Marcos 2:1-28
2 Tej tikʼ junjun qʼij, okx Jesús juntl maj toj tnam Capernaúm ex ok kybʼiʼn xjal qa otoq pon toj jun ja.
2 Tuʼntzunju, ok kychmon kyibʼ nim xjal toj ja ex ya mintiʼ lugar nix ttzi pwert. Ex ok ten Jesús yolil tiʼj tyol Dios kyukʼil.
3 Entonces pon qʼiʼn jun xjal tukʼil Jesús aju mintiʼ in bʼant tyukch ex iqin kyuʼn kyaje xinaq.*
4 Pero mintiʼ bʼant tuʼn kyokx jatumel taʼ Jesús porke ateʼtoq nim xjal. Tuʼntzunju, e jax twi ja, jaw kyiʼn techo jatumel waʼl Jesús tojxi ex kux kyqʼoʼn camilla jatumel tkubʼ xjal yabʼ.
5 Tej tok tkeʼyin Jesús qa ok qeʼ kykʼuʼj tiʼj Dios, xi tqʼamaʼn jlu te xjal: «Nkʼwal, ma che kubʼ najsaʼn tila».
6 Atzun kye escriba qʼuqli qetoq atz kubʼ kyximen toj kyanmi:
7 «¿Tiquʼn in yolin xinaq lu ikju? In xmayin tiʼj Dios. ¿Nyapetzun oʼkx Dios jaku kubʼ tnajsaʼn qil?».
8 Jurat el tnikʼ Jesús tiʼjju in che ximen tiʼj,* tuʼntzunju xi tqʼamaʼn kye: «¿Tiquʼn in kubʼ kyximane jlu toj kyanmiye?
9 ¿Alkye mas fácil tuʼn tbʼant? ¿Ape tuʼn t-xi nmaʼne te xjal yabʼ ‹ma che kubʼ najsaʼn tila› moqa aju tuʼn t-xi nqʼamaʼne te ‹weʼktza, qʼinxa tcamilla ex bʼeta›?
10 Pero tuʼn tok kykeʼyine qa at toklen Tkʼwal Xinaq tuʼn tkubʼ tnajsaʼn kyil xjal tzalu twitz txʼotxʼ...». Entonces xi tqʼamaʼn Jesús jlu te xjal yabʼ:
11 «Ok kxel nqʼamaʼne teya tuʼn tjaw weʼya, qʼinxa tcamilla ex txiʼya tjaya».
12 Tej tok tbʼiʼn xjal lu, jurat jaw weʼ kywitz txqantl, jaw tiʼn tcamilla ex ikʼ bʼet. E jaw labʼin kykyaqil xjal tiʼj jlu, jaw kynimsaʼn Dios ex kyqʼama: «Naʼmxtoq tok qqʼoʼne qwitze tiʼj jlu».
13 Xiʼ Jesús juntl maj ttzi mar ex e pon kykyaqil xjal tukʼil, ex xi tqʼoʼn xnaqʼtzbʼil kye.
14 Tej tikʼ bʼet, ok tqʼoʼn twitz tiʼj Leví* aju tkʼwal Alfeo. Qʼuqlitoq toj lugar jatumel in che cobrarin xjal impuesto ex xi tqʼamaʼn jlu te: «Lepeka wiʼje». Atzunte Leví, jurat jaw weʼ ex ok lepeʼ tiʼj.
15 Yajxitl, waʼn* Jesús junx kyukʼil tdiscípulo toj tja Leví. Ax ikx e waʼn nim xjal in che cobrarin impuesto junx kyukʼil ex qeju in che bʼinchan il. Ex e ok lepeʼ tiʼj.
16 Pero tej tok kykeʼyin qe escriba e ok te fariseo qa waʼn Jesús junx kyukʼil xjal lu, xi kyqanin kye tdiscípulo: «¿Tiquʼn in waʼn xnaqʼtzal kyeye junx kyukʼil qeju in che cobrarin impuesto ex kyukʼil xjal in che bʼinchan il?».
17 Tej tok tbʼiʼn Jesús jlu, xi tqʼamaʼn kye: «Qe xjal mintiʼ yabʼil kyiʼj nya il tiʼj tuʼn kyxiʼ tukʼil jun doctor, sino oʼkx qeju at jun yabʼil kyiʼj. Mintiʼ ma chin ule txkol kye xjal tzʼaqli, sino aqeju in che bʼinchan il».
18 Ten kykostumbr tdiscípulo Juan ex qe fariseo tuʼn ky-ayunarin. Tuʼntzunju, e pon junjun tukʼil Jesús ex xi kyqanin te: «¿Tiquʼn nya naqʼli qe teya tdiscípulo tuʼn ky-ayunarin ik tzeʼn qe tdiscípulo Juan ex qe kydiscípulo fariseo?».
19 Xi ttzaqʼweʼn Jesús kye: «Nya il tiʼj tuʼn ky-ayunarin tamiw novio qa kukx at kyukʼil. Ex nya toj tumel qa ma che ayunarin qa kukx at kyukʼil.
20 Pero kpol qʼij kʼeletz qʼiʼn novio kyxol ex kxel tzyet tuʼn ky-ayunarin toj ambʼil lu.
21 Mintiʼ in nok tslepin* jun xjal jun piẍ tela akʼaj tiʼj jun ttxʼaqin xbʼalun. Qa ma bʼant jlu tuʼn, mas kbʼajel laqj ttxʼaqin xbʼalun aj ttzaj jukʼuʼn tuʼn tela akʼaj porke mas kyuw.
22 Ax ikx mintiʼ in kux tqʼoʼn jun xjal akʼaj vin toj jun ttxʼaqin bolsa te cuero. Qa ma bʼant jlu tuʼn, jaku tzʼel laqj cuero tuʼn vin ex jaku tzʼel qojl, atzunte cuero ya mlay tzʼajbʼen. Tuʼntzunju, in kux qʼet vin akʼaj toj akʼaj bolsa te cuero».
23 Entonces ikʼx Jesús t-xol awal toj qʼij sábado. Ex el kyiʼn tdiscípulo junjun twitz awal tej in che bʼet.
24 Tuʼntzunju xi kyqʼamaʼn fariseo te: «¡Keʼyinxa! ¿Tiquʼn in xi kybʼinchaʼn teya tdiscípulo aju mintiʼ in tzaj tqʼoʼn ley ambʼil tuʼn tbʼant toj qʼij sábado?».
25 Atzunte Jesús xi ttzaqʼweʼn kye: «¿Naʼmxpe tjaw kyleerine aju bʼant tuʼn David tej tkubʼaj twa ex tej ttzaj weʼyaj tiʼj ex kyiʼj qeju xjal ateʼ tukʼil?
26 Toj relato in yolin tiʼj Abiatar aju nejenel kye pal, in tzaj tqʼamaʼn qa okx David toj tja Dios ex qa xi twaʼn pan xi qʼoʼn te oyaj twitz Dios ex xi tqʼoʼn kye xinaq ateʼ tukʼil. Mintiʼ toklen jun xjal tuʼn t-xi twaʼn pan lu, sino oʼkx qe pal».
27 Ex xi tqʼamaʼntl Jesús kye: «Kubʼ tbʼinchaʼn Dios qʼij sábado tuʼn tonin kyiʼj xjal, pero mintiʼ e kubʼ bʼinchaʼn xjal tuʼn t-xi kynimen qʼij sábado.
28 Tuʼntzunju, ax ikx in nok Tkʼwal Xinaq te Tajaw qʼij sábado».
