Ko e Kakano Hako ke Talitonu

KO E tohi Korea 31 Reasons Why Young People Leave the Church ne fakapuloa kua tokologa ne nakai o tapu ha kua nakai moua e lautolu e tau tali makona ke he tau huhu ha lautolu. Tuga anei, ne huhu a lautolu, ‘Ko e ha kua matematekelea e tau tagata ne talitonu ke he Atua?’ mo e ‘Ko e ha kua lata ia tautolu ke talia e tau mena oti kua fakaako he tau tapu ka e loga e tau fakaakoaga kua fakagoagoa mo e nakai moli?’

He hogohogomanava ha ko e tau tali ne foaki he tau akoako ha lautolu, tokologa ne fakahiku kua nakai fai tali he Tohi Tapu. He foaki he akoako e fakamaamaaga kua fakave katoatoa ke he manatu fakatagata hana, kua fua mai e nakai maama, mo e fakaheu foki e Atua mo e Tohi Tapu.

Ko e mena haia ne tupu ki a Abel, ne tupu hake ko e Lufalani i Aferika Toga. Ne liu a ia manatu: “Kua fakaako he tau tapu ko e tau tagata oti kua mamate na ‘uta’ he Atua. Ka e nakai maeke ia au ke maama e kakano kua ‘uta’ he Atua he fakaalofa e tau mamatua mai he tau fanau ha lautolu. He maaga i tua ha Aferika nukua tupu hake ai au, ne nakai tamate e mautolu e moa fifine ato lalahi e tau punua moa. Kaeke ke moua e mautolu e povi kua fatu, ne leo a mautolu ato fanau mai e punua povi mo e maeke ke mahani to tamate. Nakai maeke ia au ke maama e kakano he nakai fakakite he Atua fakaalofa e manamanatuaga taha pihia ma e tau tagata.”

Ko Aram, ko e Kanata, ne fakauaua pihia foki. “He 13 e tau he moui haku, ne mate e matua tane haku,” he talahau e ia. “He lauga mauku, ko e takitaki akoako ne fakamaama kua manako e Atua ke mate e matua tane haku ke maeke ke fakatata lahi a ia ke he Atua ki luga he lagi. ‘Uta he Atua e tau tagata mitaki,’ he talahau e ia, ‘ha kua fakaalofa e Atua ki a lautolu kua tututonu.’ Nakai maeke au ke maama e puhala kua lotokai lahi ha ia e Atua.”

 Hoko ai ke he fakaotiaga, ne matutaki a Abel mo Aram mo e Tau Fakamoli a Iehova, ti fakaako e Tohi Tapu mo lautolu ti, fakahiku ai, moua e tau tali ke he tau huhu ha laua. Ne feaki e laua e fakaalofa ma e Atua mo e tua malolo ki a ia. Fakahiku ai, ne tukulele e laua ha laua a tau momoui ki a Iehova ti eke ai mo tau fekafekau fakamoli hana.

Iloilo Tonu​—Ko e Kei ke Talitonu ke he Atua

Ko e heigoa kua maeke ia tautolu ke ako mai he tau mena iloa nei? Kua talahau e laua ki a tautolu hagaao ke he taofiaga he Atua, kua lata moli e he Tohi Tapu. Ne tala age e aposetolo ko Paulo ke he tau Kerisiano he taone i tuai ha Filipi: “Ko e haku a liogi hanai, kia fakatupu lahi ue atu ha mutolu a fakaalofa, mo e [“iloilo tonu,” NW], katoa mo e loto matala oti kana.” (Filipi 1:9) Kua talahau anei e Paulo ke he fakaalofa ma e Atua mo e ma e tau matakainaga talitonu ke he iloilo tonu he Atua mo e loto matala ke he finagalo hana.

Kua tonu e mena nei, ha ko e poakiaga fakamua ma e falanaki mo e mauokafua ke he taha tagata ko e iloa e tagata ia—ko e lahi atu e katoatoa mo e iloa moli, kua mitaki ia. Tatai ia, kua lata e iloilo tonu ma hau ke omoomoi ke talitonu ke he Atua. “Ka ko e tua, ko e falanaki haia ke he tau mena kua amaamanaki ki ai, ko e fakamoli he tau mena nakai kitia atu,” he talahau e Paulo. (Heperu 11:1) Ko e taofiaga ke he Atua ka e nakai fai iloilo tonu ke he Tohi Tapu kua tuga e fale he tau lau pele. Ko e tama puhi tote ka fakamalolo hifo ai.

Ko e fakaako ke he Tohi Tapu kua maeke ke lagomatai a koe ke kumi e tau tali ke he tau huhu tuga a ia ne leva e fakagogoa aki a Abel mo Aram, Ko e ha ne mamate e tau tagata? Kua fakamaama mai he Tohi Tapu ne “hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Kua fuakau mo e mamate e tau tagata, nakai ha kua uta he Atua a lautolu ke fakalataha mo ia, ka e ha ko e agahala ha Atamu. (Kenese 2:16, 17; 3:6, 17-19) Lafi ki ai, kua fakakite he Tohi Tapu e amaamanakiaga moli kua foaki e Iehova ko e Atua. Puhala mai he hana Tama, ko Iesu Keriso, ne foaki e ia e amaamanakiaga he liu tu mai ma e tau tagata agahala.—Ioane 5:28, 29; Gahua 24:15.

Ke lagomatai a tautolu ke loto fakaaue ke he kupu moli hagaao ke he liu tu mai, kua fakamau he Tohi Tapu falu fakafifitakiaga he tau tagata ne liuaki mai e Iesu ke he moui. (Luka 7:11-17; 8:40-56; Ioane 11:17-45) He totou e koe e tau fakamauaga nei he Tohi Tapu, kia mailoga e olioli mo e fiafia he tau kapitiga mo e magafaoa ha lautolu ne fakaliu tutu mai. Mailoga foki ne omoi a lautolu ke fakaheke e Atua mo e ke tua ki a Iesu.

Ko e iloilo tonu hagaao ke he Atua mo e hana finagalo kua maeke ke lauia pihia e tau tagata he vaha nei. Tokologa ne fakagoagoa, pehia, mo e tupetupe foki ke he taha magahala ha ko e tau huhu aoga ne nakai moua e lautolu e tau tali makona ki ai. Ka e he fakaako a lautolu ke he Tohi Tapu, ne moua e lautolu e tau tali, ti hiki katoatoa he mena ia e tau momoui ha lautolu.

Fakaalofa ma e Atua​—Kakano ne Mua ke Fekafekau ki a Ia

Ha kua latatonu e iloilo tonu he tua ke he Atua, lahi atu foki e mena kua lata ke omoomoi e tagata ke omaoma mo e ke fekafekau ki a ia. He huhu ke he poakiaga ne mua ue atu mai he Atua, ne pehe a Iesu: “Kia fakaalofa atu foki a koe ke he Iki hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa.” (Mareko 12:30) Kaeke ke fakaalofa e tagata ke he Atua ke he puhala ne fakakite e Iesu, to fiafia lahi a ia ke omaoma mo e fekafekau ki a Ia. Moli nakai e mena ia ki a koe?

Ko Rachel, ne fekafekau ko e misionare i Korea ke he loga e tau hogofulu tau, ne foaki e kakano nei ma e hana tua: “Manatu au ke he fakamokoi ha Iehova ke he hana tau mena momoui, ko e hana fakamagalo he fehagai mo e hana tau tagata, mo e hana manako ma tautolu ke aoga ni ki a tautolu he fakailoa mai ki a tautolu e tau mena kua manako a ia mai ia tautolu. Ko e tau mena oti ia kua taute e fakaalofa haku ma e Atua ke tupu. Ti kua taute he fakaalofa ia au ke manako ke fekafekau ki a ia.”

 Ko Martha, ko e takape mai i Sihamani, ne fekafekau ki a Iehova ke 48 e tau tau. Kua pehe a ia: “Ko e ha ne fekafekau au ki a Iehova? Ha kua fakaalofa au ki a ia. He tau afiafi oti kua tutala au ki a Iehova he liogi mo e tala age ki a ia e fakaaue lahi mahaki haku ma e tau monuina oti kana hana, mua atu ke he poa lukutoto.”

E, ko e fakaalofa ke he Atua kua taute a tautolu ke manako ke fekafekau ki a ia mai he tau loto. Ka e puhala fe kua maeke he taha ke moua e fakaalofa pihia? Ko e fakalagalaga malolo ue atu ke feaki e fakaalofa ma e Atua ko e loto fakaaue lahi mahaki ma e fakaalofa kua fakakite e ia ki a tautolu. Mailoga e fakamanatuaga loto mafanatia nei mai he Tohi Tapu: “Ko e tagata kua nakai fakaalofa, kua nakai iloa e ia e Atua; ha ko e Atua ko e fakaalofa a ia. Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia. Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto mo e tau hala ha tautolu.”—1 Ioane 4:8-10.

Loto fakaaue nakai a koe ke he lahi atu he fakaalofa nei? Manamanatu la kua tomo a koe he vailele tafe mafiti ti folau he tagata tane e moui hana ke fakahao a koe. To nimo kia e koe a ia, po ke to nakai loto fakaaue katoatoa a koe ki a ia? To nakai kia fiafia lahi a koe ke taute ha mena kua maeke ia koe ma hana? Ko e fakaalofa kua fakakite he Atua he foaki hana Tama, ko Iesu Keriso, ko e poa lukutoto kua nakai fai mena ke fakatatai ki ai e lahi. (Ioane 3:16; Roma 8:38, 39) Ka amotia e loto hau he fakaalofa he Atua, to omoomoi a koe ke fakaalofa mo e fekafekau loto katoatoa ki a ia.

Tau Monuina Mogonei mo e Anoiha

Pete ni ko e fakaalofa ha tautolu ma e Atua kua lata ko e matapatu kakano he taute hana finagalo, kua mafanatia e loto ke iloa kua foaki he Atua e palepale ki a lautolu kua fekafekau ki a ia. Kua talahau he aposetolo ko Paulo: “Ka nakai tua, ti nakai maeke ke fakafiafia kia ia; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.”—Heperu 11:6.

 Ko lautolu kua fakaalofa mo e omaoma ke he Atua kua fakamonuina moli e ia. Tokologa ne fiafia e malolo tino mitaki ha ko e fua he muitua ke he tau matapatu fakaakoaga Tohi Tapu. (Tau Fakatai 23:20, 21; 2 Korinito 7:1) Ko lautolu kua fakagahua e tau matapatu fakaakoaga Tohi Tapu hagaao ke he mahani fakamoli mo e fakalotomatala kua fa falanaki ki ai e tau takitaki gahua ati fiafia lahi ke he haohao mitaki fakatupe. (Kolose 3:23) He falanaki a lautolu ki a Iehova, kua fakamonuina e tau fekafekau he Atua aki e mafola he manamanatuaga i lalo foki he tau tutuaga kamatamata. (Tau Fakatai 28:25; Filipi 4:6, 7) Ki luga he tau mena oti, kua onoono mauokafua atu a lautolu ke he monuina he moui tukulagi ke he Parataiso he lalolagi hane hau.—Salamo 37:11, 29.

Maeke fefe ia lautolu kua fiafia ke he tau monuina mai ia Iehova ke logona hifo hagaao ki a ia? Ko Jacqueline, ko e Kerisiano i Kanata, ne fakakite e ia e loto fakaaue hana ma e Atua: “Kua foaki tumau e ia ki a tautolu e tau mena fakaalofa homo ue atu, mo e kua foaki e ia e amaamanakiaga moli he moui tukulagi.” Ko Abel, nukua logona e tautolu ke he kamataaga, ne fakamaama hana tau logonaaga ke he puhala nei: “Ko e amaamanakiaga he moui tukulagi ke he lalolagi parataiso ko e mena fou ki a au, ti hane onoono lahi atu au ki ai. Pete ia, kaeke ke nakai fai Parataiso, to eke agaia ni mo mena fiafia ki a au ke fakakite e fakaalofa haku ma e Atua he fekafekau ki a ia.”

Maeke Foki a Koe ke Moua e Tua Moli

“Iehova Sapaota na e, ko e fakafili tututonu, kua kamatamata ke he tau manatu mo e loto,” he talahau he Tohi Tapu. (Ieremia 11:20) E, kua kamatamata e Iehova e mena galo he tau loto hokulo muatua ha tautolu. Kua lata ke igatia mo e kamatamata hana ni a logonaaga he talitonu ke he Atua. Ko e tau taofiaga mo e tau manatu hehe hagaao ke he Atua kua liga lafi ke he tau mahani hepehepe he vaha fakamua. Ka ko e iloilo tonu he Tohi Tapu kua maeke ke takitaki ke he fakafetuiaga hako mo e Tufuga, ko Iehova ko e Atua.—1 Timoteo 2:3, 4.

Puhala he fakatokaaga he fakaakoaga Tohi Tapu nakai totogi ha lautolu, kua lagomatai he Tau Fakamoli a Iehova e tau tagata ke moua e iloilo tonu he Atua. (Mataio 28:20) Tokologa kua talia e lagomatai pihia nukua maeke ke fakaalofa ke he Atua mo e feaki e tua moli ki a ia. Puhala he fakaako e Tohi Tapu, ne moua e lautolu e “iloilo mo e loto manamanatu,” nukua lagomatai a lautolu ke ‘o ke he puhala mo e nakai haofia’ he tau vaha hagahagakelea nei. (Tau Fakatai 3:21-23) Mahomo atu, kua manamanatu a lautolu mogonei ke he amaamanakiaga “nakai matoho mo e mauokafua” ma e vaha anoiha. (Heperu 6:19) Maeke foki ia koe ke moua e tua moli mo e fiafia ai e tau monuina nei.

[Puha he lau 6]

Tau Huhu Uka ne Lata ke Fai Tali

“He fakamahani he fale gagao mo tagata fakaako ekekafo, ne kitia e au e tau tagata mitaki ne ooi he mamahi ha ko e tau gagao mo e tau matematekelea. Ane fai Atua, ko e ha ne tutupu e tau mena nei? Ko e lotu kia ko e puhala ke moua e mafola he manamanatuaga?”—Ko e tagata Peresipateria he vaha fakamua i Korea.

“Kua fa manamanatu au ke he matua tane haku, ko e tagata inu kava, ne fano ki helo po ke ke he lagi. Kua matakutaku au he tau tagata mamate mo e ke he manatu he afi helo. Nakai maama e au e puhala kua fakafano he Atua fakaalofa taha tagata ke matematekelea tukulagi i helo.”—Ko e Katolika he vaha fakamua i Parasili.

“Ko e heigoa kua fakatoka mai he vaha anoiha ma e lalolagi mo e tau tagata? To maeke fefe he tau tagata ke momoui tukulagi? Hokotia fefe e tau tagata ke he mafola moli?”—Ko e Katolika he vaha fakamua i Sihamani.

“Ko e fakaakoaga he liu fanau mai ke he taha tino foki kua nakai maama ki a au. Nakai tapuaki e tau manu huifa, ti ke he falu a kakano ni kua liu fanau a koe ke he manu huifa ke totogi aki e tau agahala hau, maeke fefe a koe ke fakahako e tau manatu mo e holo ki mua mai he tuaga ia?”—Ko e Hinitu he vaha fakamua i Aferika Toga.

“Ne tupu hake au he magafaoa Konofusia, ti fakalataha au ke he faiagahau ma e tuaga mafola he tau tupuna ha mautolu. He fai vala au ke he fakatu e laulau poa mo e fakatokotui, ne manamanatu au na o mai nakai e tau tupuna mamate ke kai e tau mena kai mo e kitia a mautolu ne fakatokotui ki a lautolu.”—Ko e tagata Konofusia he vaha fakamua i Korea.

Ko lautolu oti nei ne moua e tau tali ke he tau huhu ha lautolu he magaaho ne fakaako e lautolu e Tohi Tapu mo e Tau Fakamoli a Iehova.