DILONGESHA 04
Nzambi nnganyi?
Katshia anu bantu batuadija kuikala ne muoyo, mbatendelele nzambi ya bungi, milume ne mikaji. Kadi Bible udi uleja ne: kudi anu Nzambi umuepele udi “munene kupita nzambi mikuabu yonso.” (2 Kulondolola 2:5) Ke Nzambi kayi au? Ntshinyi tshidi tshimuvuija munene kupita nzambi mikuabu yonso idi bantu batendelela? Mu dilongesha edi, neumone mudi Nzambi au udimanyisha kuudi.
1. Dîna dia Nzambi nnganyi? Ntshinyi tshidi tshileja ne: mmusue bua tudimanye?
Mu Bible, Nzambi udi udimanyisha kutudi ne: “Meme ndi Yehowa. Adi ndîna dianyi.” (Balayi Yeshaya 42:5, 8.) Mbimueneke ne: dîna dia mu tshiena Ebelu didibu bakudimune ne: “Yehowa” didi diumvuija “Yeye udi uvuija.” Yehowa mmusue bua tumanye dîna diende. (Ekesode 3:15) Ntshinyi tshidi tshileja ne: mmusue bua tumanye dîna adi? Mmufundishe dîna diende mu Bible misangu mipite pa 7 000! a Dîna dia Yehowa ndia “Nzambi mulelela muulu mu diulu ne panshi pa buloba.”—Dutelonome 4:39.
2. Ntshinyi tshidi Bible utuambila bua Yehowa?
Bible udi wamba ne: munkatshi mua nzambi yonso idi bantu batendelela, anu Yehowa ke Nzambi umuepele mulelela. Bua tshinyi? Kudi malu a bungi adi aleja bualu ebu. Bukokeshi bua Yehowa mbupite kutumbuka, ne anu Yeye nkayende ke udi “Mutambe Bunene pa mutu pa buloba bujima.” (Balayi Misambu 83:18.) Udi “Wa Bukole Buonso,” mmumue ne: udi ne bukole bua kuenza tshionso tshidiye musue kuenza. Yeye ke Mufuki wa bintu bionso bidi mu diulu ne bidi ne muoyo pa buloba. (Buakabuluibua 4:8, 11) Yehowa mmushilangane ne nzambi mikuabu yonso, bualu Yeye utu anuku kuonso eku ne neikale anuku bua kashidi ne tshiendelele.—Misambu 90:2.
BUELA MU BUONDOKE
Keba dishilangana didi pankatshi pa mianzu idi nayi Nzambi ne dîna diende dia pa buadi. Pashishe mona mudiye ukumanyisha dîna diende ne bua tshinyi udi ukumanyishadi.
3. Nzambi udi ne mianzu ya bungi, kadi udi anu ne dîna dimuepele
Bua kumanya dishilangana didi pankatshi pa muanzu udi nawu muntu ne dîna diende, tangilayi FILME, pashishe nuandamune lukonko elu:
-
Ndishilangana kayi didi pankatshi pa muanzu, bu mudi “Mukalenge,” ne dîna?
Bible udi uleja ne: bantu badi batendelela nzambi ya bungi ne bakalenge ba bungi. Balayi Misambu 136:1-3, pashishe nuandamune lukonko elu:
-
Nnganyi udi “Nzambi wa banzambi” ne “Mukalenge wa bakalenge”?
4. Yehowa mmusue umanye dîna diende ne wikale uditela
Ntshinyi tshidi tshileja ne: Yehowa mmusue bua umanye dîna diende? Tangilayi FILME, pashishe nuandamune nkonko eyi:
-
Buebe wewe, Yehowa mmusue bua dîna diende dimanyike anyi ki mmusue? Ntshinyi tshidi tshileja nanku?
Yehowa mmusue bua bikale bamutela mu dîna diende. Balayi Lomo 10:13, pashishe nuandamune nkonko eyi:
-
Bua tshinyi bidi ne mushinga bua kutela dîna dia Nzambi dia Yehowa?
-
Mmunyi muutu umvua patu muntu uvuluka dîna diebe ne ukubikiladi?
-
Yehowa udi mua kuikala umvua mushindu kayi paudi umutela mu dîna diende?
5. Yehowa mmusue wikale pabuipi nende
Soten (mamu wa mu ditunga dia Cambodge) wakamba ne: pakamanyaye dîna dia Nzambi wakumvua ‘disanka dia katshia.’ Tangilayi FILME, pashishe nuandamune lukonko elu:
-
Tudi bamone mu filme eu ne: kumanya dîna dia Nzambi kuvua kuambuluishe Soten mushindu kayi?
Pa tshibidilu kumpala kua wewe kudia bulunda ne muntu, utu wanji umanya dîna diende. Balayi Yakobo 4:8a, pashishe nuandamune nkonko eyi:
-
Yehowa udi ukulomba bua wenze tshinyi?
-
Mmunyi mudi kumanya dîna dia Nzambi ne kumutela mu dîna edi mua kukufikisha ku didiumvua pabuipi nende bikole?
BAMUE BATU BAMBA NE: “Nzambi yeye udi anu umue, nansha wewe mumubikile mu dîna kayi si udi anu yeye.”
-
Wewe udi mushindike ne: Yehowa ke dîna dia Nzambi anyi?
-
Mmunyi muudi mua kumvuija muntu ne: Nzambi mmusue tumutele mu dîna diende?
TSHIA KUKUATA
Yehowa ke dîna dia Nzambi umuepele mulelela. Mmusue tumanye dîna diende adi, tuikale tumubikiladi bua tusemene pabuipi nende.
Diambulula
-
Nku tshinyi kudi Yehowa mushilangane ne nzambi mikuabu yonso idi bantu batendelela?
-
Bua tshinyi mbimpe kutela dîna dia Nzambi?
-
Ntshinyi tshidi tshileja ne: Yehowa mmusue bua usemene pabuipi nende?
BIA KUTANGILA KABIDI
Malu 5 a kuelela meji adi atujadikila ne: Nzambi udiku.
Bua tshinyi mbia meji bua kuitaba ne: Nzambi utu anuku kuonso eku?
“Uvua mufuke Nzambi nnganyi?” (Tshibumba tshia Nsentedi 1/8/2014)
Nansha mutudi katuyi bamanye muvuabu bashindumuna dîna dia Nzambi ku kale, bua tshinyi mbimpe tuikale tuditela?
Mushindu utudi tubikila Nzambi udi ne bualu anyi? Mona tshitudi tuambila ne: Nzambi udi anu ne dîna dimuepele diende nkayende.
“Nzambi udi ne mêna bungi kayi?” (Tshiena-bualu tshia mu jw.org)
a Bua kumanya malu makuabu adi atangila diumvuija dia dîna dia Nzambi ne bua tshinyi mbumbushe dîna edi mu Bible mikuabu, bala Tshisakidila tshia A4 mu Bible—Nkudimuinu wa bulongolodi bupiabupia.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
