Okse icarta Pedro 1:1-21
1 Ne niSimón Pedro, niitlakeual uan niiapóstol Jesucristo. Namechtlajkuililia namejuan tlen onankiselijkej melauak tlamachtil tlen miak ipati uan tejuan noijki otikselijkej. Tinochtin otikselijkej non tlamachtil porque toTajtsin Dios yolkuali uan noijki Jesucristo tlen temakixtia.
2 ToTajtsin Dios uan toTeko Jesús okachi manamechtliokolikan tlen kuali uan manamechmakakan yolseuilistli porque kuali nankinmixmatij.
3 Ichikaualis toTajtsin Dios otechtliokoli nochi tlamantli tlen kichiua matiyoltokan uan matitlaneltokakan porque kuali tikixmatij toTajtsin Dios. Ye otechnotski porque ueyititok uan yolkuali.
4 Ika non tlamantli toTajtsin Dios otechilui sapanoua miak ipati uan kuali tlen kichiuas. Tlen otechilui namechpaleuis ximochiuakan espíritus ken toTajtsin Dios. Ye ijkon okichi porque tejuan ayakmo tikchiuaj tlen techyoltilana ijkon ken kichiuaj oksekimej.
5 Ikinon moneki ximochijchikauakan xitlaneltokakan uan xikchiuakan tlen kuali. Ximochijchikauakan xiyetokan namixtlamatkej
6 uan xikmatikan nanmonauatiskej. Ximochijchikauakan xitlaxikokan uan amo keman xikkauakan toTajtsin Dios.
7 Ximochijchikauakan xikintlasojtlakan nochtin tokniuan uan oksekimej.
8 Tla nankichiuaj nochi non tlamantli uan kuali nankiteititiaj, amo nantlatsiuiskej uan chikauak nantekipanoskej porque kuali nankixmatij toTeko Jesucristo.
9 Porque akin amo ijkon kichiua yetoskia ken amo tlachia. Kintsakua ixtololouan para amo kitas tlauili uan yokilka yokitlapojpoluilijkej itlajtlakol tlen yiuejkika okichi.
10 Nokniuan, namejuan onamechnotskej uan onamechpejpenkej ikinon okachi ximochijchikauakan para amo nankipoloskej non tlateochiuali. Nochipa nantlaneltokaskej tla ijkon nankichijtoskej.
11 Ijkon sapanoua namechteochiuaskej uan nankalakiskej itech iTekiuajkayo toTeko Jesucristo tlen temakixtia. Non Tekiuajkayotl amo keman pojpoliuis.
12 Ikinon nikneki nochipa namechilnamiktis nochi nin tlamantli maski yinankimatij uan nankineltokaj tlen melauak onanmomachtijkej.
13 Axkan ok niyoltok itech nin cuerpo uan nikita moneki namechilnamiktis tlen namechyolchikauas.
14 Porque nikmati san niman nikkauas nin cuerpo ijkon ken noijki onechmatilti toTeko Jesucristo.
15 Nochipa nikchiuas tlen niueli para namechpaleuis namoselti xikilnamikikan nin tlamantli ijkuak yoniixpoliuik.
16 Tejuan otimechmatiltijkej toTeko Jesucristo yinikan yetos uan kipia chikaualistli porque otikitakej ye ueyititok. Amo otimechiluijkej tlen kijtojtinemij akinmej kimatij tlakajkayauaskej.
17 ToTajtsin Dios okitlakaitak uan okiueyitlali. Non opanok ijkuak akin teueyitlalia okinmijto ninmej tlajtolmej: “Nin noKone niktlasojtla uan ye kichiua manipaki”.
18 Tejuan otikkakej nonmej tlajtolmej tlen oualayaj iluikak ijkuak iuan otikatkaj ipan tepetl santo.
19 Ikinon okachi tikneltokaj mochiuas nochi tlen toTajtsin Dios okijto. Xikyekitakan uan xikyekkakikan nochi nin tlamantli hasta ijkuak tlanesis uan kisas sitlali tlen kisa kualkan. Non tlajtoli moneki yetos namoyolipan ken se tlauili tlen tlauia kanin tlayoua.
20 Namejuan kuali nankimatij nion se profecía tlen kajki itech iTlajtol toTajtsin Dios, kijtoua tlen mokuayejyekouaj* tlakamej.
21 Amo keman mochiua se profecía san porque se tlakatl ijkon kineki. Espíritu santo okinpaleui tlakamej matlajtokan ipatka toTajtsin Dios.
Notas
^ Noso “monejneuiliaj”.
