¿Nochipa ueli tikintakamati motatuan?... Kemansa ouij kisa, ¿melauj? Sayoj ke ¿tikmati toni mitspaleuis xitatakamati? Tikitas tein kichiuak Jesús. ¿Tikmatia ke yejua nochipa kitakamatik Jiova uan itatuan?... Timomachtitij okachi tepitsin tein kichiuak Jesús.

Achtopa ke Jesús nemiskia nikan taltikpak, yejua yetoya ne iluikak iuan iPopaj, Jiova. Sayoj ke keman nemia nikan taltikpak, Jesús no kinpiak itatuan. Motokaytiayaj José uan María. ¿Tikuelitaskia tikmatis keniuj mochiujkej itatuan?...

Ika ichikaualis, Jiova kichiuak maj Jesús nemiki nikan taltikpak. Kikuik inemilis Jesús ne iluikak uan kitalij iijtik María. Chiknaui metstika, Jesús moskaltij iijtik imomaj, ijkon kemej nochin konemej, uan satepan yolik. Ijkon María uan inamik, José, mochiujkej itatuan Jesús nikan taltikpak.

Keman Jesús kipiaya sayoj 12 xiujmej, kichiuak se taman tein ika kinextij ke kiteltasojtaya iTajtsin, Jiova. Nejin panok keman Jesús uan ichankauan yajkaj Jerusalén. Nejon xolal tel uejka moajsia. Ompa yajkaj kiueyichiuatoj Jiova. Keman mokepayajya ininchan, José uan María nion seko kiajsiaj Jesús. ¿Toni tiknemilia ke kichiujkej José uan María?...

Yejuan ijsiujka mokepkej Jerusalén uan kitemojtinenkej Jesús. Eyi tonal noyampa kitemojkej. ¡Yejuan semi motekipachouayaj! Sayoj ke satepan kiajsikej. ¿Tikmati kani yetoya?... Yetoya itech templo. ¿Keyej ompa yetoya? Porin ompa uelia okachi kiixmatia Jiova. Jesús kitasojtaya iTajtsin uan kinekia kimatis keniuj okachi kiyolpaktis. Keman Jesús moskaltij, kisentokak kitakamatik Jiova. Nochipa tatakamatik, maski kemansa ouij kikisak porin miakej kichiuiliayaj tein amo kuali. ¿Tiknemilia ke Jesús no kintakamatik José uan María?... Biblia kijtoua ke kemaj.

¿Tikitak ke Jesús nochipa tatakamatik?... Nejon techmachtia se taman tein motelneki: moneki tikintakamatis motatuan, maski kemansa ouij mitskisas. ¿Ijkon tikchiuas?...