Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Septiembre de 2015

¿Ken kiteititia Jehová techtlasojtla?

¿Ken kiteititia Jehová techtlasojtla?

“Xikitakah kenomi satlawel techtlasojtla Totajtsi Dios.” (1 JUAN 3:1)

TLAKUIKALMEJ: 51 UAN 13

1. 1) ¿Tlen otechyole ma tikchiuakan tlatitlanil Juan? 2) ¿Tleka moneki timokuayejyekoskej ken techtlasojtla Jehová?

TLATITLANIL Juan okijto: “Xikitakah kenomi satlawel techtlasojtla Totajtsi Dios” (1 Juan 3:1). Ika ninmej tlajtolmej, tlatitlanil Juan otechyole ma timokuayejyekokan ken techtlasojtla Jehová uan ken kiteititia itlasojtlalis. Tla itech timokuayejyekoaj, okachi kuali timouikaskej iuan Jehová uan okachi tiktlasojtlaskej.

2. ¿Tleka sekimej amo kineltokaj Jehová kintlasojtla?

2 Sekimej tlaltikpaktlakamej amo kineltokaj Jehová kintlasojtla. Mokuayejyekoaj Jehová amo kinpatioita. Noijki mokuayejyekoaj Jehová san kintlalia tlanauatilmej uan kintlajyouiltia akinmej amo kitlakamatij. Seki tlaneltokalismej kinmachtiaj tlaltikpaktlakamej toTajtsin Dios kipaktia kintlajyouiltis tlaltikpaktlakamej. Ik non, miakej mokuayejyekoaj amo uelis tiktlasojtlaskej. Oksekimej mokuayejyekoaj  toTajtsin Dios kintlasojtla nochtin tlaltikpaktlakamej maski san tlen kichiuaskej. Pero ken tejuan timomachtiaj Biblia tikmatij tlen melauak itech Jehová. Biblia kijtoa ye tlasojtlalistli uan ken sapanoa techtlasojtla okiualtitlanki iKone ma mikiki topampa (Juan 3:16; 1 Juan 4:8). Pero, uelis sekimej itekipanojkauan Jehová amo kineltokaj Jehová kintlasojtla. Uelis ijkon mokuayejyekoaj pampa itlaj okinpanok itech innemilis.

3. ¿Tleka uelis tikijtoskej Jehová techtlasojtla?

3 ¿Tleka uelis tikijtoskej Jehová techtlasojtla? Pampa ye otechchijchi uan otechmakak toyolilis (xiktlajtolti Salmo 100:3). * Ik non, itech Biblia moijtoa Adán okatka ikone toTajtsin Dios (Lucas 3:38). Noijki, ijkuak Jesús otechmachti ken moneki timotlatlaujtiskej, otechmachti Jehová ye toTajtsin tlen kajki iluikak (Mateo 6:9). Ik non, Jehová techtlasojtla ken se teta kintlasojtla ikoneuan.

4. 1) ¿Tleka tikijtoaj Jehová se kuali teta? 2) ¿Tlen timomachtiskej axkan uan chikome?

4 Sekimej tlaltikpaktlakamej okintlajyouiltijkej intatajuan. Ik non, amo kineltokaj se teta ma tetlasojtla. Pero Jehová amo keman techtlajyouiltis. Ye toTajtsin tlen sapanoa yolkuali (Salmo 27:10). Jehová sapanoa techtlasojtla uan kuali techmaluia. Uan tla tikmachiliaj itlasojtlalis, ijkon okachi tiktlasojtlaskej (Santiago 4:8). Itech nin tlamachtil tikitaskej naui tlamantli tlen kiteititiaj Jehová melauak techtlasojtla. Uan chikome timomachtiskej naui tlamantli tlen techpaleuis ma tikteititikan tiktlasojtlaj Jehová.

JEHOVÁ TECHMAKA MIAK TLAMANTLI

5. ¿Tlen tlamantli techmaka Jehová?

5 Se tonal, tlatitlanil Pablo oajsito Atenas. Ompa okitak miakej teotsitsintin uan tlaltikpaktlakamej tlen okineltokayaj yejuan okinmakayaj inyolilis. Ik non, Pablo okinmilui, Jehová okichijchi Tlaltikpak uan nochi tlen itech onka. Noijki okinmilui toTajtsin Dios techmaka toyolilis uan nochi tlen onka, ye okichi ma tiyoltokan (Hechos 17:24, 25, 28). Jehová techmaka nochi pampa tiyoltoskej uan tiyolpakiskej. Ma tikitakan seki tlamantli tlen techmaka Jehová pampa techtlasojtla.

6. ¿Ken chijchijtok Tlaltikpak kanin tichantij? (Xikita tlaixkopinal tlen ika peua tlamachtil.)

6 Jehová otechmakak kuajkualtsin tokalijtik (Salmo 115:15, 16). Tlaltikpak amo ken okseki planetas tlen Jehová okinchijchi. Ixtlamatkej yokinmajsikej miakej planetas itech ueyi semanauak. Pero nion se planeta kipia nochi pampa ma yeto yolilistli. Jehová okichijchi Tlaltikpak uan nochi tlen itech onka pampa ma tiyoltokan uan noijki pampa kuali ma tiyetokan uan ma tiyolpakikan (Isaías 45:18). Ijkuak timokuayejyekoaj itech Tlaltikpak tlen sapanoa kuajkualtsin, tikitaj Jehová melauak techtlasojtla (Job 38:4, 7; xiktlajtolti Salmo 8:3, 4). *

7. ¿Tlen okse tlamantli kiteititia Jehová techtlasojtla?

7 Jehová okiteititi techtlasojtla ijkuak  otechchijchi pampa uelis tikpiaskej toyelis ken ye (Génesis 1:27). Ik non, ueli tikmachiliaj ken techtlasojtla uan ueli tiktlasojtlaj. Uan ye kimati ijkon tiyolpakij, pampa nochtin konemej yolpakij miak ijkuak kimachiliaj ken intatajuan kintlasojtlaj. Noijki, Jesús okijto okachi tiyolpakiskej tla tiyetoskej inauak Jehová (Mateo 5:3). Biblia kijtoa Jehová “techmaka nochi tlan techpoloa para matipaktokah” (1 Timoteo 6:17). Melauak tikitaj Jehová techmaka miak tlamantli uan sapanoa techtlasojtla (Salmo 145:16).

JEHOVÁ KUALI TECHMACHTIA

8. ¿Tleka moneki ma techmachti Jehová?

8 Se kuali teta tlen kintlasojtla ikoneuan, kuali kinmachtia pampa kuali yetoskej satepan. Pero axkan tonalmej miakej tetajmej amo kitlakaitaj tlen kijtoa Biblia. Ik non, amo uelis kinmachtiskej inkoneuan ma kixmatikan tlen kuali uan tlen amo  kuali. Ik non, miakej konemej amo kimatij tlen kichiuaskej uan amo yolpakij (Proverbios 14:12). Pero Jehová kuali kinmachtia ikoneuan, pampa ye toTajtsin Dios itech tlen melauak (Salmo 31:5). Ye techmachtia tlen melauak uan techiluia ken moneki tikueyichiuaskej. Noijki techmachtia ken uelis tiyetoskej ika yolpakilistli (xiktlajtolti Salmo 43:3). * Ma tikitakan seki tlamantli tlen Jehová techmachtia uan tlen ika kiteititia techtlasojtla.

Tetajmej kichiuaj ken Jehová ijkuak kinmachtiaj inkoneuan tlen melauak tlamachtia Biblia uan ijkuak kinpaleuiaj kuali ma mouikakan iuan Jehová (Xikinmita párrafos 8 a 10)

9, 10. 1) ¿Tleka techmachtia Jehová miak tlamantli itech ye? 2) ¿Tlen techmachtia Jehová itech tejuan?

9 Achto, Jehová techmachtia miak tlamantli itech ye, pampa kineki ma tikixmatikan (Santiago 4:8). Yotechmachti ken itoka. Itech Biblia okachi kajki tokayotl Jehová uan amo okseki tokayomej. Jehová noijki techmachtia ken iyelis. Se neskayotl, tla kuali tikitaj nochi tlen ye okichijchi, tikitaskej ye sapanoa ixtlamatki uan kipia miak chikaualistli (Romanos 1:20). Uan ijkuak tiktlajtoltiaj Biblia, tikitaj ye yolmelauak uan techtlasojtla. Ijkuak okachi kuali tikixmatij Jehová, okachi itech timotokiaj.

Ijkuak okachi kuali tikixmatij Jehová okachi itech timotokiaj

10 Jehová noijki techmachtia miak tlamantli itech tejuan. Techiluia tipouij itech se ueyi kalchanejke. Noijki techmachtia ken tiktekichiuiliskej san sekan uan ika yolseuilistli. Biblia kijtoa Jehová amo otechchijchi pampa san tejuan tikpejpenaskej tlen kuali uan tlen amo kuali (Jeremías 10:23). Ye kimati tlen kuali pampa tejuan. Ik non, tla tiktlakaitaj uan tiktlakamatij, tiyolpakiskej miak uan tikpiaskej yolseuilistli. Jehová techmachtia tlen melauak pampa techtlasojtla.

11. ¿Tlen kualtsin chialistli techmaka Jehová?

11 Se kuali teta motekipachoa pampa ikoneuan kuali ma yetokan satepan uan ika pakilistli. Pero miakej tlaltikpaktlakamej amo kimatij tlen panos satepan. Sapanoa tekitij pampa kipiaskej miak tlamantli tlen amo uejkaua (Salmo 90:10). Pero akinmej tiktekichiuiliaj Jehová tiktlasojkamatiliaj miak pampa ye techmachtia ken uelis tiyolpakiskej axkan uan techmaka se kualtsin chialistli tlen satepan mochiuas.

JEHOVÁ TECHYEKTLALIA

12. Jehová, ¿ken okinpaleui Caín uan Baruc?

12 Ijkuak Jehová okitak Caín okinekiaya kichiuas itlaj tlen amo kuali, okinekiaya kipaleuis pampa amo ijkon ma kichiua. Okilui amo ma kualani uan ma kipatla ikuayejyekol. Tla kitlakamatiskia, Jehová kiteochiuaskia (Génesis 4:6, 7). Pero Caín amo okitlakamatki Jehová uan otlajyoui miak (Génesis 4:11-13). Noijki, Jehová okitak se itekipanojka tlen omotokayotiaya Baruc akin osotlauatoka uan omoyolkokoaya pampa amo kuali omokuayejyekoaya. Ik non, Jehová okilui ma  kipatla ikuayejyekol. Baruc okitlakamatki Jehová uan ijkon ye omomakixti (Jeremías 45:2-5).

13. ¿Tlen omomachtijkej itekipanojkauan toTajtsin Dios yiuejkika ijkuak otlajyouijtoka?

13 Jehová techyekana uan techyektlalia pampa techtlasojtla. Ye techyektlalia ijkuak moneki, pero noijki techpaleuia pampa kuali ma tikpiakan toyelis (Hebreos 12:6). Yiuejkika Jehová okinpaleui itekipanojkauan pampa kuali ma kipiakan inyelis. Se neskayotl, okitekauili José, Moisés, uan David ma kipiakan ouijkayotl. Ijkuak otlajyouijtokaj ninmej tlakamej, omomachtijkej ken okachi kuali kitekichiuiliskiaj Jehová ijkuak ye kinmakaskiaj okachi tekitl. Ijkuak timomachtiaj itech Biblia ken Jehová kinpaleuia itekipanojkauan, tikitaj ye melauak techtlasojtla (xiktlajtolti Proverbios 3:11, 12). *

14. Ijkuak tikchiuaj itlaj tlen amo kuali, ¿ken kiteititia Jehová itlasojtlalis?

14 Ijkuak tikchiuaj itlaj tlen amo kuali, Jehová kiteititia itlasojtlalis tla tejuan timoyolkuepaj uan tiktekauilia ma techyektlali. ¿Ken kiteititia itlasojtlalis? Teotlajtojki Isaías okijto, Jehová melauak techtlapojpoluia (Isaías 55:7). Uan ueyi tekiua David okijto: “Ye kitlapojpoluia nochi motlajtlakol uan kipajtia nochi tlen mitskokoa. Mitsmakixtijtok itech mikakoyoktli uan ika yolmelajkayotl mitstlasojtla uan mitsiknomati” (Salmo 103:3, 4, 12). Ken tikita, Jehová nochipa techtlapojpoluia. Pero moneki tikseliskej itlayekanalis uan tikpatlaskej toyelis ijkuak ye techyektlalis. Ma tikilnamikikan Jehová techyektlalia pampa techtlasojtla (Salmo 30:5).

JEHOVÁ TECHMALUIA

15. ¿Tlen okse tlamantli kiteititia Jehová techtlasojtla?

15 Se kuali teta kinmaluia ikoneuan pampa amo itlaj ma kinpano. Ijkon noijki techmaluia Jehová. Salmo 97:10 kijtoa Jehová “kinmaluijtok inyolilis akinmej yolmelajkej, kinmakixtia inmak akinmej amo yolkualmej” (Salmo 97:10). Ijkuak tikitaj itlaj tlen uelis techkokos san niman timomaluiaj. Noijki ijkon, Jehová kuali techmaluia pampa amo itlaj ma techpano. Ijkon kichiua pampa techtlasojtla (xiktlajtolti Zacarías 2:8). *

Jehová kuali techmaluia pampa amo itlaj ma techpano

16, 17. ¿Ken kinmaluia Jehová itekipanojkauan?

16 Jehová kintekitiltia ángeles pampa kinmaluis itekipanojkauan (Salmo 91:11). Se neskayotl, se ángel okinmikti san itech se yoak 185,000 soldados asirios pampa kimakixtiskia ialtepe toTajtsin Dios (2 Reyes 19:35). Itech achto siglo, ángeles  okikixtijkej itech telpiloyan tlatitlanil Pedro uan oksekimej (Hechos 5:18-20; 12:6-11). Amo kipiaj miak xiuitl, itech África omochi se ueyi guerra. Ompa omoteuiayaj, otlachtekiayaj, okinpinatiayaj oksekimej uan okinmiktiayaj miakej tlaltikpaktlakamej. Maski nion se iTlaixpantijka Jehová omikik, miakej okinkixtilijkej nochi tlen okipiayaj. Maski ijkon opanok, yejuan okimachiliayaj Jehová okinmaluiaya. Maski sapanoa otlajyouijkej, oyolpakiayaj. Ijkuak se tokni tlen tekiti kanin kinyekanaj iTlaixpantijkauan Jehová okintlajpaloto, okintlajtlani ken okatkaj. Yejuan okinankilijkej: “Kuali kajki nochi, pampa Jehová techpaleuia”

17 Sekimej iTekipanojkauan toTajtsin Dios omikej maski otetlakamatkej. Ijkon ken Esteban se imachtijka Jesús uan oksekimej. Nin techmachtia Jehová amo nochipa techmakixtis itech mikilistli. Pero kema techmaluia tinochtin, ye techmachtia ken tlakajkayaua Satanás (Efesios 6:10-12). Jehová techmachtia ika Biblia uan ika amatlajkuilolmej tlen techmaka ialtepe toTajtsin Dios. Se neskayotl, techiluia ma timomaluikan pampa amo ma tiktlasojtlakan tomin uan pampa amo ma tikitakan ijkuak auilnemij noso sapanoa moteuiaj itech Internet, amochmej, tlamauisolmej uan videojuegos. Jehová melauak techtlasojtla, ik non, kuali techmaluia.

SE UEYI TLATEOCHIUALISTLI

18. ¿Ken timomachiliaj ijkuak tikmatij Jehová techtlasojtla?

18 Ijkuak Moisés okilnamik ken okitekichiuili Jehová itech nochi inemilis, okitak Jehová melauak okitlasojtlaya. Ik non okijto: “Techmaka nochi kualkan motlasojtlalis yolmelauak, ijkon titsajtsiskej ika miak pakilistli uan tipakiskej itech nochi tonalmej tlen uejkauas toyolilis” (Salmo 90:14). Ma tikilnamikikan tlen okijto tlatitlanil Juan: “Xikitakah kenomi satlawel techtlasojtla Totajtsi Dios” (1 Juan 3:1). ¿Amo melauak se ueyi tlateochiualistli tikmatiskej Jehová sapanoa techtlasojtla?

^ párr. 3 Salmo 100:3 kijtoa: “Xikmatikan Jehová ye toTajtsin Dios. Ye akin otechchijchi, uan tejuan tiiaxkauan. Tejuan tiialtepe uan tiichkauan tlen ye kintlamaka”.

^ párr. 6 Salmo 8:3 uan 4 kijtoa: “Ijkuak nikita iluikak, nochi tlen okichijchijkej momajpiluan, metstli uan sitlalimej tlen te otikinchijchi, ¿Tlen ipati tlaltikpaktlakatl tlen miki pampa tikilnamikis, uan ikone tlakatl pampa tikmaluis?”.

^ párr. 8 Salmo 43:3 kijtoa: “Xiktitlani motlauil uan tlen melauak. Pampa ma nechyekanakan, ma nechuikakan itech motepe santo uan itech moueyi tabernáculo”.

^ párr. 13 Proverbios 3:11, 12 kijtoa: “Nokone, amo xikixtopeua ijkuak Jehová mitsyektlalia, uan amo xikixtopeua ijkuak Jehová mitsnojnotsa, pampa Jehová kinojnotsa akin kitlasojtla, ijkon ken se teta kichiua iuan ikone tlen kitlasojtla”.

^ párr. 15 Zacarías 2:8 kijtoa: “Pampa nin tlen kijtoa Jehová akin kinyekana miakej soldados: Satepan ijkuak okiueyichijkej ye onechualtitlanki itech altepemej tlen onamechtlajyouiltiayaj uan onamechixtekiliaya nochi; ‘pampa akin namechtelkoa kitelkojtok noixtololo”.