato bakeng sa maemo ao ba ipaketšego ona goba go phetha ka gore o a diega.

20. Ke’ng se se ka re thušago gore re dirišane gabotse le badumedi-gotee le rena le bao re gahlanago le bona bodireding bja rena? (Psalme 86:11)

²⁰ Ge e ba o nyaka go oketša tsebo ya gago ka Jehofa le ditsela tša gagwe, tšwela pele o dira nyakišišo le go naganišiša ge o bala Beibele. Ka kelohloko hlahloba dibopego tše di fapa-fapanego tše di kgahlišago tša semelo sa Jehofa. Naganišiša ka thapelo kamoo o ka ekišago Modimo le kamoo o ka phelago bophelo bja gago ka go dumelelana ka mo go feletšego le morero wa gagwe. Se se tla go thuša gore o pheme melaba, o dirišane gabotse le badumedi-gotee le wena le gore o thuše ba bangwe gore ba tsebe Modimo wa rena yo a kgahlišago le gore ba mo rate.

[Mongwalo wa ka tlase]

O Ithutile’ng?

• Ke ka baka la’ng go ikokobetša go be go le bohlokwa go Moše, gomme ke ka baka la’ng go le bohlokwa go rena?

• Ke mafelelo afe a mabotse ao a ilego a fihlelelwa ka go botša Farao molaetša wa Jehofa leboelela?

• Ke melao efe e mengwe ya motheo yeo Moše a ilego a e rutwa yeo e šomago gape le go rena?

• Re ka godiša bjang kwešišo ya rena ka dika tša Jehofa?

[Dipotšišo tša Thuto]

[Seswantšho go letlakala 21]

Moše ka potego o ile a rola molaetša wa Jehofa go Farao

[Seswantšho go letlakala 23]

Jehofa o ile a botša Moše dilo tšeo a di nyakago

[Seswantšho go letlakala 24, 25]

Naganišiša ka dika tša Jehofa