1. ¿Tlen okinmilui Pablo tokniuan tlapejpenalmej?

 TLATITLANIL Pablo okintlajkuilili tokniuan tlen okatkaj itech achto siglo, okinmilui: “Ayakmó xinemikah kemi nemih n tlaltikpaktlakah” (Rom. 12:2). ¿Tleka ijkon okinmilui tokniuan tla yomotemakakaj ixpan toTajtsin Dios uan okinpejpenkej ika espíritu santo? (Rom. 1:7).

2. ¿Tlen kichiua Satanás para ma tikkauakan Jehová?

² Pablo omotekipachoaya porque miakej tokniuan omokuayejyekoayaj ken ixtlamatkej uan ken omokuayejyekoayaj akinmej kinyekana Satanás (Efes. 4:17-19). Tinochtin uelis ijkon techpanos. Satanás akin kiyekana nochi tlen onka itech nin tlaltikpak kineki techkajkayauas ika miak tlamantli uan ijkon ma tikkauakan Jehová. Satanás san niman kitas tla tiknekij ma techpatioitakan oksekimej noso miakej ma techixmatikan. Noijki uelis kitekitiltis ika tlen otechmachtijkej tokalijtik, itech escuela uan oksekimej tlen inmiuan tikatej uan ijkon kichiuas ma timokuayejyekokan ken ye.

3. ¿Tlen tikchiuaskej para ayakmo timokuayejyekoskej tlen amo kuali?

³ ¿Tlen tikchiuaskej para ayakmo timokuayejyekoskej tlen amo kuali? (2 Cor. 10:4, TNM). Ma tikitakan tlen okijto  Pablo: “Tikpojpolojtokej tlen oksekimej mokuayejyekoaj uan nochi tlamantli tlen kixnamiki itlamatilis toTajtsin Dios uan tiknauatiaj tlen timokuayejyekoaj para ma kitlakamati Cristo” (2 Cor. 10:5, TNM). Pero Jehová techpaleuis ma tikpatlakan ken timokuayejyekoaj. Ijkon ken se pajtli uelis techpaleuis amo ma techmikti se veneno, noijki iTlajtol toTajtsin Dios techpaleuis amo ma techijtlako tlen kiyekana Satanás.

MA TIKPATLAKAN KEN TIMOKUAYEJYEKOAJ

4. ¿Tlen otikchijkej ijkuak opejki timomachtiaj Biblia?

⁴ Ma tikilnamikikan ken otikpatlakej tonemilis ijkuak opejki timomachtiaj Biblia uan ijkuak otikijtojkej tiktekichiuiliskej Jehová. Xamo otikkajkej miak tlamantli tlen amo kuali (1 Cor. 6:9-11). Sapanoa tiktlasojkamatiliaj Jehová otechpaleui ayakmo ma tikchiuakan non tlamantli.

5. ¿Tlen ome tlamantli technauatia ma tikchiuakan Romanos 12:2?

⁵ Pero nin amo kijtosneki ayakmo moneki itlaj tikpatlaskej. Xamo achto otitlajtlakolchiuayaj pero otikkajkej ijkuak otimoapolaktijkej. Pero moneki timochijchikauaskej tikixtopeuaskej nochi tlen amo kuali uan ijkon amo oksepa titlajtlakolchiuaskej. ¿Ken tikchiuaskej? Pablo okijto: “Ayakmó xinemikah kemi nemih n tlaltikpaktlakah, yej xikpatlakah nomotlayejyekolis” (Rom. 12:2). Ik non, moneki tikchiuaskej ome tlamantli. Achto, ‘ayakmó matinemikah kemi nemih n tlaltikpaktlakah’. Noijki moneki ‘matikpatlakah totlayejyekolis’.

6. ¿Tlen techmachtia tlen okijto Jesús itech Mateo 12:43-45?

⁶ Pablo amo san okijto ma tikpatlakan ken timokuayejyekoaj. Noijki okijto moneki ma tikpatlakan ken tikpiaj toyelis (xikita recuadro “ ¿Tikpatlaskej ken  timokuayejyekoaj noso san tiknekij ma techitakan?”). Ijkuak kijtoa ma tikpatlakan ken timokuayejyekoaj, kijtosneki tikpatlaskej toyelis, tlen tikmachiliaj uan tlen amo kuali otikchiuayaj. Ik non, moneki ma timotlajtlanikan: “¿Yonikpatlak seki tlamantli tlen san kitaj oksekimej? Noso ¿melauak onikpatlak noyolo uan tlen nimokuayejyekoa porque nikneki nikchiuas ken Cristo?”. Ijkon techititia tlen kijtoa Mateo 12:43-45 (xiktlajtolti). Ompa Jesús otechititi tlen moneki tikchiuaskej. Nin tlamantli techmachtia itlaj miak ipati. Amo san moneki tikpojpoloskej tlen amo kuali timokuayejyekoaj. Noijki moneki timokuayejyekoskej ken Jehová kipaktia.

‘MATIKYANKUILIKAH TOIXTLAMATILIS’

7. ¿Ken uelis tikpatlaskej tlen timokuayejyekoaj uan tlen tikpiaj itech toyolo?

⁷ ¿Kox uelis tikpatlaskej tlen timokuayejyekoaj uan tlen tikpiaj itech toyolo? ITlajtol toTajtsin Dios techiluia: “Xikyankuilikah nomoixtlamatilis ika nomoespíritu. Ijkó ximoyolpatlakah, ika se yankuik nomonemilis kemi Ye inewia yetoskia ika se nomonemilis chipawak iwa yekmilajka” (Efes. 4:23, 24). Uelis tikpatlaskej toyelis maski ualeua oui. Amo san moneki ayakmo timokuayejyekoskej nion tikchiuaskej tlen amo kuali. Moneki ‘tikyankuiliskeh toixtlamatilis’. Nin kijtosneki tikpatlaskej tlen tiknekij tikchiuaskej, tikpatlaskej toyelis uan ken tikchiuaj seki tlamantli. Pero moneki nochipa timochijchikauaskej.

8, 9. ¿Tlen techititia tlen okipanok se tokni?

⁸ Ma tikitakan tlen okichiuaya se tokni. Ye omoteuiaya iuan oksekimej uan otlauanaya. Ijkuak okipatlak iyelis uan omoapolakti, kanin ochantiaya okitakej kuali tlen okichi. Ijkuak yikin omoapolakti, se tiotlak oajsito ikalijtik se tlakatl tlen sapanoa otlauanki uan okinekiaya iuan moteuis. Achto tokni okimoxikolti amo iuan moteuis. Pero amo okixiko ijkuak non tlakatl okiuijuikalti itoka toTajtsin Dios. Okiski uan okiuitek. ¿Tleka amo okixiko? Porque ayamo ‘okiyankuiliaya ixtlamatilis’ maski omomachtiaya Biblia uan okipaleui ayakmo ma moteui. Nin kijtosneki ayamo okipatlaya ken omokuayejyekoaya.

⁹ Pero ye amo omosotla (Prov. 24:16). Tlayekankej okipaleuijkej, okipatlatia iyelis uan satepan noijki omochi tlayekanki. Se tiotlak ijkuak okatka kaltempa kanin timonechikoaj, oksepa okitak oualaya se tlakatl tlen sapanoa otlauanki uan okinekiaya kiuitekis se tlayekanki. ¿Tlen okichi tokni? Yolik uan ika yolyamanilistli okiyolseui tlakatl uan okipaleui ma ajsiti ikalijtik. ¿Tleka ayakmo okiuitek? Porque okipatlak ken omokuayejyekoaya. Omochi yolyamanki uan ayakmo san niman okualaniaya. Ijkon okiueyichi Jehová.

10. ¿Tlen kijtosneki tikpatlaskej ken timokuayejyekoaj?

¹⁰ Nin tlamantli amo uelis san niman tikchiuaskej nion san niman tikpatlatikisaj. Xamo moneki timochijchikauaskej miak xiuitl (2 Ped. 1:5). Amo san moneki miak xiuitl tiktekichiuiliskej Jehová. Moneki tikpatlaskej ken timokuayejyekoaj. ¿Tlen techpaleuis? Ma tikitakan seki tlamantli.

¿KEN TIKPATLASKEJ KEN TIMOKUAYEJYEKOAJ?

11. ¿Ken techpaleuia tla timotlatlaujtiaj ma tikpatlakan tlen timokuayejyekoaj?

¹¹ Achto, moneki ma timotlatlaujtikan. Ma tiktlajtlanikan tlen okitlajtlanki salmista:  “NoTajtsin Dios xikchiua ma nikpia se noyolo chipauak uan techmaka se yankuik espíritu tlen amo keman ma mitskaua” (Sal. 51:10). Moneki tikajsikamatiskej tleka tikpatlaskej tlen timokuayejyekoaj uan tikiluiskej Jehová ma techpaleui porque san tejuan amo uelis ijkon tikchiuaskej. ¿Ken tikmatij Jehová techpaleuis? Ma tikitakan tlen okijto kichiuas Jehová ijkuak okatka Ezequiel uan ijkuak israelitas amo otetlakamatiayaj: “Nikinmakas san se inyolo uan nikinmakas se yankuik espíritu; [...] uan nikinmakas se inyolo tetlakamati”. Non kijtosneki omonekiaya kiseliskej ma kinyekana toTajtsin Dios (Ezeq. 11:19). Nin texto sapanoa techyolchikaua. Jehová okinekiaya kinpaleuis israelitas ma kipatlakan tlen omokuayejyekoayaj uan tejuan noijki kineki techpaleuis.

12. Ijkon ken kijtoa Salmo 119:59, ¿tlen moneki itech timokuayejyekoskej?

¹² Noijki ma timokuayejyekokan. Nochipa kuali ma tiktlajtoltikan Biblia uan ma timokuayejyekokan ken techpaleuia. Ijkon tikitaskej tlen moneki tikpatlaskej (xiktlajtolti Salmo 119:59; Heb. 4:12; Sant. 1:25). Moneki ma tikitakan kox timokuayejyekoaj ken ixtlamatkej. Ma tiyetokan tiyolyamankej para tikitaskej tlen amo kuali tikchiuaj uan timochijchikauaskej ayakmo ijkon tikchiuaskej.

13. ¿Tlen moneki ma timotlajtlanikan?

¹³ Tla tiknekij tikmatiskej ken tikpatlaskej tlen timokuayejyekoaj, moneki ma timotlajtlanikan: “¿Tepitsin nitlaixneki noso nichauati?” (1 Ped. 2:1). “¿Nimoueyineki porque kuali onechiskaltijkej, sapanoa onimomachti noso nikpia miak tomin?” (Prov. 16:5). “¿Nimokuayejyekoa oksekimej amitlaj kipiaj uan noaltepe okachi ueyititok?” (Sant. 2:2-4). “¿Nechpaktia tlen kiyekana Satanás?” (1 Juan 2:15-17). “¿Nechpaktia nikitas kanin mota auilnemij uan kanin mota moteuiaj?” (Sal. 97:10; 101:3; Amós 5:15). Xamo ninmej tlajtlanilmej techpaleuiskej ma tikitakan tlen moneki tikpatlaskej. Tla tikixtopeuaskej tlen amo kuali mokuayejyekoaj oksekimej, tikyolpaktiskej toTajtsin Dios (Sal. 19:14).

14. ¿Tleka moneki kuali ma tikinpejpenakan akinmej inmiuan timouikaj?

¹⁴ Saiktlami, moneki kuali ma tikinpejpenakan akinmej inmiuan timouikaj. Yejuan kipatlaj ken timokuayejyekoaj maski amo tikitaj (1 Cor. 15:33). Porque timomachtiaj uan titekipanoaj inmiuan akinmej amo techpaleuiaj ma timokuayejyekoaj ken Jehová. Pero kanin timonechikoaj tikinmajsiskej akinmej inmiuan timouikaskej uan techpaleuiskej ma titetlasojtlakan uan ma tikchiuakan tlen kuali (Heb. 10:24, 25).

‘MATIYEKTLANELTOKAKAH KEMI OTECHMACHTIJKEH’

15, 16. ¿Ken kineki kipatlas Satanás ken timokuayejyekoaj?

¹⁵ Amo ma tikilkauakan Satanás kineki ma tikpatlakan ken timokuayejyekoaj. Kitekitiltia miak tlamantli para amo ma timokuayejyekokan ken Jehová uan ayakmo ma tiktlakamatikan iTlajtol.

¹⁶ Satanás ok kichiua ken okichi itech xochitlali Edén ijkuak okitlajtlani Eva: “¿Kox melauak Dios onamechilui...?” (Gén. 3:1). Nochi tlen kiyekana Satanás uelis kichiuas ayakmo ma tikmatikan kox melauak tlen tikneltokaj ijkuak ikaj techtlajtlania: “¿Kox melauak toTajtsin Dios amo kipaktia se tlakatl ma monamikti iuan okse tlakatl noso se siuatl ma monamikti iuan okse siuatl? ¿Kox  melauak toTajtsin Dios amo namechkauilia xikchiuakan Navidad nion xiiluichiuakan ijkuak ikaj kajxitia xiuitl? ¿Kox melauak namoTajtsin Dios amo namechkauilia xikmotlalilikan estli? ¿Kox melauak namoTajtsin Dios amo namechkauilia ximouikakan iuan akinmej kinkixtiaj itech tlanechikol maski sapanoa nankintlasojtlaj?”.

17. (1) ¿Tlen moneki tikchiuaskej ijkuak ikaj techtlajtlania kox melauak tlen tikneltokaj? (2) Ijkon ken kijtoa Colosenses 2:6, 7, ¿ken techpaleuis tla ijkon tikchiuaskej?

¹⁷ Moneki kuali tikmatiskej tlen tikneltokaj. Tla amo tikmatij ken titlanankiliskej ijkuak techtlajtlaniaj tlen tikneltokaj, xamo peuas timokuayejyekoskej kox melauak tlen tikneltokaj. Non kichiuas ma tikpatlakan ken timokuayejyekoaj uan ayakmo titlaneltokaskej. Ik non, ¿tlen moneki tikchiuaskej? ITlajtol toTajtsin Dios kijtoa ma tikpatlakan ken timokuayejyekoaj. Ijkon tikmatiskej tlen kineki Jehová ma tikchiuakan uan ‘tikchiwaskeh tlan kuali, tlan kipaktia, iwa tlan yekmilajka’ (Rom. 12:2). Nochipa ma timomachtikan Biblia uan amatlajkuilolmej porque non techpaleuis ma tikitakan melauak tlen techmachtia Jehová. Techpaleuis ma tikinpatioitakan itlanauatiluan Jehová. Ijkon tiyetoskej ken se kuauitl tlen uejkatlan toktok ineluayo uan ijkon ‘tiyektlaneltokaskeh’ (xiktlajtolti Colosenses 2:6, 7).

18. ¿Tlen techpaleuis amo ma techijtlako tlen Satanás kiyekana?

¹⁸ Amikaj ueli kichiuas ma tikpiakan chikauak totlaneltokilis. Ik non, moneki nochipa ‘matikpatlakah totlayejyekolis’. Nochipa ma tiktlatlaujtikan Jehová uan ma tiktlajtlanilikan iespíritu santo. Tla timokuayejyekoskej, techpaleuis ma tikitakan kox kuali tlen tikchijtokej uan tleka tiknekij tikchiuaskej seki tlamantli. Ma timouikakan iuan akinmej kitekichiuiliaj Jehová, yejuan techpaleuiskej kuali ma timokuayejyekokan. Tla ijkon tikchiuaskej, amo techijtlakos tlen kiyekana Satanás uan ‘tikpojpoloskej tlen oksekimej mokuayejyekoaj uan nochi tlamantli tlen kixnamiki itlamatilis toTajtsin Dios’ (2 Cor. 10:5).