“Tsela ya lena ya bophelo a e se be ya go rata tšhelete . . . Gobane Modimo o itše: ‘Le ka mohla nka se ke ka go tlogela le ge e le go go lahla.’”—Baheberu 13:5.

KAMOO MODIMO A BONTŠHAGO GORE O A TSHWENYEGA

Ge morapedi wa Jehofa Modimo a wela mathateng, go tshwenyega ga Modimo ka yena go ka bonagala ka ditsela tše di fapafapanego. E nngwe ya tšona ke go thekgwa ka lerato ke Bakristegotee. * Jakobo 1:27 e re: “Mohuta wa borapedi bjo bo hlwekilego le bjo bo sa šilafalago ponong ya Modimo wa rena le Tate ke wo: Ke go babalela ditšhiwana le bahlologadi ditlaišegong tša bona.”

Bakriste ba pele ba be ba thušana. Ka mohlala, ge go be go boletšwe e sa le pele gore tlala e šoro e be e tla wela naga ya Judea, Bakriste ba motseng wa Siria wa Antiokia ba ile ba ikemišetša “go romela tirelo ya thušo go bana babo bona bao ba dulago Judea.” (Ditiro 11:28-30) Ka baka leo, Bakristegotee le bona ba bahloki ba ile ba hwetša dilo tšeo di nyakegago. Go nea mo ka go rata go ile gwa bontšha lerato la kgonthe la Bokriste.—1 Johane 3:18.

“Nna, Jehofa, ke Modimo wa lena, Yo a le rutago gore le holege.”—Jesaya 48:17, 18.

MODIMO O RE THUŠA GORE RE ITHUŠE

Go etša ge batho ba dimilione ba utolotše seo, bohlale bjo bo hwetšwago ka Beibeleng bo a hola e bile bo nea tlhahlo e di phalago tšohle. Diema 2:6, 7 e re: “Jehofa o nea bohlale; tsebo le temogo di tšwa molomong wa gagwe. O tla bolokela ba lokilego bohlale.” Ge batho ba tsoma bohlale bjo e bile ba bo diriša, ba a ikhola.

Ka mohlala, ba phema mekgwa e gobatšago le e jago tšhelete e ntši, e bjalo ka go diriša dihlaretagi le bjala gampe. (2 Bakorinthe 7:1) Gape e ba bao ba botegago le ba nago le šedi e bile ba dira dilo ka tsela ya boikarabelo, ka go re’alo ba kaonefatša ditebelelo tšeo ba nago le tšona ka mošomo goba gore ba itire bašomi bao ba ka tšeelwago godimo. Baefeso 4:28 e re: “Yo a utswago a se ke a hlwa a utswa, eupša go e na le moo a šome ka thata, . . . gore a be le seo a ka se abelago yo mongwe yo a hlokago.”

“Bohlale bja Modimo bo hlatselwa go loka ka mafelelo a bjona.”—Mateo 11:19, “The New English Bible.”

MAFELELO AO A ITLHALOSAGO

Wilson yo e lego mošomi wa nakwana yo a dulago Ghana, o be a tla tloga a felelwa ke konteraka ya gagwe ya mošomo. Letšatšing la gagwe la mafelelo, ge a be a hlatswa koloi ya molaodi, Wilson o ile a hwetša tšhelete ka puting. Molaodi wa ka tlasana o ile a mmotša gore a tšee tšhelete yeo. Eupša Wilson, yo e lego yo mongwe wa Dihlatse tša Jehofa, o ile a gana go utswa. Go e na le moo, o ile a bušetša tšhelete yeo go mong wa yona. Go e na le gore a rakwe mošomong, Wilson o ile a fiwa mošomo wa nako e tletšego gomme ka morago a bewa maemong a go ba mohlankedimogolo.

Kua Yuropa, Géraldine o ile a lahlegelwa ke mošomo ka gobane mong wa gagwe a be a sa rate Dihlatse tša Jehofa. Lega go le bjalo, mmago mong wa gagwe o ile a botša morwedi yoo wa gagwe gore o be a dirile phošo e kgolo. O itše: “Ge e ba o nyaka mošomi yo a ka botwago le yoo a tlago go tšeela mošomo wa gagwe godimo, ga go na mošomi yo mokaone yo o ka mo hwetšago ntle le yo e lego yo mongwe wa Dihlatse tša Jehofa.” Morwedi wa gagwe o ile a nyakišiša ka Dihlatse gomme Géraldine a boela mošomong wa gagwe.

Ge Sarah, yo e lego mma yo a se nago molekane wa Afrika Borwa, a be a welwa ke mathata, o ile a bontšhwa lerato la kgonthe la Bokriste ge ditho tša phuthego ya gabo di be di nea lapa la gagwe dijo tšeo di nyakegago le go le nametša dinamelwa. Ka morago, bana ba gagwe ba itše: “Re na le batswadi ba bantši ka phuthegong.”

Go ka anegwa diphihlelo tše dintši tše di swanago le tše. Tšona di re gopotša Diema 1:33, yeo e balegago ka gore: “Ge e le yo a ntheetšago, o tla dula a bolokegile.” Ruri seo ke therešo!