Samwele Umbajinji 15:1-35
15 Kupwa Samwele wanena Solo amba: “Yehova wantumine kukushinga māni bu mulopwe wa bantu bandi bene Isalela;+ pano ivwana binena Yehova.+
2 Yehova wa bibumbo wanena namino amba: ‘Nketa bene Amaleke beshintulwile pa byobalongele Isalela, pobebalwile kitatyi kyobadi mu dishinda bakanda kutamba mu Edipito.+
3 Shi ke pano, enda ukepaye bene Amaleke+ ne kwibonakanya fututu+ pamo ne byonso byobadi nabyo. Kufwaninwepo kwibapandija;* ufwaninwe kwibepaya,+ mwana-mulume ne mwana-mukaji, mwanuke ne mwana mutyetye, ñombe ne mukōko, ngamedia ne mpunda mwine kumo.’”+
4 Solo waityija bantu, webabala mu Telaime: kwadi basola ba lwa nshi 200 000 ne bana-balume ba Yuda 10 000.+
5 Solo walunguluka kufika ne ku kibundi kya Amaleke, wajikila dya ku musanza.*
6 Kupwa Solo wanena bene Kena+ amba: “Endai, talukai mu bukata mwa bene Amaleke, kutyina’mba nakemukombeleja pamo nabo.+ Mwanda mwalombwele buswe bwa ndamatyidile ku bantu bonso ba Isalela+ kitatyi kyobadi batamba mu Edipito.” Ponkapo bene Kena batamba mu bukata mwa Amaleke.
7 Kupwa Solo waipaya bene Amaleke+ kutamba ku Havila+ kufika ne ku Shula,+ udi kubwipi na Edipito.
8 Wakwata Akaka+ mulopwe wa Amaleke mūmi, ino bantu bakwabo bonso webonakanya fututu na kipete.+
9 Inoko Solo ne bantu bapandija* Akaka ne banyema balumbuluke mu mikōko, mu bañombe, mu banyema banune, mu mikōko milume, ne byonso biyampe.+ Kebasakilepo kwibyonakanya fututu. Ino bintu byonso bya bitupu ne byokebadipo basaka, ye byobaonakenye fututu.
10 Penepa kinenwa kya Yehova kyaiya kudi Samwele amba:
11 “Nealakanya* kine kyonabikikīle Solo bu mulopwe, mwanda waleka kunonda kadi kafikidijepo binenwa byami.”+ Samwele wajingwa mutyima bininge, wadidila’nka kudidila Yehova bufuku bonso butuntulu.+
12 Samwele pa kubūka lubanga mwanda wa kwitana na Solo, basapwila Samwele amba: “Solo waenda ku Kalamela,+ kadi kwine’kwa weshimikila’ko mulawalawa.+ Kupwa wavundamuka katūkila ku Ngilengale.”
13 Mfulo mfulō Samwele pa kufika kwaadi, Solo wamunena’mba: “Yehova akwesele dyese. Nafikidija kinenwa kya Yehova.”
14 Ino Samwele wanena’mba: “Penepo lunwa lwa mikōko longivwana mu matwi ami, ne lwa bañombe i lwa’ka?”+
15 Solo nandi wamutentulula’mba: “Baselelwe ku bene Amaleke, mwanda bantu bapandije* banyema balumbuluke mu mikōko ne bañombe mwanda wa kwibalambula kudi Yehova Leza obe; ino bikwabo byashele twebyonakenye fututu.”
16 Penepo Samwele wanena Solo amba: “Uba! Leka nkusapwile byaunombolanga Yehova bufuku’bu.”+ Nandi wamunena’mba: “Nena!”
17 Samwele wabweja’ko’mba: “Mwene powadi wimona abe mwine+ bu mutyetye ye powatūdilwe bu mutwe wa bisaka bya Isalela kadi ye pakushingile Yehova māni kodi mulopwe wa Isalela?+
18 Mwenda mafuku Yehova wakutumine mu mwingilo amba: ‘Enda, konakanye fututu bene Amaleke banonga-bibi.+ Lwá nabo enka ne byowibakuba.’+
19 Penepo mwanda waka kwakōkelepo diwi dya Yehova? Ino abe’ko wabotokela bitūtwa+ na makomwa-meso ne kulonga bibibibi ku meso a Yehova!”
20 Inoko Solo wanena Samwele amba: “Ami’ko nakōkele diwi dya Yehova! Naendele mu mwingilo wantumine’ko Yehova, kadi naiya na Akaka mulopwe wa Amaleke, ino naonakanya bene Amaleke fututu.+
21 Ino bantu baselele mu bitūtwa mikōko ne bañombe balumbuluke, mu boba badi bafwaninwe konakanibwa fututu, mwanda wa kwibalambula kudi Yehova Leza obe mu Ngilengale.”+
22 Kupwa Samwele wanena’mba: “Lelo Yehova usangelanga bininge byamulambu bisōkwe ne bitapwa+ kupita’ko kukōkela diwi dya Yehova? Tala! Kukōkela i kupite buya kitapwa,+ kadi kuta mutyima i kutabuke māni+ a mikōko milume;
23 mwanda butomboki+ budi pamo na bubi bwa lubuko,+ ne kwenda kumeso na ditatu* kudi pamo na kwingidija bukomo bwa majende ne butōtyi bwa bilezaleza.* Mwanda ubapele kinenwa kya Yehova,+ nandi wakupele kwikala bu mulopwe.”+
24 Ponkapo Solo wanena Samwele amba: “Napi mambo, mwanda najilula musoñanya wa Yehova ne binenwa byobe, ke-pantu natyinine bantu naivwana byobanenene.
25 Shi ke pano, nakwisāshila ndekele bubi bwami, joka pamo nami ñende nkevukwile ku meso a Yehova.”+
26 Ino Samwele wanena Solo amba: “Nkisapo kujoka pamo nobe, mwanda wapelele kinenwa kya Yehova, Yehova nandi wakupele, kukendelelapo kwikala mulopwe pa Isalela.”+
27 Samwele pa kwalamuka kaenda, Solo wamukwata ku milomo ya kotyi wandi wampikwa maboko, nandi wasanika.
28 Ponkapo Samwele wamunena’mba: “Yehova wasana bulopwe bwa Isalela kodi dyalelo, kadi usa kupa’bo umo wa mu bakwenu bana-balume ukutabukile abe.+
29 Ne kadi, Mulēmekibwe wa Isalela+ kakabepapo bubela+ nansha kushinta milangwe yandi,* mwanda Aye ke muntupo bitupu ubwanya kushinta milangwe yandi.”*+
30 Pa kino wanena’mba: “Napi mambo. Inoko nakwisāshila mpe bulēme ku meso a bakulumpe ba bantu bami ne ku meso a Isalela. Joka pamo nami, nkevukwile ku meso a Yehova Leza obe.”+
31 Ebiya Samwele wajokela kunyuma kwa Solo, Solo nandi wevukwila ku meso a Yehova.
32 Penepa Samwele wanena’mba: “Fwenyai Akaka mulopwe wa Amaleke kondi.” Kupwa Akaka waenda kwadi na mutyima kanyonga,* mwanda Akaka wadi unena mu mutyima’mba: ‘Na bubine kyaka* kya lufu kibapite.’
33 Ino Samwele wanena’mba: “Monka mwabudijije kipete kyobe bana-bakaji kwikala na bana, inobe nandi usa kubulwa bana kutabuka bana-bakaji.” Ponkapo Samwele waketa Akaka bipindibipindi ku meso a Yehova ku Ngilengale.+
34 Ebiya Samwele wajokela ku Lama, Solo nandi wakandila ku yandi njibo ku Ngibea wa Solo.
35 Samwele kemwenepo monka na Solo kufika ne difuku dyaafwile, mwanda Samwele wadi udila Solo.+ Kadi Yehova wealakenye kine kyaabikikīle Solo bu mulopwe pa Isalela.+
Kunshi kwa Dyani
^ Nansha’mba “kwibevwanina lusa.”
^ Nansha’mba “kinekaneka.”
^ Nansha’mba “baivwanina lusa.”
^ Nansha’mba “Natapwe ku mutyima pa.”
^ Nansha’mba “baivwanine lusa.”
^ Nansha’mba “na kibutakwe.”
^ Kishima pa kishima i, “bankishi ba batelafimi,” ko kunena’mba, baleza ba mu njibo; bilezaleza.”
^ Nansha’mba “kwialakanya.”
^ Nansha’mba “kwialakanya.”
^ Bibwanika padi i, “na kikulupiji.”
^ Kishima pa kishima i, “bululu.”
