Xionyoui kampa nesi tein kipia

Xionyoui kampa nesi tein kipia

 TAMACHTILIS 11

¿Akonimej kijkuilojkej tein kichiuak Jesús?

¿Akonimej kijkuilojkej tein kichiuak Jesús?

Xikita takamej tein nesij itech taixkopin. Yejuan motokaytiaj Mateo, Marcos, Lucas, Juan, Pedro, Santiago, Judas uan Pablo. Nochin nejin takamej nenkej itech itonaluan Jesús, uan kijkuilojkej tein kichiuak. Nochi tein yejuan kijkuilojkej moajsi itech Biblia. ¿Tikneki okachi tikinixmatis nejin takamej?...

¿Akonimej nejin takamej?

Eyi tel kuali mouikayaj iuan Jesús uan iuan tanojnotsayaj. Katkaj itatitaniluan Mateo, Juan uan Pedro. ¿Uelis  tiknextis itech taixkopin kani yetokej?... Mateo uan Juan kijkuilojkej sejse amaix kampa ika tajtouaj tein kichiuak Jesús. Uan no, Juan kijkuiloj se amaix tein monotsa Apocalipsis (oso Revelación) uan tein moixmatij kemej Yekinika, Ojpatika uan Expatika Juan. Pedro kijkuiloj ome amaixmej: Yekinika uan Ojpatika Pedro. Itech ojpatika amaix, Pedro kijkuiloj keman Jiova ualtajtoj iluikak uan kijtoj keniuj kiitaya Jesús: “Yejua nejin nokonetsin. Nejua nikteltasojta uan semi nechyolpaktia tein kichiua”.

Okseki takamej akin no ixnesij itech taixkopin no kijkuilojkej tein kichiuak Jesús. Semej katka Marcos. Yejua xa moajsia iuan Jesús keman tateuianij kikitskijkej uan kiitak nochi tein panok. Okse takat katka Lucas. Yejua katka se tapajtijkej uan nesi ke peuak kichiua tein Jesús tamachtij satepan ke Jesús momikilij.

Ome iikniuan Jesús no kijkuilojkej tein kichiuak. ¿Tikmati akonimej katkaj?... Yetokej itech taixkopin, uan motokaytiayaj Santiago uan Judas. Achto amo kineltokayaj tein Jesús tamachtiaya. ¡Hasta kinemiliayaj ke tepitsin kuatapolojtoya! Sayoj ke satepan taneltokakej uan kichiujkej tein Jesús tamachtij.

Axkan maj ika titajtokan Pablo. ¿Tikita itech taixkopin? Achto ke kichiuaskia tein Jesús tamachtij, motokaytiaya Saulo. Yejua kintauelitaya akin kichiuayaj kemej Cristo uan kinchiuiliaya tein amo kuali. ¿Tikuelitaskia tikmatis keniuj peuak kichiua tein Cristo tamachtij?... Se tonal keman yaya itech se ojti, kikakik ke aksa kiualnotsaya ne iluikak. ¿Akoni kinotsaya? ¡Katka Jesús! Uan kitajtanij: “¿Keyej tikinchiuilia tein amo kuali akin notech taneltokaj?”. Satepan ke panok nejon, Pablo mopatak uan kichiuak tein Jesús tamachtij. Ompa, kijkuiloj 14 amaixmej tein moajsij itech Biblia, tein peua itech Romanos uan tami itech Hebreos.

¿Melauj ke techyolpaktia tikixtajtoltiskej Biblia mojmostaj?... Ompa miakkan kijtoua tein kichiuak Jesús. ¿Melauj ke tikneki tikmatis okachi tein kichiuak?...

MAJ TIKIXTAJTOLTIKAN ITECH BIBLIA: