Hechos de apóstoles 16:1-40
-
Pablo okipejpenki Timoteo (1-5)
-
Se tlakatl tlen oualaya Macedonia okimonextili Pablo (6-10)
-
Otlaneltokak Lidia tlen ochantiaya Filipos (11-15)
-
Pablo uan Silas okintsakej (16-24)
-
Tlakatl tlen otlamaluiaya uan akinmej ichan ochantiayaj omoapolaktijkej (25-34)
-
Pablo okijto inneuian tekiuajkej makinkixtitij (35-40)
16 Pablo oajsito altepetl Derbe uan satepan oajsito Listra. Ompa okatka se discípulo itoka Timoteo. Imama Timoteo okatka judía uan otlaneltokaya pero ipapa okatka griego.
2 Tokniuan tlen ochantiayaj Listra uan Iconio okijtouayaj kuali tlen okichiuaya Timoteo.
3 Pablo okijto okinekiaya kiuikas Timoteo ikinon okiuikak uan okichiuili circuncisión, porque ompa ochantiayaj judíos uan okimatiayaj ipapa okatka griego.
4 Ijkuak oyayaj itech altepemej, okinmiluiayaj tokniuan makichiuakan tlen okijtouayaj apóstoles uan tlayekankej tlen okatkaj Jerusalén.
5 Ijkon tokniuan tlen omonechikouayaj* okachi otlaneltokayaj uan sejse tonal omomiaktiliayaj.
6 Noijki opanokej itech altepemej Frigia uan Galacia, porque espíritu santo amo okinkauili makintlapouikan iTlajtol toTajtsin Dios akinmej ochantiayaj Asia.
7 Ijkuak oajsitoj altepetl Misia, okinekiayaj yaskej altepetl Bitinia pero Jesús ika espíritu santo amo okinkauili mayakan.
8 Ikinon okipanouijkej altepetl Misia uan oyajkej* altepetl Troas.
9 Non youak, Pablo itlaj okimonextili. Okitak ixpan okatka se tlakatl tlen oualaya Macedonia uan okitlatlaujtiaya: “Xiuiki Macedonia uan techpaleui”.
10 Ijkuak Pablo ijkon okitak, otikijtojkej tiaskej Macedonia porque otikneltokayaj toTajtsin Dios otechiluijtoka ompa matiktematiltitij kuali tlajtoli.
11 Itech altepetl Troas otitlejkokej itech barco uan otiajkej altepetl Samotracia. Mostlatika otiajkej altepetl Neápolis.
12 Satepan otiajkej se colonia tlen kajki Filipos. Nin altepetl ueyititok ompa Macedonia uan ompa otimokajkej seki tonal.
13 Sábado otikiskej itech non altepetl uan otiajkej itempa aueyatl. Otikijtouayaj ompa tikajsiskiaj kanin miakej omotlatlaujtiayaj. Ompa otimotlalijkej uan opejki tikintlapouiaj siuamej tlen ompa okatkaj.
14 Se siuatl itoka Lidia otechkaktoka. Ye oneski* altepetl Tiatira uan okinemakaya kuali tsotsoli* morado. Noijki okiueyichiuaya toTajtsin Dios. Jehová okipaleui kuali makikaki tlen okijtouaya Pablo uan makineltoka.
15 Ijkuak Lidia uan akinmej inuan ochantiaya omoapolaktijkej, ye otechilui: “Ximokauakan nochan tla nankitaj nikneltoka Jehová”. Tejuan otimokajkej ichan porque ye otechtlatlaujti.
16 Se tonal ijkuak otiayaj kanin miakej omotlatlaujtiayaj, otiknamikej se ichpochtli tlen okatka tlakeuali uan okipiaya se ejekatl.* Non ejekatl* okipaleuiaya makimati tlen panoskia satepan uan ijkon itekouan okitlaniayaj miak tomin.
17 Ichpochtli opejki techtoka tejuan uan Pablo. Noijki chikauak okijtouaya: “Ninmej tlakamej kitekichiuiliaj toTajtsin Dios tlen Ueyititok. Yejuan namechmatiltiaj ken nanmomakixtiskej”.
18 Ichpochtli ijkon okichijtinenki miak tonal. Pablo ayakmo okinekiaya kikakis ikinon omokopki uan okilui ejekatl:* “Ika itoka Jesucristo nimitsnauatia xikisa ijtik ichpochtli”. Ijkuakon ejekatl* san niman okiski.
19 Ijkuak itekouan ichpochtli okitakej ayakmo kitlaniskiaj tomin, okinkitskijkej Pablo uan Silas. Okintilantiajkej uan okinuikakej tiankisko inmixpan tekiuajkej.
20 Ijkuak okinmajxititoj inmixpan tekiuajkej, okijtojkej: “Ninmej tlakamej kinkuejsojtinemij akinmej chantij itech nin altepetl. Yejuan judíos
21 uan tlamachtijtinemij tlen tejuan amo uelis tikchiuaskej porque tiromanos”.
22 Akinmej ompa okatkaj inpan omokopkej. Tekiuajkej okintsayanilijkej intlaken uan otlanauatijkej makintlakotemakan.
23 Ijkuak yokintlakotenkej, okintsakuatoj uan okinauatijkej tlakatl tlen otlamaluiaya makinyekmalui.
24 Ijkuak ijkon okinauatijkej, ye okintsakuato kanin okachi tlaijtik uan inmikxiuan okinkalakili itech tablas tlen okoyontokaj.
25 Kanaj tlajkoyouak, Pablo uan Silas okitlatlaujtiayaj toTajtsin Dios uan okitlakuikiliayaj. Okinkaktokaj akinmej ompa otsaktokaj.
26 San niman chikauak otlalolinki uan omolini tepamitl kanin otsaktokaj. Noijki omotlapojkej nochi puertas uan ototonkej cadenas tlen ika oilpitokaj akinmej otsaktokaj.
27 Ijkuak oijsak tlakatl tlen otlamaluiaya, okinmitak puertas otlapotokaj. Okikixti iespada uan okinekiaya momiktis porque omokuayejyeko* ocholojkej akinmej otsaktokaj.
28 Pero Pablo chikauak okilui: “¡Amo ximomikti! ¡Tinochtin nikan tikatej!”.
29 Tlakatl tlen otlamaluiaya okijto matlauikan, okalaktikiski uiuiokati uan omotlankuaketski inmikxitlan Pablo uan Silas.
30 Satepan okinkixti uan okintlajtlani: “Tlakamej, ¿tlen moneki nikchiuas para nimomakixtis?”.
31 Yejuan okinankilijkej: “Xikneltoka toTeko Jesús. Ijkon te iuan akinmej mouan chantij nanmomakixtiskej”.
32 Ijkuakon Pablo uan Silas okintlapouijkej iTlajtol Jehová ye uan akinmej ichan ochantiayaj.
33 San niman non youak, tlakatl tlen otlamaluiaya okinuikak uan okinpakili kanin okinkojkojkej. Satepan ye omoapolakti uan noijki akinmej iuan ochantiayaj.
34 Satepan okinuikak ichan uan okintlamakak. Non tlakatl uan akinmej iuan ochantiayaj opakiayaj porque yokineltokayaj toTajtsin Dios.
35 Ijkuak otlaneski, tekiuajkej okintitlankej soldados makiluitij tlakatl tlen otlamaluiaya makinkixti nonmej tlakamej.
36 Tlakatl tlen otlamaluiaya okilui Pablo: “Tekiuajkej okintitlankej sekimej tlakamej manechiluikij manamechkixti. Axkan xikisakan uan kuali xiuiaj”.
37 Pero Pablo okinmilui: “Teixpan otechuitekej uan amo otechixkomakakej maski tejuan tiromanos. Satepan otechtsakej, ¿uan axkan san ichtaka kinekij techkixtiskej? ¡Amo! Yejuan matechkixtikij”.
38 Soldados okinmiluijkej tekiuajkej tlen okijto Pablo. Yejuan omomojtijkej ijkuak okimatkej Pablo uan Silas okatkaj romanos.
39 Tekiuajkej okinmiluitoj makintlapojpoluikan. Satepan okinkixtijkej uan okinmiluijkej makisakan itech non altepetl.
40 Pero Pablo uan Silas oyajkej ichan Lidia ijkuak okiskej kanin otsaktokaj. Ompa omotakej inuan tokniuan uan okinyolchikajkej, satepan oyajkej.
Notas
^ Ika griego moijtoua “tlanechikolmej”.
^ Noso “otemokej”.
^ Noso “otlakatki”.
^ Noso “tlakemitl”, “tilmajtli”.
^ Noso “demonio”.
^ Noso “demonio”.
^ Noso “demonio”.
^ Noso “demonio”.
^ Noso “omonejneuili”.
