DILONGESHA DIA 19
Bantemu ba Yehowa mbena Kristo balelela anyi?
Bantemu ba Yehowa mbatuishibue ne: mbena Kristo balelela. Bua tshinyi? Mona muaba utudi tuangatshila malongesha etu, dîna didi ditusunguluja, ne mutudi banangangane.
1. Bantemu ba Yehowa batu bangatshila malongesha abu penyi?
Yezu wakamba ne: “Dîyi [dia Nzambi] mbulelela.” (Yone 17:17) Anu bu Yezu, Bantemu ba Yehowa batu bangatshila malongesha abu anu mu Dîyi dia Nzambi. Tuangate tshilejilu tshia malu etu a matuku etu aa. Ku ndekelu kua bidimu bia 1800, kasumbu ka balongi ba Bible kakatuadija kulonga malu a mu Bible bimpe menemene. Bavua bangatshila malongesha abu mu Bible, nansha pavuawu abengangana ne a bitendelelu bikuabu. Pashishe, kutuadijabu kuyisha bantu malu malelela a mu Bible au. a
2. Bua tshinyi tudi tudibikila ne: Bantemu ba Yehowa?
Yehowa utu ubikila batendeledi bende ne: Bantemu bende bualu batu bamanyisha malu ende malelela. (Ebelu 11:4–12:1) Tshilejilu, Nzambi wakambila bantu bende ku kale ne: “Nudi bantemu banyi.” (Balayi Yeshaya 43:10.) Badi babikila Yezu ne: “Ntemu wa lulamatu.” (Buakabuluibua 1:5) Nunku, tuakangata dîna dia Bantemu ba Yehowa mu 1931. Tudi ne disanka dia kubikidibua mu dîna edi.
3. Mmunyi mudi Bantemu ba Yehowa banangangane anu bu Yezu?
Yezu uvua munange bayidi bende bikole ubangata bu ba mu dîku diabu. (Balayi Mâko 3:35.) Bantemu ba Yehowa badi pabu dîku dia buloba bujima didi mu buobumue. Ke bualu kayi tutu tubikilangana ne: muanetu wa balume anyi muanetu wa bakaji. (Filemona 1, 2) Tutu kabidi tutumikila dîyi dia ne: “Nunange tshisumbu tshijima tshia bana betu.” (1 Petelo 2:17) Bantemu ba Yehowa batu baleja dinanga edi mu mishindu ya bungi. Tshilejilu, tutu tuambuluisha bena Kristo netu ba pa buloba bujima badi mu ntatu.
BUELA MU BUONDOKE
Longa malu makuabu a Bantemu ba Yehowa, umone bijadiki bikuabu bidi bileja ne: tudi bena Kristo balelela.
Bena Kristo balelela batu bangatshila malongesha abu mu Bible, ne baamanyisha bakuabu
4. Tutu tuangatshila malongesha etu mu Bible
Yehowa uvua mumanyishe ne: bulelela bua mu Bible nebusokolodibue. Balayi Danyele 12:4 ne dimanyisha, pashishe nuandamune lukonko elu:
-
Ntshinyi tshivua ne bua ‘kuvulangana’ mu bantu ba Nzambi pavuabu batungunuka ne kulonga Bible?
Mona muvua tshisumbu tshia balongi ba Bible balonge Dîyi dia Nzambi. Charles Russell uvua umue wa kudibu. Tangilayi FILME, pashishe nuandamune lukonko ludi lulonda.
-
Mu filme eu, mmunyi muvua Charles Russell ne balongi nende ba Bible balonge Bible?
Udi mumanye anyi?
Kudi misangu itudi bakajilule malongesha etu makuabu. Bua tshinyi? Anu mutu dîba didi dipatuka dileja bulenga bua bintu ku kakese ku kakese, ke mudi Nzambi utuambuluisha bua tumvue Dîyi diende. (Balayi Nsumuinu 4:18.) Nunku, nansha mudi Bible kayi ushintuluka, tudi tuakaja malongesha etu patudi tumvua tshidiye wamba bimpe.
5. Tudi tuenda bu mudi dîna dietu
Bua tshinyi tudi bangate dîna dia Bantemu ba Yehowa? Tangilayi FILME, pashishe nuandamune lukonko ludi lulonda.
-
Bua tshinyi dîna dia Bantemu ba Yehowa nditukumbanyine?
Yehowa mmusungule bantu bua bikale Bantemu bende bua tshinyi? Mbua baleje bantu ne: yeye ke Nzambi mulelela, bualu mbamushiminyine malu a bungi. Mona abidi tshianana a kudiwu.
Kudi bitendelelu bidi bilongesha benamu ne: Nzambi mmusue bua bamutendelele ne mpingu. Balayi Lewitiki 26:1, pashishe nuandamune nkonko eyi:
-
Mbulelela kayi budi mu mvese eu? Mmunyi mudi Yehowa umona dimutendelela ne mpingu?
Bamue balombodi ba bitendelelu badi balongesha ne: Yezu ke Nzambi. Balayi Yone 20:17, pashishe nuandamune nkonko eyi:
-
Mbulelela kayi budi mu mvese eu? Nzambi ne Yezu mmuntu umue anyi?
-
Mmunyi muudi umvua bua muudi mumanye ne: Yehowa mmutume Bantemu bende bua kuyisha bantu bulelela budi bumutangila yeye ne Muanende?
6. Tudi banangangane
Bible udi ufuanyikija bena Kristo ne bitupa bishilangane bia mubidi wa muntu. Balayi 1 Kolinto 12:25, 26, pashishe nuandamune nkonko eyi:
-
Ntshinyi tshidi bena Kristo balelela ne bua kuenza padi bena Kristo nabu bakenga?
-
Ntshinyi tshiukadi mumone tshidi tshileja ne: Bantemu ba Yehowa mbanangangane?
Patu Bantemu ba Yehowa ba muaba kampanda batata, Bantemu nabu ba pa buloba bujima batu babambuluisha diakamue. Tshilejilu, tangilayi FILME. Pashishe nuandamune lukonko ludi lulonda.
-
Bua tshinyi mudimu wa Bantemu ba Yehowa wa diambuluishangana mu bipupu udi ujadika ne: mbanangangane?
Bena Kristo balelela mbanange bantu badi mu ntatu
BAMUE BATU BAMBA NE: “Bantemu ba Yehowa ntshitendelelu tshipiatshipia.”
-
Nkatshia ku dîba kayi didi Yehowa ubikila batendeledi bende ne: Bantemu?
TSHIA KUKUATA
Bantemu ba Yehowa mbena Kristo balelela. Tudi dîku dia buloba bujima dia batendeledi badi bangatshila malongesha abu mu Bible ne balongesha bantu malu malelela a Yehowa.
Diambulula
-
Bua tshinyi tudi bangate dîna dia Bantemu ba Yehowa?
-
Tutu tuenzelangana malu mushindu kayi?
-
Udi wela meji ne: Bantemu ba Yehowa mbena Kristo balelela anyi?
BIA KUTANGILA KABIDI
Longa malu etu makuabu.
Bantemu ba Yehowa—Ditabuja mu tshienzedi, Tshitupa tshia 1: Dipatuka mu mîdima (1:00:53)
Mona tshilejilu tshia muvua Bantemu ba Yehowa bele malongesha a dishima patoke.
Keba mandamuna a nkonko iudi pamuapa udiela bua Bantemu ba Yehowa.
“Nkonko itu bantu batamba kuela bua Bantemu ba Yehowa” (dibeji dia mu jw.org)
Lukinu luakasaka Stephen bua kuenza malu mabi matambe. Mona tshiakamonaye kudi Bantemu ba Yehowa tshiakamusaka bua kushintuluka.
“Nsombelu wanyi uvua wenda anu unyanguka bibi menemene” (Tshibumba tshia Nsentedi 1/7/2015)
a Katshia ku 1879, tshibejibeji tshietu tshinene tshia Tshibumba tshia Nsentedi tshitu tshimanyisha anu bulelela bua mu Bible.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
