1-3. Ke ditiragalo dife tšeo di ilego tša dira gore letšatši la Pentekoste e be le le kgethegilego, gona ditiragalo tšeo di ile tša phethagatša bjang seo Mangwalo a se boletšego e sa le pele? (Bona seswantšho se se lego ka mo godimo.)

E BE e le mesong ya Sontaga kua Jerusalema. Le e be e le letšatši le le kgethegilego le leo le kgahlišago. Batho ba be ba keteka Pentekoste, e lego monyanya o mokgethwa wo o bego o binwa mathomong a puno ya korong. Mesong yeo tempeleng ya Jerusalema, moperisita yo a phagamego o be a neela dibego tša ka mehla. Ke moka mo e ka bago ka iri ya senyane, o be a neela dinkgwa tše pedi tše di ometšwego tšeo di dirilwego ka korong ya puno ya mathomo, goba dithakangwaga tša puno. Moperisita yo a phagamego o be a tšokoletša dinkgwa tšeo pele le morago ge a be a di tliša go Jehofa. Le e be e le letšatši la Pentekoste ya ngwaga wa 33.—Lefitiko 23:15-20.

² Ngwaga o mongwe le o mongwe, ka nywaga e makgolo, moperisita yo a phagamego o be a neela sebego se sa go tšokotšwa. Sebego seo se be se tswalana kudu le selo se itšego se bohlokwa kudu seo se ilego sa direga ka Pentekoste ya ngwaga wa  33. Selo seo se ile sa diragalela barutiwa ba Jesu ba 120 bao ba bego ba rapela gotee phapošing ya ka godimo kua Jerusalema. (Ditiro 1:13-15) Moporofeta Joele o ile a ngwala ka tiragalo ye nywageng e makgolo a seswai pele e ka direga. (Joele 2:28-32; Ditiro 2:16-21) Go ile gwa direga’ng se bohlokwa gakaakaa?

³ Bala Ditiro 2:2-4. Ka Pentekoste ya ngwaga wa 33, Modimo o ile a nea Bakriste bao moya wa gagwe o mokgethwa, gomme ya ba batlotšwa. (Ditiro 1:8) Ka morago ga moo, lešaba le ile la ba kgobokanela, ke moka barutiwa bao ba thoma go le ruta dilo tše di kgahlišago tšeo ba bego ba sa tšwa go di bona le go di kwa. Moapostola Petro o ile a hlalosa seo se bego se sa tšwa go direga le bohlokwa bja sona. Ke moka o ile a botša lešaba leo gore: “Itsholeng gomme yo mongwe le yo mongwe a kolobetšwe leineng la Jesu Kriste bakeng sa tebalelo ya dibe tša lena, ke moka le tla amogela mpho e sa lefelelwego ya moya o mokgethwa.” Letšatšing leo, batho ba e ka bago ba 3 000 ba ile ba kolobetšwa gomme le bona ba amogela moya o mokgethwa.—Ditiro 2:37, 38, 41.

4. (a) Ke ka baka la’ng re swanetše go tseba ka seo se diragetšego ka Pentekoste? (b) Ke ditiragalo dife tše dingwe tša bohlokwa tšeo di ka bago di be di direga letšatšing leo nywageng e mentši pejana ga mo? (Bona tlhaloso.)

⁴ Ke’ng seo se bego se swantšhetšwa ke moperisita yo a phagamego le sebego seo a bego a se neela ka Pentekoste e nngwe le e nngwe? Moperisita yo a phagamego o be a swantšhetša Jesu. Dinkgwa di be di swantšhetša barutiwa ba Jesu bao ba tloditšwego. Barutiwa bao ba kgethilwe bathong bao ba nago le sebe gomme ba bitšwa “dithakangwaga.” (Jakobo 1:18) Modimo o ba amogetše e le barwa ba gagwe gomme o ba kgethile gore ba tle ba buše e le dikgoši le Jesu kua legodimong e le karolo ya Mmušo wa Modimo. (1 Petro 2:9) Jehofa o tlo diriša Mmušo wa gagwe go šegofatša batho ka moka bao ba mo kwago. Ka gona, go sa šetšwe gore re yo phela legodimong le Jesu goba lefaseng la paradeise, ngwaga wa Pentekoste ya 33 ke wa bohlokwa kudu go rena. ^[1]—Bona tlhaloso.

5. Re tseba bjang gore batlotšwa ga ba tlotšwe ka tsela e swanago tlwaa?

⁵ Barutiwa bao ba bego ba le ka phapošing ya ka godimo kua Jerusalema ba ka se tsoge ba lebetše letšatši leo. Yo mongwe le yo mongwe wa bona o ile a dulwa ke selo seo ekego ke kgabo ya mollo hlogong. Jehofa o ile a ba nea bokgoni bja go bolela maleme a šele. Ba be ba sa belaele gore ba tloditšwe ka moya o mokgethwa. (Ditiro 2:6-12) Eupša mehlolo ye ga e diragalele Bakriste ka moka ge ba tlotšwa. Ka mohlala, ga go na mo Beibele e re botšago gore selo seo ekego ke kgabo ya mollo se ile sa dula dihlogong tša batho ba dikete kua Jerusalema bao ba ilego ba tlotšwa ka moya letšatšing leo. Ba ile ba tlotšwa ge ba be ba kolobetšwa. (Ditiro 2:38) Le gona ga se Bakriste ka moka bao ba tlotšwago nakong ya ge ba kolobetšwa. Basamaria ba ile ba tlotšwa ka morago ga nako e itšego ba kolobeditšwe. (Ditiro 8:14-17) Le gona boemong bjo bongwe bjo bo sa tlwaelegago, Koronelio le ba ntlo ya gagwe ba ile ba tlotšwa pele ba ka kolobetšwa.—Ditiro 10:44-48.

6. Batlotšwa ka moka ba amogela eng, gona seo se bolela’ng go bona?

⁶ Go molaleng gore Bakriste ba tseba ka ditsela tše di sa swanego gore ba tloditšwe.  Go ka direga gore ba bangwe ba tsebile di tloga fase gore Jehofa o ba tloditše. Ba bangwe ba ka ba ba tsebile seo ge nako e dutše e eya. Eupša moapostola Paulo o hlalositše seo se diregago go yo mongwe le yo mongwe wa bona ge a tlotšwa. O itše: “Ka morago ga ge le dumetše, le ile la ba la swaiwa ka moya o mokgethwa wo o holofeditšwego ka yena, woo e lego pontšho ya ge e sa le pele ya bohwa bja rena.” (Baefeso 1:13, 14) Ka gona Jehofa o diriša moya wa gagwe o mokgethwa go kgonthišetša Bakriste ba gore o ba kgethile gore ba tle legodimong. Ka tsela ye, moya o mokgethwa ke “pontšho ya ge e sa le pele,” goba bohlatse bja gore nakong e tlago ba tla be ba phela legodimong e sego mo lefaseng.—Bala 2 Bakorinthe 1:21, 22; 5:5.

7. Ke’ng seo Mokriste yo mongwe le yo mongwe yo a tloditšwego a swanetšego go se dira gore a tle a hwetše moputso wa gagwe wa go ya legodimong?

⁷ Ge Mokriste a tlotšwa, na seo se ra gore o šetše a hweditše moputso wa gagwe? Aowa. O kgodišegile gore o kgethilwe gore a tle legodimong. Eupša ke feela ge a ka dula a botegela Jehofa moo a tlago go hwetša moputso woo. Petro o hlalositše se ka mantšu a latelago: “Ka lebaka le bana bešo, dirang sohle se le ka se kgonago gore le kgonthišetše go bitšwa le go kgethwa ga lena; gobane ge e ba le tšwela pele le dira dilo tše, gona le ka se ke la palelwa le ka mohla. Ge e le gabotse, ka yona tsela ye le tla abelwa ka mo go humilego go tsena mmušong o sa felego wa Morena le Mophološi wa rena Jesu Kriste.” (2 Petro 1:10, 11) Ka gona Mokriste yo mongwe le yo mongwe yo a tloditšwego ga se a swanela go dumelela selo le ge e le sefe se mo dira gore a kgaotše go hlankela Jehofa. Gaešita le ge a laleditšwe, goba a bileditšwe legodimong, ge e ba a sa botege, a ka se hwetše moputso woo.—Baheberu 3:1; Kutollo 2:10.

8, 9. (a) Ke ka baka la’ng batho ba bantši ba thatafalelwa ke go kwešiša seo se diregago go motho ge a tlotšwa? (b) Motho o tseba bjang gore o kgethilwe go yo phela legodimong?

⁸ Bahlanka ba bantši ba Modimo lehono ba ka thatafalelwa ke go kwešiša seo se diregago go motho ge Modimo a mo tlotša. Seo ga se makatše ka gobane bona ga se ba tlotšwa. Modimo o bopetše batho go phela mo lefaseng ka mo go sa felego, e sego go phela legodimong. (Genesi 1:28; Psalme 37:29) Eupša Jehofa o kgethile ba bangwe gore e tle e be dikgoši le baperisita legodimong. Ka gona ge a ba tlotša ka moya wa gagwe, kholofelo ya bona le tsela yeo ba naganago ka yona e a fetoga, moo ba lebelelago pele go yo phela legodimong.—Bala Baefeso 1:18.

⁹ Eupša motho o tseba bjang gore o kgethilwe go ya legodimong? Ela hloko seo Paulo a se boditšego batlotšwa ba kua Roma bao ba bego ba ‘biditšwe gore e be bakgethwa.’ O itše go bona: “Ga se la amogela  moya wa bokgoba woo o tlago go boela wa baka poifo, eupša le amogetše moya wa go amogelwa le le barwa, e lego moya wo ka wona re goeletšago ra re: ‘Aba, Tate!’ Moya wo ka bowona o hlatselana le moya wa rena gore re bana ba Modimo.” (Baroma 1:7; 8:15, 16) Modimo o diriša moya wa gagwe o mokgethwa go kgonthišetša motho gore o kgethilwe go tlo buša e le kgoši legodimong le Jesu.—1 Bathesalonika 2:12.

10. Ke’ng seo 1 Johane 2:27 e se bolelago ge e re ga go nyakege gore motho yo a itšego a rute Mokriste yo a tloditšwego?

¹⁰ Bao Modimo a ba kgethago go ya legodimong ga ba hloke gore motho yo mongwe a ba botše gore ba tloditšwe. Jehofa ke yena a dirago gore ba kgodišege gore o ba tloditše. Moapostola Johane o botša Bakriste ba tloditšwego gore: “Le tloditšwe ke Mokgethwa gomme ka moka ga lena le na le tsebo.” Le gona o re: “Ge e le lena, go tlotšwa mo le go amogetšego go yena go dula go lena gomme ga go nyakege gore go be le motho yo a le rutago; eupša go tlotšwa mo go tšwago go yena go le ruta dilo tšohle gomme ke ga therešo e sego ga maaka. Go etša ge go le rutile, gona dulang le le boteeng le yena.” (1 Johane 2:20, 27) Batlotšwa ba swanetše go rutwa ke Jehofa go no swana le rena. Eupša ga ba hloke gore motho yo mongwe a ba kgonthišetše gore ba tloditšwe. Jehofa o dirišitše moya wa gagwe o mokgethwa o matla go ba kgonthišetša gore ba tloditšwe!

11, 12. Ke’ng seo Mokriste yo a tloditšwego a ka ipotšišago sona, eupša ke’ng seo a sa se belaelego?

¹¹ Ge Bakriste ba tlotšwa ka moya o mokgethwa, ba fetoga kudu. Ge e le gabotse, Jesu o boletše gore ba ‘tswalwa gape,’ goba ba tswalwa go tšwa legodimong. (Johane 3:3, 5) Ke moka o hlalositše ka gore: “O se ke wa makala gobane ke go boditše gore le swanetše go tswalwa gape. Phefo e fokela mo e ratago, wa kwa modumo wa yona, eupša ga o tsebe moo e tšwago gona le moo e yago gona. Go bjalo le ka yo mongwe le yo mongwe yo a tswetšwego ke moya o mokgethwa.” (Johane 3:7, 8) Ruri ga go kgonege go hlalosa tlwaa kamoo go ba motlotšwa go lego ka gona go motho yo e sego motlotšwa. ^[2]—Bona tlhaloso.

¹² Motho yo a tloditšwego a ka ipotšiša gore: ‘Ke ka baka la’ng Jehofa a kgethile nna e sego motho yo mongwe?’ Le gona a ka ipotšiša ge e ba a tloga a swanelwa ke boikarabelo bjoo. Eupša ga a belaele gore Jehofa o mo kgethile. Go e na le moo, o ikwa a thabile kudu e bile a leboga mpho ye. Batlotšwa ba ikwa go swana le kamoo Petro a bego a ikwa ka gona ge a be a re: “A go tumišwe Modimo le Tatago Morena wa rena Jesu Kriste, gobane go ya ka kgaugelo ya gagwe e kgolo o re tswetše lefsa kholofelong e phelago ka go tsoga ga Jesu Kriste bahung, go ya bohweng bjo bo sa senyegego le bjo bo sa šilafalago le bjo bo sa hwelelego. Le bo boloketšwe magodimong.” (1 Petro 1:3, 4) Ge batlotšwa ba bala mantšu a, ba tloga ba kgodišegile gore Tatago bona o bolela le bona ka go lebanya.

13. Tsela yeo motho a naganago ka yona e fetoga bjang ge a tlotšwa ka moya o mokgethwa, gona ke mang a dirago seo?

 ¹³ Pele Jehofa a kgetha Bakriste ba gore ba tle ba phele legodimong, ba be ba na le kholofelo ya go tlo phela mo lefaseng ka mo go sa felego. Ba be ba lebeletše pele nakong ya ge Jehofa a tla be a dira lefase gore e be paradeise gomme a fediša dilo ka moka tše mpe. Mohlomongwe ba be ba ipona ba amogela ditho tša malapa a gabo bona tšeo di hwilego goba bagwera. Le gona ba be ba lebeletše pele go tlo ikagela dintlo le go dula go tšona goba go bjala dihlare le go ja dienywa tša tšona. (Jesaya 65:21-23) Go tlile bjang gore ba se sa nagana ka tsela ye? Na ke ka baka la kgateletšego ya monagano goba go imelwa ke mathata? Na ba ile ba thoma go ipotša gore go phela mo lefaseng ka mo go sa felego go tlo leša bodutu le gore ba ka se thabele seo? Goba na ke taba ya gore ba be ba nyaka go kwa gore go phela legodimong go bjang? Aowa. Go e na le moo, Modimo ke yena a ba kgethetšego tsela ye. Ge a be a ba kgetha, o ile a diriša moya wa gagwe o mokgethwa go fetoša tsela yeo ba naganago ka yona le moputso woo ba lebeletšego pele go tlo o hwetša.

14. Batlotšwa ba ikwa bjang ka bophelo bja bona mo lefaseng?

¹⁴ Ka gona na se se bolela gore batlotšwa ba nyaka go hwa? Paulo o hlalositše kamoo batlotšwa ba ikwago ka gona. O swantšhitše mmele wa bona wa nama le ‘tente’ gomme a re: “Ge e le gabotse, rena bao re lego tenteng ye re a tsetsela, ka ge re imetšwe ke dipelaelo; gobane ga re nyake go e apola, eupša re nyaka go apara e nngwe gore se se hwago se tšeelwe legato ke bophelo.” (2 Bakorinthe 5:4) Bakriste ba ga ba nyake go hwa. Ba thabela bophelo e bile ba nyaka go diriša letšatši le lengwe le le lengwe go hlankela Jehofa ba na le malapa a bona le bagwera. Eupša go sa šetšwe seo ba se dirago, ba gopola seo Modimo a ba holofeditšego sona nakong e tlago.—1 Bakorinthe 15:53; 2 Petro 1:4; 1 Johane 3:2, 3; Kutollo 20:6.

15. Ke’ng seo se sa bontšhego gore motho o tloditšwe ka moya o mokgethwa?

¹⁵ Mohlomongwe o ipotšiša ge e ba Jehofa a go kgethile gore o yo phela legodimong. Ge e ba o nagana gore o go kgethile, nagana ka dipotšišo tše tša bohlokwa: Na o nagana gore o fišega kudu bodireding? Na o tloga o thabela go ithuta Beibele le go ithuta “[dilo] tše di tseneletšego tša Modimo”? (1 Bakorinthe 2:10) Na o bona eka Jehofa o go thušitše go ba le mafelelo a mabotse bodireding? Na o fišegela go dira thato ya Jehofa go feta selo le ge e le sefe? Na o rata ba bangwe go tšwa pelong le go ikwa o swanetše go ba thuša go hlankela Jehofa? Na o bone bohlatse bja gore Jehofa o go thušitše ka ditsela tše dintši bophelong bja gago? Ge e ba karabo ya gago e le ee dipotšišong tše, na seo se ra gore o bileditšwe go yo phela legodimong? Aowa, ga go bjalo. Ka baka la’ng? Ka gobane bahlanka ka moka ba Jehofa ba ka ikwa ka tsela yeo, go sa šetšwe gore ke batlotšwa goba go se bjalo. Le gona Jehofa a ka diriša moya wa gagwe o mokgethwa go nea mohlanka le ge e le ofe wa gagwe matla a swanago, go sa šetšwe gore o tlo phela kae. Ge e le gabotse, ge e ba o ipotšiša ge e ba o tlo ya legodimong, seo se ra gore ga o ye. Bao Jehofa a ba kgethilego go ya legodimong, ga ba ipotšiše dipotšišo! Ba kgodišegile gore ba a ya!

16. Re tseba bjang gore ga se batho ka moka bao Modimo a ba neilego moya o mokgethwa ba yago go phela legodimong?

 ¹⁶ Ka Beibeleng, go na le mehlala e mentši ya batho ba botegago bao Jehofa a ilego a ba nea moya wa gagwe o mokgethwa eupša ba se ba ya legodimong. Yo mongwe wa bona ke Johane Mokolobetši. Jesu o itše ga go na motho yo mogolo go feta Johane, eupša o itše Johane a ka se buše le yena legodimong e le kgoši. (Mateo 11:10, 11) Dafida le yena o ile a hlahlwa ke moya o mokgethwa. (1 Samuele 16:13) Moya o mokgethwa o ile wa mo thuša go kwešiša dilo tše di tseneletšego ka Jehofa le go mo hlahla go ngwala dikarolo tše itšego tša Beibele. (Mareka 12:36) Lega go le bjalo, moapostola Petro o boletše gore Dafida “ga se a rotogela magodimong.” (Ditiro 2:34) Jehofa o ile a diriša moya wa gagwe o mokgethwa go nea batho bao matla a go dira dilo tše di makatšago, eupša ga se a o diriša go ba kgetha gore ba yo phela legodimong. Na seo se bolela gore ba be ba sa botege ka mo go lekanego goba go swanelega go yo buša le Jesu legodimong? Aowa. Se no bontšha gore Jehofa o tlo ba tsoša bahung lefaseng la Paradeise.—Johane 5:28, 29; Ditiro 24:15.

17, 18. (a) Ke moputso ofe woo ba bantši ba bahlanka ba Modimo ba tlago go o hwetša? (b) Re tlo ahlaahla dipotšišo dife sehlogong se se latelago?

¹⁷ Ba bantši ba bahlanka ba Modimo lehono ga ba ye legodimong. Go swana le Aborahama, Dafida, Johane Mokolobetši le banna le basadi ba bangwe ba bantši ba mehleng ya Beibele, ba lebeletše pele go tlo phela mo lefaseng ge Mmušo wa Modimo o tla be o ba buša. (Baheberu 11:10) Ke batho ba 144 000 feela bao ba tlago go buša le Jesu legodimong. Eupša Beibele e bolela ka ditho tša batlotšwa tšeo di sa “šetšego” mo lefaseng mehleng ye ya bofelo. (Kutollo 12:17) Ka gona ditho tše dintši tša ba 144 000 di šetše di hwile gomme di legodimong.

¹⁸ Eupša ge e ba motho yo a itšego a re ke yena motlotšwa, bao ba tlago go phela mo lefaseng ba swanetše go arabela bjang? Ge e ba motho yo a itšego phuthegong ya geno a thoma go ja senkgwa le go nwa beine Segopotšong, o swanetše go mo swara bjang? Gona go thwe’ng ge e ba palo ya bao ba rego ba tloditšwe e tšwela pele e oketšega? Na o swanetše go ikopiša hlogo ka seo? Re tla araba dipotšišo tšeo sehlogong se se latelago.