1 Juan 3:1-24

  • “Tejuan tiikoneuan toTajtsin Dios” (1-3)

  • Ikoneuan toTajtsin Dios uan ikoneuan Diablo (4-12)

    • Jesús kipojpolos tlen kichiua Diablo (8)

  • Matimosepantlasojtlakan (13-18)

  • ToTajtsin Dios okachi ueyi uan amo ijkon ken toyolo (19-24)

3  ¡Xikitakan ken sapanoua techtlasojtla toTajtsin Dios! Ye technotsa tiikoneuan uan tejuan melauak tiikoneuan ikinon oksekimej amo techixmatij porque yejuan amo kixmatij ye.  Nokniuan, axkan tejuan tiikoneuan toTajtsin Dios pero ye ayamo nochi technextilia ken tiyetoskej satepan. Tejuan tikmatij ijkuak ye monextis tiyetoskej ken ye porque melauak tikitaskej.  Nochtin akinmej kineltokaj inneuian mochipauaj porque ye chipauak.  Akin tlajtlakolchiua kijtosneki kixnamiki tlanauatil. Porque tlajtlakoli kixnamiki tlanauatil.  Namejuan noijki nankimatij ye omonexti para techkixtilis totlajtlakol uan ye amo kipia tlajtlakoli.  Amo tlajtlakolchiua akin iuan kajki. Akin tlajtlakolchiua amo kita uan amo kixmati.  Nokonetsitsiuan, amikaj manamechkajkayaua. Akin kichiua tlen kuali kijtosneki yolkuali ijkon ken ye yolkuali.  Akin tlajtlakolchiua kichiua ken Diablo porque Diablo yiuejkika tlajtlakolchijtok. Ikinon iKone toTajtsin Dios ouala para kipojpolos tlen kichiua Diablo.  Nion se ikone toTajtsin Dios tlajtlakolchiua porque kipia iespíritu santo. Ye amo uelis tlajtlakolchiuas porque ikone toTajtsin Dios. 10  Motaj akinmej ikoneuan toTajtsin Dios uan akinmej ikoneuan Diablo. Porque akin kichiua tlen amo kuali amo kichiua ken toTajtsin Dios. Noijki akin amo kitlasojtla ikni amo kichiua ken toTajtsin Dios. 11  Nochipa xikilnamikikan tlen achto onankikakej: moneki matimosepantlasojtlakan. 12  Amo matikchiuakan ken Caín porque ye okichi ken Satanás uan okimikti ikni. ¿Uan tleka okimikti? Porque okichiuaya tlen amo kuali pero ikni okichiuaya tlen kuali. 13  Nokniuan, amo ximotlajtlachialtikan tla oksekimej namechkokoliaj. 14  Tejuan tikmatij otikatkaj ken yotiixpolikaj uan axkan oksepa tiyoltokej porque tikintlasojtlaj tokniuan. Akin amo tetlasojtla kijtosneki ixpolitok. 15  Akin kikokolia ikni kijtosneki temiktia. Namejuan nankimatij akinmej temiktiaj amo nochipa yoltoskej. 16  Tejuan tikmatij titetlasojtlaj porque ye topatka okimiktijkej. Tejuan noijki moneki tiktemakaskej toyolilis inpatka tokniuan. 17  Tla ikaj kipia miak tlamantli para kinpaleuis oksekimej pero amo kiknomati ikni ijkuak kita itlaj kipoloua, ¿ken tikijtoskej kitlasojtla toTajtsin Dios? 18  Nokonetsitsiuan, amo san xikijtokan nantetlasojtlaj. Xikteititikan nantetlasojtlaj ika tlen nankichiuaj uan xikchiuakan ika nochi namoyolo. 19  Ijkon tikmatiskej tikchiuaj tlen melauak. Noijki tikneltokaskej toTajtsin Dios techtlasojtla 20  maski toyolo techtlajtlakoltis. Porque toTajtsin Dios nochi kimati. Ye okachi ueyi uan amo ijkon ken toyolo. 21  Nokniuan, amitlaj techtsakuilis matimotlapouikan iuan toTajtsin Dios tla toyolo amo techtlajtlakoltia. 22  Noijki techmaka nochi tlen tiktlajtlaniliaj porque tiktlakamatij* tlen technauatia uan tikchiuaj tlen ye kipaktia. 23  Ye technauatia matikneltokakan Jesucristo porque ye iKone. Noijki matimosepantlasojtlakan ijkon ken ye otechnauati. 24  Noijki akin kintlakamati* itlanauatiluan kajki iuan toTajtsin Dios uan ye noijki iuan kajki. Tejuan tikmatij toTajtsin Dios touan kajki porque ye otechmakak iespíritu.

Notas

Noso “tikuelkakij”.
Noso “kinuelkaki”.