AboFakazi bakaJehova bakholelwa ukuthi iinkambiso nemiyalo efumaneka eBhayibhelini ingasisiza senze iinqunto ezithabisa uZimu bezizuzise nathi ngokwethu. (Isaya 48:17, 18) Iinkambiswezi nemiyalo le ayikenziwa ngithi kodwana siphila ngayo. Qala bona ezinye zazo zihlobana njani nendaba yokuthandana. a

•   Umtjhado sibopho esihlala ngokungapheliko. (Matewu 19:6) Ngebanga lokuthi aboFakazi bakaJehova baqala ukuthandana njengegadango elibalungiselela ukutjhada, yeke abadlali ngakho.

•   Ukuthandana ngekwalabo abakhule ngokwaneleko bona bangatjhada. Abakhule ngokwaneleko ngilabo ‘esele badlule iminyaka yobutjha’ namkha labo abangasalawulwa ziinkanuko zomseme.​—1 Korinte 7:36.

•   Labo abathandanako batjhaphulukile bona bangatjhada. Nanyana abanye batlhale ngokusemthethweni kodwana uZimu ubaqala njengabangakatjhaphuluki bona bangatjhada godu, ngebanga lokuthi umthethwakhe uthi ibanga elizwakalako lokutlhala kulokha omunye nakaziphethe kumbi ngokomseme.​—Matewu 19:9.

•   AmaKrestu afuna ukutjhada ayalwa bona atjhade kwaphela nomuntu olotjha uZimu. (1 Korinte 7:39) AboFakazi bakaJehova abaqali umyalo lo njengoqaliselwe kwaphela emuntwini ohlonipha iinkolelo zethu kodwana uqaliselwe emuntwini owabelana nabanye lokho esikukholelwako nophila ngeenkolelwezi begodu onguFakazi obhajadisiweko. (2 Korinte 6:14) UZimu bekasolo anqophisa abantu bakhe bona batjhade kwaphela nabantu abamlotjhako. (Genesisi 24:3; Malaki 2:11) Umyalo lo ukhambisana nalokho okufunyanwe barhubhululi banamhlanjesi. b

•   Abantwana kufuze balalele ababelethi babo. (IzAga 1:8; Kolose 3:20) Ebantwaneni abahlala ekhaya, umyalo lo uhlanganisa ukulalela iinqunto zababelethi babo malungana nokuthandana. Lokhu kuhlanganisa umnyaka indodana namkha indodakazi evumeleke ngawo bona ingathandana nokuthi khuyini abavumeleke ukuyenza.

•   Ngaphezu kweenqophiso zemitlolo, aboFakazi bayazikhethela ukuthi bazokuthandana na nokuthi bazokuthandana nobani. Lokhu kuvumelana nekambisolawulo ethi: “Omunye nomunye uzozithwalela umthwalwakhe.” (Galatiya 6:5.) Nanyana kunjalo, naziza endabeni yokuthandana, ngokuhlakanipha abanengi bafuna isinqophiso kiboFakazi abavuthiweko nabaneenhloso ezihle.​—IzAga 1:5.

•   Izenzo ezinengi ezihlotjaniswa nokuthanda kuhlekuhle zizizono ezikulu. Ngokwesibonelo, iBhayibheli lisiyala bona sigegede ukuziphatha kumbi ngokomseme. Lokhu akuhlanganisi kwaphela ukuya emsemeni kodwana kuhlanganisa nezenzo ezisilapheleko ezenziwa babantu abangakatjhadi, njengokubambabamba izitho zomunye umuntu namkha ukwenza zomseme ngomlomo namkha emahlalweni. (1 Korinte 6:9-11) Ngitjho nokuziphatha okuvusa ikanuko ephela ngaphambi kokuziphatha kumbi, kuZimu “kusilaphala” lokho begodu akathabi ngokuziphatha okunjalo. (Galatiya 5:19-21) Neenkulumo ezimbi ezifaka hlangana ‘ikulumo eyonakeleko’ iBhayibheli lithi kusuke koke lokhu kithi.​—Kolose 3:8.

•   Umuntu esinguye ngaphakathi namkha ihliziyo, iyakhohlisa. (Joromiya 17:9) Ingenza umuntu enze izinto azaziko ukuthi azikalungi. Bona bakhandele ukukhohliswa ziinhliziyo zabo, abantu abathandanako bangabalekela ukuba bodwa ngaphasi kobujamo obungabalinga. Bangakhetha ukuba hlangana nabantu abanengi namkha ukuba nomuntu ofanelekako ozobagada. (IzAga 28:26) AmaKrestu afuna umlingani womtjhado ayazitjheja iingozi zokumfuna kwezethungelelwano, khulukhulu ukwakha ubungani nomuntu angamazi kuhle.​—IRhubo 26:4.