DILONGESHA DIA 28
Ikala ne dianyisha bua malu adi Yehowa ne Yezu bakuenzele
Ntshinyi tshiutu umvua padi mulunda webe ukupesha kado kimpe? Utu pamuapa umvua disanka dia bungi ne ujinga kumuleja dianyisha. Yehowa ne Yezu mbatupeshe kado kadi kapite tukuabu tuonso. Nkado kayi aku? Tshia kuenza ntshinyi bua kubaleja dianyisha?
1. Mmushindu kayi utudi mua kuleja Yehowa ne Yezu dianyisha bua malu adibu batuenzele?
Bible udi utulaya ne: “Muntu yonso udi uleja ditabuja [kudi Yezu]” udi mua kushala ne muoyo kashidi. (Yone 3:16) Kuleja ditabuja kudi kumvuija tshinyi? Kakuena kumvuija anu kuitaba Yezu patupu to, kudi kumvuija kabidi kulejila ditabuja dietu mu mapangadika atudi tuangata ne mu malu atudi tusungula bua kuenza. (Yakobo 2:17) Padi ditabuja dietu dimuenekela mu mêyi etu ne mu bienzedi, tudi tukolesha bulunda buetu ne Yezu ne Tatuende Yehowa.—Balayi Yone 14:21.
2. Ntshibilu kayi tshia pa buatshi tshidi tshituambuluisha bua kuleja Yehowa ne Yezu dianyisha bua malu adibu batuenzele?
Yezu wakaleja bayidi bende mushindu mukuabu wa bobu kuleja dianyisha bua mulambu wende butuku bua muladilu wa lufu luende. Wakenza nabu tshibilu tshia pa buatshi tshitu Bible ubikila ne: “Didia dia dilolo dia Mukalenge,” ditu dimanyike kabidi bu Tshivulukila tshia lufu lua Kristo. (1 Kolinto 11:20) Yezu wakatshibanjija bua bapostolo bende ne bonso bavua ne bua kulua bena Kristo pashishe bikale bavuluka ne: Kristo wakatufuila. Ke bualu kayi mmututumine dîyi bua tshibilu atshi ne: “Tungunukayi ne kuenza nunku bua kumvuluka.” (Luka 22:19) Paudi ubuela mu Tshivulukilu, udi uleja Yehowa ne Yezu dianyisha bua mudibu batunange bikole.
BUELA MU BUONDOKE
Longa mishindu mikuabu iudi mua kuleja Yehowa ne Yezu dianyisha bua mudibu batunange bikole. Teta kumvua kabidi mushinga udi nawu Tshivulukilu tshia lufu lua Kristo.
3. Tshia kuenza bua kuleja dianyisha
Fuanyikijabi ne: muntu mmukupandishe ku lufu lua mu mâyi. Mbipepele bua wewe kulengulula bualu abu anu nanku anyi? Peshi neukebaku tshia kuenza bua kumuleja dianyisha?
Tudi ne muoyo anu bua Yehowa. Balayi 1 Yone 4:8-10, pashishe nuandamune nkonko eyi:
-
Bua tshinyi mulambu wa Yezu nkado ka pa buaku?
-
Mmunyi muudi umvua bua tshidi Yehowa ne Yezu bakuenzele?
Mmunyi mutudi mua kuleja Yehowa ne Yezu dianyisha bua malu adibu batuenzele? Balayi 2 Kolinto 5:15 ne 1 Yone 4:11; 5:3. Panyima pa dibala mvese ne mvese yonso wa ku yidi muaba eu, nuikale nuandamuna lukonko elu:
-
Bilondeshile mvese eu, tshia kuenza ntshinyi bua kuleja dianyisha?
4. Idikija Yezu
Mushindu mukuabu wa kuleja dianyisha ngua kuidikija Yezu. Balayi 1 Petelo 2:21, pashishe nuandamune lukonko elu:
-
Mmalu kayi audi mua kuenza bua kulonda mu makasa a Yezu bimpe menemene?
Yezu uvua munange Dîyi dia Nzambi, uvua uyisha lumu luimpe, ne wambuluishangana
5. Ikala ubuela mu Tshivulukilu tshia lufu lua Kristo
Bua kumanya muvua Didia dia Mukalenge dienzeke musangu wa kumpala, balayi Luka 22:14, 19, 20. Pashishe nuandamune nkonko eyi:
-
Mmalu kayi avua menzeke mu Didia dia Mukalenge?
-
Diampa ne mvinyo bidi biumvuija tshinyi?—Tangilayi mvese wa 19 ne wa 20.
Meji a Yezu avua a ne: bayidi bende bikale benza Didia dia Mukalenge musangu umue ku tshidimu dituku dia mufikilu wa lufu luende. Nunku, Bantemu ba Yehowa batu badisangisha tshidimu tshionso bua kuvuluka lufu lua Kristo mu mushindu uvuaye muambe. Bua kumanya malu adi atangila tshibilu tshia mushinga atshi, tangilayi FILME. Pashishe nuandamune lukonko ludi lulonda.
-
Mmalu kayi atu enzeka mu Tshivulukilu?
Diampa ne mvinyo bidi ne diumvuija. Diampa didi diumvuija mubidi mupuangane wa Yezu uvuaye mufile bua bualu buetu. Mvinyo udi umvuija mashi ende
BAMUE BATU BAMBA NE: “Bua kusungidibua, wewe itaba anu Yezu.”
-
Mmunyi muudi mua kubaleja bilondeshile Yone 3:16 ne Yakobo 2:17 ne: bidi bikengela kuenza malu makuabu?
TSHIA KUKUATA
Tudi tuleja dianyisha bua tshidi Yezu mutuenzele patudi tuleja ditabuja kudiye ne tubuela mu Tshivulukilu tshia lufu luende.
Diambulula
-
Kuleja ditabuja kudi Yezu kudi kumvuija tshinyi?
-
Wewe udi mua kuleja Yehowa ne Yezu dianyisha bua malu adibu bakuenzele mushindu kayi?
-
Bua tshinyi kubuela mu Tshivulukilu tshia lufu lua Kristo kudi ne mushinga wa bungi?
BIA KUTANGILA KABIDI
Lufu lua Kristo ludi lutusaka bua kuenza tshinyi?
Mona malu makuabu adi atangila ditabuja ne mutudi mua kudileja.
“Leja ditabuja mu milayi ya Yehowa” (Tshibumba tshia Nsentedi, 10/2016)
Bala tshiena-bualu tshia “Ndi ndimona mukezuke, ne muoyo, ne bu muntu mujima,” umone muakalengela nsombelu wa mamu kampanda pakamanyaye bualu bua mulambu wa Kristo.
“Bible utu ushintulula bantu” (Tshibumba tshia Nsentedi, 1/8/2011)
Bua tshinyi anu bantu bakese ke batu badia diampa ne banua mvinyo mu Tshivulukilu? Mona diandamuna.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
