1. (1) ¿Ken techpaleuis tla timoapolaktiskej? (2) ¿Tlen timomachtiskej?

 TEJUAN tiyolpakij tla tejuatsin yotimotemakak ixpan Jehová uan yotimoapolakti. Non kijtosneki yotiktlatlaujti toTajtsin Dios mamitspaleui xikpia ‘chipauak motlalnamikilis’ (1 Ped. 3:21). Oksekimej okitakej ijkuak otimoapolakti uan non kinpaleuis noijki makinekikan moapolaktiskej. Xamo tejuatsin ayamo timoapolaktia porque itlaj mitstsakuilia. Pero tiktlasojtla Jehová uan tikneki tikchiuas tlen ye kipaktia. Kuali tikmati moneki timoapolaktis tla tikneki toTajtsin Dios mamitstlapojpolui uan mamitsseli (Hech. 2:​38-40). Ikinon nin tlamachtil mitspaleuis miak. Tikitaskej tleka sekimej amo kinekij moapolaktiskej. Noijki tikitaskej tleka moneki matikilnamiktokan ayakmo miak poliui tlamis nochi tlen axkan panotok. Saiktlami tikitaskej ken techpaleuis tla timoapolaktiskej.

¿TLEKA SEKIMEJ AMO KINEKIJ MOAPOLAKTISKEJ?

2. ¿Tleka sekimej amo kinekij moapolaktiskej?

² Miakej kinekij kitekichiuiliskej toTajtsin Dios pero momojtiaj moapolaktiskej. Matikitakan tleka ijkon tikijtouaj. Xamo miakej momojtiaj porque mokuayejyekouaj amo uelis kiyolpaktiskej Jehová. Tla ijkon timomachilia, xikintlajtolti  seki textos tlen mitspaleuiskej xikajsikamati toTajtsin Dios amo kineki nochi kuali xikchiua. Noijki xikilnamikto Jehová pakis tla timochijchikauas tiktekichiuilis (Sal. 103:​13, 14; Col. 3:23). Tla timomojtia mitstlajyouiltiskej oksekimej ijkuak timoapolaktis, xikilui Jehová mamitsyolchikaua. Xikijto ijkon ken okijkuilo salmista: “Jehová nouan kajki, amo nimomojtis. ¿Akin uelis itlaj nechtoktis?” (Sal. 118:6).

3. ¿Tleka sekimej ayamo kinekij moapolaktiskej? (Noijki xikita dibujo).

³ Miakej amo kinekij moapolaktiskej porque mokuayejyekouaj ayamo nochi kimatij tlen tlamachtia iTlajtol toTajtsin Dios. Pero amo moneki nochi tikmatiskej tla tiknekij timoapolaktiskej. Matikitakan tlen opanok ijkuak Pablo uan Silas okintsakej. Non youak Jehová okichi chikauak matlalolini uan ijkon okikixti Pablo uan Silas kanin otsaktokaj. Tlakatl tlen otlamaluiaya uan akinmej iuan ochantiayaj okajsikamatkej akin okatka Jesús porque Pablo uan Silas okintlapouijkej. Xamo non tlakatl uan ifamilia okajsikamatkej toTajtsin Dios okichi se milagro para kikixtiskia Pablo uan Silas. Non youak okajsikamatkej seki tlamantli miak ipati. ¿Tlen okichijkej ijkuak okimatkej non tlamantli? Non tlakatl san niman “omoapolakti uan noijki akinmej iuan ochantiayaj” (Hech. 16:​25-33). Tejuatsin yiuelis timoapolaktis tla tikmati ken iyelis toTajtsin Dios, tla tiktlasojtla ika nochi moyolo, tla yitikmati tlen amo oui tlamachtia Biblia, tla ayakmo tikchiua tlen amo kuali uan tla yotikijto tiktlakamatis Jehová ika nochi moyolo (Mar. 12:30).

4. ¿Tleka oksekimej amo kinekij moapolaktiskej? (Noijki xikita foto).

⁴ Sekimej kinekij moapolaktiskej uan kiyolpaktiskej toTajtsin Dios pero kitaj sapanoua oui ijkon kichiuaskej. Ikinon miak ipati matimokuayejyekokan tlen tikpejpenaskej tikchiuaskej (Luc. 14:​27-30). Pero oksekimej mokuayejyekouaj moneki kipatlaskej miak tlamantli para uelis kitekichiuiliskej Jehová. Se tokni itoka Candace ijkon okipanok. Ifamilia okitekichiuiliaya toTajtsin Dios ijkuak okatka takotsin pero ye amo okinekiaya momachtis Biblia. Satepan opejki momachtia. Ye okijto: “Ne onikmatiaya tlen omonekiaya nikchiuas tla oniknekiaya nikyolpaktis Jehová. Pero onechpaktiaya ken onikpiaya nonemilis maski onikmatiaya Jehová amo kipaktia tlen onikchiuaya. Onikitaya oui nikkauas non  tlamantli”. Oksekimej amo kinekij moapolaktiskej porque mokuayejyekouaj amo keman uelis kintlakamatiskej itlanauatiluan Jehová. Sekimej momojtiaj se tonal tlajtlakolchiuaskej uan kinkixtiskej itech tlanechikol. ¿Tlen uelis tikchiuas tla mitstekipachoua se tlamantli tlen yotikijtojkej?

5. ¿Tlen moneki okachi tikpatioitaskej? (Mateo 13:​44-46).

⁵ Ijkuak itlaj tikmokouiskej, achto tikitaj kox techpaleuis uan amo san tikitaj kech ipati. Xamo san niman tikmokouiskej tla tikitaskej techpaleuis. Noijki ijkon panoua ijkuak timoapolaktiaj. Tla timoapolaktiskej, techpaleuis matimouikakan iuan Jehová uan amo san timokuayejyekojtoskej amo uelis tikpatlaskej tonemilis. Jesús okiyekijto tlen kijtosneki nin tlamantli (xiktlajtolti Mateo 13:​44-46). Ye okijto se tlakatl okajsik se perla patio uan san niman nochi omotlanemakito uan okimokouito. Tejuatsin noijki otikpatioitak “kuali tlajtoli” ijkuak opejki timomachtia. Ximokuayejyeko tlen okijto Jesús tla timotlajtlania kox mitspaleuis tla timoapolaktis. Ximotlajtlani: “¿Nikneltoka miak ipati tlen nimomachtijtok? ¿Nikpatioita nimouikas iuan Jehová? ¿Nikneltoka satepan nochipa niyoltos? ¿Nikpatioita nimouikas inuan tokniuan tlen katej ken nofamilia?”. Ximotlajtlani non tlamantli para tikmatis tlen tikchiuas uan ijkon uelis timoapolaktis.

6. ¿Tlen mitspaleuis xikchiua tlen timomachtia?

⁶ Jesús noijki okiyekijto amo nochtin kikakij kuali tlajtoli. Ijkon okijto porque tlatlamantli timokuayejyekouaj. Pero oksekimej kikakij kuali tlajtoli ika nochi inyolo uan kichiuaj tlen momachtiaj (Luc. 8:​5-15). Pero amo ximosotlaua tla tikmachilia amo uelis tikchiuas tlen Jehová mitsnauatia. Xikilui Jehová mamitsyolini xiktlakamati. Noijki xiktlatlaujti mamitspaleui xikchiua tlen timomachtia (Ezeq. 18:31; 36:26).

7, 8. ¿Tleka sekimej telpochmej uan ichpochmej amo moapolaktiaj? (Noijki xikita foto).

⁷ Sekimej telpochmej uan ichpochmej kitlasojtlaj Jehová pero amo moapolaktiaj porque oksekimej kinmiluiaj makichiuakan okseki tlamantli. Xamo akinmej kinmachtiaj kinmiluiaj makichiuakan seki tlamantli tlen amo kipaktia toTajtsin Dios. Pero nantlajyouiskej tla nankichiuaskej tlen oksekimej namechiluiaj (Sal. 1:​1, 2; Prov. 7:​1-5). ¿Tlen namechpaleuis amo xikchiuakan tlen oksekimej namechiluiaj? Xikchiuakan ijkon ken se salmista ijkuak okilui Jehová: “Okachi niixtlamatki amo ijkon ken nochtin tlen nechmachtiaj porque nimokuayejyekoua tlen techilnamiktia” (Sal. 119:99).

⁸ Sekimej tetajmej tlen kitekichiuiliaj Jehová amo kinkauiliaj inkoneuan mamoapolaktikan. Okachi kintekipachoua mamomachtikan uan ijkon kipiaskej se kuali tekitl. Noijki amo kinpaleuiaj inkoneuan mamouikakan iuan Jehová uan mamoapolaktikan. Telpochmej uan ichpochmej ximotlajtlanikan kox namopapanuan namechpaleuiaj xikchiuakan tlen moneki para uelis nanmoapolaktiskej. Amo ximomojtikan nankinmiluiskej manamechpaleuikan. Noijki xikilnamiktokan uelis nanmouikaskej iuan Jehová maski ayamo nankipiaj miak xiuitl (Prov. 20:11).

9. ¿Tleka sekimej ayamo moapolaktiaj?

⁹ Sekimej yiuelis moapolaktiskej pero amo ijkon kichiuaj porque kinekij kinchiaskej oksekimej para san sekan moapolaktiskej. Xamo se infamiliar kinmiluia makichiakan uan ijkon san sekan moapolaktiskej. Amo tlajtlakoli tla tikchiaskej se tofamiliar. Pero non amo kijtosneki nochipa tikinchixtoskej. Matikilnamiktokan tisejse timotemakaj  ixpan Jehová ijkuak tikiluiaj nochipa tiktekichiuiliskej. Ikinon oksekimej amo moneki techiluiskej keman moneki timoapolaktiskej (Rom. 14:12).

¿TLEKA MONEKI MATIKILNAMIKTOKAN AYAKMO MIAK POLIUI KIPOJPOLOSKEJ NOCHI TLEN AXKAN PANOTOK?

10. ¿Tleka oksekimej amo moapolaktiaj?

¹⁰ Miakej amo moapolaktiaj porque mokuayejyekouaj ayamo tlamis nochi tlen axkan panotok ikinon uelis yolik kipatlatiaskej innemilis. Pero amo matimokajkayauakan porque Jesús okinnejmachti idiscípulos uan okinmilui: “Namejuan noijki ximotlachilijtokan porque iKone Tlakatl uits ijkuak amo nankichixtoskej” (Luc. 12:40).

11. Ijkon ken kijtoua Salmo 119:​60, ¿tlen tiknekij tikchiuaskej ijkuak okachi tikixmatij Jehová?

¹¹ Timotemakaskej ixpan Jehová uan timoapolaktiskej tla tiktlasojtlaj uan tla tikinpatioitaj itlanauatiluan. Ijkuak okachi timomachtiaj akin Jehová, tikitaj ye techtlasojtla uan technauatia matikintlakamatikan itlanauatiluan porque kineki kuali matiyetokan. Ikinon san niman tikchiuaj tlen technauatia (xiktlajtolti Salmo 119:60). Discípulo Santiago okiyekijto tleka miak ipati san niman matikintlakamatikan itlanauatiluan Jehová porque amo tikmatij tlen techpanos mostla. Ikinon mojmostla matikchiuakan tlen toTajtsin Dios technauatia (Sant. 4:​13-17).

12. ¿Tlen techmachtia tlen okijto Jesús?

¹² Xamo ikaj mokuayejyekojtok Jesús okijto akin tekipanos se hora noijki kitlaxtlauiskej ijkon ken akin otekipano se tonal. Neli tlen okijto Jesús. Pero ¿tleka nonmej tlakeualmej otekipanojkej san se hora? Nonmej tlakamej amo otlatsiuiayaj porque yomochixtokaj tekipanoskej pero amikaj okintlakeuaya. Pero san niman otekipanotoj ijkuak okintlakejkej (Mat. 20:​1-16). Axkan Jesús noijki techiluia matimochiuakan idiscípulos uan matitetlapouikan. Ikinon san niman matikchiuakan tlen Jesús technauatia.

13. ¿Tlen techmachtia tlen okipanok isiua Lot?

¹³ Sekimej mokuayejyekouaj kipatlaskej innemilis uan kitekichiuiliskej Jehová hasta ijkuak yitlamis tlen axkan panotok. Pero kitaskej okachi oui kipatlaskej innemilis non tonal. Jesús okimatiaya miakej ijkon kichiuaskiaj ikinon okinmilui idiscípulos: “Xikilnamikikan tlen okipanok isiua Lot” (Luc. 17:​31-35). Isiua Lot okimatiaya Jehová san niman kipojpoloskia Sodoma uan Gomorra. Pero ye okachi okipatioitaya tlen okipiaya  uan amo okinekiaya kikajteuas (Gén. 19:​23-26). Nin kijtosneki Jehová amo nochipa techchixtos matikpatlakan tonemilis uan matiktekichiuilikan. Ayakmo uelis itlaj tikchiuaskej ijkuak ajsis non tonal (Luc. 13:​24, 25).

14. ¿Tlen moneki tikchiuaskej ijkuak tikitaj mochixtok tlen kijtoua iTlajtol toTajtsin Dios?

¹⁴ Axkan panoua miak tlamantli ipan nochi tlaltikpak uan non kiteititia mochijtok tlen kijtoua iTlajtol toTajtsin Dios. Xamo seki tlamantli tlen kijtoua Biblia amo mochijtok ik kanin tichantij pero panotok itech okseki altepemej. Ikinon san niman matikpatlakan tonemilis uan matimoapolaktikan. Matimokuayejyekokan tlen okinmijkuilili apóstol Pedro tokniuan tlen okatkaj achto siglo. Okinmilui: “Kuali ximokuayejyekokan”. ¿Tleka ijkon okinmilui? Ye okinmilui “yitlamis nochi tlen onka” (1 Ped. 4:7). Apóstol Pedro okinmiluijtoka ijkuak kipojpoloskiaj Jerusalén uan templo. Pero nonmej tokniuan amo ochantiayaj ompa Jerusalén. Ikinon yejuan amitlaj kinpanoskia ijkuak kipojpoloskiaj Jerusalén (1 Ped. 1:1). Pero ijkuak kitaskiaj kipojpoloskej Jerusalén uan templo, okachi kineltokaskiaj Jehová kichiuas nochi tlen yokijto. Axkan noijki tikitaj mochijtok tlen kijtoua iTlajtol toTajtsin Dios uan non techititia yitlamis nochi tlen axkan panotok. Non kijtosneki tikatej itlamian tonalmej ikinon matimochijchikauakan matimoapolaktikan.

15. ¿Ken moneki tikchiaskej “itonal Jehová”? (2 Pedro 3:​10-13).

¹⁵ Itech okse carta tlen okijkuilo Pedro okijto moneki matimoyektlalikan para tikchiaskej “itonal Jehová”. Nin kijtosneki ijkuak toTajtsin Dios kipojpolos nochi tlen axkan panotok. Ijkuak Pedro okijkuilo nin tlamantli ok opoliuiaya miak xiuitl para mochiuaskia tlen okijto Jehová. Pero Pedro okinmilui tokniuan ‘makichixtokan itonal Jehová uan amo makilkauakan’ (xiktlajtolti 2 Pedro 3:​10-13). Tejuan noijki tikilnamiktokej ayakmo miak poliui ajsiki “itonal Jehová” uan tikchixtokej ika nochi toyolo. Ikinon matimochijchikauakan ‘matiyetokan tiyolchipauakej uan matikteititikan tikueyichiuaj toTajtsin Dios’. Jehová sapanoua yolpakis tla  ijkon tikchiuaskej. Ximokuayejyeko ken momachilis tla ixpan timotemakas uan timoapolaktis.

¿KEN TECHPALEUIS TLA TIMOAPOLAKTISKEJ?

16. ¿Keman moneki timoapolaktiskej? (2 Corintios 6:​1, 2; noijki xikinmita fotos).

¹⁶ Axkan okachi moneki matimochijchikauakan timoapolaktiskej (xiktlajtolti 2 Corintios 6:​1, 2). Matikitakan tlen okichi se tekiua tlen oualaya Etiopía ijkuak Felipe okitlapoui. Ye san niman omoapolakti ijkuak okajsikamatki kuali tlajtoli. Amo okijto okachi momachtiskia uan satepan moapolaktiskia. Ye okitlajtlani Felipe: “¿Tlen nechtsakuilia amo manimoapolakti?” (Hech. 8:​26, 27, 35-39). Ijkuak tekiua omoapolakti, “oyajki uan opaktia”.

17. ¿Tlen moneki matikilnamiktokan?

¹⁷ Xamo tejuatsin ayamo timoapolaktia porque itlaj mitstsakuilia pero xikilnamikto Jehová mitspaleuis iuan ximouika (Rom. 2:4). Ye mitspaleuis amo ximomojti, mitspaleuis tla tikita oui tikpatlas monemilis uan noijki mitspaleuis maski oksekimej amo mitsyolchikauaj ximoapolakti. Ijkuak timoapolaktis, tipakis porque tikpias ‘chipauak motlalnamikilis’ uan ayakmo ‘san tikilnamiktos tlen opanok’ (Filip. 3:​8, 13). Tipakis tikchias tlen “satepan uits”. Nin kijtosneki mochiuas tlen Jehová kinmiluia akinmej ixpan motemakaj uan moapolaktiaj (Hech. 3:19).