Fakakite e Finagalo Amaamanaki!
Fakakite e Finagalo Amaamanaki!
“To amaamanaki au ke he Atua he haku a fakamouiaga; to fanogonogo mai haku a Atua kia au.”—MIKA 7:7.
1, 2. (a) Fakahagahaga kelea fefe he finagalo hepe e tau Isaraela he tutakale? (e) Ko e heigoa ka tupu ke he Kerisiano ne nakai feaki e finagalo mitaki?
LOGA e tau mena he moui kua mailoga ke mitaki po ke nakai mitaki, he falanaki ke he finagalo ha tautolu. He magaaho ne ha ha e tau Isaraela he tutakale, ne foaki fakamana ki a lautolu e tau manai. Kua lata ia lautolu ke onoono viko ke he malamalaega mo e fakaaue lahi ki a Iehova he foaki e kai ma lautolu. To fakakite he mena ia e finagalo mitaki. Ka e kehe ni, ne manatu e lautolu e tau kai kehekehe i Aikupito mo e gugu kua nakai lolo e manai. Ko e finagalo kelea ha ia!—Numera 11:4-6.
2 Kua maeke ke pihia foki e finagalo he Kerisiano he vaha nei kua tuga ke fiafia po ke nakai fiafia. Ka noa mo e finagalo mitaki, kua mukamuka he Kerisiano ke galo e fiafia hana, ti ko e mena kelea a ia ha kua tuga ne talahau mai e Nehemia: “Ko e fiafia kia Iehova ko e malolo ha [tau]tolu haia.” (Nehemia 8:10) Ko e finagalo mitaki mo e fiafia ka fakamalolo a tautolu mo e fakatu e mafola mo e kaufakalataha i loto he fakapotopotoaga.—Roma 15:13; Filipi 1:25.
3. Lagomatai fefe he finagalo mitaki a Ieremia he tau vaha uka?
3 Pete kua moui he tau vaha uka, ne fakakite e Ieremia e finagalo mitaki. Pihia foki he magaaho ne kitia mata e ia e matakutakuina he veli a Ierusalema he 607 F.V.N., ne kitia e ia e fahi mitaki. To nakai nimo e Iehova a Isaraela, mo e to laveaki ai e motu. Ne tohia e Ieremia he tohi he Tagi Aue: “Kia liliu mai a mutolu, ko e fanau na e ne liliu kehe, ti fakamalolo ai e au ha mutolu a liliu kehe. Kia kitekite mai ā koe kia mautolu, kua o atu a mautolu kia koe, ha ko e Atua ha mautolu a koe, Iehova na e. Ko e moli nakai aoga he tua ke he tau mouga, mo e miha he motu o tagata ki luga he tau mouga; ko e moli, ha ha ia Iehova ha mautolu a Atua e fakamouiaga a Isaraela.” (Tagi Aue 3:22, 23) Tali mai he fakamauaga tuai, ko e tau fekafekau he Atua he tau tutuaga hagahaga kelea lahi nukua fakamakamaka ke fakatumau e finagalo mitaki mo e fiafia foki.—2 Korinito 7:4; 1 Tesalonia 1:6; Iakopo 1:2.
4. Ko e heigoa e finagalo ne ha ha mau ia Iesu, mo e lagomatai fefe ki a ia?
4 He ono teau tau he mole a Ieremia, kua lagomatai a Iesu ke fakauka ha ko e hana finagalo mitaki. Kua totou e tautolu: “Ko [Iesu] ne fakauka ke he satauro, mo e fakateaga a ia ke he ma, ha ko e fiafia kua toka ki mua, kua nofo foki a ia ke he fahi matau he nofoaiki he Atua.” (Heperu 12:2) Ko e ha fakafualoto po ke favaleaga ni ne fehagaao mo Iesu—pihia foki e mamahi ke he akau fakakikiveka—ne tokaloto e ia e “fiafia kua toka ki mua hana.” Ko e fiafia ia ko e kotofaaga ke fakapuloa e pule katoatoa a Iehova mo e fakatapu e higoa hana pihia foki e amanakiaga ke ta mai e tau monuina ke he tau tagata omaoma he vaha anoiha.
Kia Moua e Finagalo Amaamanaki
5. Ko e heigoa e tuaga ne kua maeke he finagalo amaamanaki ke lagomatai a tautolu ke fakatumau ke moua e onoonoaga mitaki?
5 Kaeke feaki e tautolu e finagalo tuga ha Iesu, to nakai galo ia tautolu e fiafia a Iehova pete ni ka nakai tutupu e tau mena tuga ne manako e tautolu po ke he magaaho ha tautolu. Ne talahau he perofeta ko Mika: “Ka ko au, to tatali atu au kia Iehova, to amaamanaki au ke he Atua he haku a fakamouiaga.” (Mika 7:7; Tagi Aue 3:21) Maeke foki ia tautolu ke fakakite e finagalo amaamanaki. Fefe? Ke he tau puhala loga. Taha mena, liga kitia e tautolu kua hepe e mena ne taute he taha matakainaga leveki ti kua lata ke fakahako fakamafiti. Ka e fakaata he finagalo amaamanaki a tautolu ke manamanatu, ‘Kua hepe moli kia a ia, po ko au ne hepe? Kaeke ke hepe a ia, nakai kia ha kua fakaata e Iehova e mena ia ke tupu kakano he manatu a ia to lagomatai he mena ia e tagata ti kua nakai lata ke fakahako fakamafiti?’
6. Maeke fefe he finagalo amaamanaki ke lagomatai e tagata ne taufetului mo e hana ni a lekua?
6 Liga kua lata tonu e finagalo amaamanaki kaeke tupetupe a tautolu ha ko e lekua fakatagata po kua taufetului mo e taha matapona tuai. Liga kua ole lagomatai a tautolu ki a Iehova, ka e tumau agaia e lekua. Ko e heigoa mogoia? Kua lata ia tautolu ke taute e mena kua fahia a tautolu ke taute ke fakahako e lekua katoa mo e tua ke he tau kupu a Iesu: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu.” (Luka 11:9) Kia fakatumau ke he liogi, mo e tatali ki a Iehova. He magaaho kua lata mo e ke he hana ni a puhala, to tali e Iehova e tau liogi hau.—1 Tesalonia 5:17.
7. Ko e puhala fe ka lagomatai he finagalo amaamanaki e onoonoaga ha tautolu ke he maama fakahaga he Tohi Tapu?
7 He fakamoli fakahaga e tau perofetaaga he Tohi Tapu, kua fakamahino foki e maamaaga ha tautolu ke he tau Tohiaga Tapu. He falu magaaho, mogoia, liga manamanatu a tautolu kua mule lahi falu a fakamaamaaga. Kaeke nakaila kitia ia he magaaho ne manako e tautolu, kua makai nakai a tautolu ke fakatali? Manatu, nukua iloa e Iehova e magaaho ke fakakite fakaeneene mai e “iloilo ke he tau mena galo kia Keriso” ti kua molea ke he 4,000 he tau tau. (Efeso 3:3-6) Kua fai kakano kia a tautolu mogoia ke nakai fakauka? Kua fakauaua kia a tautolu na kotofa e “fekafekau fakamoli mo e loto matala” ke foaki ke he tau tagata ha Iehova e “tau mena kai ke he tau magaaho”? (Mataio 24:45) Ko e ha ne fakatoka kehe ni e tautolu a tautolu mai he fiafia mahani Atua ha kua nakai maama katoatoa e tau mena oti? Manatu, na fifili ni e Iehova e magaaho mo e puhala ke fakakite ai “hana finagalo.”—Amosa 3:7.
8. Kua fakakite fefe he fakauka a Iehova e aoga ke he tokologa?
8 Liga fakalolelole falu ha kua logona hifo e lautolu he mole e tau tau loga he fekafekau fakamoli, liga to nakai momoui a lautolu ke kitia e “aho a Iehova kua lahi mo e matakutakuina.” (Ioelu 2:30, 31) Ka kua maeke agaia a lautolu ke fakamalolo ka onoono atu a lautolu ke he fahi mitaki. Ne fakatonu mai e Peteru: “Kia manatu . . . e fakauka he Iki ha tautolu.” (2 Peteru 3:15) Kua fakaata foki he fakauka ha Iehova e totou miliona ne tututonu ke fakaako e kupu moli. Nakai kia ko e mena mitaki lahi a ia? Ti, ka leva e fakauka a Iehova, ti lahi ai e magaaho ke ‘gahua kia momoui ai a tautolu mo e matakutaku mo e vivivivi.’—Filipi 2:12; 2 Peteru 3:11, 12.
9. Kaeke kua temotemoai e mena kua maeke ke taute e tautolu he fekafekauaga ha Iehova, to maeke fefe he finagalo amaamanaki ke lagomatai a tautolu ke moua e fakauka?
9 Kua lagomatai he finagalo amaamanaki a tautolu ke nakai fakalolelole he magaaho ka fakaalaia mai e fakafualoto, gagao, motua lahi, po ke falu a mena vihi ki a tautolu he fekafekauaga he Kautu. Amanaki mai a Iehova ki a tautolu ke fekafekau ki a ia mo e loto katoa. (Roma 12:1) Pete ni ia, ko e Tama he Atua, ko ia ne “fakaalofa . . . kia ia kua lolelole, mo ia kua nofogati,” kua nakai manako mai ke mua atu e mena ka taute ke he mena kua fahia ai a tautolu; ti pihia foki a Iehova. (Salamo 72:13) Ko e mena ia, kua fakamafana ki a tautolu ke taute e mena kua maeke ni ia tautolu, he fakatalitali fakauka ato hiki e tau tutuaga—pete he fakatokaaga nei po ke he fakatokaaga hane hau. Manatu: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.”—Heperu 6:10.
10. Ko e heigoa e mahani nakai Atua kua lata he tagata mo e finagalo amaamanaki ke kalo kehe mai ai? Fakamaama.
10 Kua lagomatai foki he finagalo amaamanaki a tautolu ke kalo mai he mahani ohooho. Ko e falu ne eke mo tau tagata tiaki taofiaga nukua nakai makai ke fakatali. Liga manatu a lautolu kua lata ke fai hikihikiaga, ke he maamaaga he Tohi Tapu po ke he tau puhala fakatokatokaaga. Ka e, kua kaumahala a lautolu ke mailoga ko e agaga a Iehova ne omoi e fekafekau fakamoli mo e loto matala ke taute e tau hikihikiaga he magaaho Hana ni, nakai he magaaho kua lata he logona e tautolu. Mo e ha hikihikiaga ka taute kua fakalata atu ni ke he finagalo a Iehova, nakai ke he tau manatu fakatagata ha tautolu. Ne fakaata he tau tagata tiaki taofiaga e mahani ohooho ke fakahehe aki e manamanatuaga ha lautolu ati lolelole ai a lautolu. Ka e kaeke hiki mai e lautolu e finagalo ha Keriso, liga tumau e fiafia ha lautolu mo e haia agaia mo e tau tagata ha Iehova.—Filipi 2:5-8.
11. Maeke fefe ia tautolu ke fakaaoga fakamitaki e magaaho ne fakaaoga ke fakatali, he muitua ke he tau fakafifitakiaga ha hai?
11 Moli, ke fakatumau e finagalo amaamanaki kua nakai pehe a ia ke fakatevateva po ke fakateaga. Kua fai gahua a tautolu ke taute. Ke fakatai ki ai, kua lata ia tautolu ke taute e fakaako Tohi Tapu fakatagata mo e fakakite e fiafia makutu ke he tau mena fakaagaga tuga ne fakakite he tau perofeta fakamoli mo e he tau agelu foki. Vagahau hagaao ke he fiafia pihia, ne pehe a Peteru: “Ko e fakamouiaga ia ne hūhū ki ai mo e kumi fakamakutu ai he tau perofeta, . . . ko e tau mena ia kua foli ki ai e tau agelu he fia kitekite ki ai.” (1 Peteru 1:10-12) Nakai ni ko e fakaako Tohi Tapu fakatagata kua lata ka e pihia foki ke o tumau ke he tau feleveiaaga mo e liogi. (Iakopo 4:8) Ko lautolu ne mataala ke he tau manako fakaagaga ha lautolu he taumafa tumau ke he tau mena kai fakaagaga mo e feoaki mo e tau katofia Kerisiano ha lautolu, nukua fakatata kua hiki mai e lautolu e finagalo ha Keriso.—Mataio 5:3.
Kia Moli e Onoonoaga
12. (a) Ko e heigoa e mahani tutokotaha ne kumi e Atamu mo Eva? (e) Ko e heigoa e fua he mumuitua e tau tagata ke he puhala a Atamu mo Eva?
12 He magaaho ne tufugatia he Atua e tau tagata tokoua fakamua, ne toka e ia ki a ia ni e tonu ke fakatokatoka e tau tutuaga ke he hako mo e hepe. (Kenese 2:16, 17) Ne manako a Atamu mo Eva ke tutu kehe mai he takitakiaga he Atua, ati fua mai ai e lalolagi ne kitia e tautolu he vaha nei. Ne talahau he aposetolo ko Paulo: “[Ne] hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Kua fakatata he ono afe tau he fakamauaga tuai he tagata tali mai he vaha a Atamu e moli he tau kupu a Ieremia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” (Ieremia 10:23) Ke talahau kua moli e tau kupu a Ieremia, nakai ko e amanaki ke kaumahala a ia. Kua moli lahi. Kua fakamaama mai e tau senetenari loloa ia he magaaho ne “pule ai e taha tagata ke he taha, ke kelea ai e ia ni” ha kua tutokotaha e pule he tagata mai he Atua.—Fakamatalaaga 8:9.
13. Ko e heigoa e onoonoaga moli ne ha ha he Tau Fakamoli a Iehova ke he mena kua maeke ke taute he tau tagata?
13 Ha ko e tuaga he tagata, kua mailoga he Tau Fakamoli a Iehova e tau kaupaaga ke he mena ka moua he fakatokaaga nei. Kua maeke he finagalo mitaki ke lagomatai ke puipui e fiafia ha tautolu, ka e nakai ko e tali a ia ke he tau mena oti. He kamataaga he tau atu tau he 1950, ne tohi fakailoa he taha akoako Amerika e tohi mahuiga lahi ne ui The Power of Positive Thinking. Ne talahau he tohi kua maeke ke kautu mai he laulahi he tau fakalavelave kaeke fehagai ki ai mo e finagalo mitaki. Kua nava moli e finagalo mitaki ia. Ka kua fita he mailoga ko e iloilo, makaka, muhu koloa, mo e falu mena loga foki kua fakakaupa e tau mena kua maeke ia tautolu ke moua. Mo e ke he lalolagi katoa, kua loga lahi mahaki e tau mena vihi ke fakahako he tau tagata—pete ni kua mitaki e tau manamanatuaga ha lautolu!
14. Ha ha ai nakai he Tau Fakamoli a Iehova e finagalo kelea? Fakamaama.
14 Ha ko e onoonoaga moli ha lautolu ke he tau mena pihia, kua tukupau e Tau Fakamoli a Iehova he falu magaaho he finagalo kelea. Ka kua manako lahi a lautolu ke tala age ke he tau tagata hagaao ki a Ia tokotaha maka ka maeke ke fakamahomo tukulagi e moui he tagata. Ke he mena nei foki kua fifitaki e lautolu e finagalo ha Keriso. (Roma 15:2) Ti kua lavelave lahi a lautolu he lagomatai e tau tagata ke moua e fakafetuiaga mitaki mo e Atua. Iloa e lautolu ko e tau mena nei to fakahiku ni ke moua mai aki e tau mitaki loga.—Mataio 28:19, 20; 1 Timoteo 4:16.
15. Fakamahomo ki mua fefe he gahua he Tau Fakamoli a Iehova e tau tagata takitokotaha?
15 Kua nakai matapouli e Tau Fakamoli a Iehova ke he tau mena vihi he kaufakalatahaaga—mua atu ke he tau gahua nakai faka-Tohi Tapu fakalialia—ne viko takai ia lautolu. Fakamua to eke e tagata mo taha he Tau Fakamoli a Iehova, ne taute e ia e tau hikihikiaga, ti fa mahani ke kautu mai he tau hufia kelea ne nakai talia he Atua. (1 Korinito 6:9-11) Ti kua lagomatai he Tau Fakamoli a Iehova a lautolu ne fanogonogo ke kautu mai he konahia, hufia he tulaki, mahani feuaki, mo e pele tupe tumau. Ko e tau tagata liliuina pihia kua ako ke foaki ma e tau magafaoa ha lautolu ke he tau puhala kua tonu mo e mahani fakamoli. (1 Timoteo 5:8) Ka lagomatai e tau tagata mo e tau magafaoa ke he puhala nei, ti matulutulu hifo ai e tau mena vihi he maaga—kua gahoa e tau tagata hufia he tulaki, gahoa e tau favale he magafaoa, mo e falu mena foki. Ha ko e tau tagata omaoma matafakatufono a lautolu mo e he lagomatai falu ke hiki e tau momoui ha lautolu ke he mitaki, kua fakatote hifo he Tau Fakamoli a Iehova e kavega he tau ekegahua leveki ne gahua ke fehagai mo e tau mena vihi he tau tagata.
16. Ko e ha ne nakai fakalataha e Tau Fakamoli a Iehova ke he tau fakaholoaga fakamea he lalolagi?
16 Ti, kua hiki kia he Tau Fakamoli a Iehova e mahani ne holofa he lalolagi? He tau hogofulu tau kua mole, ne malikiti hake e numera he Tau Fakamoli gahuahua mai he 3,800,000 ni ke teitei 6,000,000. Ko e 2,200,000 a ia ne holo hake, kua tokologa ne tiaki e tau gahua nakai tututonu he magaaho ne eke a lautolu mo tau Kerisiano. Kua tokologa e tau momoui ne holo atu ki mua! Pete ia, kua tote lahi e numera nei ka fakatatai mo e tupu he puke tagata he lalolagi he magahala ia ni—875,000,000! Ko e punaaga he fiafia a ia ma e Tau Fakamoli a Iehova ke lagomatai e tau tagata ne fanogonogo, pete he iloa to gaogao ni mai he tau tagata ka o mai ke he puhala he moui. (Mataio 7:13, 14) He fakatalitali e Tau Fakamoli ma e hikiaga ke he mitaki he lalolagi katoa ne maeke ni he Atua ke taute, kua nakai fakalataha a lautolu ke he tau fakaholoaga fakamea he lalolagi, ne fa mahani ke kamata mo e tau manamanatu mitaki ka e fakahiku ni ke fakavaia mo e ke he favale foki.—2 Peteru 3:13.
17. Ko e heigoa ne taute e Iesu ke lagomatai aki a lautolu ne viko takai ia ia, ka ko e heigoa ne nakai taute e ia?
17 He uta e puhala nei, kua fakakite he Tau Fakamoli a Iehova e mauokafua ki a Iehova tuga ne taute e Iesu he nofo agaia he lalolagi. He senetenari fakamua, ne taute fakamana e Iesu e fakamaloloaga. (Luka 6:17-19) Ne liu fakatutu mai foki e ia e tau tagata mamate. (Luka 7:11-15; 8:49-56) Ka e nakai uta kehe e ia e tau gagao po ke kautu ke he fi ko e mate. Iloa e ia, nakai la hoko mai ia e magaaho kotofa he Atua ma e mena nei. Mo e tau taleni mua atu he tagata mitaki katoatoa, kua liga lahi e mena ka taute e Iesu ke fakamitaki aki e tau mena vihi fakapolitika mo e he kaufakalatahaaga. Ti tuga manako falu he magaaho ia ke pule a ia mo e ke taute e mena nei, ka e nakai talia e Iesu. Kua totou e tautolu: “Ko e tau tagata ne kitia e fakamailoga ne eke e Iesu, kua pehe age a lautolu, Ko e moli ni, ko e perofeta ia hanai, ke haele mai ke he lalolagi. Kua fioia foki e Iesu, ko e o mai ne fai a lautolu ke tapaki a ia, kia eke a ia mo patuiki, ati haele kehe ai a ia tokotaha ke he mouga.”—Ioane 6:14, 15.
18. (a) Kua fakakite tumau fefe e Iesu e finagalo amaamanaki? (e) Kua hiki fefe e gahua a Iesu tali mai he 1914?
18 Ne nakai talia a Iesu ke fakalataha ke he tau mena fakapolitika po ke gahua leveki ha kua iloa e ia ko e magaaho ke pule patuiki a ia mo e ke taute e tau gahua fakamalolo ma e tau tagata oti he tau fahi oti na nakala hoko mai ia. Pihia foki he mole e haele hake hana ke he moui fakaagaga nakai maeke ke mate i luga he lagi, ne fakamakai a ia ke fakatalitali ke he magaaho kotofa a Iehova fakamua to taute ha mena. (Salamo 110:1; Gahua 2:34, 35) Ka e, tali mai he eke a ia mo Patuiki he Kautu he Atua he 1914, ne “fina atu ai a ia kua kautu, to kautu ni a ia.” (Fakakiteaga 6:2; 12:10) Ko e loto fakaaue ha ia ha tautolu ke omaoma ke he hana pule patuiki, ka ko e falu ne talahau teao ko e tau Kerisiano kua fifili ke fakaheu e tau fakaakoaga he Tohi Tapu hagaao ke he Kautu!
Amaamanaki—Punaaga Kia he Fakahogohogo Manava po ke Fiafia?
19. Ko e magaaho fe ka ‘mamahi e loto’ he fakatalitali, mo e magaaho fe ka eke ai mo punaaga he fiafia?
19 Iloa e Solomona kua maeke e fakatalitali ke fakahogohogo manava. Ne tohia e ia: “Kua mule e amaamanaki ti mamahi ai e loto.” (Tau Fakatai 13:12) Moli ni, kaeke manamanatu e tagata ke he tau amaamanaki fakateaga, ti maeke ke gagao e loto ha kua nakai fakamoli ai. Ka e, ka amanaki ke he tau magaaho fiafia—liga ko e mauhoana, ko e fanauaga he tama, po ke liu fakalataha mo lautolu ne ofania e tautolu—ka fakapuke a tautolu aki e amaamanakiaga fiafia ke leva la ato hoko e aho. Kua tupu lahi foki e fiafia ia kaeke fakaaoga fakapulotu e tautolu e magaaho fakatali, he tauteute ma e magaaho ia.
20. (a) Ko e heigoa e tau mena homo ue atu ne fa e amanaki a tautolu ke kitia? (e) Maeke fefe a tautolu ke moua e fiafia he magaaho ka amaamanaki ke fakamoli e tau finagalo a Iehova?
20 Kaeke mauokafua katoatoa a tautolu to fakamoli ha tautolu a tau amaamanakiaga—pete ni ka nakai iloa e magaaho ka fakamoli ai—kua nakai eke e tau magaaho fakatali ke ‘fakamamahi e loto.’ Iloa he tau tagata tapuaki fakamoli he Atua kua tata lahi mai e Pule Meleniamu ha Keriso. Kua mauokafua lahi ai a lautolu to kitia e lautolu e fakahikuaga he mate mo e tau gagao. Kua makutu he amaamanaki ne fakatalitali mo e fiafia a lautolu ke he magaaho ka liu fakafeleveia e lautolu e totou piliona mai he mate, putoia ai foki e tau fakahele ha lautolu ne mamate. (Fakakiteaga 20:1-3, 6; 21:3, 4) He tau vaha matematekelea nei he takatakaiaga, kua olioli lahi a lautolu ke he taha amaamanakiaga pauaki ke kitia e Parataiso ka fakatu he lalolagi. (Isaia 35:1, 2, 7) Kua pulotu ha mogoia, ke fakaaoga fakamitaki e magaaho fakatali, “kia fakamakai nakai noa ke he gahua he Iki”! (1 Korinito 15:58) Kia fakatumau ke taumafa ke he tau mena kai fakaagaga. Ke ati hake e fakafetuiaga tata mo Iehova. Ke kumi a lautolu ne manako ke fekafekau ki a Iehova. Ke fakamafana e tau katofia talitonu auloa. Ke fakaaoga katoatoa ha magaaho ni ka fakaata mai e Iehova. Ti, ka pihia, to nakai taute he amaamanaki ki a Iehova a koe ke ‘mamahi e loto.’ Ka e to fakapuke aki e fiafia a koe!
Maeke Nakai a Koe ke Fakamaama?
• Fakakite fefe e Iesu e finagalo amaamanaki?
• Ko e heigoa e tau tutuaga ne kua lata he tau Kerisiano ke moua e finagalo amaamanaki?
• Ko e ha ne mauokafua ai e Tau Fakamoli a Iehova ke amaamanaki ki a Iehova?
• Maeke fefe e amaamanaki ki a Iehova ke eke mo punaaga he fiafia?
[Tau Huhu he Fakaakoaga]
[Tau Fakatino he lau 24]
Ne fakauka a Iesu ke he fiafia kua toka ki mua hana
[Fakatino he lau 25]
Pihia foki he mole e tau tau he fekafekauaga, kua lata ia tautolu ke fakatumau e fiafia ha tautolu
[Tau Fakatino he lau 27]
Totou miliona ne fakamahomo ki mua e tau momoui ha lautolu he eke mo Tau Fakamoli a Iehova