1 Timoteo 6:1-21
6 Akinmej katej ken tlakeualmej nochipa makintlakaitakan intekouan, para amo keman makiuijuikaltikan itoka toTajtsin Dios nion tlen tlamachtia.
2 Akinmej kinpiaj intekouan tlen tlaneltokaj amo kijtosneki amo kintlakaitaskej san porque yejuan tokniuan. Moneki okachi tekipanoskej porque tlen kichiuaj kinpaleuia akinmej tlaneltokaj uan kintlasojtlaj.
Nochipa xitlamachti nochi nin tlamantli uan xitenejmachti.
3 Tla ikaj tlamachtia okse tlamantli pero amo mouika iuan kuali tlamachtil tlen iaxka toTeko Jesucristo, nion amo mouika iuan tlamachtil tlen kijtoua ken tiktekichiuiliskej toTajtsin Dios,
4 san moueyineki uan amitlaj kajsikamati. San kineki mokualanis ika tlajtoli uan tlananankilia. Non kichiua oksekimej matlaixnekikan, mamokualanikan, mateyolkokokan uan amo makinneltokilikan oksekimej.
5 Nochipa mokualaniaj ika tlen amitlaj ipati porque amo kuali mokuayejyekouaj* uan amo kimatij tlen melauak. Yejuan mokuayejyekouaj* moneki kitlaniskej tomin tla kitekichiuiliskej toTajtsin Dios.
6 Melauak techpaleuia tiktekichiuiliaj toTajtsin Dios tla tipakij san ika tlen tikpiaj.
7 Porque amitlaj otikualikakej ipan tlaltikpak ijkuak otineskej* uan amitlaj tikuikaskej ijkuak tiixpoliuiskej.
8 Ikinon matipakikan tla tikpiaj tlen tikkuaskej uan tlen tikmokentiskej.
9 Pero akinmej kinekij kipiaskej miak tomin kinyoltilana tlen amo kuali uan uetsij imak trampas. Noijki kinekij kichiuaskej tlen kinmijtlakoua ikinon tlajyouiaj uan ixpoliuij.
10 Porque akinmej kixnekij tomin kinpanoua miak tlamantli amo kuali, ikinon sekimej tlen kixnekij tomin ayakmo tlaneltokaj uan inselti motlajyouiltiaj.
11 Pero te tiktekichiuilia toTajtsin Dios ikinon amo xikchiua non tlamantli. Ximochijchikaua xikchiua tlen kuali, xikueyichiua toTajtsin Dios, xitlaneltoka, xitetlasojtla, xitlaxiko uan xiyeto tiyolyamanki.
12 Xikmomaka ken se soldado tlen kimati kimomakas uan ijkon tikpaleuis tlen tlamachtia toTajtsin Dios. Xikmoaxkati yolilistli tlen amo keman tlamis porque toTajtsin Dios yokijto tikselis uan te noijki otiktematilti inmixpan miakej.
13 Ixpan toTajtsin Dios tlen kichiua nochi mayolto uan ixpan Cristo Jesús tlen kuali otetlapoui ixpan Poncio Pilato, nimitsnauatia
14 kuali xiktlakamati* tlen nimitsiluia uan amo mamitsteluikan hasta ijkuak monextis toTeko Jesucristo.
15 Ye tlanauatia uan paki uan kiteititis ichikaualis ijkuak ajsis tonal tlen omoijto. Tlanauatia inpan nochtin tekiuajkej uan okachi ueyititok amo ken oksekimej tekiuajkej.
16 San ye amo uelis ixpoliuis, chanti kanin onka tlauili uan ompa amikaj uelis kalakis. Noijki ayamo ikaj kita uan amikaj kitas. Makitlakaitakan uan nochipa makipia chikaualistli. Amén.
17 Xikinnauati nin tlamantli akinmej axkan kipiaj miak tomin: amo mamoueyinekikan uan amo makineltokakan intomi kinpaleuis porque ajsis tonal tlamis. Makineltokakan toTajtsin Dios porque ye techmaka nochi tlamantli tlen kichiua matipakikan.
18 Xikinmilui makichiuakan miak tlamantli kuali uan ika nochi inyolo makitemakakan tlen kipiaj.
19 Ijkon kololoskej tlen kipatioita toTajtsin Dios. Non kijtosneki kuali yetoskej satepan uan kimoaxkatiskej yolilistli tlen melauak.
20 Timoteo, xikmalui tlen omitsmakak toTajtsin Dios, amo xikkaki tlen amitlaj ipati uan kixnamiki toTajtsin Dios. Noijki amo xikinkaki tlen mokuayejyekouaj* ixtlamatkej pero inmixtlamatilis kixnamiki tlen melauak.
21 Pero sekimej moueyinekij porque mokuayejyekouaj* ixtlamatkej ikinon ayakmo tlaneltokaj.
ToTajtsin Dios nochipa manamechtliokoli tlen kuali.
Notas
^ Noso “monejneuiliaj”.
^ Noso “monejneuiliaj”.
^ Noso “otitlakatkej”.
^ Noso “xikuelkaki”.
^ Noso “monejneuiliaj”.
^ Noso “monejneuiliaj”.
