Batho bao ba šomago ka thata ga ba tšwafe. Go e na le moo, ba thabela go šoma ka thata gore ba hwetše dilo tšeo ba di hlokago le go thuša ba bangwe, le ge mošomo woo ba o dirago o nyatšega.

Mo bophelong, go na le dilo tšeo re ka se di tšhabelego. Le ge batho ba bantši lehono ba sa rate go šoma ka thata, go šoma ka thata go tla go hola.—Mmoledi 3:13.

Reyon o re: “Ke lemogile gore ge o šoma ka thata, o a thaba le go kgotsofala. Seo se dirile gore ke rate go šoma. E bile ge o šoma ka thata, o itirela leina le lebotse.”

MOLAO WA MOTHEO WA BEIBELE: “Boitapišo bja mohuta le ge e le ofe bo a hola.”—Diema 14:23.

Ithute go rata mošomo ka go latela megato e latelago.

Ithute go dira dilo gabotse. Ge o dira mošomo wa ka gae, o ngwala di-homework goba o šoma mošomo wa boiphedišo, dira bjalo ka pelo ka moka. Ge o ka dira mošomo o itšego gabotse, lebelela gore nakong e tlago o ka kaonefatša kae, mohlomongwe ka go fetša mošomo woo kapela goba go o dira go phala peleng. Ge o kgona go dira mošomo o itšego gabotse, ke moo o tlago go o thabela.

MOLAO WA MOTHEO WA BEIBELE: “Na o kile wa bona monna yo a kgonago mošomo wa gagwe? Yena o tla ema pele ga dikgoši; a ka se eme pele ga batho feela.”—Diema 22:29.

Nagana le ka batho ba bangwe. Gantši ge o dira mošomo wa gago gabotse, batho ba bangwe le bona ba a holega. Ka mohlala, ge o šoma ka thata ka gae, o dira gore ba bangwe ka lapeng ba se ke ba imelwa.

MOLAO WA MOTHEO WA BEIBELE: “Go na le lethabo le legolo go neeng go feta go amogeleng.”—Ditiro 20:35.

Dira go feta seo se letetšwego. Ge o laetšwe go dira mošomo o itšego, o se ke wa no dira wona feela. Dira le e mengwe. Ge o dira bjalo, o bontšha gore o kgona go laola bophelo bja gago ka gore ga o gapeletšwe go dira dilo, eupša o di dira ka go rata.—Mateo 5:41.

MOLAO WA MOTHEO WA BEIBELE: “Tiro ya gago e botse e se dirwe ka go gapeletšwa, eupša e be ka boithatelo.”—Filemone 14.

Eba le tekatekano. Le ge batho bao ba šomago ka thata ba sa tšwafe, seo ga se bolele gore ba phelela go šoma. Ba dira dilo ka tekatekano. Le ge ba thabela go šoma, ba ba le nako ya go khutša.

MOLAO WA MOTHEO WA BEIBELE: “Seatla se se tletšego khutšo se phala diatla tše pedi tše di tletšego boitapišo gotee le go kitimiša phefo.”—Mmoledi 4:6.