Dipotšišo tše Tšwago go Babadi

Ke’ng seo se swantšhetšwago ke tokišetšo ya ngwaga wa Megobo woo go bolelwago ka wona go Lefitiko kgaolo 25?

Molao wa Moše o be o laetše gore “ngwaxa wa xo šupa e tlo ba Sabatha ya xo khutša xa naxa.” Ba-Isiraele ba be ba laetšwe mabapi le ngwaga woo gore: “O se kê wa lema thšemo ya xaxo; O se kê wa thêna morara wa xaxo. O se kê wa buna maidi, O se kê wa kxobêla dienywa tša morara o sa thênwaxo; naxa e bê le ngwaxa wa Sabatha.” (Lefitiko 25:4, 5) Ka go rialo, ngwaga o mongwe le o mongwe wa bošupa e be e swanetše go ba Sabatha bakeng sa naga. Le gona ngwageng o mongwe le o mongwe wa bo-50, e lego ngwaga wo o latelago ngwaga wa Sabatha ya bošupa, e be e swanetše go ba Ngwaga wa Megobo. Go be go swanetše go direga’ng ngwageng woo?

Jehofa o ile a botša ba-Isiraele ka Moše gore: “E bê xo kxêtha ngwaxa wa masome a mahlano. Naxa le bohle ba ba dutšexo xo yôna, Le ba hlabêlê mokxoši wa khunoloxô. A e bê ngwaxa wa lena wa moxobo, wa xore ka moka Le boêlê maxaeng a lena, mang le mang a boelê molokong wabô. Ngwaxa wó wa masome a mahlano e bê ngwaxa wa lena wa moxobo; Le se kê la lema; Le se ke la kxobêla maidi a wôna; ’me Le se kê la ripa dienywa tša morara o sa thênwaxo.” (Lefitiko 25:10, 11) Ngwaga wa Megobo o be o bolela nywaga e mebedi yeo e latelanago ya Sabatha bakeng sa naga. Eupša e ile ya tliša tokologo go badudi ba yona. Mo-Juda le ge e le ofe yo a bego a rekišitšwe bokgobeng o be a swanetše go lokollwa. Bohwa bjoo motho a ka bago a ile a gapeletšwa go bo rekiša, bo be bo swanetše go bušetšwa lapeng la gagwe. Ngwaga wa Megobo e be e swanetše go ba ngwaga wa tsošološo le tokologo bakeng sa ba-Isiraele ba bogologolo. O swantšhetša’ng bakeng sa Bakriste?

Borabele bja motho wa mathomo e lego Adama, bo ile bja tliša batho bokgobeng bja sebe.  Tokišetšo ya Modimo ya go lokolla batho bokgobeng bja sebe ke sehlabelo sa topollo sa Jesu Kriste. * (Mateo 20:28; Johane 3:16; 1 Johane 2:1, 2) Ke neng moo Bakriste ba lokollwago molaong wa sebe? Ge a bolela le Bakriste ba tloditšwego, moapostola Paulo o itše: “Molaô wa Môya wa xo phela ka Kriste Jesu o nkhunolotše molaong wa sebe le wa lehu.” (Ba-Roma 8:2) Bao ba nago le kholofelo ya go phela legodimong ba amogela tokologo ye ge ba tlotšwa ka moya o mokgethwa. Gaešita le ge mebele ya bona e le ya nama e bile e sa phethagala, Modimo o ba bolela e le bao ba lokilego e bile o ba thwala e le barwa ba gagwe ba moya. (Ba-Roma 3:24; 8:16, 17) Go batlotšwa e le sehlopha, Ngwaga wa Megobo wa Bakriste o thomile ka Pentekoste ya 33 C.E.

Go thwe’ng ka “dinku tše dingwê” tšeo di nago le kholofelo ya bophelo bjo bo sa felego mo lefaseng? (Johane 10:16) Bakeng sa dinku tše dingwe, Pušo ya Nywaga e Sekete ya Kriste e tla itlhatsela e le nako ya tsošološo le tokologo. Nakong ye ya Ngwaga wa Megobo wa Pušong ya Nywaga e Sekete, Jesu o tla diriša mehola ya sehlabelo sa gagwe sa topollo bathong bao ba dumelago gomme o tla dirolla ditla-morago tša sebe. (Kutollo 21:3, 4) Mafelelong a Nywaga e Sekete ya Pušo ya Kriste, batho ba tla fihlelela phethego gomme ba tla lokologa ka mo go feletšego sebeng sa leabela le lehung. (Ba-Roma 8:21) Ge seo se phethagaditšwe, Ngwaga wa Megobo wa Bokriste o tla ba o fedile.

[Mengwalo ya ka tlase]

[Caption on page 26]

Ngwaga wa Megobo wa Pušong ya Nywaga e Sekete—nako ya tsošološo le tokologo bakeng sa “dinku tše dingwê”