Marcos 8:1-38
-
Xi tqʼoʼn Jesús kywa 4 mil xinaq (1-9)
-
Xi kyqanin te tuʼn tbʼant jun señal tuʼn (10-13)
-
Aju levadura ajbʼen kyuʼn fariseo ex Herodes (14-21)
-
Kubʼ tqʼanin jun xjal moẍ toj Betsaida (22-26)
-
Tzaj tqʼamaʼn Pedro qa a Jesús Cristo (27-30)
-
Tzaj tqʼamaʼn Jesús qa kkyimel (31-33)
-
Aju il tiʼj tuʼn tbʼant tuʼn jun t-xnaqʼtzbʼen Jesús (34-38)
8 Toj ambʼil aju, ok kychmon kyibʼ nim xjal juntl maj. Tuʼnju mintiʼ jun tiʼ tuʼn t-xi kywaʼn, tzaj ttxkoʼn Jesús qe tdiscípulo ex xi tqʼamaʼn kye:
2 «Ma tzaj qʼaqʼin nkʼuʼje kyiʼj xjal lu porke ya ma tzikʼ oxe qʼij ateʼ wukʼile ex mintiʼ jun tiʼ tuʼn t-xi kywaʼn.
3 Qa ma txi nqʼamaʼne kye tuʼn kymeltzʼaj kyja ex mintiʼ jun tiʼ ma txi kywaʼn,* jaku tzaj desmayo kyiʼj toj bʼe. Ex ateʼ junjun najchaq ma che tzaj».
4 Pero xi kytzaqʼweʼn tdiscípulo te: «Najchaq taʼ lugar lu, ¿jatumel jaku kanet pan quʼn tuʼn t-xi qqʼoʼn kywa nim xjal tuʼn kynoj?».
5 Atzunte Jesús xi tqanin kye: «¿Jteʼ pan qʼiʼn kyuʼne?». Xi kytzaqʼweʼn te: «Siete».
6 Entonces xi tqʼamaʼn Jesús kye xjal tuʼn kykubʼ qeʼ twitz txʼotxʼ. Yajxitl tzaj ttzyuʼn qe siete pan, xi tqʼoʼn chjonte te Dios, kubʼ tpiẍun ex xi tqʼoʼn kye tdiscípulo, atzun kye tdiscípulo xi kysipen kye xjal.
7 Ax ikx, qʼiʼntoq junjun tal pescad kyuʼn. Ex tej tok tqʼoʼn Jesús jun naʼj Dios,* ax ikx xi tqʼamaʼn kye tuʼn t-xi kysipen.
8 E waʼn kykyaqil xjal ex e noj. Ex tej tjaw kychmoʼn piẍ wabʼj kyaj sobrarin, noj siete chiʼl kyuʼn.
9 E ten junlo 4 mil xinaq.* Yajxitl xi tqʼamaʼn Jesús kye tuʼn kymeltzʼaj.
10 Entonces jax Jesús toj bark junx kyukʼil tdiscípulo ex okx toj txʼotxʼ te Dalmanuta.
11 E ultzun fariseo tukʼil Jesús ex e ok ten jyol qʼoj tukʼil. Ex tuʼn tok kyqʼoʼn toj prueba, xi kyqanin te tuʼn tbʼant jun señal tuʼn in tzaj toj kyaʼj.
12 Kubʼ tnaʼn Jesús nimxix bʼis toj tanmi ex tqʼama: «¿Tiquʼn kukx in che jyon xjal lu tiʼj jun señal? Ax tok kxel nqʼamaʼne kyeye, mlay tzʼok kykeʼyin xjal lu ni jun señal».
13 Ikʼtzun bʼet Jesús, jax juntl maj toj bark ex xiʼ toj juntl plaj mar.
14 Pero ikʼ tnaʼl kyuʼn tdiscípulo tuʼn t-xi kyiʼn pan, noq oʼkx jun pan qʼiʼntoq kyuʼn toj bark.
15 Entonces xi tqʼamaʼn Jesús kye: «Ten kykwente kyiʼje ex kyxqʼuqink kyibʼe tiʼj levadura in najbʼen kyuʼn fariseo ex tiʼj levadura in najbʼen tuʼn Herodes».
16 E oktzun ten tdiscípulo Jesús yolil kyxolx porke mintiʼ pan xi kyiʼn.
17 Tej tok tkeʼyin Jesús aju in bʼaj xi tqʼamaʼn kye: «¿Tiquʼn in che yoline tiʼj pan mintiʼ ma tzaj kyiʼne? ¿Naʼmxpe tel kynikʼe tiʼjju in xi nqʼamaʼne kyeye? ¿Mintiʼpe in nikʼx toj kywiʼye ex kukx jupuʼn kynabʼle?
18 ‹Maske at kywitze mintiʼ in che keʼyine ex maske at kyẍkine mintiʼ in che bʼine›. ¿Mintiʼpe naʼn kyuʼne
19 tej tkubʼ npiẍune jweʼ pan tuʼn kywaʼn 5 mil xinaq? ¿Jteʼ chiʼl noj kyuʼne tuʼn wabʼj kyaj sobrarin?». Xi kytzaqʼweʼn tdiscípulo te: «Doce».
20 «Yajtzun tej tkubʼ npiẍune siete pan tuʼn kywaʼn 4 mil xinaq, ¿jteʼ chiʼl noj kyuʼne tuʼn wabʼj kyaj sobrarin?». Xi kytzaqʼweʼn tdiscípulo te: «Siete».
21 Entonces xi tqʼamaʼn Jesús kye: «¿Tzeʼn tten mintiʼ in nel kynikʼe tiʼj?».
22 Tej kypon toj tnam Betsaida, pon qʼiʼn jun xjal moẍ tukʼil Jesús ex kubʼsan twitz tuʼn tkubʼ tqʼanin.
23 Entonces tzaj ttzyuʼn Jesús tqʼabʼ xjal moẍ ex xi tiʼn tiʼjxi aldea. Ex tej tok ttzubʼin tiʼj tbʼaqʼ twitz xjal, kubʼ tqʼoʼn tqʼabʼ tibʼaj ex xi tqanin te: «¿Tiʼ in nok tkeʼyina?».
24 Jaw tiʼn xjal twiʼ ex tqʼama: «In che ok nkeʼyine xjal in che bʼet, pero ik che keʼyin ik tzeʼn qe tzeʼ».
25 Entonces kubʼ tqʼoʼn Jesús tqʼabʼ juntl maj tibʼaj tbʼaqʼ twitz xinaq ex bʼant tkeʼyin. E bʼant twitz ex klar til tkyaqil.
26 Tej tbʼaj jlu, xi tqʼamaʼn Jesús te xinaq tuʼn tmeltzʼaj tja ex xi tqʼamaʼn te: «Miʼn tzʼokxa toj aldea».
27 Yajxitl xiʼ Jesús kyukʼil tdiscípulo kyoj aldea te Cesarea te Filipo ex xi tqanin jlu kye tej in che bʼet: «¿Tiʼ kyxim xjal wiʼje? ¿Alkye qine?».
28 Xi kytzaqʼweʼn tdiscípulo te: «In kubʼ kyximen qa aya Juan el Bautista, atzun junjuntl in kyqʼamaʼn qa aya Elías. Ex junjuntl in kubʼ kyximen qa aya jun kyxol qe profeta».
29 Xitzun tqanin Jesús kye: «Yajtzun kyeye, ¿alkye qine toj kywitze?». Xi ttzaqʼweʼn Pedro te: «Aya Cristo».
30 Entonces xi tqʼamaʼn Jesús kye tuʼn miʼn t-xi kyqʼamaʼn kye txqantl alkye te.
31 Ex xi tzyet tuʼn t-xi tqʼoʼn Jesús xnaqʼtzbʼil kye ex xi tqʼamaʼn kye qa il tiʼj tuʼn tikʼ Tkʼwal Xinaq toj nim sufrimiento ex tuʼn tel ikʼun kyuʼn ansyan, kyuʼn pal nim kyoklen ex qe escriba. Ax ikx qa il tiʼj tuʼn tkyim ex tuʼn tjaw anqʼin* toj toxin qʼij.
32 Klarxix xi tqʼamaʼn tkyaqil jlu kye. Pero xi tiʼn Pedro Jesús part ex xi tqʼamaʼn te tuʼn miʼn tyolin ikju.
33 Atzunte Jesús aj tqʼoʼn ttzel tiʼj, xi tkeʼyin qe tdiscípulo ex xi tqʼamaʼn te Pedro: «¡Paʼmil tibʼa wiʼje* Satanás! Porke nya ik t-xima ik tzeʼn te Dios, sino ik tzeʼn kye xjal».
34 E tzajtzun ttxkoʼn Jesús qe xjal junx kyukʼil tdiscípulo ex xi tqʼamaʼn kye: «Qa taj jun xjal tuʼn tok lepeʼ wiʼje, xkʼayinku tibʼ teju tex tajbʼil, qʼinx ttzeʼ te kʼixbʼisabʼil* ex kukx lepeʼk wiʼje.
35 Porke alkye xjal taj tuʼn tklet tchwinqlal, ok kkyimel. Ex alkye jun xjal ma kyim noq tuʼnju nxnaqʼtzbʼene ex noq tuʼn tbʼanel noticia, ok ktel tchwinqlal juntl maj.
36 Porke, ¿tiʼ tajbʼen te jun xjal qa ma kambʼet tkyaqil twitz txʼotxʼ tuʼn pero in naj tchwinqlal?
37 ¿Moqa tiʼ jaku txi tqʼoʼn jun xjal tuʼn tklet tchwinqlal?
38 Alkye ma tzaj tchʼixwi wiʼje ex kyiʼj nyole kywitz xjal nya bʼaʼn in che anqʼin toj ambʼil jaʼlo ex o tzʼel kypan kyibʼ tiʼj Dios,* ax ikx tzul tchʼixwi Tkʼwal Xinaq tiʼj aj tul tukʼil toklen* Tman junx kyukʼil qe anjel xjan».
