Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Septiembre de 2015

¿Ken uelis tikteititiskej tiktlasojtlaj Jehová?

¿Ken uelis tikteititiskej tiktlasojtlaj Jehová?

“Tejwah tiktlasojtla Dios porke Ye achto otechtlasojtlak.” (1 JUAN 4:19)

TLAKUIKALMEJ: 6 UAN 138

1, 2. ¿Ken techmachtia Jehová ma titetlasojtlakan?

SE KUALI teta kinmachtia ikoneuan ika tlen kichiua. Ijkuak kintlasojtla, kinmachtia ma tetlasojtlakan. Ijkon techmachtia Jehová. Ye akin okachi techtlasojtla. Biblia kijtoa: “Ye achto otechtlasojtlak” (1 Juan 4:19). Ijkuak Jehová techtlasojtla, techmachtia ma titetlasojtlakan.

2 ¿Tleka kijtoa Biblia Jehová achto otechtlasojtlak? Pampa ye okiualtitlanki iKone ma mikiki topampa “maya otikatkah titlajtlakolejkeh” (Romanos 5:8). Jehová ijkon okichi pampa uelis techmakixtis itech tlajtlakoli uan mikilistli. Uan ijkon ye otechmachti ma titetlasojtlakan uan ma tiktemakakan tlen tikpiaj (1 Juan 4:10). Noijki pampa ijkon okichi, axkan uelis timochiuaskej tiiyolikniuan uan tikteititiskej tiktlasojtlaj.

3, 4. ¿Ken tikteititiaj tiktlasojtlaj Jehová?

3 Tlasojtlalistli non tlen okachi kinextia Jehová. Ik non, Jesús okijto tlanauatil tlen okachi ipati ye nin: “Xiktlasojtla Moteko Dios ika nochi moyolo, ika nochi moalma, ika nochi  motlalnamikilis iwa ika nochi mochikawalis” (Marcos 12:30). Jehová kineki ma tiktlasojtlakan ika nochi toyolo. Amo kipaktia tla okachi tiktlasojtlaj ikaj noso itlaj uan amo ye. Pero ye amo kineki san ma tikijtokan tiktlasojtlaj. Ye noijki kineki ma tiktlasojtlakan ika nochi tokuayejyekol uan ika nochi tochikaualis, nin kijtosneki, tiktlasojtlaskej ika tlen timokuayejyekoaj uan ika tlen tikchiuaj (xiktlajtolti Miqueas 6:8). *

4 Moneki tiktlasojtlaskej Jehová ika nochi toyolilis uan ika nochi tlen tikpiaj. Tla melauak tiktlasojtlaj, okachi kipias ipati itech toyolilis. Yichikome otimomachtijkej naui tlamantli tlen kiteititia Jehová melauak techtlasojtla. Axkan timomachtiskej ken uelis okachi tiktlasojtlaskej Jehová uan ken tikteititiskej tiktlasojtlaj.

MA TIKTLASOJKAMATILIKAN JEHOVÁ

5. Ijkuak timokuayejyekoaj itech nochi tlen Jehová techmaka, ¿tlen tiknekij tikchiuaskej?

5 Ijkuak ikaj techmaka se tetliokolil, melauak tiktlasojkamatiliaj. Ijkuak tiktekitiltiaj non tetliokolil tikteititiaj melauak tikpatioitaj. Tlatitlanil Santiago okijto: “Nochi tlan kuali iwa yekmilajka wits de ilwikak iwa Dios techmakah” (Santiago 1:17). Jehová techmaka nochi pampa tiyoltoskej uan tiyolpakiskej. Ik non, melauak tiktlasojkamatiliaj. Tikitaj melauak techtlasojtla uan tiknekij tikteititiskej tejuan noijki tiktlasojtlaj. ¿Ijkon tikmachiliaj?

6. ¿Tlen omonekiaya ma kichiuakan israelitas pampa Jehová kinteochiuaskia?

6 Jehová okinmakak israelitas miak tlamantli tlen kuali. Itech miak xiuitl okinmakak nochi pampa yoltoskiaj. Noijki okinmakak itlanauatiluan pampa kimatiskiaj tlen kichiuaskiaj (Deuteronomio 4:7, 8). Se neskayotl, tlanauatil okijtoaya israelitas omonekiaya kimakaskiaj Jehová tlakilolmej tlen okachi kuali tlen okitemakaya Tlaltikpak (Éxodo 23:19). Tla okinekiayaj Jehová ma kinteochiua, omonekiaya kitlakamatiskiaj uan kimakaskiaj tlen okachi kuali okipiayaj. Ijkon kiteititiskiaj okitlasojkamatiliayaj Jehová (xiktlajtolti Deuteronomio 8:10, 11). *

7. ¿Ken uelis tiktekitiltiskej “tlamantli miak ipati tlen tikpia[j]” pampa tikteititiskej tiktlasojtla Jehová?

7 Tejuan uelis tikteititiskej tiktlasojtlaj Jehová tla tiktemakaj “tlamantli miak ipati tlen tikpia[j]” (Proverbios 3:9). ¿Ken uelis tikchiuaskej? Uelis tiktemakaskej tomin tlen kisas itech toyolo pampa tikinpaleuiskej tokniuan itech tonechikol uan itech nochi Tlaltikpak. Maski amo tikpiaskej miak tlamantli tlen ipati, tinochtin uelis tiktekitiltiskej tlen tikpiaj pampa tikteititiskej tiktlasojtlaj Jehová (2 Corintios 8:12). Pero amo san ijkon tikteititiaj tiktlasojtlaj. Ma tikitakan ken noijki uelis tikteititiskej tiktlasojtlaj.

Ijkuak titlaneltokaj itech Jehová tikteititiaj tiktlasojtlaj

8, 9. 1) ¿Tlen okse tlamantli uelis tikchiuaskej pampa tikteititiskej tiktlasojtlaj Jehová? 2) ¿Tlen okichijkej Mike uan ikalchanejkauan?

8 Tla titlaneltokaj itech Jehová ijkon  noijki tikteititiaj tiktlasojtlaj. ¿Tleka? Jesús otechmachti amo ma timotekipachokan pampa tikpiaskej tlen ika timopanoltiskej. Jehová kijtoa techmakas nochi tlen techpoloa tla tiktekichiuiliaj (Mateo 6:31-33). Tejuan tikneltokaj ijkon kichiuas. Pampa ijkuak ikaj tiktlasojtlaj, itech titlaneltokaj. Ijkuak titlaneltokaj itech Jehová, tikteititiaj tiktlasojtlaj (Salmo 143:8). Ik non, moneki ma timotlajtlanikan: “Ika nochi tlen nikchiua, ¿nikteititia niktlasojtla Jehová? ¿Nikneltoka nechmakas mojmostla nochi tlen nechpolos?”

9 Ma tikitakan tlen okipanok Mike uan ikalchanejkauan. Ijkuak okatka telpochtli, Mike okinekiaya yas okse altepetl pampa okachi tetlapouiskia. Satepan omonamikti uan okinpixkej inkoneuan, pero Mike ok okinekiaya yas okse altepetl. Ye uan ikalchanejkauan okitlajtoltijkej seki neskayomej itech tokniuan tlen oyajkej okse altepetl pampa okachi tetlapouiskej. Ik non, omokuayejyekojkej ayakmo kipiaskiaj miak tlamantli. Okinemakakej inkalijtik uan ochantito itech okse kali tlen amo ueyi okatka. Mike ayakmo okachi otekitiaya. Axkan, Mike uan ikalchanejkauan kitekichiuiliaj Jehová ika miak pakilistli itech okse altepetl. Mike kijtoa melauak mochiua tlen toTeko Jesús okijto itech Mateo 6:33.

MA TIMOKUAYEJYEKOKAN ITECH NOCHI TLEN TECHMACHTIA JEHOVÁ

10. ¿Tleka moneki tikchiuaskej ken David uan timokuayejyekoskej itech nochi tlen Jehová techmachtia?

10 Tekiua David omokuayejyekoaya itech itlanauatiluan Jehová uan itech nochi tlen Jehová okichijchi. Ik non, okijto: “Nochi iluikak kitematiltia iueyichiualis toTajtsin Dios; semanauak kitematiltia nochi tlen ye okichijchi ika imauan”. Noijki okijto “itlanauatil Jehová yekkuali” uan techmaka chikaualistli uan ixtlamatilistli. Ijkuak David ijkon omokuayejyekoaya, okachi okitlasojtlaya Jehová. Ik non, omochijchikauaya pampa nochi tlen okijtoaya uan omokuayejyekoaya, ma kiyolpakti Jehová (Salmo 19:1, 7, 14). Ijkon ken David, tejuan moneki timokuayejyekoskej itech nochi tlen okichijchi Jehová uan itech nochi tlen ye techmachtia ika Biblia. Ijkon okachi kuali timouikaskej iuan Jehová uan tikteititiskej tiktlasojtlaj.

11. ¿Tlen uelis tikchiuaskej ika nochi tlen techmachtia Jehová pampa uelis tikteititiskej tiktlasojtlaj? (Xikita tlaixkopinal tlen ika peua tlamachtil.)

11 Axkan tonalmej, Jehová techmachtia ken iyelis, ken okichijchi nochi, uan nochi tlen ijkuilitok itech Biblia. Tlaltikpaktlakamej kinyoleuaj oksekimej ma momachtikan itech uejueyij escuelas, pero ompa san kipoloaj tlasojtlalistli tlen kipialiaj toTajtsin Dios. Pero, Jehová amo san kineki ma tikmatikan miak tlamantli. Noijki kineki ma tikmatikan tlen tikchiuaskej. Ye techmachtia pampa kuali ma  tiyetokan uan pampa ma tikinpaleuikan oksekimej (Proverbios 4:5-7). ¿Ken uelis tikchiuaskej? Uelis tikinpaleuiskej tlaltikpaktlakamej ma kixmatikan tlen melauak uan ijkon uelis momakixtiskej (1 Timoteo 2:4). Tla tikinmachtiaj tlaltikpaktlakamej tlen kichiuas iTekiuajkayo toTajtsin Dios, ijkon tikteititiaj tiktlasojtlaj Jehová uan tlaltikpaktlakamej (xiktlajtolti Salmo 66:16, 17). *

12. ¿Tlen okijto se ichpochtli itech se tetliokolil tlen okimakak Jehová?

12 Telpokamej noijki uelis mokuayejyekoskej itech nochi tlen Jehová kinmaka uan kinmachtia. Se neskayotl, se tokni ichpochtli tlen itoka Shannon kilnamiki ken omomachili itech ueyi Nechikol de Distrito “Devoción piadosa”. Ye okipiaya 11 xiuitl uan iikni 10 xiuitl. Itech se tlapoualistli tlen omotemak itech non ueyi nechikol okinmiluijkej telpokamej san sekan ma motlalikan. Shannon ompa omotlali. Achto omomojtiaya, pero satepan oyolpakik miak ijkuak sejse telpokamej okinmakakej amochtli Los jóvenes preguntan. Ye kijtoa ken ika nin tetliokolil okimachili ken Jehová melauak yoltok uan melauak kitlasojtla. Kitlasojkamatilia Jehová pampa ye techmaka miakej tetliokolilmej kuajkualtsitsintin.

 MA TIKSELIKAN TLAPALEUILISTLI TLEN TECHMAKA JEHOVÁ IJKUAK TECHYEKTLALIA

13, 14. ¿Ken moneki tikitaskej ijkuak Jehová techyektlalia?

13 Biblia kijtoa Jehová kinyektlalia tlaltikpaktlakamej tlen ye kintlasojtla, ijkon ken se teta kichiua iuan ikone (Proverbios 3:12). ¿Ken moneki tikitaskej ijkuak Jehová techyektlalia? Uelis timoyolkokoskej, pero nochipa moneki ma tikkauilikan Jehová ma techyektlali. Ijkon tikchiuaj tlen kuali uan tikpiaj yolseuilistli (Hebreos 12:11). Amo keman ma tikualanikan tla Jehová techyektlalia. Tla tikkakij iTlajtol Jehová uan timoyektlaliaj, ijkon tikteititiskej tiktlasojtlaj.

Ijkuak Jehová techyektlalia uan tiktlakamatij, tikteititiaj tiktlasojtlaj

14 Ijkuak okatka teotlajtojki Malaquías, judíos okitemakayaj tlamanali tlen amo kuali pampa Jehová. Ik non, ye okinyektlali chikauak (xiktlajtolti Malaquías 1:12, 13). * Okinyektlali miak vuelta, pero yejuan amo okikakej. Ik non, Jehová okintlajyouilti (Malaquías 2:1, 2). ¿Tlen techmachtia nin neskayotl? Tla amo timotekauiliaj ma techyektlali Jehová noso amo tikpatioitaj, ye ayakmo yetos toyolikni.

Moneki tiktlakamatiskej Jehová uan amo tlaltikpaktlakamej (Xikita párrafo 15)

15. ¿Tlen amo moneki tikchiuaskej?

15 Miakej tlaltikpaktlakamej moueyinekij uan amo motekipachoaj intech oksekimej. Miakej amo kinpaktia ma kinyektlalikan nion ma kinmiluikan tlen moneki kichiuaskej. Uan ijkuak kichiuaj tlen kinmiluiaj ma kichiuakan, kualanij ijkuak kichiuaj. Pero Biblia kijtoa amo moneki tikchiuaskej ijkon. Moneki tikmatiskej tlen Jehová kineki ma tikchiuakan uan tiktlakamatiskej (Romanos 12:2). Ye kitekitiltia ialtepe pampa techyektlalis ijkuak monekis. Se neskayotl, techmachtia ken moneki timotlapouiskej iuan tokniuan tlakamej  uan siuamej, ken kuali tikinpejpenaskej toyolikniuan uan ken uelis timoyolpaktiskej. Ijkuak Jehová techyektlalia uan tiktlakamatij, tikteititiaj tiktlasojkamatiliaj uan tiktlasojtlaj (Juan 14:31; Romanos 6:17).

MA TIKILUIKAN JEHOVÁ MA TECHPALEUI UAN MA TECHMALUI

16, 17. 1) Achto tikchiuaskej itlaj, ¿tleka moneki timochijchikauaskej pampa tikmatiskej tlen mokuayejyekoa Jehová? 2) ¿Tlen amo kuali okichijkej israelitas?

16 Ijkuak se konetl kineki ma kipaleuikan uan ma kimaluikan, san niman yaui iuan itajtsin. Ualeua hasta akinmej yikipiaj miak xiuitl ok kinekij intatajuan ma kipaleuikan. ¿Tleka? Maski yikimatij tlen kichiuaskej, noijki kimatij intatajuan kitemakaj kuali tlanojnotsalmej. Noijki ijkon panoa iuan Jehová. Ye techkauilia ma tikpejpenakan tlen tikchiuaskej. Pero ken itech titlaneltokaj uan tiktlasojtlaj, nochipa tikiluiaj ma techpaleui. Uan achto tikchiuaskej itlaj, timochijchikauaj pampa tikmatiskej tlen mokuayejyekoa. Ijkuak tikiluiaj Jehová ma techpaleui, ye techpaleuia ika iespíritu pampa tikchiuaskej tlen kuali (Filipenses 2:13).

17 Itech itonaluan Samuel, israelitas omoteuijkej iuan filisteos pero omotaya amo tlatlaniskiaj. Ik non, yejuan okiuikakej arca itech tlajtolsenkaualistli itech non guerra uan amo otlaneltokakej itech Jehová pampa amo okitlajtlanijkej tlen omonekiaya kichiuaskiaj. Omokuayejyekojkej Jehová kinpaleuiskia. Pero amo omochijchikajkej pampa kimatiskiaj tlen omokuayejyekoaya. San okichijkej tlen yejuan omokuayejyekojkej kuali okatka. ¿Tlen opanok pampa ijkon okichijkej? Omikej 30,000 soldados israelitas uan filisteos okiuikakej arca itech tlajtolsenkaualistli (1 Samuel 4:2-4, 10, 11; xiktlajtolti Proverbios 14:12). *

18. Ijkon ken kijtoa Salmo 42:5, 6 uan Proverbios 3:5, 6, ¿tlen moneki tikchiuaskej?

18 Se tlakatl tlen okitlasojtlaya miak Jehová okijto ken ijkuak okipiaya ouijkayotl, okineltokaya Jehová kipaleuiskia uan kimakixtiskia (Salmo 42:5, 6). ¿Ijkon timomachilia? Uelis tejuatsin yititlaneltoka itech Jehová. Pero tinochtin uelis okachi itech titlaneltokaskej. Biblia kijtoa: “Ximotenmachia itech Jehová ika nochi moyolo, uan amo xikchiua tlen timokuayejyekoa. Itech nochi tlen tikchiua xikchiua ken toTajtsin Dios kineki, uan ye kichiuas kuali xikpia monemilis” (Proverbios 3:5, 6).

19. ¿Ken tikteititis tiktlasojtla Jehová?

19 Ken yotimomachtijkej, Jehová achto otechtlasojtlak. Ijkon otechmachti ma tiktlasojtlakan. Nochipa moneki tikilnamikiskej nochi tlen techmaka uan ken sapanoa techtlasojtla. Ma tikteititikan tiktlasojtlaj ika nochi toyolo, toalma, tokuayejyekol uan tochikaualis (Marcos 12:30).

^ párr. 3 Miqueas 6:8 kijtoa: “Ye omitsilui tlen kuali, oh tlaltikpaktlakatl. ¿Uan tlen mitstlajtlanilia Jehová? ¡Moneki tikpias melajkayotl uan tiktlasojtlas yolmelajkayotl uan ika yolyamanilistli tinemis iuan moDios!”.

^ párr. 6 Deuteronomio 8:10 uan 11 kijtoa: “Ijkuak yotitlakua uan yotiixuik, moneki tikueyichiuas moDios Jehová pampa kuali tlali omitsmakak. Ximomalui pampa amo tikilkauas Jehová moDios pampa amo tiktlakamatis tlen technauatia, itlaixkomakalis tlen kipejpena uan itlanauatiluan tlen axkan nimitsnauatijtok”.

^ párr. 11 Salmo 66:16 uan 17 kijtoa: “Xiualakan uan xitlakakikan, nochtin namejuan akinmej kimauiliaj toTajtsin Dios, uan ne namechiluis tlen nopampa ye yokichi itech noyolilis. Ye oniktlatlaujti ika nokamak, uan onikueyichi ika nonenepil”.

^ párr. 14 Malaquías 1:12 uan 13 kijtoa: “‘Pero namejuan nechteneuaj ijkuak nankijtoaj: “Imesa Jehová sokio, uan itlakilol, itlakual moneki tikixtopeuaskej”. Uan okijtojkej: “¡Xikita! ¡Yotitlatsiuijkej!” uan nankichikoitaj’, okijto Jehová akin kinyekana miakej soldados. ‘Uan nankinualikaj yolkamej tlen onankinmichtekej, koxomej uan tlen mokokoaj. Kema, ¡tikualika nin tlamantli ken se tetliokolil! ¿Moneki ma nikseli tlen tinechmaka?’, kijtoa Jehová”.

^ párr. 17 Proverbios 14:12 kijtoa: “Onka se ojtli tlen mota kuali iixpan tlakatl, pero nin ojtli tlami itech mikilistli”.