Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2017

Ma tikpaleuikan Jehová san ye kinamiki tlanauatis

Ma tikpaleuikan Jehová san ye kinamiki tlanauatis

“Toteko Dios, sanwel Tejwatsi moaxka n weyílistli, mawistílistli iwa n weletílistli. Porke Tejwatsi otikchijchi nochi tlan onka, iwa tejwatsi otikmonekilti mayetokah, yika otikinchijchi” (APOC. 4:11).

TLAKUIKALMEJ: UAN 49

1, 2. ¿Tlen melauak moneki tikneltokaskej? (Xikita tlaixkopinal tlen ika peua tlamachtil).

KEN otimomachtijkej yichikome, Diablo kijtoa Jehová amo kinamiki ma tlanauati itech nochi semanauak uan tlaltikpaktlakamej okachi kuali yetoskej tla inneuian monauatiskej. Pero ¿non melauak? Ma tikijtokan akinmej kinekij inselti monauatiskej nochipa chantiskej. ¿Okachi kuali yetoskej tla amo kinnauatis toTajtsin Dios? ¿Tikneltokaskia okachi tiyolpakis tla san tikchiuas tlen tiknekis uan noijki tikpias yolilistli tlen amo keman tlamis?

2 Amo uelis ikaj mopatka tlanankilis. Tinochtin moneki kuali timokuayejyekoskej itech nin tlamantli. Uan ma tikneltokakan san toTajtsin Dios kinamiki tlanauatis uan moneki ma tikpaleuikan. Biblia techiluia tleka moneki ma tikneltokakan. Ma tikitakan tlen techiluia ijkuak kijtoa san ye kinamiki tlanauatis.

JEHOVÁ KINAMIKI TLANAUATIS

3. ¿Tleka san Jehová kinamiki tlanauatis?

3 San Jehová kinamiki tlanauatis, porque san ye akin kipia sapanoa miak chikaualistli uan akin otechchijchi (1 Crón.  29:11; Hech. 4:24). Ijkuak Juan okinmitak 144,000 tlen tlanauatiskej iuan Cristo, yejuan okijtojkej: “Toteko Dios, sanwel Tejwatsi moaxka n weyílistli, mawistílistli iwa n weletílistli. Porke Tejwatsi otikchijchi nochi tlan onka, iwa tejwatsi otikmonekilti mayetokah, yika otikinchijchi” (Apoc. 4:11). Jehová nochi okichijchi, ik non, kinamiki ma kinnauati ángeles uan noijki tejuan.

4. Tla Jehová techkauilia ma tikpejpenakan tlen tikchiuaskej, ¿kijtosneki uelis tikixnamikiskej?

4 Satanás amo kinamiki kinauatis semanauak porque ye amo itlaj okichijchi. Sapanoa omoueyineki Satanás, Adán uan Eva ijkuak okixnamikej Jehová amo kinamiki tlanauatis (Jer. 10:23). Yejuan uelis kipejpenaskiaj kikauaskej toTajtsin Dios, pero ¿melauak uelis ijkon kichiuaskiaj? Amo. Maski Jehová techkauilia ma tikpejpenakan tlen mojmostla tikchiuaskej, pero non amo kijtosneki uelis tikixnamikiskej. Tikixnamikiskej Jehová kijtosneki amo kuali tiktekitiltiaj tlen ye techkauilia ma tikpejpenakan. Moneki ma technauati toTajtsin Dios.

5. ¿Tleka uelis tikneltokaskej nochi tlen kipejpena kichiuas Jehová kichiua ika melajkayotl?

5 Onka okse tlamantli tleka san Jehová kinamiki tlanauatis: tlanauatia ika melajkayotl. Ineuian kijtoa: “Ne niJehová Akin kiteititia tlasojtlalistli yolmelajki uan melajkayotl itech nochi Tlaltikpak. Porque nimoyolpaktia itech nin tlamantli” (Jer. 9:24). Itech Jehová kisa melajkayotl. Ik non, para itlaj kichiuas amo moneki kitas se tlanauatil tlen okitlalijkej tlaltikpaktlakamej. Tlanauatilmej tlen otechmakak kisaj itech imelajkayo. Biblia kijtoa: ‘Ipan melajkayotl uan ipan tlaixkomakalistli okitlali itrono’ Jehová. Ik non, uelis tikneltokaskej nochi tlanauatilmej, principios uan nochi tlen kipejpena kichiuas nochi katej ika melajkayotl (Sal. 89:14; 119:128). Maski Satanás kijtoa Jehová amo kuali tlanauatia, ye amo ueli kichiua ma yeto melajkayotl itech Tlaltikpak.

6. ¿Tlen tlamantli kiteititia san Jehová kinamiki tlanauatis itech nochi Tlaltikpak?

6 Onka okse tlamantli tleka Jehová kinamiki tlanauatis: kipia tlamatilistli uan ixtlamatilistli tlen moneki para kimaluis tlen okichijchi. Ma timokuayejyekokan ijkuak Jehová okimakak chikaualistli iKone para ma kinpajti akinmej omokokoayaj uan nin amo uelis kichiuaskia se akin tlapajtia (Mat. 4:23, 24; Mar. 5:25-29). Tlen okichi Jesús amo okitlajtlachialti Jehová porque ye kimati ken kajki totlalnakayo uan uelis kipajtis. Noijki kimati ken kinyolitis akinmej yomikej uan ken kichiuas ayakmo ma tlaxixini.

7. ¿Tleka Jehová okachi ixtlamatki uan amo tlen kiyekana Satanás?

7 Satanás uan nochi tlen kiyekana amo ueli kichiua ma yeto yolseuilistli nion se itech altepetl. San Jehová kipia ixtlamatilistli para kichiuas ma yeto yolseuilistli (Is. 2:3, 4; 54:13). Ijkuak okachi tikmatij itech itlamatilis uan ixtlamatilis Jehová, okachi timomachiliaj ken tlatitlanil Pablo ijkuak okijto: “¡Milák, kema weyi iteiknomatilis Dios, iwa kema weyi iixtlamatilis! Iwa iajsikamatilis, amaka weleti kiteajsikamatiltia tlan Dios kichiwa, nion amaka kajsikamati tlan kichiwa nion kenomi kichiwa” (Rom. 11:33).

ITLANAUATILIS JEHOVÁ OKACHI KUALI

8. ¿Tlen okachi mitspaktia itech ken tlanauatia Jehová?

8 Biblia amo san kijtoa Jehová kinamiki  tlanauatis. Noijki kiyekijtoa tleka okachi kuali tlanauatia. Ye tlanauatia ika tlasojtlalistli. Techpaktia ken technauatia. Ye “teiknomatki uan teajsikamatki, amo san niman kualani uan sapanoa kipia tlasojtlalistli yolmelajki uan kijtoa tlen melauak” (Éx. 34:6). Jehová kintlakaita tlaltikpaktlakamej. Ye okachi kuali techmaluia amo ken tejuan. Tlen kijtoa Satanás amo melauak, Jehová kema techkauilia akinmej tiyolmelajkej ma tikpiakan tlen kuali. Uan hasta okitemakak iKone para tikpiaskej yolilistli tlen amo keman tlamis (xiktlajtolti Romanos 8:32; Santiago 1:17).

9. ¿Ken tikmatij toTajtsin Dios totech motekipachoa?

9 Jehová motekipachoa itech ialtepe pero noijki motekipachoa itech sejse itekipanojkauan. Ma timokuayejyekokan tlen opanok ijkuak okatkaj jueces itech altepetl Israel. Kanaj treinta xiuitl, Jehová okintekitilti jueces para israelitas amo itlaj ma kinpano. Ijkuak opanotoka miak ouijkayotl, omotekipacho itech se siuatl tlen omotokayotiaya Rut uan tlen amo okatka israelita pero okichi miak tlamantli para pouis itech ialtepe Jehová. Jehová okiteochi ijkuak omonamikti iuan se tlakatl yolkuali uan okipixki se ikone. Ijkuak Jehová kiyolitis Rut kimatis ikone noijki omochi ikojkol Jesús. Noijki kimatis tlen okipanok ijkuilitok itech Biblia uan kipia itoka. ¿Timokuayejyekoa ken momachilis? (Rut 4:13; Mat. 1:5, 16).

10. Xikyekijto kox Jehová se tlanauati tetlajyouilti.

10 Jehová amo se tlanauati tetlajyouilti. Akinmej kinnauatia kuali momachiliaj uan yolpakij (2 Cor. 3:17). David okijto: “Ixpan kajki ueyichiualistli; chikaualistli uan pakilistli katej kanin ye kajki” (1 Crón. 16:7, 27). Uan okse salmista itoka Etán noijki okijto: “Yolpakij akinmej kimatij tsajtsiskej ika pakilistli. Oh Jehová, yejuan nejnemij kanin te tikintlauilia. Yejuan yolpakij itech motoka nochi tonal uan ika momelajkayo kinueyichiuaj” (Sal. 89:15, 16).

11. ¿Tlen tikchiuaskej para okachi tikneltokaskej Jehová kuali technauatis?

11 Ijkuak okachi timokuayejyekoaj itech itlasojtlalis Jehová, okachi tikneltokaskej ye okachi kuali technauatis. Timomachiliskej ken salmista akin okijto: “¡Porque niyetos se tonal kanin kajki moteokal okachi kuali uan amo ken mil tonalmej oksekan niyetos!” (Sal. 84:10). Amo onka kanin okachi tiyetoskej. Jehová otechchijchi, ik non, kimati tlen okachi moneki para tiyolpakiskej uan techmaka ika nochi iyolo. San tlen tlamantli kinekis ma tikchiuakan, techpaleuis. Noijki tla tiktlakamatiskej okachi tiyolpakiskej maski monekis timochijchikauaskej (xiktlajtolti Isaías 48:17).

12. ¿Tleka moneki tikpaleuiskej Jehová san ye kinamiki tlanauatis?

12 Biblia kijtoa ijkuak Jesús tlamis tlanauatis, sekimej tlaltikpaktlakamej kijtoskej amo kinamiki Jehová tlanauatis (Apoc. 20:7, 8). ¿Tleka ijkon kijtoskej? Porque Satanás kikajkauaskej uan kichiuas ma moueyinekikan tlaltikpaktlakamej uan kinkajkayauas ijkon ken nochipa kichiua. Kinkajkayauas nochipa kipiaskej yolilistli tlen amo keman tlamis maski amo kitlakamatiskej Jehová. Pero non amo uelis kichiuas. Pero uelis timotlajtlaniskej kox tikkakiskej tlen kijtos Satanás. Tla tiktlasojtlaj Jehová uan tiktekichiuiliaj porque yolkuali uan akin  san ye kinamiki tlanauatis itech Tlaltikpak uan iluikak, amo tikneltokaskej tlen kijtos Satanás. Tiknekiskej nochipa ma technauati Jehová akin kichiua nochi ika melajkayotl uan ika tlasojtlalistli.

MA TIKPALEUIKAN JEHOVÁ SAN YE KINAMIKI TLANAUATIS

13. ¿Ken tikteititiaj san Jehová kinamiki tlanauatis ijkuak tikchiuaj ken ye?

13 Ken yotikitakej, Jehová kinamiki tlanauatis uan kuali kichiuas. Ik non moneki ma tikpaleuikan. Uan tikpaleuiaj ijkuak tikpiaj ajsitok toyolo uan tikatej tiyolmelajkej ixpan toTajtsin Dios. Uan tikchiuaj ken ye technauatia. Uan amo san tikpaleuiaj ken technauatia, noijki tikpatioitaj ken tlanauatia (xiktlajtolti Efesios 5:1, 2).

14. ¿Ken uelis kichiuaskej ken Jehová tlayekankej uan akinmej kinyekanaj inkalchanejkauan?

14 Biblia techmachtia Jehová tlanauatia ika tlasojtlalistli. Ik non, akinmej kinyekanaj inkalchanejkauan uan tlayekankej tlen kipatioitaj ken tlanauatia Jehová, amo kinchiualtiskej oksekimej itlaj ma kichiuakan ken yetoskia yejuan tlanauatiaj. Okachi kuali, kichiuaskej ken Jehová. Ijkon ken tlatitlanil Pablo okichi ken toTajtsin Dios uan ken Jesús (1 Cor. 11:1). Amo okinpinati nion okinchiualti oksekimej ma kichiuakan tlen kuali, okachi kuali, okintlapoui ika tlasojtlalistli (Rom. 12:1; Efes. 4:1; Filem. 8-10). Jehová ijkon kichiua. Uan noijki ijkon kichiuaskej akinmej kipatioitaj uan kipaleuiaj ken tlanauatia Jehová.

15. ¿Tleka tiktlakamatiskej tlen kijtoa ialtepe Jehová tikteititiaj tikpatioitaj ken tlanauatia Jehová?

15 ¿Ken okachi tikpaleuiaj ken tlanauatia Jehová? Ma tikintlakamatikan akinmej okintlali ma tlayekanakan. Tiktlakamatiskej ialtepe maski amo kuali tikajsikamatij tlen kijtoaj kichiuaskej noso amo techpaktia tlen kichiuaskej. Oksekimej  amo tetlakamatij pero moneki ijkon mochiuas tlen tlanauatia toTajtsin Dios (Efes. 5:22, 23; 6:1-3; Heb. 13:17). Tla titetlakamatij, techpaleuis porque Jehová kineki kuali ma tiyetokan.

16. Akinmej kipaleuiaj Jehová san ye kinamiki tlanauatis, ¿ken kichiuaj ijkuak itlaj kipejpenaj kichiuaskej?

16 Tlen tikpejpenaj tikchiuaskej noijki kiteititia kox tikpaleuiaj toTajtsin Dios san ye kinamiki tlanauatis. Ye amo techiluia tlen moneki tikchiuaskej itech sejse tlamantli. Okachi kuali, techiluia ken mokuayejyekoa. Se neskayotl, amo techiluia tlen tlakemitl tikonakiskej, ye techiluia ma timotlakentikan ken moneki ijkon ken motlakentiaj akinmej kichiuaj ken Cristo (1 Tim. 2:9, 10). Noijki amo kineki ikaj ma tikkualanikan ika tlen tikpejpenaj tikchiuaskej (1 Cor. 10:31-33). Tikteititiskej tikpatioitaj ken tlanauatia Jehová uan tikpaleuiaj tla tikpejpenaj tlen tikchiuaskej ken ye kineki uan amo ken tejuan tiknekij.

Tikpaleuiaj Jehová san ye kinamiki tlanauatis ijkuak itlaj tikpejpenaj tikchiuaskej uan noijki tlen kichiuaj tokalchanejkauan. (Xikinmita párrafos 16 a 18).

17, 18. ¿Tlen kichiuaskej akinmej yomonamiktijkej para kiteititiskej kipaleuiaj Jehová san ye kinamiki tlanauatis?

17 Ma tikitakan ken uelis kipaleuiskej Jehová akinmej yomonamiktijkej. ¿Tlen kichiuaskej tla akinmej yomonamiktijkej tlajyouiaj? ¿Tla innamiktilis amo kuali kajki? Ma mokuayejyekokan ken israelitas okichiuiliayaj Jehová. Israelitas moneskayotiaj ken yomonamiktijkej (Is. 54:5; 62:4). Sapanoa okatka oui. Pero Jehová amo keman omosotla. Nochipa okintlapojpolui uan ye okitlakaitak tlajtolsenkaualistli tlen inmiuan okichi (xiktlajtolti Salmo 106:43-45). ¿Amo melauak itlasojtlalis yolmelajki Jehová techyoltilana?

18 Akinmej yomonamiktijkej kitlasojtlaj Jehová ijkuak kichiuaj ken ye. Amo itlaj kichiuaj tlen kixnamiki Biblia para mokajkauaskej. Kajsikamatij Jehová okinsetili uan moneki san sekan yetoskej. Biblia kijtoa uelis mokajkauaskej inmixpan tekiuajkej uan uelis oksepa monamiktiskej tla se oauilnenki (Mat. 19:5, 6, 9). Tla mochijchikauaskej kuali kipiaskej innamiktilis, kiteititiskej kipaleuiaj Jehová san ye kinamiki tlanauatis.

19. ¿Tlen tikchiuaskej ijkuak tikchiuaj itlaj amo kuali?

19 Ken titlajtlakolejkej, ualeua tikyolkokoaj Jehová. Ye kimati uan okiualtitlanki iKone ma kitemaka iyolilis para techmakixtis porque techtlasojtla. Ik non, moneki ma tikiluikan ma techtlapojpolui ijkuak tikchiuaj itlaj amo kuali (1 Juan 2:1, 2). Amo ma timotekipachojtokan itech tlajtlakoli tlen otikchijkej, okachi kuali, ma timochijchikauakan ayakmo ijkon tikchiuaskej. Tla timotokiskej itech toTajtsin Dios, ye techtlapojpoluis, techyolchikauas uan satepan uelis tikixnamikiskej ouijkayotl (Sal. 103:3).

20. ¿Tleka moneki ma tikpaleuikan Jehová san ye kinamiki tlanauatis?

20 Jehová tlanauatis itech nochi Tlaltikpak uan tinochtin tikinmixmatiskej iojuiuan tlen melauakej (Is. 11:9). Pero yitimomachtijtokej itech nonmej iojuiuan. Uan yiajsis tonal ijkuak amo ikaj kiluis Jehová amo kinamiki tlanauatis. Axkan moneki ma tikpaleuikan Jehová san ye kinamiki tlanauatis, ma tiktlakamatikan uan ma timochijchikauakan ma tikchiuakan ken ye itech nochi tlamantli.