“Matimoyekchikawakah [...], ijkó timoskaltiskeh iwa timotlamitiweh kemi Cristo.” (EFESIOS 4:13)

TLAKUIKALMEJ: 11 UAN 42

1, 2. ¿Tlen tiknekij tinochtin akinmej tiktekichiuiliaj Jehová? Xikijto se neskayotl.

IJKUAK tiknekij tikkoaskej se tlakilotl, ¿ken tikpejpena? Uelis tiktemoaj tlen amo okachi patio. Pero noijki tiktemoaj tlen okachi uelik uan tlen yichikauak pampa uelis tikkuaskej. Pampa tikmatij ijkuak kuali yoiksik okachi uelik.

Ijkuak timomachtiaj Biblia, ma tiktemokan tlen uelis techpaleuis ma tikmatikan tlen kuali uan tlen amo kuali

2 Ijkuak timomachtiaj itech Jehová uan timoapolaktiaj noijki tiknekij tikpiaskej chikauak totlaneltokilis. Pero nin amo kijtosneki okachi tikpiaskej xiuitl. Kijtosneki tikpiaskej kuali toyelis uan kuali timouikaskej iuan Jehová. Tlatitlanil Pablo okinmilui tokniuan itech Éfeso uelis kipiaskiaj chikauak intlaneltokilis ken Cristo. Pero omonekiaya san sekan ma yetokan uan okachi ma momachtikan itech Jesús (Efesios 4:13).

3. Axkan itech miakej tlanechikolmej, ¿ken mochijtok ken itech Éfeso?

3 Ijkuak tlatitlanil Pablo okintlajkuilili tokniuan itech Éfeso, ompa okatkaj miakej tokniuan tlen okinpiayaj chikauak  intlaneltokilis uan tlen yiuejkika omomachtiayaj. Pero noijki okatkaj oksekimej tokniuan tlen omonekiaya okachi kuali ma mouikakan iuan Jehová. Noijki axkan ijkon kinpanoa miakej tokniuan. Miakej yiuejkika kitekichiuilijtokej Jehová. Pero oksekimej ok moneki ma kipiakan chikauak intlaneltokilis, ken tokniuan tlen sejse xiuitl moapolaktiaj. Nochtin yejuan moneki ma mochijchikauakan pampa okachi chikauak ma kipiakan intlaneltokilis. ¿Uan tejuatsin? ¿Chikauak motlaneltokilis? (Colosenses 2:6, 7.)

¿KEN TIKTEITITIAJ CHIKAUAK TOTLANELTOKILIS?

4, 5. 1) ¿San se tlamantli motaj akinmej chikauak intlaneltokilis? 2) ¿Tlen tlamantli kichiuaj akinmej chikauak intlaneltokilis? (Xikita tlaixkopinal tlen ika peua tlamachtil.)

4 Tlakilotl tlen yoiksik tlatlamantli mota. Uelis seki okachi uejueyij, okseki mota tlatlamantli, pero onka seki tlamantli tlen kiteititia yoiksikej. Noijki ijkon panoa iuan akinmej kipiaj chikauak intlaneltokilis. Tinochtin titlatlamantli. Uelis sekimej okachi kipiaj xiuitl, kinpaktia okseki tlamantli noso uitsej itech okse altepetl, pero mota kipiaj chikauak intlaneltokilis pampa kichiuaj seki tlamantli. ¿Ken mota kox kipiaj chikauak intlaneltokilis?

“¿Tlen tlamantli uelis okachi kuali nikchiuas pampa nikchiuas ken Jesús?”

5 Akinmej kipiaj chikauak intlaneltokilis mochijchikauaj kichiuaskej ken Jesús (1 Pedro 2:21). Ye okijto moneki ma tiktlasojtlakan Jehová ‘ika nochi toyolo uan ika nochi toyolilis uan ika nochi totlalnamikilis’. Noijki okijto ma tikintlasojtlakan oksekimej (Mateo 22:37-39, TNM). Akinmej kipiaj chikauak intlaneltokilis mochijchikauaj pampa kitlakamatiskej nin tlanauatil. Itech innemilis mota kipatioitaj mouikaskej iuan Jehová uan noijki kintlasojtlaskej oksekimej.

Tokniuan tlen yikipiaj miak xiuitl uelis kinpaleuiskej telpokamej kuali ma kichiuakan iteki (Xikita párrafo 6)

6, 7. 1) ¿Tlen okseki tlamantli kichiuaj akinmej chikauak intlaneltokilis? 2) ¿Tlen moneki ma timotlajtlanikan?

6 Tlasojtlalistli se tlamantli tlen mota itech akinmej kipiaj chikauak intlaneltokilis, pero ¿tlen okseki tlamantli kichiuaj? (Gálatas 5:22, 23). Yolkualmej, amo san niman kualanij uan tetlasojtlaj. Kimatij mochiaj ijkuak tlajyouijtokej uan noijki tlaxikoaj ijkuak ikaj kinyolkokoa uan ok kichiaj tlen kuali. Ijkuak momachtiaj Biblia, kitemoaj tlen uelis kinpaleuis ma kimatikan tlen kuali uan tlen amo kuali,  uan satepan nochi tlen kimatij kinpaleuia pampa ma kichiuakan tlen kuali. Yolyamankej uan kimatij okachi kuali tla kikakij Jehová uan kikauaj ma kinyekana. * (Xikita tlajtoli tlen kiualika tlakxitlan.) Uan noijki ika yolpakilistli tetlapouiaj uan mochijchikaua pampa san sekan ma yeto tlanechikol.

7 Maski yiuejkika noso yikin tiktekichiuiliaj Jehová, tinochtin moneki ma timotlajtlanikan: “¿Tlen tlamantli moneki okachi kuali nikchiuas pampa nikchiuas ken Jesús?”. Ma tikitakan eyi tlamantli tlen techpaleuis ma tikpiakan chikauak totlaneltokilis ijkon ken Cristo.

KUALI MA TIMOMACHTIKAN BIBLIA

8. ¿Tleka tikijtoaj Jesús okimatiaya uan kuali okajsikamatiaya Biblia?

8 Jesús okimatiaya uan kuali okajsikamatiaya tlen kijtoa Biblia. Se neskayotl, ijkuak okipiaya 12 xiuitl, omotlapouijtoka itech teokali iuan akinmej otlamachtiayaj itech Biblia. Ik non, “nochteh non okikakiah, omotlajtlachialtiayah porke Ye satlawel oixtlamatia, iwa porke kuali  okinnankiliaya” (Lucas 2:46, 47). Uan seki xiuitl satepan kuali okitekitilti Biblia uan akinmej okikokoliayaj amo okimatkej ken kinankiliskej (Mateo 22:41-46).

9. 1) Tla tiknekij ma yeto chikauak totlaneltokilis, ¿keman moneki ma timomachtikan? 2) ¿Ken moneki ma timomachtikan Biblia?

9 Tla tiknekij ma tikpiakan chikauak totlaneltokilis moneki ma tikchiuakan ken Jesús. Amo san moneki tikmatiskej tlen amo oui itech Biblia. Moneki okachi kuali ma timomachtikan Biblia, pampa “akimeh yochikawak intlaneltokalis, ya weletih kikuah nochi tlákuali” (Hebreos 5:14). Moneki “matikyekixmatikah” Biblia (Efesios 4:13). Ik non, moneki ma tiktlalikan tlen tonal timomachtiskej Biblia uan ijkon ma tikchiuakan. Nin kijtosneki mojmostla tiktlajtoltiskej Biblia, toselti ma timomachtikan uan noijki sejse semana ma timomachtikan iuan tokalchanejkauan. Ijkuak timomachtiaj Biblia, moneki tikmatiskej tlen mokuayejyekoa uan tlen kimachilia Jehová uan satepan ijkon ma tikchiuakan itech tonemilis. Tla ijkon tikchiuaj, okachi kuali timouikaskej iuan Jehová.

10. Akinmej chikauak intlaneltokilis, ¿ken kiteititiaj kintlasojtlaj itlanauatiluan Jehová?

10 Akinmej kipiaj chikauak intlaneltokilis, amo san kimatij tlen kijtoa Biblia, noijki kitlasojtlaj itlanauatiluan toTajtsin Dios uan nochi tlen kinmiluia. ¿Ken kiteititiaj? Mochijchikauaj pampa itech nochi innemilis kichiuaskej tlen toTajtsin Dios kineki, maski moneki kipatlaskej innemilis, tlen mokuayejyekoaj uan tlen kichiuaj. Yejuan kichiuaj ken Jesús uan kipatlaj innemilis pampa axkan ‘chipawakej iwa yekmilajkej’ (xiktlajtolti Efesios 4:22-24). Ma tikilnamikikan, toTajtsin Dios ika espíritu santo okinyekanak akinmej okijkuilojkej Biblia. Ik non, ijkuak ikaj momachtia Biblia, espíritu santo kipaleuia pampa okachi ma kajsikamati uan okachi ma tetlasojtla. Noijki kipaleuia okachi kuali ma mouika iuan Jehová.

MA TITLAPALEUIKAN PAMPA SAN SEKAN MA YETO TLANECHIKOL

11. ¿Tlen okichiuayaj tlaltikpaktlakamej ijkuak Jesús ouala Tlaltikpak?

11 Ijkuak Jesús ouala Tlaltikpak amo okipiaya tlajtlakoli. Pero itatajuan, iikniuan uan oksekimej tlen okixmatiayaj kema okipiayaj tlajtlakoli. Uan noijki imachtijkauan ualeua okiteititijkej okatkaj tsotsokamej uan omoueyinekiayaj. Se neskayotl, itech yoak ijkuak kimiktiskiaj Jesús, imachtijkauan omokualanijkej pampa okinekiayaj kimatiskej akin okachi oueyititoka (Lucas 22:24). Pero maski yejuan ijkon okichijkej, Jesús okineltokaya uelis kipatlaskiaj innemilis uan kipiaskiaj chikauak intlaneltokilis uan satepan san sekan yetoskiaj. Ik non, itech non yoak Jesús okitlatlaujti Jehová ma kinpaleui san sekan ma yetokan ijkon ken yejuan san sekan okatkaj. Okitlatlaujti: “Yejwah maseititokah, ijkó kemi tejwah tiseititokeh” (Juan 17:21, 22).

12, 13. 1) ¿Tlen moneki tikchiuaskej tinochtin? 2) ¿Tlen okichi se tokni pampa kimatis moneki ma yeto san sekan tlanechikol?

12 Akinmej kipiaj chikauak intlaneltokilis mochijchikauaj pampa itech tlanechikol  nochtin san sekan ma yetokan (xiktlajtolti Efesios 4:1-6, 15, 16). Tinochtin moneki ma timochijchikauakan pampa san sekan ma titekitikan iuan tokniuan. Ik non, moneki ma tiyetokan tiyolyamankej. Se neskayotl, tla se tokni kichiua itlaj amo kuali noso techyolkokoa, ¿tlen tikchiuaj? ¿Ayakmo iuan timotlapouiaj? ¿Noso timochijchikauaj pampa oksepa iuan timouikaskej? Tla chikauak totlaneltokilis, san niman timochijchikauaskej pampa oksepa kuali timouikaskej uan amo okachi tikueyitiliskej tlen otechchiuili.

13 Ximokuayejyeko tlen okipanok se tokni tlen itoka Uwe. Ye sapanoa okualaniaya ijkuak tokniuan okichiuayaj itlaj amo kuali. Pero se tonal omokuayejyeko momachtis tlen okipanok David, uan okitekitilti Biblia uan amochtli Perspicacia. ¿Tleka okinekiaya momachtis itech David? Pampa noijki oksekimej itekipanojkauan Jehová okitlajyouiltijkej. Se neskayotl, ueyi tekiua Saúl okinekiaya kimiktis. Okse tonal oksekimej israelitas okinekiayaj kimojmotlaskej ika tetl. Uan se tonal noijki isiua okipinati (1 Samuel 19:9-11; 30:1-6; 2 Samuel 6:14-22). Maski okipanok nochi nin tlamantli, David okitlasojtlaya Jehová uan itech otlaneltokak. Uan noijki okinmiknomatki oksekimej. Ika nochi tlen omomachti Uwe, okajsikamatki omonekiaya kichiuas ken David uan ayakmo kitaskia tlen okichiuayaj tokniuan ken achto okinmitaya. Noijki okajsikamatki omonekiaya kintlapojpoluis tokniuan uan tlapaleuis pampa tlanechikol ma yeto san sekan. ¿Amo melauak tinochtin moneki tikchiuaskej ken nin tokni?

MA TIMOUIKAKAN IUAN AKINMEJ YOLMELAJKEJ IUAN JEHOVÁ

14. ¿Iuan akinmej omouikaya Jesús?

14 Jesús kuali omouikaya iuan nochtin tlaltikpaktlakamej. Ik non, nochtin tlakamej, siuamej, konemej uan akinmej yokipiayaj xiuitl kuali omomachiliayaj ijkuak iuan okatkaj. Pero ye amo omouikaya iuan nochtin tlaltikpaktlakamej. Se tonal okinmilui itlatitlaniluan: “Nomejwah de milajka notlakaikniwah tla nonkichiwah tlan nomechnawatia” (Juan 15:14). Jesús san omouikaya iuan akinmej yolmelajkej, noijki iuan akinmej okitlasojtlayaj uan okitekichiuiliayaj Jehová. Miak ipati noijki tejuan san ma timouikakan iuan akinmej melauak kitlasojtlaj Jehová. ¿Tleka?

San ma timouikakan iuan akinmej melauak kichiuaj ken Cristo

15. ¿Tleka miak ipati telpokamej ma mouikakan iuan akinmej kipiaj chikauak intlaneltokilis?

15 Tlakilotl okachi kuali iksi ijkuak kajki itlampa Tonaltsin. Tlasojtlalistli tlen onka itech tlanechikol noijki ken Tonaltsin. ¿Tleka? Pampa techpaleuia ma tikpiakan chikauak totlaneltokilis. Se neskayotl, tla titelpochtli noso ichpochtli, ¿yitikmati tlen tikchiuas satepan? Tla tikneki kuali tikpejpenas tlen tikchiuas,  ximouika iuan tokniuan akinmej yiuejkika kitekichiuiliaj Jehová uan tlapaleuia san sekan ma yeto tlanechikol. Yejuan tlatlamantli yotlajyouijkej uan uelis mitspaleuiskej xikpejpena kuali tlen tikchiuas. Tla inmiuan timouika, mitspaleuiskej kuali xikpejpena tlen tikneki tikchiuas uan mitspaleuiskej xikpia chikauak motlaneltokilis (xiktlajtolti Hebreos 5:14).

16. Tokniuan, ¿ken okipaleuijkej se ichpochtli?

16 Se tokni tlen itoka Helga kilnamiki ijkuak yikisaskia kanin omomachtiaya nochtin okijtoayaj tlen kichiuaskiaj. Miakej okijtoayaj okinekiayaj momachtiskej itech universidad uan momachtiskej pampa kipiaskej se kuali tekitl. Pero Helga okintlajtlani sekimej tokniuan tlen kipiaj chikauak intlaneltokilis. Miakej tokniuan okipiayaj okachi xiuitl. Helga kijtoa sapanoa okipaleuijkej uan okiyolchikajkej pampa uelis okachi kitekichiuiliskia Jehová ken precursora. Ik non, Helga makuili xiuitl otekitik ken precursora. Yiuejkika ijkon okipanok, pero Helga sapanoa yolpaki pampa ijkuak okatka ichpochtli okitekichiuili Jehová.

17, 18. Tla tiknekij okachi kuali tiktekichiuiliskej Jehová, ¿tlen moneki ma tikchiuakan?

17 Tla tikchiuaj ken Jesús, uelis tikpiaskej chikauak totlaneltokilis. Uan noijki okachi kuali timouikaskej iuan Jehová uan okachi tiknekiskej tiktekichiuiliskej. Ijkon okachi kuali tiktekichiuiliskej Jehová. Jesús okinmilui imachtijkauan: “Nomejwah xikintlawilikah n tlakah para makitakah nomejwah nonkichiwah tlan kuali, ijkó n tlakah kitaskeh tlan kuali nonkichiwah. Ijkó yejwah kiweyijkachiwaskeh Nomotajtsi Dios non kajki ilwikak” (Mateo 5:16).

18 Ken otimomachtijkej, tokniuan akinmej kipiaj chikauak intlaneltokilis uelis tlapaleuiskej itech tlanechikol. Uan noijki moixmatij pampa kuali kipiaj intlalnamikilis. ¿Ken techpaleuia totlalnamikilis pampa kuali ma tikpejpenakan tlen tikchiuaskej? ¿Ken tikteititiaj tiktlakaita tlen intlalnamikilis kinkauilia oksekimej ma kichiuakan? Nin chikome timomachtiskej.

^ párr. 6 Se neskayotl, uelis tokniuan akinmej yikipiaj xiuitl kinmiluiaj ma kinkauilikan oksekimej tokniuan tlen okachi telpokamej ma kichiuakan tekitl tlen yejuan kichiuaj itech tlanechikol. Uan tikchiaj tokniuan akinmej yikipiaj xiuitl ma kinpaleuikan akinmej okachi telpokamej.