Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Septiembre de 2015

“Kuali xitlaneltokakah”

“Kuali xitlaneltokakah”

“Kuali xitlaneltokakah.” (1 CORINTIOS 16:13)

TLAKUIKALMEJ: 23 UAN 34

1. 1) ¿Tlen okipanok Pedro? (Xikita tlaixkopinal tlen ika peua tlamachtil.) 2) ¿Tleka Pedro opejki apolaki?

SE TONAL ijkuak yitlajkoyoak Pedro uan oksekimej imachtijkauan Jesús okipanauijtokaj mar de Galilea itech se barca, pero san niman omochi se ueyi ejekakiauitl. Ijkuakon okitakej Jesús onejnentiualaya ipan atl. Pedro okitlajtlani kox ye noijki uelis nejnemiskia ipan atl. Jesús okilui kema. Ijkuakon, Pedro okiski itech barca uan opejki nejnemi ipan atl pampa kinamikiskia Jesús. Pero satepan opejki apolaki. ¿Tleka? Pampa okitak ejekakiauitl uan omomojti. Ijkuakon Pedro okitlatlaujti Jesús ma kipaleui. Jesús okimakitski uan okilui: “¡Amo tiyektlaneltoka!, ¿amo techneltoka?” (Mateo 14:24-32).

2. ¿Tlen timomachtiskej axkan?

2 Axkan timomachtiskej eyi tlamantli itech tlen okipanok Pedro. Se, ken achto okiteititi otlaneltokak Jehová kipaleuiskia. Ome, tleka ayakmo otlaneltokak. Uan eyi, ken oksepa otlaneltokak. Nin eyi tlamantli techpaleuis okachi ma mochikaua totlaneltokilis (1 Corintios 16:13).

 MA TITLANELTOKAKAN ITECH JEHOVÁ

3. 1) ¿Tleka Pedro okiski itech barca uan opejki nejnemi ipan atl? 2) ¿Tleka tejuan noijki titlaneltokaj itech Jehová?

3 Ijkuak Jesús okinotski Pedro, ye san niman okiski itech barca uan opejki nejnemi ipan atl. ¿Tleka ijkon okichi? Pampa okineltokaya Jehová kipaleuiskia ijkon ken okipaleuijtoka Jesús. Akinmej tikchiuaj ken Cristo noijki ijkon titlaneltokaj. Ijkuak itech Biblia otikmatkej Jesús techyoleua ma timochiuakan imachtijkauan, otimotemakakej iixpan Jehová uan otimoapolaktijkej. ¿Tleka? Pampa sapanoa otikneltokayaj Jehová uan Jesús techpaleuiskiaj (Juan 14:1; xiktlajtolti 1 Pedro 2:21).

Tlaneltokilistli okichi Pedro ma kichiua seki tlamantli tlen amo ikaj uelis kichiuaskia

4, 5. ¿Tleka miak ipati tlaneltokilistli?

4 Tlaneltokilistli miak ipati, pampa techpaleuia ma tikchiuakan seki tlamantli tlen mota oui (Mateo 21:21, 22). Se neskayotl, Pedro onejnenki ipan atl pampa otlaneltokak. Tejuan noijki yotikchijkej miak tlamantli oui pampa titlaneltokaj. Se neskayotl, yotikpatlakej nochi tonemilis. Uan nochtin akinmej otechixmatiayaj yokitakej axkan ayakmo tikchiuaj ken achto. Otikpatlakej nochi tonemilis pampa tiktlasojtlaj Jehová uan pampa ye otechpaleui ma tikpatlakan tonemilis (xiktlajtolti Colosenses 3:5-10). Uan noijki pampa titlaneltokaj, otimotemakakej iixpan Jehová uan kuali iuan timouikaj. Amo itlaj uelis tikchiuaskiaj tla Jehová amo techpaleuiskia (Efesios 2:8).

5 Tlaneltokilistli noijki miak ipati pampa techyolchikauaj pampa uelis tiktlaniliskej Satanás akin kipia miak chikaualistli (Efesios 6:16). Noijki tlaneltokilistli techpaleuia ma titlaxikokan ijkuak titlajyouiaj. Jehová techiluia tla itech titlaneltokaj uan timochijchikauaj tiktekichiuiliskej, ye techmakas nochi tlen techpoloa (Mateo 6:30-34). Uan tlaneltokilistli noijki kichiuas ma tiyoltokan nochipa itech Xochitlali (Juan 3:16).

AMO MA TIKPOLOKAN TLANELTOKILISTLI

6, 7. 1) ¿Tlen ika uelis tikneskayotiskej ejekatl uan atl tlen okimomojti Pedro? 2) ¿Tleka tinochtin moneki tikmaluiskej totlaneltokilis?

6 Oksepa ma tikitakan tlen okipanok tlatitlanil Pedro. ¿Tleka omomojti ijkuak onejnentoka ipan atl? Biblia techiluia ayakmo okitak Jesús uan san okimomojti ejekakiauitl (Mateo 14:30). Ijkuak opejki ayakmo tlaneltoka opejki apolaki. Ejekatl uan atl uelis tikneskayotiskej ken ouijkayotl uan nochi tlamantli amo kuali tlen axkan techpanoa. Maski sapanoa titlajyouiaj, Jehová techyolchikaua pampa ma titlaxikokan. Pero tla san timokuayejyekoaj itech ouijkayotl, uelis ayakmo tikneltokaskej Jehová melauak techpaleuis.

Ayakmo chikauak yetos totlaneltokilis tla san tikitaj tlen amo kuali

7 Tinochtin uelis ayakmo titlaneltokaskej. ¿Tleka? Pampa Biblia kijtoa tla ayakmo titlaneltokaj mochiua ken “tlajtlákoli non techijilpia” (Hebreos 12:1). Tla san timotekipachoaj  itech tlen techtlajyouiltia ijkon ken okichi Pedro, uelis ayakmo titlaneltokaskej. ¿Ken uelis tikmatiskej kox ayakmo chikauak totlaneltokilis? Ma tikitakan seki tlajtlanilmej tlen techpaleuiskej ma tikitakan ken tikpiaj totlaneltokilis.

8. ¿Tlen uelis kichiuas ayakmo ma titlaneltokakan itech tlen Jehová okijto kichiuas?

8 ¿Ok titlaneltokaj itech tlen kichiuas Jehová? Se neskayotl, Jehová okijto ayakmo miak poliui uan kitlajtlamis nochi tlen kiyekantok Satanás. Pero tla san tiknekij timoyolpaktiskej ika tlen onka itech Tlaltikpak, uelis tikpoloskej totlaneltokilis axkan ijkuak ayakmo miak poliui pampa kitlajtlamis nochi tlen amo kuali (Habacuc 2:3). Ma tikitakan okse neskayotl. Jehová noijki okijto techtlapojpoluis totlajtlakoluan pampa Jesús okitemakak iyolilis. Pero tla amo tikilkauaj tlamantli amo kuali tlen otikchijkej, uelis ayakmo tikneltokaskej Jehová melauak techtlapojpoluia (Hechos 3:19). Ijkuakon ayakmo tiyolpakiskej tiktekichiuiliskej Jehová uan noijki ayakmo titetlapouiskej.

9. ¿Tlen uelis panos tla ayakmo tikpatioitaj Jehová?

9 ¿Tiktekichiuiliaj Jehová ika nochi toyolo? Tla chikauak tiktekichiuiliaj Jehová, nin techpaleuis ma tikchiakan yolilistli tlen tikpiaskej. Pero ¿tlen panos tla okseki tlamantli okachi tikpatioitaj? Se neskayotl, uelis tikseliskej se tekitl kanin kuali techtlaxtlauiskej pero ayakmo uelis okachi tiktekichiuiliskej Jehová. Nin uelis kichiuas ayakmo okachi ma titlaneltokakan uan ayakmo ma tiktekichiuilikan Jehová ika nochi toyolo (Hebreos 6:10-12).

Imachtijkauan Jesús okimatiayaj moneki tlaneltokilistli pampa titetlapojpoluiskej

10. ¿Tleka ijkuak titetlapojpoluiaj tikteititiaj titlaneltokaj itech Jehová?

10 ¿Amo tikintlapojpoluiaj oksekimej? Ijkuak itlaj techchiuiliaj, ¿tikualanij uan ayakmo tikintlapouiaj? Tla ijkon tikchiuaj, uelis san timotekipachoaj itech tlen tikmachiliaj. Pero tla tikintlapojpoluiaj akinmej itlaj techchiuiliaj, tikteititiaj titlaneltokaj itech Jehová. ¿Tleka ijkon tikijtoaj? Tla tiknekij Jehová ma techtlapojpolui, moneki ma titetlapojpoluikan (Lucas 11:4). Ijkuak tikintlapojpoluiaj, tikteititiaj tikneltokaj Jehová yolpaki ika tlen tikchiuaj uan ye techtlapojpoluis. Uan nin okachi ipati, amo ma tikintlajtlakoltikan oksekimej pampa tlen techchiuiliaj. Imachtijkauan Jesús okimatiayaj moneki tlaneltokilistli pampa uelis tikintlapojpoluiskej oksekimej. Ik non, ijkuak Jesús okinmilui ma tetlapojpoluikan maski miak uelta okintlajyouiltijkej, yejuan okiluijkej: “Xikmiakili totlaneltokalis” (Lucas 17:1-5).

11. ¿Tlen moneki ma tikchiuakan ijkuak techyektlaliaj?

 11 ¿Tikualanij ijkuak techyektlaliaj? Ijkuak ikaj techyektlalia moneki tikitaskej ken techpaleuia tlen techiluia. Pero tla san tikitaj tlen amo kuali otechilui, noso tlamantli amo kuali tlen kichiua, amo itlaj techpaleuis (Proverbios 19:20). Moneki ma titlaneltokakan uan ma tikitakan ken ijkuak techyektlaliaj uelis techpaleuis ma tikmatikan ken mokuayejyekoa Jehová.

12. ¿Tlen tikteititiaj tla tikinteneuaj tlayekankej?

12 ¿Tikinteneuaj akinmej tlayekanaj itech tlanechikol? Ijkuak israelitas okikakej tlen okijtojkej majtlaktli tlakamej tlen ichtakaj otlachiatoj, opejkej kinteneuaj Moisés uan Aarón. Ik non, Jehová okitlajtlani Moisés: “¿Keski kauitl ninmej tlaltikpaktlakamej amo nechtlakaitaskej, uan keski kauitl notech amo tlaneltokaskej maski miak tlamantli kuali yonikchi intlajkotia yejuan?” (Números 14:2-4, 11). Ijkuak israelitas opejkej kinteneuaj tlakamej tlen Jehová okintlali ma kinyekanakan, yejuan okiteititijkej intech amo otlaneltokayaj. Noijki, tla tikinteneuaj tlakamej akinmej tlayekanaj itech tlanechikol, tikteititiaj amo titlaneltokaj itech Jehová.

13. ¿Tleka amo moneki ma timosotlauakan?

13 Ika ninmej tlajtlanilmej uelis yotikitakej totlaneltokilis ayakmo chikauak. Pero amo ma timosotlauakan. Ma tikilnamikikan noijki tlatitlanil Pedro omomojti uan ayakmo otlaneltokak. Uan ualeua Jesús okinyektlali itlatitlaniluan pampa amo okipiayaj chikauak intlaneltokilis (Mateo 16:8). Pero uelis timomachtiskej itlaj tlen miak ipati itech tlen okichi Pedro ijkuak opejki apolaki pampa amo otlaneltokak.

 TLEN TECHPALEUIS OKSEPA MA TITLANELTOKAKAN

14, 15. 1) ¿Tlen okichi Pedro ijkuak opejki apolaki? 2) ¿Ken uelis tikitaskej Jesús?

14 ¿Tlen okichi Pedro ijkuak opejki apolaki? Ye kuali omajkuiaya, uan uelis mokuepaskia itech barca (Juan 21:7). Pero amo okichi. ¿Tleka? Pampa ye amo okitemo iselti momakixtis, okitak Jesús uan okitlajtlani ma kipaleui. Tla tikitaj ayakmo okachi chikauak totlaneltokilis, moneki ma tikchiuakan ken Pedro. ¿Ken uelis ijkon tikchiuaskej?

15 Pedro okitak Jesús. Noijki moneki ma tikitakan Jesús ijkon ken kijtoa Biblia (xiktlajtolti Hebreos 12:2, 3). (Xikita recuadro tlen itoka “¿Tlen kijtosneki?”.) Pero tejuan amo uelis tikitaskej Jesús ijkon ken Pedro. ¿Ken uelis tikitaskej Jesús? Nin tikchiuaskej ijkuak timomachtiskej tlen okichi, tlen otlamachti uan tla tejuan ijkon tikchiuaj. Tla ijkon tikchiuaj uelis oksepa titlaneltokaskej. Ma tikitakan seki tlamantli tlen techmachtis ken uelis tikchiuaskej ken Jesús.

Totlaneltokilis mochikauas tla tikchiuaj ken Jesús (Xikita párrafo 15)

16. ¿Ken uelis Biblia techpaleuis ma mochikaua totlaneltokilis?

16 Ika Biblia ma tikchikauakan totlaneltokilis. Jesús kuali okimatiaya Biblia iaxka toTajtsin Dios uan nochi tlen ompa kijtoa melauak techpaleuia (Juan 17:17). Tla tiknekij tikchiuaskej ken Jesús uan ma tikpiakan chikauak totlaneltokilis, moneki mojmostla ma tiktlajtoltikan Biblia, ma timomachtikan uan ma timokuayejyekokan itech tlen otiktlajtoltijkej. Noijki tla itlaj amo tikajsikamatij, moneki ma tiktemokan tlen kijtosneki. Se neskayotl, ¿tikneltoka melauak tikatej itech itlamian nochi tlen amo kuali? Ximomachti nochi tlen Biblia kijtoa itech itlamian nochi tlen amo kuali uan nin kichikauas motlaneltokilis. ¿Titlaneltoka Jehová melauak kichiuas nochi tlen okijto? Ximomachti nochi tlen yomochi, nin kichikauas motlaneltokilis. ¿Tikneltoka nochi tlen kijtoa Biblia melauak techpaleuia? Ximomachti inneskayo tokniuan tlen omopaleuijkej ika tlen kijtoa Biblia, nin noijki kichikauas motlaneltokilis (1 Tesalonicenses 2:13). *

17. 1) ¿Tlen okipaleui Jesús ma tlaxiko? 2) ¿Ken uelis tikchiuaskej ken Jesús?

17 Ma timokuayejyekokan itech tlen Jehová okijto kichiuas. Jesús omokuayejyeko itech tlen Jehová okilui. Nin okipaleui ma tlaxiko maski sapanoa otlajyoui (Hebreos 12:2). Ye amo keman omokuayejyeko itech tlamantli tlen uelis kipiaskia itech Tlaltikpak (Mateo 4:8-10). ¿Ken uelis tikchiuaskej ken Cristo? Ma timokuayejyekokan itech tlen Jehová okijto kichiuas. ¿Tlen uelis mitspaleuis itech non ximokuayejyeko? Ximokuayejyeko yitika itech Xochitlali. Uelis tikijkuilos tlen mitspaktiskia tikchiuas itech Xochitlali. Noso noijki uelis tikijkuilos nochtin akinmej tikneki ma kinyolitikan uan tlen tikintlapouis. Ximokuayejyeko nochi tlen Jehová okijto kichiuas, noijki tlen kichiuas pampa tejuatsin.

18. ¿Tlen uelis techpaleuis okachi ma titlaneltokakan?

18 Ma tiktlatlaujtikan Jehová ma kichiua okachi ma titlaneltokakan. Jesús okinmachti imachtijkauan ken uelis kitlajtlaujtiskej Jehová ma kinmaka okachi espíritu santo (Lucas 11:9, 13). Espíritu santo kichiuas okachi ma titlaneltokakan, pampa tlaneltokalistli se tlamantli tlen kisa itech espíritu  santo. Noijki uelis tiktlajtlaniliskej Jehová ma techpaleui pampa uelis tiktlaniliskej nochi tlamantli tlen uelis kichiuas ayakmo okachi ma titlaneltokakan. Se neskayotl, tla amo san niman tikintlapojpoluiaj oksekimej, uelis tiktlatlaujtiskej Jehová ma techpaleui ma mochikaua totlaneltokilis uan ma techpaleui ma titetlapojpoluikan.

19. ¿Iuan akinmej moneki ma timouikakan?

19 Ma timouikakan iuan akinmej chikauak intlaneltokilis. Jesús kuali okinpejpenki inyolikniuan. Ye kuali omouikaya iuan itlatitlaniluan pampa okatkaj yolmelajkej uan okitlakamatiayaj (xiktlajtolti Juan 15:14, 15). Noijki moneki ma timouikakan iuan akinmej kipiaj chikauak intlaneltokilis uan kitlakamatij Jesús. Akinmej kuali mouikaj kuali motlapouiaj. Tla moneki techyektlaliskej kichiuaj. Uan tla moneki ma tikinyektlalikan yejuan kiseliaj (Proverbios 27:9).

20. ¿Tleka moneki ma tikinpaleuikan oksekimej ma mochikaua intlaneltokilis?

20 Ma tikinpaleuikan oksekimej ma mochikaua intlaneltokilis. Jesús miak tlamantli okichi uan okinmilui imachtijkauan pampa ma mochikaua intlaneltokilis (Marcos 11:20-24). Noijki moneki ma tikinpaleuikan oksekimej ma mochikaua intlaneltokilis. Ijkon noijki mochikauas totlaneltokilis (Proverbios 11:25). ¿Ken uelis tikinpaleuiskej oksekimej ma mochikaua intlaneltokilis? Ijkuak titetlapouiaj, uelis tikinmiluiskej oksekimej tleka tikneltokaj toTajtsin Dios melauak onka, totech motekipachoa uan okichijchi Biblia. Noijki uelis tikinpaleuiskej tokniuan ma mochikaua intlaneltokilis. Se neskayotl, tla se tokni kinteneua akinmej tlayekanaj, amo ma timokuayejyekokan amo chikauak itlaneltokilis nion ayakmo tiktlapouiskej. Moneki ma tikpaleuikan okachi ma tlaneltoka itech Jehová uan ma kineltoka tokniuan kuali kichiuaj inteki (Judas 22, 23). ¿Titelpochtli noso tiichpochtli uan ok timomachtijtok? Tla akin mitsmachtia peua tlamachtia tiuitsej itech yolkamej, ximoyolchikaua uan xikintlapoui onka ikaj akin otechchijchi. Amo ximokuayejyeko kualaniskej akinmej tikinmiluis tlen tikneltoka. Uelis mitstlajtlachialtiskej pampa kuali kikakiskej tlen tikintlapouia.

21. ¿Tleka techpaleuis Jehová?

21 Ken otimomachtijkej, Jehová uan Jesús okipaleuijkej Pedro amo ma momojti uan ma mochikaua itlaneltokilis. Seki kauitl satepan, Pedro okitlali se kuali neskayotl itech ken moneki tikpiaskej totlaneltokilis. Jehová noijki techpaleuis tisejse pampa chikauak ma tikpiakan totlaneltokilis (xiktlajtolti 1 Pedro 5:9, 10). Ik non, miak ipati ma timochijchikauakan pampa chikauak ma yeto totlaneltokilis.

^ párr. 16 Se neskayotl, itech revista Akin Tetlapouijtok xikinmita tlamachtilmej tlen itoka “Biblia okinpatili innemilis”.