Xionyoui kampa nesi tein kipia

Xionyoui kampa nesi tein kipia

 TAMACHTILIS 2

Rebeca kinekia kiyolpaktis Jiova

Rebeca kinekia kiyolpaktis Jiova

Rebeca katka se siuat akin kitasojtaya Jiova. Inamik, Isaac, no kitasojtaya Jiova. Maj tikitakan keniuj moixmatkej, uan no maj tikitakan keniuj kiyolpaktij Jiova.

Itatuan Isaac motokaytiayaj Abrahán uan Sara. Abrahán kinekia maj Isaac monamiktiani iuan se ichpoch akin no kiueyichiuaya Jiova. Sayoj ke yejuan nemiaj Canaán, uan ompa amo akin kiueyichiuaya Jiova. Yejua ika, kititanik semej itekitikauan (xa Eliezer) maj youi Harán. ¿Keyej kititanik ompa? Porin itech xolal Harán nemiaj sekin ichankauan Abrahán, uan Eliezer ueliskia kiajsis ompa se kuali inamik Isaac.

Rebeca monekik tel tekitis uan ijkon kinmakas at camellos

Eliezer tel uejka ojtokak iniuan oksekin itekitikauan Abrahán. Kuikayaj 10 camellos tein kimamayaj takual uan netetayokolilmej. Sayoj ke ¿keniuj kimatiskia Eliezer katiyejua ichpoch yeskia inamik Isaac? Eliezer kimatia ke siuamej akin nemiaj Harán yayaj atakuitij itech se ameyal. Yejua ika, keman ajsikej ompa, yajkej itech nejon ameyal. Ompa kichiuak se netataujtil uan kiluij Jiova: “Nikiluiti se ichpoch maj nechmaka at. Komo yejua nechmaka at nejua uan no kinmaka nocamellos, kijtosneki ke yejua ichpoch akin tikixpejpenak maj mochiua inamik Isaac”.

Ompa, Rebeca atakuiko. Biblia kijtoua ke yejua semi kuakualtsin katka. Eliezer kitajtanij tepitsin at uan yejua kinankilij: “Ika  miak pakilis nimitsmakas at tein titayis tejua uan mocamellos”. ¡Sayoj ximonemili! Camellos tein tel amiktokej tayij miak at, yejua ika Rebeca monekik tsitsikuinis miakpa kikuitiuj at. Xikita taixkopin tein nesi itech página 6. ¿Toni kichiujtok Rebeca?... Keman kiitak ke tel tekititoya, Eliezer kimoujkaitak keniuj Jiova kinankilij inetataujtil.

Eliezer kimakak Rebeca miak netetayokolilmej kualtsitsin, uan yejua kiyoleuak Eliezer uan akin iuan yayaj maj yakan ikalijtik kampa moajsiaj ichankauan. Ompa Eliezer kintapouij keyej Abrahán kititanka. No kintapouij keniuj Jiova kinankilij inetataujtil. Keman kikakkej nejon, ichankauan Rebeca semi yolpakkej. Kiluijkej Eliezer: “Kuali tikitaj maj Rebeca monamikti iuan Isaac”.

Rebeca yajki Canaán iuan Eliezer uan monamiktij iuan Isaac

Sayoj ke ¿tiknemilia ke Rebeca kinekia monamiktis iuan Isaac?... Keman ichankauan kitajtanijkej Rebeca ox kinekia monamiktis iuan Isaac, yejua tanankilij ke kemaj. ¿Keyej? Porin Rebeca kimatia ke Jiova kititanka Eliezer. Yejua ika, yajki Canaán iuan Eliezer, uan keman ajsikej ompa, Rebeca monamiktij iuan Isaac.

Jiova kiyekpiak Rebeca porin kichiuak tein yejuatsin kinekia. Uan miak xiujmej satepan Jesús pouiko itech ichankauan Rebeca. Jiova no mitsyekpias komo titatakamati, uan no tikyolpaktis kemej kichiuak Rebeca.

MAJ TIKIXTAJTOLTIKAN ITECH BIBLIA: