Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2017

“Kuali ken timokuayejyekoa”

“Kuali ken timokuayejyekoa”

DAVID akin ochantiaya itech altepetl Israel, okinmilui ninmej tlajtolmej se siuatl tlen itoka Abigail. ¿Tleka ijkon okichi? ¿Tlen techmachtia Abigail?

David okixmatki Abigail ijkuak Saúl okitemojtinemiaya. Abigail omonamikti iuan Nabal, se tlakatl tlen sapanoa okinpiaya yolkamej tlen okatkaj ik sur itech Judá. David uan itlakeualuan okinmaluiayaj itlakeualuan Nabal tlen otlajpiayaj. Ik non, David okintitlanki sekimej tlakamej ma kitlajtlanilitij tlakuali (1 Sam. 25:8, 15, 16). Amo san okitlajtlanilijtoj tlakuali, yejuan okimaluijtokaj tlen iaxka Nabal.

Pero Nabal okichi ken itoka, tlen kijtosneki xoxo. San okiuijuikalti David ijkuak okinankili. Ik non, David omoyektlali para kitlajyouiltiti. Tlen okijto Nabal kichiuaskia nochtin ikalchanejkauan ma tlajyouikan (1 Sam. 25:2-13, 21, 22).

Abigail okitak nochi tlen kichiuaskia David, ik non, omoyolchika uan amo kikauiliskia David ma kintlajyouilti. Abigail okiyekilui David ma mokuayejyeko uan ma kita ken mouika iuan Jehová. Noijki okimakak miak tlakuali akin yetoskia ueyi tekiua itech Israel uan itlakeualuan. Uan David okijto Jehová okitekitilti Abigail para amo ma kichiua tlen amo kuali. David okilui Abigail: “Kuali ken timokuayejyekoa uan toTajtsin Dios ma mitsteochiua porque axkan otinechpaleui amo ikaj ma nikmikti uan amo ma nimomakuepa” (1 Sam. 25:18, 19, 23-35).

Ijkon ken Nabal, san niman mota ijkuak amo timotlasojkamatij. Noijki ijkuak tikitaskej itlaj amo kuali panos, ma timochijchikauakan ma tikyektlalikan. Ma tiktlajtlanilikan toTajtsin Dios ijkon ken salmista: “Xinechmachti kuali ma nimokuayejyeko uan ma nikpia tlamatilistli” (Sal. 119:66).

Oksekimej uelis mokuayejyekoskej kuali tlen otikchijkej uan kuali otimokuayejyekojkej. Maski kijtoskej kema noso amo, uelis mokuayejyekoskej ken David akin okijto: “Kuali ken timokuayejyekoa”.