Marcos 11:1-33
11 Tej kypon t-xe witz Olivos jatumel taʼ Betfagué ex Betania ex tej chʼixtoq kypon toj Jerusalén, xi tsamaʼn Jesús kabʼe tdiscípulo
2 ex xi tqʼamaʼn jlu kye: «Kyxiʼye toj aldea qʼanchaʼl chix. Aj kypone, kʼokel kyqʼoʼne kywitze tiʼj jun tal bur naʼmx tjax jun xjal tibʼaj. Kytzaqpiʼmele ex kyiʼntze wukʼile.
3 Qa ma tzaj tqanin jun xjal kyeye tiquʼn in nel kytzaqpiʼne tal bur, kyqʼamanxe jlu te: ‹At tajbʼen te Qajaw, pero jurat tzul qʼolte juntl maj›».
4 E xiʼtzun tdiscípulo ex kanet tal bur kyuʼn kʼaloʼn ttzi tpwertil jun ja tok nqayin ttzi bʼe ex el kytzaqpiʼn.
5 Pero junjun xjal ateʼ atz, xi kyqanin kye: «¿Tiʼ in bʼaj kyeye? ¿Tiquʼn in nel kytzaqpiʼne tal bur?».
6 Atzun kye tdiscípulo xi kyqʼamaʼn aju xi tqʼamaʼn Jesús kye ex xi kyqʼoʼn xjal permis kye tuʼn t-xi kyiʼn tal bur.
7 Ultzun kyiʼn tal bur tukʼil Jesús, jax kyqʼoʼn kyxbʼalun tibʼaj ex yajxitl jax qeʼ Jesús tibʼaj.
8 Nim qe xjal kubʼ kylikʼun kyxbʼalun toj bʼe, atzun junjuntl kubʼ kyqʼoʼn t-xaq tzeʼ el kytoqin ttzi bʼe.
9 Kykyaqil qeju e kubʼ nej twitz ex qeju e ok lepeʼ tiʼj in kyqʼamaʼntoq tukʼil tqʼajqʼajel kywiʼ: «¡In qo kubʼsane twitza, kloma! ¡Kʼiwlaʼn aju in tzaj samaʼn toj tbʼi Jehová!*
10 ¡O kubʼ kʼiwlaʼn Gobierno tzul, aju Tgobierno qman David! ¡In qo kubʼsane twitza, kloma, aya Dios at toj kyaʼj!».
11 Tej tokx Jesús toj Jerusalén, xiʼ toj templo ex ok tkeʼyin tzeʼn taʼ tkyaqil. Pero tuʼnju ya otoq txiʼ or, xiʼ toj Betania kyukʼil qeju Doce.
12 Tej kyetz toj Betania toj juntl qʼij, tzaj weʼyaj tiʼj Jesús.
13 Ex ok tkeʼyin jun tqan higo najchaq taʼ ex attoq t-xaq. Xiʼ jyolte qa at twitz, pero tej tpon laqʼeʼ tiʼj mintiʼ kanet twitz tuʼn, sino oʼkx t-xaq. Porke naʼmxtoq tpon ambʼil tuʼn tel twitz higo.
14 Tuʼntzunju xi tqʼamaʼn Jesús te tqan higo: «Mlay txi kyloʼn xjal twitza juntl maj». Ex ok kybʼiʼn tdiscípulo tej tqʼama jlu.
15 Tej tpon Jesús toj Jerusalén, okx toj templo ex etz tlajoʼn kykyaqil xjal in che kʼayin ex qeju in che laqʼon. Jaw tpichʼkuʼn kymes xjal in che cambiarin pwaq ex kyqʼuqbʼil qeju in che kʼayin paloma.
16 Ex mintiʼ xi tqʼoʼn ambʼil te jun xjal tuʼn tikʼx toj templo qa qʼiʼn jun tiʼ tuʼn.
17 Yajxitl xi tqʼoʼn xnaqʼtzbʼil kye xjal ex xi tqʼamaʼn jlu kye: «¿Nyapetzun tzʼibʼin toj tyol Dios qa ‹Kʼokel qʼoʼn tbʼi njaye te ja te naʼj Dios kye kykyaqil nasyon›? Atzun kyeye ma tzʼok kyqʼoʼne te kyjul eleqʼ».
18 Ok kybʼiʼn pal nim kyoklen ex qe escriba aju bʼaj ex xi kyjyoʼn tumel tzeʼn tuʼn tkubʼ kybʼyoʼn. Otoq che tzaj xobʼ porke e jaw labʼin xjal tiʼj xnaqʼtzbʼil xi tqʼoʼn Jesús.
19 Tej naʼmxtoq tkux bʼaj qʼij, etz Jesús kyukʼil tdiscípulo toj tnam.
20 Te prim toj juntl qʼij, e ikʼ ttxlaj tqan higo ex ok kykeʼyin qa otoq kubʼ tzqij junx tukʼil tlokʼ.
21 Tzaj tnaʼn Pedro aju otoq bʼaj ex xi tqʼamaʼn te Jesús: «¡Xnaqʼtzal,* keʼyinxa! Ma kubʼ tzqij tqan higo kubʼ tmaldecirina ew».
22 Tej tok tbʼiʼn Jesús jlu, xi tqʼamaʼn kye: «Qeʼk kykʼuʼje tiʼj Dios.
23 Ax tok kxel nqʼamaʼne kyeye, qa ma txi tqʼamaʼn jun xjal te witz lu, ‹Weʼktza ex xoʼnx tibʼa toj mar› ex mintiʼ in dudarin toj tanmi, kbʼajel aju in kubʼ t-ximen qa in nok qeʼ tkʼuʼj tiʼj.
24 Tuʼntzunju kxel nqʼamaʼne kyeye, tkyaqilju in xi kyqanine toj kynaʼj Diose qeʼk kykʼuʼje tiʼj ik tzeʼn ya otoq tzaj qʼoʼn kyeye ex atzun jlu kbʼajel.
25 Ex aj kykubʼ weʼye naʼl Dios, qa at jun xjal nya bʼaʼn kytene tukʼil, kynajsame til tuʼntzun tkubʼ najsaʼn kyile tuʼn Kymane at toj kyaʼj».
26 * ——
27 Entonces e pon juntl maj toj Jerusalén. Tej tzmatoq in bʼet Jesús toj templo, e pon pal nim kyoklen tukʼil, qe escriba ex qe ansyan,
28 ex xi kyqanin te: «¿Tiʼ toklena at tuʼn tbʼant tkyaqil jlu tuʼna? ¿Ex alkye ma tzaj qʼonte toklena tuʼn t-xi tbʼinchaʼna?».
29 Xi tqʼamaʼn Jesús kye: «Kxel nqanine jun xjel kyeye. Qa ma tzaj kytzaqʼweʼne, kxel nqʼamaʼne kyeye alkye ma tzaj qʼonte woklene tuʼn tbʼant tkyaqil jlu wuʼne.
30 ¿Alkye xi qʼonte toklen Juan tuʼn tbautisarin? ¿A Dios at toj kyaʼj moqa aʼye xjal? Kytzaqʼwentze».
31 E oktzun ten yolil kyxolx tiʼj jlu ex kyqʼama: «Qa ma txi qtzaqʼweʼn te qa a Dios tzaj qʼonte toklen Juan, tzul tqanin qe: ‹Qa ikju, ¿tiquʼn mintiʼ ma txi kynimane tyol?›.
32 Pero, ¿alkye jaku txi qʼamante qa aʼye xjal xi qʼonte toklen?». Otoq che tzaj xobʼ kywitz xjal porke ok qeʼ kykʼuʼj tiʼj qa xi qʼoʼn toklen Juan te profeta.
33 Tuʼntzunju xi kyqʼamaʼn te Jesús: «Mintiʼ ojtzqiʼn quʼne». Atzunte Jesús xi tqʼamaʼn kye: «Ax ikx weye mlay txi nqʼamaʼne kyeye alkye tzaj qʼonte woklene tuʼn tbʼant tkyaqil jlu wuʼne».
