DILONGESHA DIA 26
Bua tshinyi kudi makenga ne malu mabi?
“Bua tshinyi?” Elu ndukonko lutu bantu bela dîba dia bualu bubi bua kanyinganyinga. Diakalenga, Bible udi utuandamunalu bimpe bitambe!
1. Satana wakabueja makenga mu bantu mushindu kayi?
Satana Diabolo wakatombokela Nzambi. Satana uvua ukeba ba kukokeshaye, ke kusakaye bantu ba kumpala, Adama ne Eva, ku ditombokela Nzambi. Bua kukumbajaye dijinga diende adi, wakashima Eva. (Genese 3:1-5) Wakafikisha Eva ku diela meji ne: Yehowa uvua umupangisha tshintu kampanda tshimpe. Satana uvua musue kuleja ne: bu bantu mua kutombokela Nzambi, bavua mua kupeta disanka dipite dikavuabu nadi. Wakapatula dishima dia kumpala pavuaye muambile Eva ne: kavua mua kufua to. Ke bualu kayi, Bible udi ubikila Satana ne: “Mmuena dishima ne tatu wa dishima.”—Yone 8:44.
2. Adama ne Eva bakasungula tshinyi?
Yehowa uvua mupeshe Adama ne Eva bintu ne tshianza tshilekelela. Uvua mubanyishile bua kudia mitshi yonso ivua mu budimi bua Edene, pa kumbusha anu mutshi umuepele. (Genese 2:15-17) Nansha nanku, bobu bakasungula anu bua kudia tshimuma tshia ku mutshi au. Eva “wakangata tshimuma tshiawu, yeye kutshidia.” Pashishe, Adama pende ‘kubanga kutshidia.’ (Genese 3:6) Bakabenga kutumikila Nzambi. Bu muvuabu bantu bapuangane, kuenza malu makane kakuvua bualu bua lutatu kudibu to. Kadi pakabengabu kutumikila Nzambi ku bukole, bavua benze mpekatu ne batombokele bukokeshi buende. Tshienzedi atshi tshiakabalelela ntatu mibi mitambe.—Genese 3:16-19.
3. Buntomboji bua Adama ne Eva mbutukebele tshinyi?
Pavua Adama ne Eva benze mpekatu, bakalua bapange bupuangane ne bakasambulujila ndelanganyi yabu yonso dipanga bupuangane. Bible udi wamba bua Adama ne: ‘Mpekatu mmubuele mu ba pa buloba kupitshila kudi muntu umue, ne lufu lubuele bua mpekatu, ne mushindu eu lufu kutampakana kudi bantu bonso.’—Lomo 5:12.
Tudi tukenga bua malu a bungi. Kudi misangu itudi tukenga bua mapangadika mabi atudi tuangata anyi adi bantu bakuabu bangata. Misangu mikuabu tutu tukenga anu bualu tudi basanganyibue muaba mubi mu tshikondo tshibi.—Balayi Muambi 9:11.
BUELA MU BUONDOKE
Mona tshidi tshileja ne: Nzambi ki ngudi ukebesha makenga ne malu mabi lelu to, ne mudiye umvua patudi tukenga.
4. Mukebeshi wa makenga etu
Bantu ba bungi badi bela meji ne: Nzambi ke udi ukokesha buloba. Kadi mmuomu anyi? Tangilayi FILME.
Balayi Yakobo 1:13 ne 1 Yone 5:19, pashishe nuandamune lukonko elu:
-
Nzambi ke utu ukebesha makenga ne malu mabi anyi?
5. Mmalu kayi akadi menzeke katshia Satana watuadija kukokesha?
Balayi Genese 3:1-6, pashishe nuandamune nkonko eyi:
-
Mbualu kayi bua dishima buvua Satana muambe?—Tangilayi mvese 4 ne 5.
-
Mmushindu kayi uvua mêyi a Satana asua kuleja ne: Yehowa uvua upangisha bantu tshintu kampanda tshimpe?
-
Mu meji a Satana yeye, bua bantu kuikalabu ne disanka mbimpe Yehowa ikale Mukokeshi wabu anyi?
Balayi Muambi 8:9, pashishe nuandamune lukonko elu:
-
Mmalu kayi adi menzeke mu tshikondo tshidi Yehowa kayi ukokesha buloba etshi?
-
Adama ne Eva mbantu bavua bapuangane bavua basombele mu Mparadizu. Kadi bakateleja Satana, kutombokelabu Yehowa
-
Panyima pa buntomboji abu, buloba buakuwula tente ne mpekatu, ne makenga, ne lufu
-
Yehowa neajikije mpekatu, makenga, ne lufu. Bantu nebalue kabidi bapuangane, kusombabu kabidi mu Mparadizu
6. Yehowa udi utusamishila meji
Nzambi mmulengulule dikenga dietu anyi? Mona tshivua mukalenge Davidi ne mupostolo Paulo bafunde. Balayi Misambu 31:7 ne 1 Petelo 5:7, pashishe nuandamune lukonko elu:
-
Ntshinyi tshiudi umvuaku paudi ujingulula ne: Yehowa udi umona ntatu yetu ne usamisha meji bua bualu buayi?
7. Nzambi neajikije makenga etu onso
Balayi Yeshaya 65:17 ne Buakabuluibua 21:3, 4, pashishe nuandamune lukonko elu:
-
Bua tshinyi kumanya ne: Yehowa neajikije makenga adi malu mabi onso matukebele kudi kutukankamija?
Udi mumanye anyi?
Pavua Satana muambe bualu bua dishima bua kumpala, uvua mushiminyine Yehowa malu. Mbuena kuamba ne: uvua munyangile Yehowa lumu, mumuvuije bu Mukokeshi mubi udi kayi ne dinanga. Pajimija Yehowa makenga etu mu katupi kîpi emu, neadibingishe ku bualu bua dishima abu, mmumue ne: nealeje mudi bukokeshi buende yeye buimpe bupite makuabu onso. Dibingishibua dia dîna dia Yehowa mbualu bua mushinga wa bungi kupita malu makuabu onso.—Matayi 6:9, 10.
BAMUE BATU BAMBA NE: “Makenga mbulongolodi bua Nzambi.”
-
Wewe udi wamba tshinyi?
TSHIA KUKUATA
Satana Diabolo ne baledi betu ba kumpala ke bantu menemene badi batukebele ntatu. Yehowa udi usamisha meji bikole bua ntatu yetu, ukadi mene pa kuyijikija.
Diambulula
-
Mbualu kayi bua dishima buvua Satana Diabolo muambile Eva?
-
Ntshinyi tshidi buntomboji bua Adama ne Eva butuenzele tuetu bonso?
-
Mmunyi mutudi bafike ku dimanya ne: Yehowa udi usamisha meji bua ntatu yetu?
BIA KUTANGILA KABIDI
Mona mudi Bible umvuija mpekatu.
Bala malu makuabu a tshilumbu tshivua Satana Diabolo mujule mu budimi bua Edene.
“Bua tshinyi Nzambi mmulekele makenga?” (Tshibumba tshia Nsentedi, 1/1/2014)
Konkonona mandamuna a lukonko lukole adi atukolesha.
Mona tshiakalonga muntu mukuabu bua makenga avuaye nawu.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
