Samwele Umbajinji 8:1-22
8 Samwele paadi ke mununu, watongele bandi bana bu batyibi ba Isalela.
2 Dijina dya wandi mwana umbedi i Yoela, ne dijina dya wandi mwana wa bubidi i Abidya;+ badi batyibi mu Bela-Sheba.
3 Ino bandi bana kebadipo banangila mu mashinda andi; badi balēmenene ku kukimbakimba tumweno twa budimbidimbi,+ badi betabija kutyibwa milomo,+ ne kunyengakanya boloke.+
4 Mwenda mafuku bakulumpe bonso ba Isalela bekongela pamo baiya kudi Samwele ku Lama.
5 Bamunena’mba: “Tala! Pano ubanunupa, ino bobe bana kebanangilangapo mu mashinda obe. Shi ke pano witutongele mulopwe wa kwitutyibila mambo mwikadile mizo mikwabo yonso.”+
6 Ino byafītyija Samwele mutyima* abo pa kunena’mba: “Witupe mulopwe wa kwitutyibila mambo.” Penepo Samwele walombela kudi Yehova,
7 Yehova nandi wanena Samwele amba: “Teja bintu byonso bikunena bantu; mwanda ke abepo obapela, ino i amiwa obapela kwikala mulopwe wabo.+
8 Baloñanga enka mobalongele tamba difuku dyonebatambije mu Edipito kufika ne dyalelo’di; bangilwanga’nka kungilwa+ bengidila’ko baleza bangi,+ kadi ye byobakulonga ne abe.
9 Shi ke pano wibateje. Inoko ufwaninwe kwibadyumuna na kusumininwa; wibalombole amba mulopwe wa kwibabikala ukekala na lupusa lwa kwibalomba bintu.”
10 Ebiya Samwele walombola bantu badi bamulomba mulopwe binenwa byonso bya Yehova.
11 Webanena’mba: “Mulopwe wa kwimubikala ukekala na lupusa lwa kwimulomba bino bintu:+ Ukayata benu bana bana-balume+ webatūla pa makalo+ andi ne kwibalamuna ke bandi ba kukanda pa tubalwe,+ bamo bakenda lubilo kumeso kwa makalo andi.
12 Uketongela aye mwine bamfumu ba tununu+ ne bamfumu ba makumi atano,+ kadi bantu bamo bakamudimina madimi,+ kumwangwila byakudya,+ ne kumupungila byabulwi ne bingidilwa bya ku makalo andi.+
13 Ukayata benu bana bana-bakaji ke ba kusobakanya māni a kwishinga,* ba kutēka, ne ba kusōka mikate.+
14 Ukayata madimi enu malumbuluke, madimi enu a mañanza, ne bitongo byenu bya impafu,+ kadi ukapa’byo bengidi bandi.
15 Ukayata kipindi kimo kya pa bipindi dikumi bya madimi enu a miseke ne madimi enu a mañanza ukapa’byo bengidi bandi ba bulēme ba mu kipango ne bengidi bandi.
16 Kadi ukayata bengidi benu bana-balume ne bana-bakaji, bimunanwa byenu bilumbuluke, ne benu bampunda ukebengidija ku mwingilo wandi.+
17 Ukayata kipindi kimo kya pa bipindi dikumi bya luombe lwenu,+ kadi nenu mukekala bengidi bandi.
18 Difuku dikāyanga’ko dyomukadila mwanda wa mulopwe omwetongēle banwe bene,+ ino Yehova kakemulondololapo mu dyadyo difuku.”
19 Ino bantu bapela kuteja byadi bibasapwila Samwele, kebanena’mba: “Kutupu, twi basumininwe kwikala na mulopwe wa kwitubikala.
20 Netu tukekala mwikadile mizo mikwabo yonso, kadi mulopwe wetu uketutyibila mambo ne kwituludika ne kulwa malwi etu.”
21 Samwele pa kupwa kuteja binenwa byonso byanenene bantu, webipituluka mu matwi a Yehova.
22 Yehova nandi wanena Samwele amba: “Wibateje, kadi tonga mulopwe wa kwibabikala.”+ Kupwa Samwele wanena bantu ba Isalela amba: “Muntu ne muntu ajokele ku kyabo kibundi.”
Kunshi kwa Dyani
^ Kishima pa kishima i, “byadi bibi mu meso a.”
^ Nansha’mba “ba kulonga māni a mwenye.”
