Kghani Nawulungileko Lokho Kutjho Ukuthi Uzokuba Nengomuso Elihle?
Sekuminyaka eminengi abantu bakholelwa ukuthi nawumumuntu olungileko noziphethe kuhle lokhu kutjho ukuthi uzokuba nengomuso elihle. Ngokwesibonelo, abantu abanengi abahlala e-Asia bavumelana nalokho okwatjhiwo sisazi esidumileko u-Confucius (551-479 B.C.E.) owathi: “Lokho ongafuni abantu bakwenze kuwe ungakwenzi kwabanye.” *
LOKHO ABANENGI ABAKWENZAKO
Abantu abanengi bakholelwa ukuthi nawuziphatha kuhle uzokuba nengomuso elingcono. Balinga ukuba babantu abanehlonipho, abaziphatha kuhle nabadlala indimabo ngendlela efaneleko emphakathini. U-Linh ohlala e-Vietnam uthi: “Bengikholelwa ukuthi nangihlala ngikhuluma iqiniso ngizokuthabela ukuphila.”
Abanye benza izinto ezihle ngebanga lalokho abakufundiswa emasondweni. U-Hsu-Yun ohlala e-Taiwan uthi, “Ngafundiswa ukuthi lokha umuntu nakenza izinto ezihle uzokuthaba ngemva kokuthi ahlongakele kodwana nakenza izinto ezimbi uzokuya esirhogweni.”
IBE YINI IMIPHUMELA YALOKHO?
Kuliqiniso ukuthi nasenzela abanye izinto ezihle siyathaba. Esikhathini esinengi abantu abenzela abanye izinto ezihle, balemuke ukuthi bona abaphathwa kuhle. U-Shiu Ping ohlala e-Hong Kong uthi, “Ngafunda kilokho okwangehlelako ukuthi awuthabi ngaso soke isikhathi nanyana wenzela abantu izinto ezihle. Ngalinga koke okusemandlenami ukuthi ngitlhogomele umndenami begodu ngenze izinto ezihle. Nanyana kunjalo umtjhadwami wamotjheka, ubabakwami wasitjhiya mina nendodanami.”
Abantu abanengi balemuke ukuthi akusiwo woke umuntu osondako olungileko. U-Etsuko ohlala e-Japan uthi, “Ngaba lilunga lesonto elithileko ngathoma ngaba mdosiphambili wabantu abatjha. Kwangirara khulu ukubona abantu baziphatha kumbi ngokomseme, balwela iinkhundla begodu bangayisebenzisi kuhle imali yesonto.”
“Ngalinga koke okusemandlenami ukuthi ngitlhogomele umndenami begodu ngenze izinto ezihle. Nanyana kunjalo umtjhadwami wamotjheka, ubabakwami wasitjhiya mina nendodanami.”—SHIU PING, HONG KONG
Abantu abazinikele esontweni abalinga ukwenza izinto ezihle, bagcina sele badanile ngombana abantu abababuki ngemisebenzabo emihle. U-Van ohlala e-Vietnam wazizwa ngendlela leyo. Uthi, “Qobe langa bengiza neenthelo, amablomu nokudla ngizibeke e-aldareni ngizinikele abezimu bami nginethemba lokobana ngizokufumana iimbusiso. Nanyana bengenza zoke izinto ezihle ngilandela namasiko wekolo iminyaka eminengi, ubabakwami wagula khulu. Kwathi ekukhambeni kwesikhathi indodakazami ebeyifunda kwenye inarha nayo yahlongakala.”
Nangabe ukuba mumuntu olungileko akutjho ukuthi uzokuba nengomuso elingcono, khuyini ke ekuqinisekisako? Ukuthi siphendule umbuzo lo sitlhoga isinqophiso esingasithemba—umthombo welwazi ozosiphendulela imibuzo esinayo bewusitjengise indlela yokufumana ingomuso elingcono. Singasifumanaphi isinqophisweso?
^ isig. 2 Ukufumana imininingwana engeziweko ngeemfundiso zaka-Confucian qala isahluko 7, iingaba 31-35 encwadini ethi, Ukufuna Kwesintu UNkulunkulu efumaneka ku-www.jw.org.
