Samwele Umbajinji 27:1-12
-
Davida wapebwa Zikelake na bene Fidishitia (1-12)
27 Ino Davida wanena mu mutyima wandi amba: “Difuku dimo nsa kufwa ku makasa a Solo. I kipite buya nyemene+ mu ntanda ya bene Fidishitia; penepa Solo ukaleka’byo kunkimba mu ntanda yonso ya Isalela,+ kadi nkapanda ku kuboko kwandi.”
2 Ebiya Davida wataluka pamo na bana-balume 600+ baadi nabo, bakandila kwa Akishi+ mwanā Maoke, mulopwe wa Ngata.
3 Davida washikata na Akishi mu Ngata, aye ne bantu bandi, muntu ne muntu na ba mu njibo yandi. Davida nandi wadi na bakaji bandi babidi, Ahinoame+ wa ku Yezelele ne Abikele+ mwine Kalamela, mukaji wa kishala wa Nabalu.
4 Pobasapwidile Solo amba Davida wanyemena ku Ngata, penepa waleka’byo kumukimba.+
5 Ebiya Davida wanena Akishi amba: “Shi ubantōkelwa mutyima, bampe’ko kifuko mu kibundi kimo kya mu ntanda, nshikate’mo. Le kishikatyila mwingidi obe pamo nobe mwipata i kika?”
6 Penepo Akishi wamupa Zikelake+ mu dine difuku’dya. O mwanda Zikelake i wa balopwe ba Yuda kufika ne dyalelo.
7 Bula bwa kitatyi* kyashikete Davida mu ntanda ya bene Fidishitia i mwaka umo ne myeji iná.+
8 Davida wadi ukanda na bantu bandi ukatamba’dyo bene Ngeshula,+ ne bene Ngileze, ne bene Amaleke,+ mwanda badi bashikatanga mu ntanda yadi tamba ku Telame kutūla ne ku Shula,+ kutūka kufika ne ku ntanda ya Edipito.
9 Davida paadi utamba ntanda bulwi, kadipo ulama muntu nansha umo mūmi,+ ekale mwana-mulume nansha mwana-mukaji, ino wadi usela mikōko, bañombe, bampunda, bangamedia, ne bivwalwa, kupwa wajokela kwa Akishi.
10 Ebiya Akishi wadi umwipangula’mba: “Le kowakatambañananga dyalelo i kwepi?” Davida wadi ulondolola’mba: “Dya kunshi* kwa Yuda”+ nansha’mba “Dya kunshi kwa bene Yelamele”+ nansha kadi amba “Dya kunshi kwa bene Kena.”+
11 Davida kadipo ushiya muntu nansha umo mūmi, ekale mwana-mulume nansha mwana-mukaji amba aselelwe ku Ngata, kanena’mba: “Kutyina’mba bakebalombola myanda yetu ne kunena’mba, ‘Bino byo byalongele Davida.’” (Muno mo mwaadi ulongelanga kitatyi kyonso kyaashikete mu ntanda ya bene Fidishitia.)
12 Enka nenki Akishi wakulupila Davida, kanena mu mutyima wandi amba: ‘Na bubine, waikala ke kintu kinunka bibi mu bantu bandi bene Isalela, nanshi usa kwikala nyeke mwingidi wami.’
