Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2017

Amo ma tikilkauakan san Jehová kinamiki tlanauatis

Amo ma tikilkauakan san Jehová kinamiki tlanauatis

“Para nochtin ma kimatikan te motoka Jehová, san te okachi tiUeyititok ipan nochi Tlaltikpak” (SAL. 83:18).

TLAKUIKALMEJ: 46 UAN 136

1, 2. (1) ¿Tlen okachi moneki tikilnamiktoskej? (2) ¿Tleka moneki ma tikpatioitakan nin tlamantli?

MIAKEJ okachi kipatioitaj kipiaskej tomin. Ik non, okachi kitemoaj noso kimaluiaj tlen yikipiaj. Uan oksekimej okachi kinpatioitaj inkalchanejkauan, amo ma mokokokan noso okachi kitaj tlen kichiuaj.

2 Pero onka se tlamantli tlen okachi ipati uan moneki amo keman ma tikilkauakan: san Jehová kinamiki tlanauatis. Tla amo timomaluiskej, tlen mojmostla tikchiuaj noso tlen techtekipachoa uelis kichiuas ayakmo ma tikpatioitakan nin tlamantli. Uan tla okachi tikajsikamatij san Jehová kinamiki tlanauatis, okachi timoyektlaliskej para tikixnamikiskej ouijkayotl uan okachi iuan timouikaskej.

¿TLEKA MIAK IPATI?

3. ¿Tlen kijtoa Satanás itech itlanauatilis Jehová?

3 Satanás okijto Jehová amo kinamiki tlanauatis. Okijto se tekiua tetlajyouilti, amo kineki kuali ma tiyetokan uan okachi tiyolpakiskej tla san tejuan toselti timonauatiskej (Gén. 3:1-5). Noijki okijto nion se tlaltikpaktlakatl  amo uelis yetos yolmelajki ixpan Jehová uan nochtin kixtopeuaskej itlanauatilis tla kipiaskej ouijkayotl (Job 2:4, 5). Ik non, Jehová kikajtok ma mota kox melauak okachi kuali yetoskej tlaltikpaktlakamej tla ye amo kinnauatis.

4. ¿Tleka moneki ma moteititi san Jehová kinamiki tlanauatis?

4 Jehová kuali kimati tlen okijto Satanás amo melauak. Ik non, ¿tleka amo kiyektlalia nin tlamantli uan ma mota kox melauak tlen okijto Satanás? Nin kipia tlen kitas iuan ángeles uan noijki iuan tlaltikpaktlakamej (xiktlajtolti Salmo 83:18). Maski miakej yokixtopejkej ken tlanauatia Jehová ijkon ken okichi Adán uan Eva. Nin uelis kichiuas sekimej ma mokuayejyekokan uelis melauak tlen okijto Diablo. Ken ángeles uan tlaltikpaktlakamej ayamo kitaj kox melauak nin tlamantli, ok yetos ouijkayotl itech altepemej uan itech kalchanejkej. Pero ijkuak Jehová kiteititis san ye kinamiki tlanauatis, tinochtin technauatis uan nochi tlen okichijchi oksepa yetos ika yolseuilistli (Efes. 1:9, 10).

5. ¿Ken tikteititiaj tikpaleuiaj Jehová san ye kinamiki tlanauatis?

5 Moteititis Jehová tlanauatia ika melajkayotl. Uan itlanauatilis Satanás uan ken tlanauatiaj tekiuajkej moteititis amo kuali, ik non, kinpojpoloskej. Tlatlanis iTekiuajkayo toTajtsin Dios tlen kiyekantok Jesús (Is. 45:23, 24). Tlaltikpaktlakamej tlen yolmelajkej kiteititiskej uelis kipaleuiskej Jehová san ye kinamiki tlanauatis. ¿Tiknekij tipouiskej itech ninmej itekipanojkauan toTajtsin Dios tlen yolmelajkej? Kema. Para uelis inmiuan tipouiskej, moneki tikilnamiktoskej uan tikajsikamatiskej tlen kijtosneki nin tlamantli.

OKACHI MIAK IPATI TLANAUATIS JEHOVÁ UAN AMO MA TECHMAKIXTIKAN

6. ¿Tleka miak ipati ma moteititi san Jehová kinamiki tlanauatis?

6 Ken yomoijto, okachi moneki ma tikpatioitakan itlanauatilis Jehová. Tiyolpakiskej miak ipati, pero okachi miak ipati san Jehová kinamiki tlanauatis. ¿Kijtosneki amo kipia ipati ma techmakixtikan noso Jehová amo totech motekipachoa? Amo. ¿Tleka?

7, 8. ¿Ken techpaleuia san Jehová kinamiki tlanauatis?

7 Jehová sapanoa techpatioita. Sapanoa techtlasojtla, hasta okitemakak iKone para techmakixtis uan ma tikpiakan yolilistli tlen amo keman tlamis (Juan 3:16; 1 Juan 4:9). Tla Jehová amo kichiuaskia tlen kijtoa, Diablo kijtos Jehová san tlakajkayaua uan amo kuali tlanauatia porque amo techkauilia ma kipiakan tlen kuali. Noijki ijkon kijtoskej akinmej kipaleuiaj Satanás tlen kipinauiaj toTajtsin Dios uan kijtoaj: “¿Kanin kajki n Cristo non onomechilijkeh oksepa walmokopas? Yomijmikeh totatawah, iwa itech nin tlaltíkpaktli nochipa san ijkó kajki kemi ijkuak opejki” (2 Ped. 3:3, 4). Ik non, Jehová kinmakixtis akinmej kitlakamatij porque itech poui san ye kinamiki tlanauatis (xiktlajtolti Hebreos 6:17, 18). Noijki Jehová kiteititia tlanauatia ika tlasojtlalistli. Ik non, uelis tikneltokaskej Jehová nochipa kintlasojtlas uan kinpatioitas itekipanojkauan tlen yolmelajkej (Éx. 34:6).

 8 Tikilnamiktoskej san Jehová kinamiki tlanauatis amo kijtosneki amo tikpatioitaj ma techmakixtikan noso amo techtlasojtla toTajtsin Dios. Techmakixtiskej miak ipati pero okachi ipati Jehová kinamiki tlanauatis. Moneki kuali ma tikilnamiktokan nin tlamantli para amo tikilkauaskej okachi ipati tikpaleuiskej Jehová itlanauatilis.

JOB OKIPATLAK KEN OMOKUAYEJYEKOAYA

9. ¿Tlen okijto Satanás itech Job? (Xikita tlaixkopinal tlen ika peua tlamachtil).

9 Itech amochtli Job, tlen yiuejkika okijkuilojkej, kijtoa itlaj moneki tikitaskej ken moneki. Ompa kijtoa Satanás okijto Job kikauaskia toTajtsin Dios tla sapanoa tlajyouiskia. Satanás okilui Jehová ma kitlajyouilti. Jehová amo ijkon okichi, maski okikauili ye ma kiyejyeko. Jehová okijto “nochi tlen kipia kajki itech moma(xiktlajtolti Job 1:7-12). San niman okinmichtekilijkej iyolkauan, omikej itlakeualuan uan noijki majtlaktli ikoneuan. Satanás okichi ma mota ye toTajtsin Dios itlajtlakol tlen okipanok (Job 1:13-19). Satepan Satanás okichi Job ma kipia se kokolistli tetlajyalti (Job 2:7). Noijki isiua uan eyi tlakamej tlen okijtoayaj okatkaj iyolikniuan, okiyolkokojkej (Job 2:9; 3:11; 16:2).

10. (1) ¿Ken okiteititi Job okatka yolmelajki ixpan Jehová? (2) ¿Uan tlen amo kuali okichi?

10 ¿Melauak tlen okijto Satanás? Amo. San otlakajkaya porque Job amo okika Jehová (Job 27:5). Pero Job satepan okilka tlen okachi miak ipati. Okachi okinekiaya kiteititis ye okatka yolmelauak uan okijto ikaj ma kiyekilui tleka otlajyouijtoka (Job 7:20; 13:24). Uelis tikijtoskej ijkon okichi porque otlajyouijtoka pero toTajtsin Dios iuan omotlapoui. ¿Tlen okilui?

11, 12. ¿Tlen okajsikamatki Job ijkuak Jehová okipaleui uan tlen okichi?

11 Tlen okijto Job ijkuilitok itech tlakotonal 38 a 41 itech amochtli Job uan amo kanaj kiyekijtoa tleka otlajyouijtoka. Pero tlen okijto toTajtsin Dios amo non okachi miak ipati, ken yetoskia ika mopaleuiskia. Jehová okinekiaya kipaleuis Job ma kajsikamati non amo itlaj ipati, okachi kuali, ma kajsikamati ye okachi Ueyititok. Uan okipaleui ma kajsikamati okseki tlamantli okachi miak ipati (xiktlajtolti Job  38:18-21). Ika nin tlamantli Job okipatlak ken omokuayejyekoaya.

12 ¿Okatka yoltlakuauak Jehová ijkuak ijkon okitlapoui Job maski otlajyouijtoka? Amo. Job amo ijkon okitak. Maski miak tlamantli yokipanoka, satepan nochi okajsikamatki. Uan okijto: “Amo oniknekiaya ijkon nikijtos, ik non, melauak nimoyolkuepa”. Ik non, Jehová omotlapoui iuan Job ijkuak omonekiaya uan noijki okiyolchika (Job 42:1-6). Achto, se telpochtli tlen itoka Elihú noijki yokitlapouijka (Job 32:5-10). Jehová okitak ken okipatlak iyelis Job uan okiseli porque okatka yolmelajki (Job 42:7, 8).

13. ¿Ken ok okipaleui tlen Jehová okilui Job satepan ijkuak ayakmo okipiaya ouijkayotl?

13 Tlen Jehová okilui Job noijki ok okipaleuijtoka maski ayakmo okipiaya ouijkayotl. Maski Jehová okiteochi Job okachi ken achto, amo san niman opajtik. Satepan okinpixki chikome chokotsitsintin uan eyi takotsitsintin (Job 42:12-14). Uelis Job okinmilnamikiaya ikoneuan tlen omikej itlajtlakol Satanás. Uelis ok okilnamikiaya nochi tlen okipanok. Noijki okajsikamatki tleka otlajyoui uan uelis omotlajtlani tleka sapanoa otlajyoui. Maski san tlen opanok, uelis mokuayejyekoskia itech tlen okilui Jehová. Nin kipaleuiskia ma kajsikamati tlen opanok uan kiyolchikauaskia (Sal. 94:19).

¿Ayakmo timokuayejyekoskej itech ouijkayotl tlen tikpiaj uan tikilnamiktoskej san Jehová kinamiki tlanauatis? (Xikita párrafo 14).

14. ¿Tlen techmachtia tlen okipanok Job?

14 Tlen okipanok Job noijki techpaleuis ma tikajsikamatikan uan ma timoyolchikauakan. Uan Jehová okichi ma moijkuilo “para matimoixtlamachtikah, para matikchiakah ika yolsewílistli tlan Ye yokijto techmakas” (Rom. 15:4). ¿Tlen techmachtia nin tlamantli? Amo san ma timokuayejyekojtokan itech tlen techpanoa, tlamo non kichiuas ma tikilkauakan tlen okachi miak ipati: san Jehová kinamiki tlanauatis. Uan ma tikilnamiktokan tikteititiaj tikpaleuiaj Jehová san ye kinamiki tlanauatis ijkuak tikatej tiyolmelajkej maski titlajyouiskej ijkon ken Job.

15. ¿Tlen panos tla tikatej tiyolmelajkej maski titlajyouiskej?

15 ¿Tleka techyolchikaua ma timokuayejyekokan miak ipati ma tiyetokan tiyolmelajkej ixpan Jehová? Porque techilnamiktia amo san nenka titlajyouiaj. Tla titlajyouiaj, amo kijtosneki toTajtsin Dios touan  kualani, okachi kuali, techkauilia ma tikteititikan tiknekij ye ma technauati (Prov. 27:11). Tla titlaxikoskej, Jehová techselis uan tlen tikchiaj tikseliskej okachi tikneltokaskej (xiktlajtolti Romanos 5:3-5). Tlen okipanok Job kiteititia “Toteko Dios satlawel tetlasojtlak iwa teiknoma” (Sant. 5:11). Uelis tikneltokaskej Jehová kinteochiuas nochtin akinmej kipaleuiaj san ye kinamiki tlanauatis. Non techpaleui ma tikxikokan nochi ouijkayotl uan ma tiyolpakikan (Col. 1:11).

AMO MA TIKILKAUAKAN TLEN OKACHI MIAK IPATI

16. ¿Tleka miak ipati ma tikilnamiktokan san Jehová kinamiki tlanauatis?

16 Oui nochipa tikilnamiktoskej san Jehová kinamiki tlanauatis, okachi ijkuak titlajyouijtokej. Noijki maski amo miak ouijkayotl tikpiaskej uelis kichiuas sapanoa itech ma timokuayejyekokan. Ik non, maski sapanoa titlajyouiskej, nochipa ma tikilnamiktokan san Jehová kinamiki tlanauatis.

17. ¿Tleka tla tikchijtokej tekitl tlen otechmakak Jehová amo tikilkauaskej tlen okachi miak ipati?

17 Tla tejuan tikchijtokej tekitl tlen otechnauati Jehová amo tikilkauaskej tlen okachi miak ipati. Ma tikitakan se neskayotl. Se iTlaixpantijka Jehová tlen itoka Renee okipixki se kokolistli itech itsonteko uan noijki okipiaya cáncer. Ijkuak okipajtiayaj, okintlapouiaya akinmej tlapajtiaj, tlen omokokoayaj uan tlen oyayaj kitlajpalotiuij. Itech ome semanas uan tlajko otetlapoui 80 horas ijkuak okatka itech hospital. Maski yimikiskia, okichi tlen okachi miak ipati. Uan non okipaleui amo okachi ma tlajyoui.

18. ¿Tlen techmachtia tlen okipanok se tokni ijkuak amo okilka kichiuas tlen miak ipati?

18 Maski mojmostla tikixnamikij miak ouijkayotl noijki moneki tikilnamiktoskej san Jehová kinamiki tlanauatis. Jennifer okatka eyi tonal itech aeropuerto okichiaya se avión para yas ikalijtik. Uan amo okisayaj aviones. Ye uelis momachiliskia iselti uan mosotlauaskia ompa omochixtoka uan san ye itech motekipachoskia. Pero amo ijkon okichi. Okilui Jehová ma kiyekana para kintlapouis akinmej ompa omochixtokaj tlen sapanoa yomosotlajkej. ¿Tlen opanok? Okintlapoui miakej uan okintemakak miakej amatlajkuilolmej. Ye kijtoa: “Maski okatka oui, onikmachili ken onechpaleui Jehová ma niktematilti itoka ken moneki”. Pero amo okilka tlen okachi miak ipati.

19. ¿Tlen kiteititia melauak tikueyichiuaj toTajtsin Dios?

19 Ialtepe Jehová nochipa kipaleuia uan kajsikamati tleka miak ipati san ye kinamiki tlanauatis. Nin amo kichiua tlaneltokalistli tlen amo melauak. Sejse tejuan moneki tikpaleuiskej tlaneltokalistli tlen melauak.

20. ¿Ken kita Jehová ijkuak tikpaleuiaj san ye kinamiki tlanauatis?

20 Uelis tikneltokaskej Jehová sapanoa kipatioita tikpaleuiaj san ye kinamiki tlanauatis uan ixpan tikatej tiyolmelajkej (Sal. 18:25). Chikome timomachtiskej tleka moneki ma tikpaleuikan san Jehová kinamiki tlanauatis uan ken uelis tikpaleuiskej.