Xionyoui kampa nesi tein kipia

Xionyoui kampa nesi tein kipia

 TAMACHTILIS 4

Yejua kiyolpaktij ipopaj uan Jiova

Yejua kiyolpaktij ipopaj uan Jiova

¿Toni motenkaujtok Jefté iuan Jiova?

Maski ouij kikisak, iichpoch Jefté kichiuak tein ipopaj motenkauak

¿Tikmati akoni siuapiltsin tein nesi itech taixkopin?... Biblia amo kijtoua itokay, sayoj ke techiluia ke ipopaj motokaytiaya Jefté. Jiova uan Jefté semi yolpakkej keman nejin siuapil kichiuak teisa. ¿Tikuelitaskia tikmatis toni kichiujkej Jefté uan isiuapil?

Jefté katka se takat yolkuali akin panok miak tonalmej iuan iichpoch uan ijkon uelik kimachtij akoni katka Jiova. No katka se takat chikauak uan se kuali taixyekankej. Yejua ika israelitas kiluijkej: “¿Tikneki titechixyekanas itech neteuilis?”.

Jefté kiluij Dios itech se netataujtil maj kipaleui maj tatani itech se neteuilis. Yejua motenkauak ke komo tatania, kimakaskia Jiova akin yekinika yaskia kinamikitiuj keman yejua mokepaskia. ¿Toni kijtosnekia  nejon? Ke akin kisaskia kinamikitiuj nemiskia uan tekitiskia nochi inemilis itech tabernáculo tein iaxka Dios. Itech tabernáculo yayaj kiueyichiuatij Jiova. ¿Tatanik Jefté itech neteuilis? Kemaj. Uan keman mokepak ichan, ¿tikmati akoni achto kinamikito?...

Kemaj, ¡yejua iichpoch! Uan Jefté amo kipiaya okseki ikoneuan, sayoj yejua, uan axkan monekia kititanis maj nemiti itech tabernáculo. Nejon semi kitayokoltij. Sayoj ke ¿tikelnamiki tein kiluijka Jiova? Yejua ika, ichpoch kiluij: “Nopopaj, tejua timotenkauak iuan Jiova, uan moneki tikchiuas kemej tikijtoj”.

Xijxiujtika, ichpochmej akin iniuan kuali mouikaya iichpoch Jefté yayaj kikalpanotij

Iichpoch Jefté no motayokoltij nejon tonal, porin keman nemiskia itech tabernáculo, amo ueliskia monamiktis nion kinpias konemej. Sayoj ke yejua kinekia kichiuas tein ipopaj motenkauak uan kiyolpaktis Jiova. Yejua kiitaya ke nejon okachi monekia ke monamiktis oso kinpias konemej. Yejua ika, kinkauak ichankauan uan nemik itech tabernáculo nochi inemilis.

¿Tiknemilia ke tein yejua kichiuak kiyolpaktij Jefté uan Jiova?... ¡Kemaj! Uan tejua, komo titatakamati uan tiktasojta Jiova ijkon kemej iichpoch Jefté, yejuatsin semi yolpakis. Uan motatuan no yolpakiskej.

MAJ TIKIXTAJTOLTIKAN ITECH BIBLIA: