1, 2. Abantu bakaZimu baqalana naziphi iintjhijilo namhlanjesi? (Qala isithombe esisekuthomeni.)

ABODORHODERE nabonesi abanengi basebenza ngabantu abanamagulo athathelanako. Into ebenza basebenze ngabantu abagulako kukuthi bafuna ukubasiza. Nabasebenza ngeengulana njalo kufuze nabo bazivikele ekutheni bangatholi ukugula. Kuyafana nangathi namhlanjesi, inengi lethu lihlala belisebenza nabantu abanobuntu obuphikisana nobuntu bakaZimu. Lokhu-ke kuba sitjhijilo kithi.

² Amalanga wokuphela la abantu abasenamikghwa. Incwadi yesibili uPowula ayitlolela uThimothi ihlathulula indlela abantu abazozihlukanisa ngayo noZimu ibuye ihlathulule nobuntu obuzokutjengiswa babantu esikhathini esizako. (Funda 2 Thimothi 3:1-5, 13.) Ubuntobo kungenzeka busithuse bubuye godu businamathele. (IzA. 13:20) Esihlokwenesi sizokucoca ngobuntu obuhlukanisa abantu bakaZimu nabantu bamalanga wokuphela. Sizokubuye sifunde nangokuthi singazivikela njani ekutheni singabi nemikghwa emimbi kube ngesikhathi esifanako sisiza abantu bathande uZimu.

3. UmTlolo we-2 Thimothi 3:2-5 ukhuluma ngabobani?

³ Umpostoli uPowula watlola wathi, ‘emihleni yokuphela kuzokufika  iinkhathi ezibudisi kwamambala.’ Ngemva kwalokho wabala imikghwa imimbi eli-19 eveza abantu bamalanga wokuphela. Irhelo lezinto uPowula akhuluma ngazo zifana nalezi ezibalwe emTlolweni webeRoma 1:29-31. Incwadi uPowula ayitlolela uThimothi ihlanganisa nezinye izinto okungakakhulunywa ngazo emTlolweni yamaKrestu yesiGirigi. “Abantu” uPowula akhuluma ngabo bahlanganisa abantu bembaji nebengubo abanemikghwa esikhulume ngayo ngaphambilini. Kodwana bekangakhulumeli boke abantu. AmaKrestu anemikghwa ehlukileko.—Funda uMalaki 3:18.

4. Ungamhlathulula uthini umuntu ozikhukhumezako?

⁴ Ngemva kokuthi uPowula athe abantu bazakuba ngabazithanda bona nabathanda imali, wabuye wathi godu bazakuba ngabazikhakhazisako, abazibona bangcono kunabanye nabakhukhumeleko, okumimikghwa eyenza abantu bazizwe babakhulu kunabanye. Lokhu kubangelwa makghonwabo, indlela abajame ngayo ngokweemali nendlela ababumbeke ngayo. Abantwaba bafuna ukuthandwa nokuhlonitjhwa. Esinye isazi satlola ngomuntu ozikhakhazisako sathi, “Uzibona angcono khulu kunabanye abantu.” Abanye bathi abantu abazikhukhumezako bayanyenya nababona abanye abantu bazikhukhumeza.

5. Kwenzeka njani ukuthi ngitjho nabantu abathembekileko bazikhukhumeze?

⁵ UJehova ukuhloyile ukuzikhukhumeza. Uyawahloya “amehlo aziphakamisako.” (IzA. 6:16, 17) Ukuzikhukhumeza kutjhidisela umuntu kude noZimu. (Rhu. 10:4) Ukuzikhukhumeza kungobunye bobuntu obumbi bakaSathana. (1 Thim. 3:6) Kuyadanisa ukuthi ngitjho nabakhulekeli bakaJehova abathembekileko bakhe bazikhukhumeza. U-Uziya iKosi yakwaJuda yathembeka kuZimu iminyaka. IBhayibheli lithi: “Kodwana ukudlondlobala kwaka-Uziya kwamenza wazikhukhumeza kwaba kukuwa kwakhe njalo. Azange asathembeka kuSomnini uZimakhe, wangena ngethempelini lakaSomnini kobana ayotjhisa itjhwalo e-aldarini lalo.” IKosi uHezikhiya nayo khekwaba nesikhathi lapho yazikhukhumeza khona.—2 Kron. 26:16; 32:25, 26.

6. Yini ebeyingabangela uDavida bona azikhukhumeze, kodwana kubayini angakhenge azikhukhumeze?

⁶ Abanye into ebenza bazikhukhumeze bubuhle, idumo, ukuba nekghono lokuvuma, amakghono abanawo namkha isikhundla esiphezulu emsebenzini. UDavida bekanazo zoke izintwezi, kodwana bekathobekile. Ngemva kokuthi abulele uGoliyadi wanikelwa indodakazi yeKosi uSawula bona ibe mkakhe, kodwana uDavida wathi: “Ngingubani mina begodu uyini umndeni wekhethu namkha ikoro kababa kwa-Israyeli, bonyana ngibe mkhwenyana wekosi na?” (1 Sam. 18:18) Yini eyasisiza uDavida bona athobeke? UZimu ‘wakhothama’ wamsiza waba nobuntu obuhle, wamupha amakghono namalungelo ebekanawo. (Rhu. 113:5-8) UDavida bekazi ukuthi yoke into anayo ehle uyithole kuJehova.—Madanisa neyo-1 Korinte 4:7.

7. Yini ezosisiza sithobeke?

⁷ NjengoDavida, abantu bakaZimu nabo balwela ukuthobeka. Kuyasimangaza ukuthi uJehova umuntu omkhulu ephasini nezulwini usathobekile bekube nje. (Rhu. 18:36, [18:35, NW]) Ayasikhuthaza amezwi asemtlolweni athi: “Mbathani isirhawu nethando, umusa, ukuthobeka, ummoya  ophasi, nokubekezela.” (Kol. 3:12) Begodu siyazi nokuthi “Ithando alizigqaji, alizikhakhazisi.” (1 Kor. 13:4) Nasithobekileko abantu bangafuna ukwazi uJehova ngebanga lalokho. Njengombana amadoda angafuna ukwazini uJehova ngebanga lokuziphathi kuhle kwabafazi bawo. Nasithobekileko nabantu bangafuna ukwazi uJehova.—1 Pit. 3:1.

8. (a) Kunjani ukungahloniphi namhlanjesi? (b) ImiTlolo iyelelisa abantwana bona benzeni?

⁸ UPowula waveza indlela abantu abaphila emalangeni wokuphela ebebazokuphathana ngayo. Wathi emalangeni wokuphela, abantwana ngekhe babalalela ababelethi babo. Kuyatlhuwisa ukuthi namhlanjesi ukungalaleli sele kwamukelwa emphakathini, kangangombana sekukunengi eencwadini, kuma-TV, kumamuvi nakwamanye amahlelo. Ukuziphathokhu kwenza imindeni nemiphakathi ingabumbani. Indaba yokungalaleli le sele kusikhathi eside yaziwa. Isibonelo esenza indaba le iqakatheke nasi, eGreece yekadeni umuntu nakabetha ababelethi bakhe, bekaqothwa emphakathini. Bese kuthi eRoma, umthetho wakhona bewuthi umuntu nakabetha uyise loyo bekumlandu ongafaniswa nokubulala. ImiTlolo yamaKrestu yesiGirigi neyamaHebheru ithi abantwana kufuze bahloniphe ababelethi babo.—Eks. 20:12; Efe. 6:1-3.

9. Yini engasiza abantu abatjha balalele ababelethi babo?

⁹ Ukucabanga ngalokho ababelethi ababenzele khona kuzokusiza abantwana bona babalekele ukungalaleli ababelethi babo. Ummoya wokuthokoza sizokuba nawo kwaphela nasizwisisa ukuthi nguZimu uBabethu ofuna silalele ababelethi bethu. Nabakhuluma kuhle ngababelethi babo, abantu abatjha bazokusiza nabanye bahloniphe ababelethi babo. Iye indaba le ikabili, nakhibe ababelethi ababazwisisi abantwababo kuzokuba budisi ngabantwana bona balalele. Bese kuthi ngakelinye ihlangothi abantwana nabalizwa ithando lababelethi bazokulwela ukubathabisa. U-Austin uthi: “Ngezinye iinkhathi ngikhe ngifune ukwenza engikufisako nanyana kungakalungi, kodwana ngigcine ngingakwenzi ngebanga lokuthi ababelethi bami bangibekela iinzathu ezizwakalako nabangikhalimako, namkha nabangibekela imithetho. Lokhu kungenza ngitjhaphuluke, ngikghone ukukhulumisana nabo begodu ngibalalele. Koke lokhu kwenza ngibone ukuthi banendaba nami begodu nami ngilwela ukubathabisa.”

10, 11. (a) Ngiziphi izinto ezitjengisa ukuthi abantu sele baphelelwe lithando? (b) AmaKrestu abathanda kangangani abanye abantu?

¹⁰ UPowula wakhuluma ngeminye imikghwa eveza ukuthi abantu abanalo ithando. Wathoma ngabantu abangathokoziko bese walandela ‘ngabantwana abangalaleli ababelethi’ babo. Lokhu kwenziwa kukuthi abantu abangathokoziko abazithatheli ehloko izinto abenzelwa zona. Wathi godu abantu bazakuba ngabangathembekiko. Bebangeze bavume ukwenza isivumelwano, lokho kuveze ukuthi abafuni ukuzwana nabanye abantu. Abanye bebazokuba bahlambalazi, abanye bakhaphele, bakhulume namezwi ahlabako ebantwini bakhulume kumbi nangoZimu. Bekuzokuba khona abantu abahlebako, abakhuluma kumbi abanye ngomqopho wokwehlisa isithunzi sabo. *

¹¹ Ngokungafaniko nabantu abanganathando namhlanjesi, iinkhonzi zakaJehova ziyathandana. Lokhu bekusolo kuliqiniso  bekube nje. UJesu wathi ukuthanda umakhelwanakho kumthetho wesibili oqakathekileko olandela othi kufuze uthande uJehova. Yomibili imithetho le ihlangana naleyo uZimu ayinikela uMosi. (Mat. 22:38, 39) UJesu wabuye wathi amaKrestu azokubonakala ngokuthandana. (Funda uJwanisi 13:34, 35.) Ithandweli lenza amaKrestu athande amanabawo.—Mat. 5:43, 44.

12. Yini uJesu ayenzako etjengisa indlela athanda ngayo abanye abantu?

¹² UJesu bekabathanda tle abantu! Wakhamba idorobho nedorobho, atjela abantu iindaba ezimnandi zomBuso kaZimu. Walapha abarholopheleko, wavula amehlo weemphofu, wahlambulula abanobulepheru begodu wavula iindlebe zabangezwako. Wavusa abafileko. (Luk. 7:22) UJesu wabe wafela boke abantu, ngitjho nanyana abanye bebamhloyile. Ithando lakhe latjengisa indlela uBabakhe asithanda ngayo. AboFakazi bakaJehova ephasini mazombe, bathanda woke umuntu. Balingisa uJehova.

13. Indlela esithanda ngayo abantu ingabasiza njani bona batjhidelane noJehova?

¹³ Abantu nababona indlela esinethando ngayo, bangafuna ukulotjha uBabethu wezulwini. Isibonelo salokho ngenye indoda yeThailand, yaya emhlanganweni yathi nayibona indlela abanakwethu abathandana ngayo yasala ibambe ongenzasi. Yathi nayibuyela ekhaya yabawa ukufundelwa, yafunda kabili ngeveke. Yathi nayizwa amaqiniso lawo yatjhumayeza woke umndenayo. Kwathi sekudlule iinyanga ezisithandathu ibuye emhlanganweni eyayakiwo loya, yabeka ikuluma yokuthoma yokufunda iBhayibheli. Akhe sizibuze imibuzo nasi, sizihlole ukuthi sibathanda kangangani abantu: ‘Ngenza koke okusemandlenami na ukusiza umndenami, abanakwethu nabodadwethu ebandleni nabantu engibatjhumayezako? Ngiqala abantu ngendlela uJehova abaqala ngayo?’

14, 15. Abantu namhlanjesi baziphatha njani, abanye bona batjhuguluke njani baba ngcono?

¹⁴ Ngebanga lokuthi abantu namhlanjesi abasenasimilo, lokho kwenza kuqakatheke khulu ukuthi amaKrestu angazihlanganisi nabo. Abantu abangamlotjhiko uZimu  abakuthandi okulungileko, kuhlekuhle bayakunyenya. Abantu abangakwazi ukuzibamba nabanelaka. Abanye banekani yesirhwerhwe. Okukuphela kwezinto abafuna ukuzenza ngezithandwa ngibo, abe abanandaba nokuthi zibaphatha njani abanye.

¹⁵ Inengi labantu ebelinganasimilo latjhuguluka. IBhayibheli latjho kade ukuthi abantu bazokutjhuguluka. (Funda u-Isaya 11:6, 7.) Amavesi la athi iinlwana zemmangweni zizakuhlala ngokuthula neenlwana ezifuywako njengeemvana namakonyana. Kuzakuba nokuthula ephasini loke “ ngombana iphasi lizakuzala ilwazi lakaSomnini njengamanzi asibekele ilwandle.” (Isa. 11:9) Iveseli alikhulumi ngeenlwana kodwana likhuluma ngabantu ngombana iinlwana angeze zafunda ngoJehova.

16. IBhayibheli libasize njani abanye bona batjhugulule imikgwabo emimbi?

¹⁶ Inengi labantu belinelaka njengepisi, nje seliphila ngokuthula nabanye abantu. Ungafunda ngemilandwabo esihlokweni esithi “IBhayibheli Litjhugulula Amaphilo” esifumanaka ku-jw.org. Abantwaba bafunda ngoJehova begodu bayamlotjha, abafani nabantu ababonakala bazinikele kuZimu kodwana bawaphika amandla wokuzinikelokho. Bathi bathanda okulungileko kodwana izenzo zabo ziyakuphikisa lokho. Abantu ebebanelaka batjhuguluka ‘bambatha ubuntu obutjha obadalwa ngokuvumelana nentando kaZimu ngokulunga kwamambala nokuthembeka.’ (Efe. 4:23, 24) Abantu nabasolo bafunda ngoZimu kulapho babona khona ukuthi kuqakathekile ukulalela imithethwakhe. Lokho kubenze batjhugulule iinkolelo zabo, indlela abacabanga ngayo nokuziphatha kwabo. Kuliqiniso ukuthi akusilula nakancani ukutjhuguluka ngalendlela, kodwana ummoya kaZimu uyabasiza abantu abafisa ukwenza intandwakhe.

17. Yini engasisiza bona singacaphazelwa kuziphatha kwabantu abangamlotjhiko uZimu?

¹⁷ Njengombana isikhathi sikhamba umahluko phakathi kwabantu abalotjha uZimu nabangamlotjhiko uba sebaleni. Nokho thina esilotjha uZimu kufuze siyelele ngombana kulula khulu ukuthi sigcine sele sifana nabo. Kungebangelo kufuze sihlakaniphe sibafulathele abantu ekukhulunywa ngabo emTlolweni ka-2 Thimothi 3:2-5. Iye khona kuliqiniso ukuthi angekhe sakubalekela ngaso soke isikhathi ukuba nabantu abanemikghwa emimbi. Kazi abanye babo singasebenza nabo, sifunde nabo besihlale nabo nemakhaya. Kodwana singakubalekela ukucabanga njengabo nokubalingisa. Okhunye okungasisiza ukuthi senze njalo, kutjhidelana noZimu ngokufunda iliZwi lakhe nokuba nabangani abazimisele ukumlotjha.

18. Esikutjhoko nendlela esiziphatha ngayo kungabenza njani abantu bafune ukwazi uJehova?

¹⁸ Kufuze silinge ngamandla kusiza nabanye bathuthukise ubuhlobo babo noZimu. Asebenzise amathuba owatholako ukuthi utjhumayele, bawa uJehova akusize ukhulume okufaneleko nangesikhathi esifaneleko. Kufuze sibatjele abantu ukuthi siboFakazi bakaJehova. Lokho kuzokwenza ukuthi abantu nababona siziphethe kuhle bangadumisi thina kodwana badumise uJehova. UJehova usibandulile bona “sale ukungahloniphi uZimu neenkanuko zephasi begodu siphile ngomkhumbulo oqaqulukileko, ngokulunga nangokuzinikela kuZimu phakathi kwephaseli.” (Tit. 2:11-14) Kufuze sihlale sikhumbula ukuthi nasiziphatha kuhle, abantu bayakubona lokho. Abanye bangabe bathi: “Sifuna ukukhamba nawe ngombana sizwile bonyana uZimu unani.”—Zak. 8:23.